Cütlük, arxiv şəkli

Pandemiyadan sonra toy yas mərasimləri necə keçiriləcək?

1386
(Yenilənib 12:56 24.01.2021)
Bundan sonra 200-300 nəfəri bir məkana yığıb toy etməyə, mərasim evlərində yas mərasimləri keçirməyə lüzum qalmayacaq.

Zülfiyyə Quluyeva, Sputnik Azərbaycan

BAKI, 24 yanvar — Sputnik. Məşhur filmdə deyildiyi kimi, "xalqımın toy kimi gözəl adəti var, bu gözəl adətinə hörməti var". Koronavirus pandemiyası yayılandan isə bir xeyli adətimiz, o cümlədən də toy və yas mərasimlərimiz adət olmaqdan çıxaraq cərimə bəhanəsinə çevrilib. COVID-19 əleyhinə vaksinasiya başlayandan toyların və yas mərasimlərinin pandemiya qaydalarına uyğun keçiriləcəyi barədə məlumatlar dolaşır. Bəs görəsən, postpandemiya dövründə toy və yas mərasimlərinin əvvəlki qaydadan fərqli keçirilməsi əhalinin ürəyincədirmi? Elə bu suala cavab tapmaq üçün Sputnik Azərbaycan paytaxt sakinləri arasında sorğu keçirib.

Tərlan Hacıyev adlı paytaxt sakini bildirib ki, pandemiyadan sonra toyların dəbdəbədən uzaq keçirilməsinin tərəfdarı deyil: "Toyun şən keçməsi üçün qohum-əqraba, dost-tanış toyda iştirak etməlidir. Əgər 50 nəfərlə toy olacaqsa, elə ondansa gedib kəbin kəsdirib evlənmək daha yaxşıdır".

© Sputnik / Zulfiyya Guluyeva
Hacıyev Tərlan

Əli Bayramov isə toyların sadə keçirilməli olduğunu düşünür. Onun fikrincə, əsas gənclərin xoşbəxtliyidir: "Toy iki gəncin ailə həyatı qurmasının qeyd edilməsidir. Bunun üçün 200 nəfərlik məclis keçirməyə ehtiyac yoxdur. Yaxın qohum-əqrabanın iştirakı ilə də yola vermək olar".

© Sputnik / Zulfiyya Guluyeva
Bayramov Əli

Texniki Universitetin tələbəsi 21 yaşlı Sara Təhməzova isə dədə-baba qaydası ilə toy çalınmasa, böyük zalda bütün qohum-əqraba toplaşmasa, toy etməyin mənasız olduğunu düşünür: "Pandemiya, düşünürəm ki, müvəqqətidir. Toy isə insan həyatında bir dəfə baş verir. O günü yaddaqalan etmək lazımdır. Şəxsən mən pandemiyadır deyib, 30-40 nəfərin iştirakı ilə toy etmərəm. Gözləyərəm pandemiya bitsin, sonra toyumu edərəm. Mənim fikrimcə, bütün qızların arzusudur ki, toyu dəbdəbəli keçsin. Böyük zalda, bütün qohum-əqraba, rəfiqələrin iştirakı ilə toy olsun. İndi müğənnilərə də qadağa var. Amma gənc qızlar arzulayırlar ki, hansısa məşhur müğənni onun toyunda iştirak etsin. Bütün bu arzuların həyata keçirilmədiyi toyu məncə, hansısa gənc qız arzulamır. Mənim fikrimcə, toylarımız elə əvvəlki kimi keçirilməlidir".

© Sputnik / Zulfiyya Guluyeva
Təhməzova Sara

Şuşa istiqamətində döyüşdən qayıtmış dostlar Həbib Ağamalıyev və Məhəmməd Hüseynov da sorğumuzda iştirak etdilər. 24 yaşlı gənclər dost olsalar da, toy məsələsində fikirləri üst-üstə düşmür. 24 yaşlı Həbib Ağamalıyev deyir ki, nişanlı olduğundan müharibədən qayıdandan sonra pandemiya dövrünün qaydalarına uyğun evlənib: "Mənim fikrimcə, toylarımızla bağlı müəyyən adətlər dəyişməlidir. Sevdiyim qızla müharibədən sonra toysuz evləndik. Heç əvvəldən də biz elə dəbdəbəli toy etməyi düşünmürdük. İş elə gətirdi ki, əvvəl pandemiya, sonra da müharibəyə görə toyumuz təxirə düşdü. Ona görə də hər iki tərəfdən valideynlərin xeyir-duası ilə evləndik. Buna görə peşman da deyilik. Məncə, elə toylarımız yaxın qohumların iştirakı ilə yığcam keçirilsə yaxşıdır. Çox uzaq qohumların, hətta keçmiş qonşuların toya çağırılması artıq məsrəfdir".

Məhəmməd Hüseynov isə özünə çal-çağırlı toy etmək arzusundadır: "Pandemiyadan sonra toyların keçirilməsi niyə dəyişsin ki? Toyda qohum-əqraba, dost-tanış iştirak edər ki, şən keçsin. Beş-on nəfərlə toyun ləzzəti olmaz. Məncə, toylarımızda heç nəyi dəyişməməliyik. Gənclər bir-birinin imkanını nəzərə almalıdır. Amma qalan adətlərə dəymək olmaz!".

© Sputnik / Zulfiyya Guluyeva
Ağamalıyev Həbib (sağda) və Hüseynov Məhəmməd

Memarlıq və İnşaat Universitetinin 18 yaşlı ikinci kurs tələbəsi Gülçin İbrahimova isə əvvəlcə ailə qurmaq fikri olmadığından sorğumuzda iştirak etməkdən imtina etsə də, sonra öz fikirlərini söylədi: "Postpandemiya dövründə toylar fərqli keçirilməlidir. Çünki dövr dəyişib. İnsanlar artıq israfın gərəksiz olduğunu gördülər. Toya görə restoranlarda bahalı masa tutmağa ehtiyac yoxdur. Bəzən toy sahibi artıq xərcə düşür. Ondansa, düşünürəm, o pul ailə quran gənclərin ehtiyaclarına sərf oluna bilər. Təbii ki, bu, mənim fikrimdir. Mənim ətrafımda bunun tamamilə əksini düşünən qızlar var. Amma məncə, toy adətlərimizin dəyişməsinə ehtiyac var".

© Sputnik / Zulfiyya Guluyeva
İbrahimova Gülçin

Ömrünün 75-ci qışını yaşayan Aydın Məmmədov isə həm toy, həmçinin də yas mərasimlərinin dəyişməli olduğunu söyləyir: "Toylarımız tamamilə əndazəni aşıb. Yaslarımız da toy kimi keçirilir. Əzizini itirən insan bilmir acısını çəksin, bilmir ehsan dərdinə qalsın. Məncə, toylarımızın şən keçirilməsi üçün yaxın qohumlar iştirak etməlidirlər. Amma ölüyə üç, yeddi, cümə axşamı, 40 mərasimləri təşkil etməyə lüzum yoxdur. Quran oxutmaq kifayətdir".

© Sputnik / Zulfiyya Guluyeva
Aydın Məmmədov (solda)

Bakının Binəqədi sakini Esmira Nuriyeva isə yas mərasimlərinin təmtəraqlı keçirilməsinin İslam dininə zidd olduğunu söyləyir: "Keçmişdə kimin əzizi ölürdüsə, qonşular üç gün o evə yemək bişirib aparardılar ki, insan öz acısını çəksin. İndi əksinə, camaat yasa elə bil yemək yeməyə gedir. Ölü qalır bir qıraqda, onun yaxınları bazarlıq edib yemək hazırlayırlar. Yaslarımızla bağlı adətlər dəyişməlidir. Mənim fikrimcə, üç gündən sonra yas mərasimi keçirməyə ehtiyac yoxdur".

© Sputnik / Zulfiyya Guluyeva
Bakıda sorğu

Millət vəkili Fazil Mustafa isə postpandemiya dövründə həm toy, həmçinin də yas mərasimlərinin fərqli şəkildə keçirilməli olduğunu söyləyir. Deputat deyir ki, pandemiyadan əvvəlki xeyir və şər mərasimləri postpandemiya dövründə fərqli şəkildə təşkil edilməlidir: "Onsuz da virusa yoluxma riski baxımından toy və yas mərasimlərinin keçirilməsinə icazə verilsə belə, bu, məhdud sayla baş tutacaq. 200-300 nəfəri bir məkana yığıb toy etməyə, mərasim evlərində yas mərasimləri keçirməyə daha lüzum yoxdur. Düşünürəm ki, pandemiyadan sonra insanlar izafi xərclərə, israfçılığa yol verməyəcəklər. Həm toy, həmçinin də yas mərasimləri müəyyən çərçivələrə salınacaq. Əgər kimsə gözləyirsə onun toyu böyük sarayda dəbdəbəli şəkildə keçirilsin, onda gözləsin pandemiyanın tam bitməsini. Yas mərasimlərinə gəlincə, dəfndən sonrakı yas mərasimlərinin İslam dini ilə bağlı heç bir əlaqəsi yoxdur. Ona görə də postpandemiya dövründə yas və toyların keçirilməsi düşünürəm ki, daha sadə şəkildə olacaq".

1386
Teqlər:
COVID-19, Koronavirus, epidemiya, pandemiya, yas, toy adəti, toy
Qarabağda qəbiristanlıq, arxiv şəkli

Hərbçilər Şuşada Növrəsli qardaşlarının ulu babalarının qəbrini tapıblar- VİDEO

29
(Yenilənib 16:17 08.03.2021)
Öz yaradıcılıqları ilə Azərbaycanda məşhur olan qardaşlar bildirilbər ki, ilk fürsətdə dövrünün görkəmli şairi olmuş ulu babalarının qəbrini ziyarət edəcəklər.

BAKI, 8 mart — Sputnik. Azərbaycanlı hərbçilər Şuşada məşhur Azərbaycan şairi Mirzə Ələsgər Növrəsin qəbrini tapıblar. Növrəs öz yaradıcılıqları ilə məşhur olan azərbaycanlı qardaşların – Şahin, Tərlan, Nurlan və Arslan Növrəslilərin ulu babasıdır.

Bu barədə Sputnik Azərbaycan-a şair Tərlan Növrəsli məlumat verib. Onun sözlərinə görə, qardaşlar şokdadırlar və eyni zamanda şaddırlar ki, ulu babalarının qəbrindən nəsə qalıb.

"Şuşadakı bütün tarixi abidələr, o cümlədən də qəbirlər ermənilər tərəfindən vandalizmə məruz qalıb. Ona görə də bizim orada ulu babamız Mirzə Ələsgər Növrəsin qəbrini tapacağımıza ümidimiz demək olar ki, yox idi. Biz hazırda Şuşada xidmət çəkən hərbçilərimizə minnətdarıq. Onlar məşhur azərbaycanlıların dəfn edildiyi yeri tapıblar, daha doğrusu onlardan nələrinsə qaldığı yeri. Şuşa qəbiristanlığında şair Qasım bəy Zakirin qəbrini tapıblar, onun yanında da bizim ulu babamızın", - deyə Növrəsli bildirib.

Qardaşlar onu da bildiriblər ki, ilk fürsətdə ulu babalarının qəbrini ziyarət edəcəklər.

Mirzə Ələsgər bəy Kərbəlayı Abdin bəy oğlu Əhmədbəyov 1836-cu ildə Şuşa şəhərində anadan olub. Əslən Cavanşir-Dizaq mahalının Zərgər obasındandır. Mükəmməl mədrəsə təhsili almışdı. Şair idi. Növrəs təxəllüsü ilə xoştəb şeirlər yazırdı. Şuşada fəaliyyət göstərən "Məclisi-üns" şairlər yığıncağının üzvü idi. O, ərəb, fars dillərini kamil bilməklə yanaşı, rus dilini də tamam-kamal öyrənib qəza idarəsində kargüzar vəzifəsində çalışmışdı.

Mirzə Ələsgər Növrəs el şənliklərində toybaşı olardı. O, 1912-ci ildə vəfat edib. Onun dörd övladı olub. Qızı Fatimə bəyimi Xurşidbanu Natəvanın oğlu Seyid Həsənə ərə verib.

Mirzə Ələsgər Növrəs Xurşidbanu bəyim Natəvan, Seyid Əzim Şirvani və başqaları ilə yazışırdı.

© Photo : Courtesy of Tarlan Novrasli
Məşhur Azərbaycan şairi Mirzə Ələsgər Növrəsin qəbri

1872-ci ildə Mirzə Ələsgər Növrəs Azərbaycan şairəsi Xurşidbanu Natəvanın rəhbərlik etdiyi "Məclisi Üns" ədəbi dərnəyin fəal iştirakçılarından biri olub. O, həm də Mir Mövsüm Nəvvabın rəhbərlik etdiyi "Məclisi Fəramuşan"un daimi qonaqlarından olub. Bu məclislərə o dövrün ən görkəmli şairləri və musiqiçiləri toplaşıblar. Azərbaycan şairi və maarifçisi Seyid Əzim Şirvani zamanında Növrəsə şeirlə yazdığı məktubunda "Səlam olsun sənə, ey Kəbeyi-əhli-səfa, Növrəs" sözləri ilə Şamaxı ədəbi məktəbinin şairlərinin, "Səfa" cəmiyyətinin üzvlərinin onun yaradıcılığına hörmət və ehtiramını ifadə edib

1912-ci ildə vəfat edərkən o, Şuşada Qasım bəy Zakirin yanında dəfn edilib.

Onun adını daşıyan nəvəsi İqtisad Elmləri namizədi, dosent Növrəs Növrəslidir.

29
Pəncərə yanında adam, arxiv şəkli

Bakıda kişi intihar edib

5
(Yenilənib 16:17 08.03.2021)
Bakının Suraxanı rayonu, Hövsan qəsəbəsində 35 yaşlı kişi özünü çoxmərtəbəli binadan ataraq intihar edib.

BAKI, 8 mart - Sputnik. Bu gün Bakıda intihar hadisəsi baş verib.

Sputnik Azərbaycan “Report”a istinadən bildirir ki, Suraxanı rayonu, Hövsan qəsəbəsində 35 yaşlı Salman Fərmanov özünü çoxmərtəbəli binadan ataraq intihar edib.

Faktla bağlı Suraxanı Rayon Prokurorluğunda araşdırma aparılır.

5
Teqlər:
intihar, kişi, Bakı
Bəşər Əsəd, arxiv şəkli

Əsəd ailəsi koronavirusa yoluxdu

0
(Yenilənib 16:29 08.03.2021)
Suriyada koronavirus pandemiya elan olunandan (11.03.2020) indiyədək 15981 nəfər COVID-19-a yoluxub, 1063 nəfər vəfat edib

BAKI, 8 mart - Sputnik. Suriyanın prezidenti Bəşər Əsəd və xanımı Əsma Əsəd koronavirusa yoluxublar. 

Sputnik Azərbaycan bildirir ki, bu barədə Suriya prezidentinin dəftərxanası məlumat yayıb. 

"Prezident Əsəd və xanım Əsma Əsəd PCR test veriblər, nəticə müsbət olub", - məlumatda deyilir. 

Qeyd olunur ki, Bəşər Əsəd və xanımının vəziyyəti yaxşı, stabildir.

Suriyada koronavirus pandemiya elan olunandan (11.03.2020) indiyədək 15981 nəfər COVID-19-a yoluxub, 1063 nəfər vəfat edib. 4544 nəfər müalicə alır.   

0
Teqlər:
Koronavirus, Suriya, Əsma Əsəd, Bəşər Əsəd
Mövzu:
Yeni tip koronavirus pandemiyası