Bakıda Yeni il instalyasiyası, arxiv şəkli

Yeni il təxirə düşdü - 2020-ni "adına layiq" yola salacağıq

88
(Yenilənib 11:12 31.12.2020)
Nə bayram atəşfəşanlığı, nə də bayram süfrəsi – Qarabağ müharibəsində həlak olanların xatirəsi azərbaycanlılar üçün daha əzizdir

BAKI, 31 dekabr – Sputnik. Azərbaycan əhalisinin yarıdan çoxu Yeni il gecəsini bayram etməyəcək. Sputnik Azərbaycan bildirir ki, buna ölkədə son aylarda baş verən hadisələr səbəb olub.

Bakıda Şaxta baba, arxiv şəkli
© Sputnik / Murad Orujov

Qarabağ müharibəsində hərbçilərimizin, eləcə də dinc əhalinin şəhid olması səbəbindən vətəndaşlarımızın əksəriyyəti kütləvi bayramlaşmaqdan imtina edib. Bu qərarı rayonların icra hakimiyyətləri də dəstəkləyib. Məsələn, Sumqayıtda quraşdırılan yolkanı bir gün sonra söküblər.

Bakı İcra Hakimiyyəti də şəhid olan hərbçilərimizin xatirəsinə hörmət əlaməti olaraq şəhəri bəzəməmək qərarına gəlib. Dənizkənarı bulvarda bu il atəşfəşanlıq olmayacaq.

Sputnik Azərbaycan yeni ili necə qarşılayacaqlarına dair vətəndaşlarımız arasında sorğu keçirib.

Evdar xanım Lena Osmanova:

“Bu il süfrə açmayacam. Hər il bəzədiyimiz yolkanı bu il heç şkafdan çıxarmadıq. İki uşağım var və onlara bu hərəkətimi izah etməyə çalışıram. Qonşularımız dəfn olunmuş oğullarının ölümünə ağlayan zaman mən evimdə bayram edə bilmərəm”.

Təhsil eksperti Kamran Əsədov: “İki qızım var, biri birinci, digəri üçüncü sinifdə oxuyur. Onlardan biri rus dili dərsində “Yeni il” mövzusunu keçəndə mənə dedi ki, bu il yolka bəzəmək istəmir. Uşaqlar balaca olduğundan biz hər il dekabrın 15-dən sonra evi işıqlarla bəzəyir, yolka qurur, rəqs edir, xatirə şəkli çəkdirirdik. Bu il isə evdə bayramı əks etdirəcək heç bir atribut yoxdur”.

Əsədovun sözlərinə görə, Qarabağda şəhid olan 2823 insan arasında onun da qohumları var, buna görə də bayram eləmək niyyəti yoxdur.  

Bayram əhvalı Bakı şəhər Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədova da yaddır. Dekabrın 31-dən yanvarın 1-nə keçən gecə Əsədov növbədə olacaq, şəhərdə asayişə nəzarət edəcək. Polis polkovniki deyir ki, onun üçün bayram yol-nəqliyyat hadisələrinin olmamasıdır.

Milli Məclisin deputatı Məzahir Əfəndiyev bayram günlərində ailəsi ilə birlikdə olacaq.

“Hamı kimi qeyd edəcəyik. “Qeyd edəcəyik” sözü bir az düzgün deyil əslində. Təbii ki, ailəmizlə sakitcə yığışıb köhnə ili yola salacağıq. Ötən ildə maraqlı anlar çox oldu, ən əsası isə belə tarixi qələbə qazandıq. Təntənəli qeyd etməyəcəyik. Ev formatında, özünütəcrid şəraitində köhnə ili yola salacağıq”, - deputat deyib.

Bayram əhvalını COVID-19 pandemiyası da korlayır. Statistikaya görə, doqquz ay ərzində Azərbaycanda 2609 nəfər koronavirus infeksiyasından vəfat edib. 34.7 min nəfər isə xəstəxanalarda müalicə alır.

Bu səbəbdən ölkədə kütləvi bayram tədbirləri ləğv olunub. Hüquq-mühafizə orqanları hətta ezamiyyə vərəqələri olanlara rayonlara getməyi qadağan edib. Bəziləri bu qadağanı pozmağa çalışsa da polis restoratorları və otel sahiblərini əvvəlcədən xəbərdarlıq edib ki, bayram tədbiri təşkil edən böyük məbləğdə cərimələnəcək.

88
Teqlər:
şəhidlər, Qarabağ, Sumqayıt, Bakı, sorğu, bayram, Yeni il, Azərbaycan
Meşə yanğını, arxiv şəkli

Hirkanda yanğın: Azərbaycanın zəngin təbiəti məhv olmaqdadır

10
(Yenilənib 22:32 18.01.2021)
Əməliyyata, həmçinin, Fövqəladə Hallar Nazirliyi Aviasiya dəstəsinin "BE-200ÇS" tipli amfibiya təyyarəsi də cəlb edilib.

BAKI, 18 yanvar — Sputnik. Astara rayonu ərazisində Hirkan Milli Parkında baş vermiş yanğının söndürülməsi ilə əlaqədar Fövqəladə Hallar Nazirliyi tərəfindən operativ və təxirəsalınmaz tədbirlər davam etdirilir.

Bu barədə Sputnik Azərbaycan-a nazirlikdən məlumat verilib.

Bildirilib ki, yanğının söndürülməsinə relyefin mürəkkəbliyi və hava şəraitinin əlverişsizliyi ciddi maneə yaradır. Yanğının daha geniş sahəyə yayılması və Milli Parkın ərazisinə, ümumiyyətlə, ekologiyaya daha böyük ziyan vurmasının qarşısının alınması məqsədilə FHN-in qüvvələri tərəfindən zəruri tədbirlər davam etdirilir.

Bu gün yanğınsöndürmə əməliyyatına Fövqəladə Hallar Nazirliyinin Dövlət Yanğından Mühafizə Xidmətindən 44 nəfər şəxsi heyət, iki texnika, Mülki Müdafiə Qoşunlarından 28 nəfər şəxsi heyət, iki texnika, Xüsusi Riskli Xilasetmə Xidmətindən 31 nəfər şəxsi heyət, iki texnika, Cənub Regional Mərkəzindən 18 nəfər şəxsi heyət, iki texnika, eyni zamanda, Ekologiya və Təbii Sərvətlər Nazirliyinin 15 nəfər əməkdaşı cəlb olunub.

Əməliyyata, həmçinin, Fövqəladə Hallar Nazirliyi Aviasiya dəstəsinin "BE-200ÇS" tipli amfibiya təyyarəsi də cəlb edilib.

10
Bakıda günəşli hava, arxiv şəkli

Bu hava axırımıza çıxacaq - ekspertlərdən bədbin proqnoz

72
(Yenilənib 22:27 18.01.2021)
Umayra Tağıyevanın sözlərinə görə, soyuq hava cərəyanları ölkəyə daxil olmur, buna görə də havanın temperaturu çoxillik normadan 2 dərəcəyədək yüksəkdir.

İradə Cəlilova, Sputnik Azərbaycan

BAKI, 18 yanvar — Sputnik. "Yanvar ayının ilk günlərindən hava çox xoş keçir, mülayimdir. Külək müşahidə olunmur". Bu barədə Milli Hidrometeorologiya Xidmətinin rəisi Umayra Tağıyeva danışıb. O qeyd edib ki, soyuq hava cərəyanları ölkəyə daxil olmur, buna görə də havanın temperaturu çoxillik normadan 2 dərəcəyədək yüksəkdir.

Onun sözlərinə görə, son onilliklərdə iqlimdə istiləşmə gedir.

Belə ki, istiləşmə ölkə ərazisində qeyri-bərabər şəkildə paylanır. Bəzi bölgələrdə göstəricilər daha yüksəkdir, məsələn, 1.4 dərəcə. Bəzi bölgələrdə 0.8 dərəcə. Amma istiləşmə prosesi müşahidə olunur.

İqlimin istiləşməsi nəticəsində qış aylarında şaxtalı günlərin sayı əhəmiyyətli dərəcədə azalıb:

"Azalma varsa, yağıntılar artıq qar şəklində deyil, yağış şəklində düşür. Yağıntıların da miqdarında azalma qeydə alınır. Bu problem nəinki Azərbaycanda, bir çox ölkələrdə baş verir. Bu da iqlim dəyişmələrinin təzahürləridir".

Ekoloq Vaqif Əliyev Sputnik Azərbaycan-a açıqlamasında bildirib ki, iqlim dəyişmələri landşaft qurşaqlarının sərhədlərinin yuxarı irəliləməsinə, isti və mülayim qurşaqların sahəsinin genişlənməsinə, soyuq qurşaqlarının sahəsinin isə azalmasına gətirib çıxarır.

Mütəxəssisin sözlərinə görə, dünya üzrə iqlim dəyişmələrinə nəzarət üçün Kiota protokolunun müddəti bitsə də, hələ ki, arzuolunan nəticə əldə edilməyib:

"Hal-hazırda bu protokolun ardınca İqlim Dəyişmələrinə dair Paris çərçivə Konvensiyası bu işi davam etdirir. Bu konvensiyada hər bir ölkə istixana qazlarının emissiyasını azaltmaq üzrə öhdəçilik götürür. Azərbaycan da baza ili kimi 1990-cı ili seçərək 2030-cu ilədək istixana effektli qazların emissiyasını 35% azaltmağı hədəf götürüb"

Onun sözlərinə görə, iqlim dəyişmələri havaların istiləşməsi ilə nəticələnir. Bu səbəbdən adaptasiya tədbirlərinin görülməsi çox önəmlidir.

İqlim dəyişikliklərinin yaratdığı problemləri aradan qaldırmaq üçün quraqlığa davamlı yeni bitki növlərinin becərilməsi, əkin sahələri və su hövzələri boyunca su qoruyucu və tarla qoruyucu zolaqların salınması, suvarmada damcılı və yağış suvarma texnologiyalarının tətbiqi, su anbarlarının tikilməsi, sel və daşqınlara qarşı qoruyucu bəndlərin tikilməsi və s. qoruyucu tədbirlər görülməlidir.

V.Əliyev vurğulayıb ki, iqlim dəyişikliyi illərlə baş verən bir prosesdir. Məsələn, illərlə qar yağmır, külək olmur və birdən qar yağmağa, külək əsməyə başlayır. Abşeron yarımadasında külək, günəş, rütubət var. Burada günəşli günlərin sayı daha azdır və quru hava şəraiti daha çox olur.

Həkim terapevt Xatirə Əhmədovanın sözlərinə görə, havaların anomal keçməsi müxtəlif xəstəliklərin yayılmasına, xüsusilə də soyuqdəymə adlanan hala gətirib çıxarır.

Buna səbəb isə insanların bədən temperaturlarını tənzimləyə bilməmələri ilə əlaqədardır.

Onun sözlərinə görə, bədən tempraturu tez-tez dəyişdiyinə görə, immunitet zəifləyir. İmmunitet zəiflədiyi zaman xəstəliklərə yoluxma asanlaşır.

"Belə havalarda insan özünü halsız, yuxusuz, iştahsız hiss edir. Bu, uzun müddət davam edəndə immunitet zəifləyir və xəstəliyə tutulma riski artır" - deyən həkim belə havalarda havaya uyğun geyinməyi məsləhət görür.

Həkim əlavə edib ki, pandemiya dönəmi olduğu üçün insanlar sağlamlıqları ilə daha diqqətli davranmalıdır:

"Qidalanmaya, geyim tərzinə xüsusi diqqət yetirilməlidir. Qalın və ya nazik geyinmək olmaz. Özünüzü havaya uyğunlaşdırın. Qidalara gəldikdə isə vitaminlərlə zəngin qidalara - meyvə-tərəvəzə üstünlük verin. Məsələn, qaraciyər, yumurta, balıq, banan, portağal və s. qidalara rasionunuzda daha çox yer ayırın".

Mütəxəssislərə görə, anomal hava şəraitində daha çox tərləmədən qorunmaq lazımdır. Çünki bədən tərli ikən soyuqlama daha tez baş verir.

72
Avtomat və güllələlər, arxiv şəkli

Qazax sakinində silah aşkarlanıb

0
(Yenilənib 00:11 19.01.2021)
Götürülən maddi sübutlar müvafiq ekspertizaya təqdm edilib, faktlarla bağlı XPŞ-nin İstintaq Qrupunda cinayət işi başlanılıb, araşdırmalar davam etdirilir.

BAKI, 18 yanvar — Sputnik. Nəqliyyatda Baş Polis İdarəsinin Narkotiklərlə Mübarizə Şöbəsinin və Dəmir Yolu Nəqliyyatında Polis İdarəsinin Gəncə st. Xətt Polis Şöbəsinin (XPŞ) əməkdaşlarının daxil olan məlumat əsasında keçirdikləri əməliyyat-axtarış tədbirləri nəticəsində qanunsuz olaraq narkotik vasitə saxlamaqda və gəzdirməkdə şübhəli bilinən, Qazax şəhər sakini, Afiq Məmmədov XPŞ-yə gətirilib.

Sputnik Azərbaycan Daxili İşlər Nazirliyinin Mətbuat Xidmətinin Gəncə regional qrupundan verilən məlumata istinadla xəbər verir ki, onun üzərində şəxsi axtarış keçirilən zaman əlində olan, göy rəngli politelen torbanın içərisindən 455 qram narkotik vasitə olan qurudulmuş "marixuana" aşkar edilərək götürülüb.

Afiq Məmmədovun ətrafında keçirilən istintaq-əməliyyat tədbirləri nəticəsində onun Qazax şəhər ərazisindəki qəbirstanlıqda odlu silah gizlətməsi də məlum olub. Polis əməkdaşlarının həmin əraziyə keçirdiyi baxış zaman oradan bir ədəd istifadəyə yararlı "AKM-72" tipli avtomat və həmin avtomata aid 4 ədəd patron aşkar edilərək götürülüb.

Götürülən maddi sübutlar müvafiq ekspertizaya təqdm edilib, faktlarla bağlı XPŞ-nin İstintaq Qrupunda cinayət işi başlanılıb, araşdırmalar davam etdirilir.

0