Adil Rzayev

Şəhid anası işdən çıxarıldı? - ZİDDİYYƏT

33
(Yenilənib 16:18 18.12.2020)
"Katibə fabrikin direktoru Hidayət adlı şəxsin sözünü çatdıraraq bildirdi ki, ya işə gəlməliyəm, ya da ərizə yazıb çıxmalıyam" - Şəhid anası.

Nigar İsgəndərova, Sputnik Azərbaycan

BAKI, 18 dekabr — Sputnik. II Qarabağ müharibəsində qəhrəmancasına döyüşərək şəhid olan Adil Akif oğlu Rzayevin anası işdən çıxarılıb. Bu barədə Sputnik Azərbaycan-a şəhidin anası Məhbubə Hüseynova məlumat verib.

Ailənin 5-ci övladı olan Adillə əlaqə oktyabrın 10-da kəsilib. 21 yaşlı əsgərin axtarışlarına başlanılıb, öncə itkin olduğu deyilib, noyabrın 29-da isə ailəyə zəng vurub bildiriblər ki, Füzulidə bir şəhid var. Şəhidin kimliyinin müəyyənləşməsi üçün anadan Bakıda DNT analizi götürülür. Noyabrın 30-da ailənin sonbeşiyi Sumqayıtdakı Şəhidlər Xiyabanında dəfn edilib. Ailənin acı günləri bununla bitmir.

Hazırda Sumqayıt şəhərinin Hacı Zeynalabdin Tağıyev qəsəbəsi (Nasosnu), Kərim Kərimli küçəsində yaşayan ailənin maddi vəziyyəti getdikcə daha da pisləşir. Ana deyir ki, oğlu şəhid olandan sonra onlarla maraqlanan olmayıb. Hətta övladı şəhid olduğu üçün bir müddətdir ki, işə getməyən ana işdən də uzaqlaşdırılıb:

"Həyat yoldaşım dünyasını dəyişdikdən sonra dolanmaq üçün Sumqayıtdakı "Elat" quşçuluq fabrikində işə düzəldim, aşpaz işlədim. Oğlumun yeddisi çıxan kimi fabrikdən zəng vurub işə çıxmalı olduğumu dedilər. Heç üzümün cırığı, yarası sağalmamışdı, ona görə balamın 40-ı çıxana qədər onlardan möhlət istədim. Amma nə olsun, davamlı olaraq işdən mənə zəng edirdilər. Məcbur qalıb bacımla fabrikə getdik. Bacım katibəyə dedi ki, "O, şəhid anasıdır, imkan verin, 40 gün evdə qalsın".

"Katibə isə fabrikin direktoru Hidayət adlı şəxsin sözünü çatdıraraq bildirdi ki, ya işə gəlməliyəm, ya da ərizə yazıb çıxmalıyam. Bacım katibədən: "Bəs səlahiyyətli qurumlar bilirmi sizin şəhid anasını işdən çıxardığınızı, ona bir müddət möhlət vermədiyinizi bilirmi?" - deyə soruşanda cavabı bu oldu ki, "Bizə hökumətin sizin 40 gün işləməməyinizə icazə verməsi haqda kağız gətirin, onların icazəsi olsa, biz də sizə icazə verərik". Təsəvvür edin, oradakı işçilərdən biri yolda məni görüb deyir ki, "Sən keyimisən, hələ ayılmamısan. Şəhid anasına belə münasibətmi olar?! Bu, açıq-aşkar şəhid anasına qarşı hörmətsizlikdir". Bizə deyirlər ki, nazirlikdən kağız olmasa, işləyə bilməzsiniz", - deyə şəhid anası əlavə edir.

Ana işini itirməmək üçün nə qədər çalışsa da, cəhdləri nəticəsiz qalır, hətta oğlu şəhid olanadək işlədiyi 15 günün də maaşını ala bilmir. Pandemiya şəraiti isə ailənin digər üzvlərini də işsiz qoyub, günəmuzd işləyən oğulların da işi bir müddətdir ki, dayanıb.

© Photo : Courtesy of Mahbuba Guseynova
Şəhid Adil Rzayev

Bu dar gündə onlara yalnız qonşuları hayan olub, kommunal xərcləri qonşular tərəfindən ödənilir, qaldıqları şəraitsiz ev də onlara məxsus deyil, evin suyu, hamamı yoxdur:

"Yollarımız da bərbad gündədir. Şəhidimi gətirəndə bacım qəsəbənin icra nümayəndəliyinə gedib dedi ki, heç olmasa, yola bir neçə maşın qum səpilsin ki, şəhidi aparanda palçığa batmasınlar. Dedilər, qəsəbənin İnzibati Ərazi Dairəsi üzrə nümayəndəsi Lalə Hacıyeva məzuniyyətdədir. Onun səlahiyyətlərini müvəqqəti icra edən şəxs də deyib, cibimdən pul verəsi deyiləm, 1600 manat pul lazımdır bunun üçün".

Ailə ilə sonuncu dəfə Adilin 7-si olandan sonra əlaqə saxlanılıb və ona işləyəcəyi ilə bağlı heç nə deyilməyib.

Acınacaqlı durumda olan ailə onlara yardım olunması üçün aidiyyəti qurumlardan kömək istəyirlər.

Ailəyə yalnız dəfn mərasimində ərazi üzrə icra hakimiyyətindən baş çəkilib, yəni noyabrın 30-dan ailəni arayıb-axtaran yoxdur.

Məsələ ilə əlaqədar olaraq adıçəkilən şirkətin rəsmisi, mühasib Natiq Məmmədli ilə əlaqə saxladıq: "Xanım işdən çıxarılmayıb, sadəcə olaraq onu işə dəvət edərək deyiblər ki, nə zaman işə çıxacağını bildirsin. Qanunla danışaq, işdən çıxan bir işçinin adı necə portalda qala bilər?! İşçi işdən çıxarsa, adının portalda qalması özü bir cinayətdir. Sadəcə olaraq ona bildirilib ki, əgər işə çıxmayacaqsa, idarədə yemək bişməlidir, yerinə işçi götürülsün, yox, tezliklə çıxacaqsa, işçi götürülməsin. Xanımın hər gün maaşı hesablanıb və kartına oturub. İndi nə oldu, hamı azərbaycanlı oldu, biz erməni şirkəti?! Hazırda bizim 3 əsgərimiz var, onlardan yaralananlar da var, hansı ki, maaşları kartlarına oturur, günbəgün hesablanır. Bizim də şəhidimiz var, əslim Füzulidəndir".

"Xanımın maaşının hamısı kartına köçürülüb və işdən çıxma söhbəti də yoxdur. Sadəcə olaraq ona deyiblər ki, nə zaman istəsən, işə çıx, sadəcə olaraq özünə qapılma, gəl işə, başın qarışsın. Sonra da özü deyib ki, bəlkə, mən heç işə çıxmadım. Bir daha deyim ki, heç kəs onun maaşını kəsməyib, biz də azərbaycanlıyıq", - deyə adıçəkilən qurumun rəsmisi əlavə edib.

33
Teqlər:
, Sumqayıt, ana, şəhid

Təhsil naziri: "Öyrənmə motivasiya arasında çox böyük əlaqə var"

8
Emin Əmrullayev: "Mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır".

BAKI, 22 yanvar - Sputnik. Təhsil naziri Emin Əmrullayev pandemiya ilə əlaqədar şagirdlərin dərslərində bəzi geriləmələrin olması ilə bağlı səsləndirilən fikirlərə münasibət bildirib.

Xəzər Televiziyasında yayımlanan “Vaxt gəldi” proqramında nazir övladlarından birinin 1-ci sinfə getdiyini, digərinin isə məktəbəqədər yaşda olduğunu deyib. O, distant təhsilin problemlərindən bəhs edərkən deyib:  

“Distant təhsil və teledərslər öz-özlüyündə izləmə baxımından maraqlı prosesdir. Eyni zamanda bu, çox çağırışlı məsələdir, o mənada ki, problemlidir. Belə ki, avadanlıqdan istifadə və ya müxtəlif problemlər meydana çıxır. Misal olaraq, hava soyuq olanda işıqlar sönə bilər. Bunu uşağa izah etmək məsələsi var. Odur ki, mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır”.

Nazir ibtidai siniflərdə şagirdlərin sosial-psixoloji, sosial-emosional inkişafına fokuslaşmalı olduğumuzu da qeyd edib:

“Biz emosiyalara və ya hansısa gümanlara yox, faktlara, ölçmələrə, elmə inanmalıyıq. Hazırda bununla bağlı planlar var və bunlardan biri də şagirdlərin biliyinin qiymətləndirilməsinin aparılmasıdır. Təbii, şagirdlər də dərsə qayıtmalıdır ki, biz bunu edə bilək. Yaxud başqa formatlar da düşünə bilərik. İnandığım budur ki, fokuslanmalı olduğumuz məsələ, xüsusilə də ibtidai sinifdə şagirdlərin sosial-psixoloji, sosial-emosional inkişafıdır. Mənə görə məktəb insanın sosial emosional inkişafını irəli aparan yer olmalıdır. Çünki öyrənmə və motivasiya arasında çox böyük əlaqə var”.

8
Teqlər:
Azərbaycanın təhsil naziri, təhsil naziri, Emin Əmrullayev

Təhsil naziri şikayətləndi: Fikirlərim təhrif edilib, elə demək istəmirdim

59
(Yenilənib 23:16 22.01.2021)
Emin Əmrullayev: "Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir".

BAKI, 22 yanvar - Sputnik. "Öyrənmək məqsədli olmalıdır. Əgər valideyn övladı üçün hansısa öyrənmək imkanı yaratmaq istəyirsə, öyrənmənin məqsədlərini izah etməlidir. Bu həmçinin müəllim üçün də önəmlidir".

Sputnik Azərbaycan xəbər verir ki, bunu Təhsil naziri Emin Əmrullayev Xəzər Televiziyasında yayımlanan “Vaxt gəldi” proqramında çıxışı zamanı deyib.

Nazir bildirib ki, tədris prosesin məqsədi öyrənən adama məlum deyilsə, onun motivasiyası yoxdursa, yəqin ki, öyrənmə baş vermir:

"Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir. Uşaq da başa düşmür ki, hazırlığa və ya məktəbə nə üçün gedir. O, bunun niyəsini başa düşmürsə, ehtimal ki, öyrənmənin keyfiyyəti aşağı düşür".

"Mən bunu demək istəyirdim. Təəssüf, fikrim elə təqdim edildi ki, guya öyrənmək olmaz demişəm. Demək istədiyim odur ki, məqsədli öyrənmək başqa şeydir”, - deyə nazir əlavə edib.

59
Teqlər:
Emin Əmrullayev, Azərbaycanın təhsil naziri, təhsil naziri

Yanvarın 25-nə qədər ölkədə ictimai nəqliyyat işləməyəcək

0
(Yenilənib 00:11 23.01.2021)
Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

BAKI, 23 yanvar - Sputnik. Bu gündən yanvarın 25-i saat 06:00-dək bütün ölkə ərazisində ictimai nəqliyyatın fəaliyyəti dayandırılıb.

Sputnik Azərbaycan-ın məlumatına görə, Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

Bununla əlaqədar 23 yanvar saat 00:00-dan 25 yanvar saat 06:00-dək ölkə ərazisində ictimai nəqliyyat fəaliyyət göstərməyəcək.

Qeyd edək ki, Bakı metropolitenində də sərnişindaşıma dayandırılıb.

0