Tikinti

Vətəndaşların tikinti şirkətlərindən narazılığının qarşısını almaq lazımdır

93
E.Fərzəliyevin fikrincə, həyət evi olan əraziləri dövlət özü götürməli, sökməli və yeni binaların tikilməsinə qərar verməlidir. Bu zaman dövlət büdcəsi heç nə itirməyəcək. Əksinə, qazanacaq. Çünki hər bir vətəndaş tikinti şirkətindən çox dövlətə inanır.

İradə Cəlilova, Sputnik Azərbaycan

BAKI, 12 noyabr — Sputnik. Bir müddət öncə millət vəkili Asim Mollazadə tikinti şirkərtləri bağlı problemlərə toxunaraq bildirib ki, bəzi ərazilərdə vətəndaşların köçürülməsi ilə bağlı problemlər yaşanır.

Millət vəkili qeyd edib ki, tikinti şirkətləri bəzən öz üzərinə götürdüyü öhdəlikləri yerinə yetirmirlər.

Belə ki, layihə razılaşdırılır, sonradan isə layihə dəyişdirilir.

Onun sözlərinə görə, Nəsimi rayonu ərazisində 3 ildən artıqdır ki, tikinti dayanıb: "İnşa ərazilərindən kimlərisə köçürə bilmirlər. Məhkəmə prosesləri illərlə uzanır. Bu, vətəndaşların çox ciddi narazılığına səbəb olur. Bununla bağlı bir neçə dəfə Bakı şəhər rəhbərliyinə, rayon rəhbərliyinə müraciət etmişəm".

A.Mollazadə vurğulayıb ki, bu məsələ ilə bağlı qanunvericilikdə dəyişiklik olmalıdır.

Qanunvericiliyə dəyişiklik edilərək həm vətəndaşların mülkiyyət hüquqları müdafiə edilməli, həm də dövlətin həyata keçirdiyi layihələrin qarşısı alınmamalıdır.

Əmlak məsələləri üzrə ekspert Elnur Fərzəliyev Sputnik Azərbaycan-a açıqlamasında bildirib ki, bu məsələ son günlərin ən aktual məsələlərindəndir.

"Bəzi ərazilər var ki, evlərin kvadratı az olsa da, insanlar buna öyrəşib. Məsələn "Sovetski", "Papanin" kimi ərazilərdə insanlar kiçik ərazilərdə 2-3 otaq düzəldib yaşayırlar. Bu gün hansısa tikinti şirkəti həmin ərazilərdə yaşayan insanlara yaşadıqları evin kvadratına 1000-1500 manat pul təklif edir. Ancaq bu pul insanları qane etmir. Çünki həmin şəxslər şəhərin mərkəzində yaşayır və öz yaşayışlarını həmin kiçik evlərə artıq sığışdırıblar. Onlara verilən 50-60 min pulla məcburdur ki, şəhərdən kənara Xırdalana, Binəqədiyə və s. çıxıb ev alsın. Ancaq bu insanların işi, övladlarının oxuduğu məktəb, qısacası həyatı şəhərə görə uyğunlaşdırılıb. Belə insanları nəzərə almaq lazımdır", - deyən ekspert vurğulayıb ki, söhbət bu insanların şəhərdə mənzillə təmin edilməsindən gedir.

Ekspert qeyd edib ki, bu günə qədər çox mənzillər olub ki, vətəndaşın razılığı olmadan sökülüb. Bununla bağlı məhkəmələrdə kifayət qədər iş var.

Bu isə problemin həlli deyil.

"Bəzən elə olur ki, binalar sökülür, yenisi tikilir və vətəndaşlar yeni tikilən binaya yerləşdirilir. Lakin vətəndaşlar yenə narazı qalır. Səbəb isə odur ki, layihələr yaxşı olmur. Məqsəd sadəcə vətəndaşı yerləşdirmək olduğu üçün binalar yaxşı tikilmir. Yəni belə tikinti problemləri saysızdır", - deyən E.Fərzəliyev bildirib ki, bununla bağlı qanunvericilikdə dəyişikliklər edilməlidir. Çünki şəhərin mərkəzində elə kiçik evlər var ki, sovet dövründən qalmasına baxmayaraq, onların çıxarışı yoxdur.

Belə ki, bəzi mülk sahiblərinin torpaq sahəsi olmasına baxmayaraq, tikinti şirkətləri ancaq evə görə pul verir. Halbuki, həmin ərazilərdə torpağın sotu çox baha olur. Bu kimi hallar vətəndaşların hüquqlarının pozulmasına səbəb olur.

Buna görə də dövlət birbaşa özü bu problemin həlli ilə məşğul olmalıdır. Tikinti şirkətlərinə icazələrin verilməsi şəhərin arxitekturasına da xələl gətirir.

"Təsəvvür edin ki, iki bina tikilir, arasında bir həyət evi qalır. Sakin razılaşmadığı üçün tikinti şirkəti ona əhəmiyyət vermədən öz işini görür", - deyən ekspert hesab edir ki, bu kimi hallarda dövlət özü dövriyyəyə keçməlidir.

E.Fərzəliyevin fikrincə, həyət evi olan əraziləri dövlət özü götürməli, sökməli və yeni binaların tikilməsinə qərar verməlidir. Bu zaman dövlət büdcəsi heç nə itirməyəcək. Əksinə, qazanacaq. Çünki hər bir vətəndaş tikinti şirkətindən çox dövlətə inanır.

Ekspert vurğulayıb ki, bu məsələ ilə bağlı qanun layihəsi hazırlanmalıdır.

"Tikinti şirkəti hər hansı bir tikinti ilə məşğul olan zaman özü üçün öhdəlik götürür ki, məsələn, 2 ilə binanı təhvil verəcək. Ancaq hansısa vətəndaşın razılaşmaması tikinti şirkətləri ilə vətəndaşları qarşı-qarşıya qoyur. Gələcəkdə bu kimi halların qarşının alınması üçün dövlət özü bu işlə məşğul olmalıdır", - o əlavə edib.

93

Qarabağdakı hava limanları ICAO reyestrinə daxil ediləcək

2
Hava limanlarının kodları ICAO-nun 7910/178 nömrəli Sənədinin 2020-ci ilin dekabr ayında dərc olunacaq yenilənmiş nəşrinə əlavə ediləcək.

 

BAKI, 25 noyabr — Sputnik. Beynəlxalq Mülki Aviasiya Təşkilatı (ICAO) Azərbaycanın daha 6 hava limanının beynəlxalq məkan indeksləri kataloquna daxil edilməsini təsdiq edib.

Sputnik Azərbaycan bu barədə "Azərbaycan Hava Yolları" QSC-yə (AZAL) istinadən xəbər verir.

“Əlamətdar haldır ki, beynəlxalq təşkilatın yenilənmiş reyestrinə Zabrat, Yevlax və Naftalandakı hava limanları ilə yanaşı, həm də Ali Baş Komandan, Prezident İlham Əliyevin rəhbərliyi altında azad edilmiş ərazilərdə - Ağdam, Füzuli və Xankəndində yerləşən hava limanları da daxil olacaq. Bu, beynəlxalq aviasiya qurumlarının ölkəmizin ərazi bütövlüyünü tanımasının növbəti təzahürüdür”, – deyə AZAL-ın prezidenti Cahangir Əsgərov bildirib.

Qeyd edilən hava limanlarının kodları ICAO-nun 7910/178 nömrəli Sənədinin 2020-ci ilin dekabr ayında dərc olunacaq yenilənmiş nəşrinə əlavə ediləcək.

Azərbaycanın beynəlxalq səviyyədə tanınmış sərhədləri daxilində aeronaviqasiya xidmətinə görə məsuliyyət Çikaqo konvensiyasının (ICAO-nin 7300 nömrəli sənədi) prinsiplərinə uyğun olaraq, AZANS Hava Hərəkəti İdarəsinə həvalə edilib. Bu məsuliyyət hədləri ICAO Şurası tərəfindən təsdiq edilib və Azərbaycanın suveren ərazilərinə müvafiqdir.

Qeyd etmək lazımdır ki, ICAO Azərbaycanın öz ərazisi üzərindəki hava məkanında mütləq suverenliyini dəfələrlə təsdiq və qeyd edib.

Məkanın işarələri 7910/178 nömrəli Sənədin müddəalarına müvafiq olması məqsədilə ICAO tərəfindən yoxlanılır. Rüblük sənədə dəyişikliklər yalnız müvafiq qaydada nəzərdən keçirildikdən sonra daxil edilir.

Qeyd etməliyik ki, işğal edilmiş ərazilər üzərində hava məkanı təxminən 30 il müddətində beynəlxalq uçuşlar üçün bağlı olub. Həmin ərazidəki mülki aviasiya infrastukturu ciddi şəkildə zərər çəkmiş və tam dağılmış vəziyyətə gətirilib.

Beynəlxalq uçuşların həyata keçirilməsi məqsədilə, uzun illər Ermənistan işğalı altında qalan ərazilər üzərində aeronaviqasiya təminatının bərpa edilməsi üzrə işlər yerinə yetiriləcəkdir. Bütün bunlar mülki aviasiyanın təkcə regional səviyyədə deyil, həm də qlobal miqyasda inkişaf etməsinə kömək edəcək.

2
Teqlər:
Xocalı hava limanı, hava limanı, AZAL
Koronavirus testi, arxiv şəkli

Azərbaycanda son sutkada 3469 nəfər COVID-19-a yoluxub

10
Son sutka ərzində yeni yoluxma hallarının müəyyənləşdirilməsi ilə əlaqədar 15 057, ötən müddət ərzində isə ümumilikdə 1 646 654 test aparılıb. 

BAKI, 25 noyabr - Sputnik. Azərbaycan Respublikasında koronavirus (COVID-19) infeksiyasına 3469 yeni yoluxma faktı qeydə alınıb, 1229 nəfər müalicə olunaraq sağalıb və evə buraxılıb.

Nazirlər Kabineti yanında Operativ Qərargahdan Sputnik Azərbaycan-a verilən məlumata görə, COVID-19 üçün götürülən analiz nümunələri müsbət çıxmış 30 nəfər vəfat edib.

İndiyədək ölkədə ümumilikdə 102 396 nəfərin koronavirus infeksiyasına yoluxması faktı müəyyən edilib, onlardan 66 963 nəfər müalicə olunaraq sağalıb, 1 224 nəfər vəfat edib, aktiv xəstə sayı 34 209 nəfərdir.

Son sutka ərzində yeni yoluxma hallarının müəyyənləşdirilməsi ilə əlaqədar 15 057, ötən müddət ərzində isə ümumilikdə 1 646 654 test aparılıb. 

10
Teqlər:
Azərbaycan, test, Koronavirus, COVID-19, yoluxma
Xəritə, arxiv şəkli

Tsakurinin Hünərli, Quşçubabanın isə Baharlı adlandırılması təsdiqlənib

0
(Yenilənib 19:06 25.11.2020)
Prezident "Azərbaycan Respublikasının Xocavənd rayonunun Tsakuri kəndinin Hünərli kəndi adlandırılması haqqında" qanunu təsdiq edib.

BAKI, 25 noyabr — Sputnik. Prezident İlham Əliyev "Azərbaycan Respublikasının Xocalı rayonunun Quşçubaba kəndinin Baharlı kəndi adlandırılması haqqında" qanunu təsdiq edib.

Sputnik Azərbaycan-ın məlumatına görə, qanuna əsasən, Azərbaycan Respublikasının Xocalı rayonunun Qarabulaq kənd inzibati ərazi dairəsi tərkibindəki Quşçubaba kəndi Baharlı kəndi adlandırılıb.

Prezident İlham Əliyev həmçinin "Azərbaycan Respublikasının Xocavənd rayonunun Tsakuri kəndinin Hünərli kəndi adlandırılması haqqında" qanunu təsdiq edib.

Qanuna əsasən, Azərbaycan Respublikasının Xocavənd rayonunun Çiraquz kənd inzibati ərazi dairəsi tərkibindəki Tsakuri kəndi Hünərli kəndi adlandırılıb.

0
Teqlər:
təsdiq, qanun, Xocavənd, Xocalı