Söküntü işləri, arxiv şəkli

Bir qərarın verilməsi digərini ləğv etdi, amma olan vətəndaşa oldu

458
(Yenilənib 17:50 10.11.2020)
"Bu kimi problemlər kütləviləşdiyindən 2019-cu ildən sərəncamların verilməsi Bakı Şəhər İcra Hakimiyyətindən alınaraq, Arxitektura Komitəsinə verildi".

İradə Cəlilova, Sputnik Azərbaycan

BAKI, 10 noyabr — Sputnik. 2016-cı ildə Nazirlər Kabinetinin 86 saylı qərarından sonra paytaxtın rayonlarında söküntü bumu başladı. Qərara görə, rayonların ərazilərində qəzalı vəziyyətdə olan, istismar müddəti başa çatmış tikintilər sökülməli və yenisi ilə əvəz edilməli idi. Lakin belə bir qərarın verilməsi ilə başlayan söküntü işləri bir müddət sonra sakinlərin narazılığına səbəb oldu. Rayon icra hakimiyyətləri tərəfindən müəyyən edilmiş tikinti şirkətləri bəzən vətəndaşlarla razılığa gəlmir və söküntünün qanuni olduğunu iddia edərək, icra edirdi.

Şəhid evi
© AR Ministry of Labour and Social Protection of the Population

Həmin dövrdə şikayətlər daha çox Nəsimi rayonu ərazisində idi. Sputnik Azərbaycan dəfələrlə bu rayon ərazisində olan problemləri işıqlandırmışdı.

Ancaq ötən il dekabrdan Nazirlər Kabinetinin 482 saylı qərarı ləğv edildi. Və yeni qərara əsasən, Bakı şəhərinin Sabunçu, Binəqədi, Qaradağ, Suraxanı, Nəsimi, Xətai, Nərimanov Rayon İcra Hakimiyyəti, Nizami, Yasamal, Səbail, Pirallahı və Xəzər Rayon İcra Hakimiyyətləri ərazisində 2018-ci il avqustun 1-dək tikintiyə icazə icraatı başlanılan və ya layihələndirilməsi barəsində sərəncam qəbul edilmiş tikinti layihələrinə münasibətdə mülki və mənzil qanunvericiliklərinin tələblərinə əməl etməklə tikintini həyata keçirməlidirlər.

Əmlak məsələləri üzrə ekspert Elnur Azadovun sözlərinə görə, Nazirlər Kabinetinin 86 saylı qərarı ilə rayonlar üzrə istismar müddəti bitmiş, fiziki aşınmış, yol kənarında uyğun olmayan şəkildə tikilmiş, qəzalı binaların sökülərək, yeniləri ilə əvəz edilməsi müəyyən edildi.

"Köhnə binaların sökülməsi ilə bağlı verilən qərarın müsbət və mənfi tərəfləri oldu. Müsbət tərəfi ondan ibarət idi ki, qəzalı binalarda yaşayan vətəndaşlar binalarının sökülməsini səbrsizliklə gözləyirdilər. Çünki istismar müddəti bitmiş evlərin içinin, çölünün durumu, kommunikasiya xətlərinin vəziyyəti bəllidir", - deyən ekspert vurğulayıb ki, köhnə ikiotaqlı mənzilin qiyməti 100.000 manat idisə, yerində yeni tikilən binalarda isə 150.000 manat olur. Bu da vətəndaşa hərtərəfli sərf edirdi.

Ekspertin sözlərinə görə, qəzalı binaların sökülərək yenisi ilə əvəz edilməsini bəziləri ədalətsizlik kimi də qiymətləndirirdilər: "Tutaq ki, ikiotaqlı evdə iki ailə yaşayır. Yeni tikiliyə köçürüləndə deyirlər ki, biz iki ailəyik, hər ailəyə ikiotaqlı ev verin. Amma vətəndaşlar nəzərə almırlar ki, tikinti şirkəti o binanı sökməsəydi, yenə də vətəndaş o köhnə tikilidə yaşayacaqdı.

Tikinti şirkətləri çalışır ki, öz pullarına daha çox qənaət etsinlər. Sadəcə, bu mexanizm dövlət tərəfindən daha çox təkmilləşməli idi. Bu kimi problemlər kütləviləşdiyindən 2019-cu ildən sərəncamların verilməsi Bakı Şəhər İcra Hakimiyyətindən alınaraq, Arxitektura Komitəsinə verildi", - deyə o əlavə edib.

E.Azadov vurğulayıb ki, komitənin tikinti ilə bağlı normativləri olduqca sərtdir.

Belə ki, əgər əvvəllər 1 hektar torpaq ərazisində 50.000 kv metr inşa olunurdusa, onların normativi ilə bu rəqəm 14.000 kv metr oldu: "Bu yaxınlarda Nazirlər Kabinetinin təsdiq etdiyi qərara əsasən, 27-28 min kvadratmetrə qaldırıldı. Yəni əvvəlkindən 2 dəfə az oldu. Bu isə qiymətin artmasına səbəb olur. Qiymət artdıqca alıcılıq qabiliyyəti azalır, tikinti şirkətlərinin marağı azalır".

Ekspert hesab edir ki, tikinti normativləri məsələsinə yenidən baxılmalıdır.

458
Teqlər:
vətəndaşlar, mənzil, bina, "söküntü bumu", söküntü, tikinti

Topçu Vüsal məsələsində son nöqtə qoyuldu - "Məqsədimiz..."

10
"Az-Granata" MMC-nin PR meneceri: "Bu şəkilin seçilməsində məqsəd Azərbaycan Ordusunun mərdliyini, cəsarətini nümayiş etdirmək idi".

Zülfiyyə Quluyeva, Sputnik Azərbaycan

BAKI, 30 noyabr — Sputnik. Vətən müharibəsinin qəhrəmanlarından olan topçu Vüsal Şahkərimovu məşhurlaşdıran fotonun spirtli içki şüşəsinin üzərinə vurulması sosial şəbəkələrdə birmənalı qarşılanmayıb. İctimaiyyətdə qəhrəman topçunun şəklinin spirtli içki şüşəsində əks olunması geniş narazılığa səbəb olub. Əsgərin atası İslam Şahkərimov bildirib ki, şərab istehsalçılarına şifahi şəkildə razılıq verib: "Bir az əvvəl həmin adamlar yenə mənə zəng etmişdilər. Dedilər ki, Vüsal özü bu məsələyə nə deyir, əsas odur. Mən də belə düşünürəm ki, razılıq verməklə səhv etmişəm. Görürəm ki, camaatdan da xeyli narazılıq var. Elə az əvvəl Vüsalla da danışdım. Dedi ki, fotomun içki şüşəsinin üstünə vurulmasına etiraz edirəm".

"Az-Granata" MMC-nin PR meneceri Ülvi Günəşli Sputnik Azərbaycan-a açıqlamasında bildirib ki, artıq topçu Vüsal Şahkərimovla bağlı məsələ bağlanıb: "Qeyd edim ki, üzərində topçu Vüsal Şahkərimovun şəkli olan spirtli içki istehsala verilməmişdi. Sadəcə olaraq bu barədə məlumat paylaşılmışdı. "Az-Granata" MMC Vüsalın valideyni ilə danışaraq həm şifahi, həmçinin də rəsmi razılığını almışdı. Sadəcə olaraq bu məsələdə ictimaiyyətin fikrini nəzərə aldıq. Həmçinin topçumuz özü də şəklinin spirtli içki şüşəsində olmasına razı olmayıb. Biz də bütün bunları nəzərə alaraq bu məsələni qapatdıq".

Ü.Günəşli iddia edir ki, əslində bu məsələdə şirkətin məqsədi tamamilə başqa olub: "Bizim fikrimiz ictimaiyyətə düzgün çatdırılmadı. Şirkətimiz Vüsalın şəklinin vurulduğu kitabların çapına da sponsorluq etmək niyyətində idi. Bizim qədim tarixi adları daşıyan məhsullarımız var. Həmin məhsullar gələn qonaqlara təqdim edildikdə tariximizlə bağlı məlumatlar da verilir. Bizim üzərində topçu olan spirtli içkini bir dəfə istehsal etmək fikrimiz vardı. Bu şəkilin seçilməsində məqsəd Azərbaycan Ordusunun mərdliyini, cəsarətini nümayiş etdirmək idi".

Qeyd edək ki, əslən Xaçmaz rayonundan olan 19 yaşlı topçu Vüsal Şahkərimov Vətən müharibəsinin minlərlə qəhrəmanından biridir.

10

Azərbaycanda minaların partlaması nəticəsində 535 mülki şəxs ölüb

2
Əhmədov qeyd edib ki, Agentlik tərəfindən vətəndaşların təhlükəli, naməlum əşyalara, hərbi sursatlara və qurğulara toxunmamaları ilə bağlı maarifləndirmə işləri aparılır.

BAKI, 30 noyabr — Sputnik. 1999-2020-ci illər ərzində Azərbaycanda minaların partlaması nəticəsində 535 nəfər mülki şəxs həlak olub, 2418 nəfər yaralanıb.

Sputnik Azərbaycan xəbər verir ki, bunu Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) direktoru Qəzənfər Əhmədov deyib.

O qeyd edib ki, Agentlik tərəfindən vətəndaşların təhlükəli, naməlum əşyalara, hərbi sursatlara və qurğulara toxunmamaları ilə bağlı maarifləndirmə işləri aparılır.

Q.Əhmədov qeyd edib ki, bununla bağlı vətəndaşların rayon polis idarəsinə və icra hakimiyyətinə məlumat vermələri xahiş olunur.

2