İlqamət Hadiyevin əl işləri

İmzayla başladı, bayraqla davam edir - Azərbaycanlı xalçaçı dünyanı evinə "yığmaq" istəyir

89
(Yenilənib 10:16 08.11.2020)
Hər bir vətəndaşımızın öz evində bizim dövlət bayrağımızın olmasını istəməsini başa düşürəm, ona görə də heç vaxt qiymət demirəm

Rahim Muradov, Sputnik Azərbaycan

BAKI, 8 noyabr — Sputnik. İxtisasca iqtisadçı olan və hal-hazırda 24 saylı Regional Xəzinədarlıq İdarəsinin aparıcı məsləhətçisi işləyən Lerik rayon sakini İlqamət Hadiyevin digər sənəti xalça toxumaqdır. İlqamət Hadiyev Sputnik Azərbaycan-a xalçaçı ailəsində anadan olduğunu və anasının xalçaçılıq sexində çalışdığını bildirdi.

- Ailəmizdə uşaq çox olduğundan anama dəzgahları evə gətirib xalçanı evdə toxumağa icazə verirdilər. İlk dəfə xalça ilə 4-cü sinifdə oxuduğum zaman tanışlığım olub. Doğulduğum Mondigah kəndində subay qızlar öz cehizlik xalçalarını özləri toxuyardılar. Qonşu qız-gəlinlər gəlib köməklik edərdilər. Xalça toxumağı bacarmayanlar isə toxuyanlara xidmət edərdilər. Xalçanın kəsilməsi xüsusi ritual olub, bayram əhval-ruhiyyəsilə keçirilib. Belə ki, xalça kəsilərkən xalça evin ortasına sərilər, çay süfrəsi salınar və gələn qonşu qız-gəlinlər özlərilə şirniyyat gətirərdilər. Bu da xalçanın şirnisi adlanardı. Təəssüf ki, indi belə adət-ənənələr yoxdur.

© Sputnik / Rahim Murad
İlqamət Hadiyev

- İlqamət müəllim, bəs nəyə görə məhz miniatür xalça toxumağı seçdiniz?

- Düzünü desəm, bunu biznes ideyası kimi fikirləşmişdim və o, uğurlu alındı. Toxuduğum miniatür bayraq xalçaları arasında ən çox Azərbaycan bayrağı üstünlük təşkil edir və bayrağımıza tələbat çoxdur. Hər bir vətəndaşımızın öz evində bizim dövlət bayrağımızın olmasını istəməsini başa düşürəm, ona görə də heç vaxt qiymət demirəm. Deyim ki, 100 ədəd Azərbaycan bayrağı miniatür xalçasını satmışamsa, bir o qədər də hədiyyə etmişəm. Nəzərə alsaq ki, əl işi, miniatür suvenir xalçaları heç bir vergiyə cəlb olunmur, çox uğurlu biznes layihədir. Beləcə, mən miniatür xalçalar toxumağa başladım. İlk toxuduğum miniatür xalça ümummilli lider Heydər Əliyevin imzasıdır. Ondan sonra isə Azərbaycan Respublikasının Dövlət gerbini, Azərbaycan Respublikasının bayrağını miniatür xalça formasında toxudum.

- Bayraq xalçalarını sifariş əsasında toxuyursunuz, yoxsa sadəcə satış üçün toxuyursunuz?

- Bildiyimiz kimi, rayonumuz turistik bölgədədir. Odur ki, hansı ölkələrdən qonaqlar gələcəksə, həmin ölkələrə aid miniatür xalça bayraqlar qabaqcadan sifariş edilir və onları hazırlayıb sifarişçilərə satıram. Ayrıca bir fikrim var ki, bütün dünya ölkələrinin bayraqlarını toxuyum. Hazırda burada 25-ə yaxın ölkənin bayraqları var, bəziləri isə tematik xalçalardır.

© Sputnik / Rahim Murad
İlqamət Hadiyevin əl işləri

- Bir miniatür xalçanı toxumağa nə qədər vaxt sərf edirsiniz?

- Dünya dövlətlərinin bayraqları olan xalçaların toxunmasına 2-3 gün vaxt sərf olunur. Nəzərə alaq ki, bu mənim peşəm deyil, hobbimdir. İşdən sonra yorğunluğumu bununla atıram. Hər gün 2-3 saat vaxt sərf edirəm. Toxuduğum xırda milli ornamentli xalçaya isə 3 ay vaxt sərf eləmişəm. Bir çində 109 ilmə var, maksimum bir gün ərzində müntəzəm otursam, 10 çindən artıq ilmə vurmaq olmur. Fiziki cəhətdən həm göz yorulur, bir çindən sonra günəşə çıxdıqda adamın gözü qamaşır, yaşarır.

 - Gələcəkdə miniatür portret xalça toxumaq fikriniz varmı?

- Miniatür xalça üzərində portret işləmək çox çətindir. Gələcəkdə belə bir fikrim var, inşallah, miniatür xalça üzərində bir portret toxuyaram. Bu günə kimi belə bir sifariş olmayıb, amma özüm ümummilli liderimizin portretini toxumaq istəyirəm.

© Sputnik / Rahim Murad
İlqamət Hadiyev

- Əl işlərinizdən ibarət sərginiz təşkil olunubmu və ya hər-hansı bir sərgidə öz əl işlərinizlə çıxış edibsinizmi?

- Bir neçə sərgidə iştirak eləmişəm. 2017-ci ildə isə Lerik Dövlət Rəsm Qalereyasında mənim rəsmi sərgim təşkil edilib. Daha sonra Lerik Rayon İcra Hakimiyyəti başçısının şəxsi təşəbbüsü ilə rayonumuzun ərazisində yerləşən istirahət mərkəzlərinin birində fərdi şərgim təşkil olundu. O, xarici ölkələrdən gələn bir çox turistin marağına səbəb oldu, hətta onlar öz ölkələrinə aid miniatür bayraq xalçalarından hədiyyə olaraq götürdülər. 

© Sputnik / Rahim Murad
İlqamət Hadiyevin əl işləri

- Miniatür xalça toxumaq sənətini öyrənmək üçün sizə müraciət edən olub? Ümumiyyətlə, Lerikdə bu sənətə maraq varmı?

- Bu günə kimi müraciət edən olmayıb. Amma Lerik Rayon Dövlət Rəsm Qalereyasında bu işi öyrənmək istəyən və maraqlanan gənclər üçün Qalereyanın direktoru usta dərsləri təşkil etmək ideyasını irəli sürüb. İnşallah, yaxın günlərdə bu ideyanı reallaşdıracağıq.

89
Teqlər:
gerb, bayraq, Azərbaycan, Lerik, usta, miniatür sənət, xalça
Mövzu:
Sözlə deyə bilmədiklərimizin izharı - sənət (32)

Cəbhəyanı ərazilərdə onlarla tank piyada əleyhinə mina, bombacıqlar aşkarlandı

11
Mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

BAKI, 26 noyabr - Sputnik. Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Ağcabədi, Ağdam, Beyləqan, Füzuli, Goranboy, Göygöl, Tərtər rayonları ərazisində mərmilərin aşkar olunması barədə Daxili İşlər Nazirliyinin ″102″ Xidməti-Zəng mərkəzi sistemindən 38 və Fövqəladə Hallar Nazirliyinin Böhran Vəziyyətlərində İdarəetmə mərkəzindən 7 müraciət daxil olub.

ANAMA-dan Sputnik Azərbaycan-a verilən məlumata görə, daxil olmuş 45 çağırış əsasında agentliyin xüsusi mobil çevik əməliyyat qrupları tərəfindən Daxili İşlər Nazirliyinin əməkdaşları ilə birlikdə 28 operativ və təxirəsalınmaz əməliyyat çıxışı həyata keçirilib.

Aparılmış əməliyyat-axtarış tədbirləri zamanı 71 ədəd partlamamış hərbi sursat (PHS), 2 ədəd tank əleyhinə mina, 42 ədəd piyada əleyhinə mina, 4 ədəd bombacıq və 40 ədəd partlamış mərmi qalıqları aşkar olunub.

Agentliyin partlayış qrupu tərəfindən 26 ədəd mina və partlamamış hərbi sursat (PHS), 4 ədəd bombacıq zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

11
Məktəbdə dərs prosesi, arxiv şəkli

Ümumi təhsil pilləsi nələri əhatə edəcək?

6
(Yenilənib 23:41 25.11.2020)
Ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

BAKI, 25 noyabr — Sputnik. Azərbaycan Respublikasında ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

Sputnik Azərbaycan-ın məlumatına görə, bu, Prezident İlham Əliyev tərəfindən bu gün təsdiqlənən "Təhsil haqqında" qanuna dəyişiklik edilməsi barədə qanunda əksini tapıb.

Qanuna əsasən, Ümumtəhsil məktəbi ibtidai, ümumi orta və tam orta məktəb formasında ayrı-ayrılıqda da təşkil oluna bilər.

Həmçinin, qanunda göstərilib ki, İbtidai təhsilin məqsədi təhsilalanlara oxu, yazı və hesablama bacarıqları, vətənpərvərlik və Azərbaycan xalqının dəyərlərinə, dövlət rəmzlərinə hörmət hissi aşılamaq, onlarda insan, cəmiyyət və təbiət haqqında ilkin biliklər, şəxsiyyətin formalaşdırılmasına yönəlmiş həyati bacarıqlar, sadə əmək vərdişləri, məntiqi təfəkkür elementləri, bədii-estetik keyfiyyətlər və digər xüsusiyyətlər formalaşdırmaqdan ibarətdir.

Eyni zamanda ümumi orta təhsilin məqsədi təhsilalanlarda nitq, yazı və ünsiyyət mədəniyyətinin, sağlam həyat tərzinin formalaşdırılmasını, onların dövlətə və dövlətçiliyə, Azərbaycan xalqının dəyərlərinə və ümumbəşəri dəyərlərə sədaqət ruhunda tərbiyə olunmasını, insan hüquq və azadlıqlarına hörmətlə yanaşmasını, idrak fəallığının və məntiqi təfəkkürünün inkişafını, müvafiq təhsil proqramı üzrə əldə etdiyi bilikləri tətbiq etmək, müasir informasiya-kommunikasiya texnologiyalarından istifadə etmək, cəmiyyətdə baş verən hadisələri dəyərləndirmək, öz gələcək həyat yolunu və fəaliyyət istiqamətlərini müəyyənləşdirmək, müstəqil öyrənmə və qərar qəbuletmə bacarığını, peşə seçiminə və əmək fəaliyyətinə hazırlığını təmin etməkdən ibarətdir.

6