Avtobus, arxiv şəkli

Anlayış təhlükəsizlik zamanı: bir dərdimiz tıxacdırsa, o biri azlıqdır

97
(Yenilənib 18:58 30.10.2020)
"Daşıyıcı şirkətlər öz avtobuslarını cəbhə bölgəsinə göndəriblər. Hər şirkətin beş-on avtobusu cəbhə bölgəsinə göndərməsi avtobus sayının azalmasına səbəb olub"

Zülfiyyə Quluyeva, Sputnik Azərbaycan

BAKI, 30 oktyabr — Sputnik. Bakı metropolitenində sərnişindaşıma fəaliyyətinin dayandırılması ilə əlaqədar ekspress xətlər üzrə avtobuslar fəaliyyət göstərir. Oktyabrın 19-dan etibarən sərnişin daşımaları əvvəlcədən hazırlanan nəqliyyat planına uyğun olaraq təşkil edilir. Ekspress xətlər fəaliyyətə başlasa da, sərnişinlər avtobusların gecikməsindən narazılıq edirlər. Onların sözlərinə görə, metro fəaliyyətini dayandırdıqdan sonra ümidləri ekspress avtobuslara qalsa da, avtobus gözləməkdən yorulurlar. Avtobuslarda sərnişin çox olduğundan, bəzən ekspress avtobuslara minmək belə mümkün olmur. Bu hallar müntəzəm avtobuslarda da müşahidə edilir. Xüsusilə 3 və 6 saylı avtobuslarda gecikmə halları daha çoxdur. Sputnik Azərbaycan metronun fəaliyyəti dayandırıldığı dövrdə sərnişinlərin daşınmasında yaranan çatışmazlıqların aradan qaldırılması yollarını araşdırıb.

Bakı Nəqliyyat Agentliyinin mətbuat katibi Mais Ağayev yaranmış gecikmələrin yollarda yaranmış tıxac səbəbindən baş verdiyini bildirib. Onun sözlərinə görə, gecikmələrin baş verməsinə səbəb avtobus azlığı deyil: "Ötən həftə ərzində marşrut xətləri üzrə gündəlik sərnişin səfər sayı 1900000-2000000 arasında dəyişib. Ümumilikdə isə xətlərə 2100-2200 ədəd avtobus çıxarılıb ki, bu da adi rejimlə müqayisədə 15% çoxdur. Sıxlıq və tıxac olan yollardan keçən bütün müntəzəm və ekspress xətlər üzrə avtobusların hərəkət intervalında gecikmələr baş verir".

"Məsələn, oktyabrın 26-sı axşam saatlarında Ziya Bünyadov prospekti Çermet körpüsündən 20 Yanvar dairəsi istiqamətində, Abdulvahab Salamzadə küçəsi–Ceyhun Səlimov küçəsi ilə kəsişmə (Ziya Bünyadov prospekti və Ak.Həsən Əliyev küçəsi), Alı Mustafayev küçəsi - 20 Yanvar dairəsindən Ziya Bünyadov prospektinə gedən yol, Abbasqulu ağa Bakıxanov küçəsi – Türkiyə səfirliyi istiqamətində, Tbilisi prospekti - 20 Yanvar dairəsi istiqamətində, Qara Qarayev prospekti –Dakar dairəsi istiqamətində nisbətən sıxlıq, Rəşid Behbudov küçəsi – Qış parkına qədər nisbətən (Füzuli küçəsinə qədər), Yusif Səfərov küçəsi–Heydər Əliyev prospekti istiqamətində, Heydər Əliyev prospekti–Bağırov körpüsündən "Koroğlu" metro stansiyası və şəhər istiqamətində köməkçi yolda, Şah İsmayıl Xətai prospekti - Heydər Əliyev prospekti istiqamətində, Mikayıl Useynov prospekti – Azneft dairəsi istiqamətində müntəzəm və ekspress xətlər üzrə avtobusların hərəkət intervalında gecikmələr qeydə alınıb. Avtobusların sıxlıqda gecikməməsi və hərəkət intervalının tənzimlənməsi üçün bütün zəruri tədbirlər görülür. Müvafiq küçə və prospektlərdə işıqforlara "yaşıl dalğa" əmri tətbiq edilir. Sərnişin tələbatı yüksək olan istiqamətlər üzrə ehtiyat avtobuslar cəlb edilir", - deyə M. Ağayev əlavə edib.

Nəqliyyat məsələləri üzrə ekspert Elməddin Muradlı isə Sputnik Azərbaycan-a açıqlamasında bildirib ki, avtobusların gecikməsinə təsir edən iki amil var. Onun sözlərinə görə, yollarda tıxac avtobusların intervala uyğun hərəkətinə mane olur: "Yollarda yaranmış tıxac pik saatlarda avtobusların gecikməsinə təsir göstərir. Amma digər danılmaz fakt avtobusların sayının azlığıdır. Xətlərdə avtobusların sayı yetərincə deyil. Daşıyıcı şirkətlər öz avtobuslarını cəbhə bölgəsinə göndəriblər. Hər şirkətin beş-on avtobusu cəbhə bölgəsinə göndərməsi avtobus sayının azalmasına səbəb olub. Bununla belə daşıyıcı şirkətlərdə olan bütün avtobuslar xidmətdədir. Əhali bunu nəzərə almalı, zərurət yaranmadığı halda evdən çıxmamalıdır".

Nəqliyyat məsələləri üzrə hüquqşünas Ərşad Hüseynov da Sputnik Azərbaycan-a açıqlamasında bildirib ki, pandemiya və müharibə dövründə əhali vəziyyəti anlayışla qarşılamalıdır: "Elə bir vəziyyətdir ki, cəbhədə vəziyyət gərgindir. Eyni zamanda koronavirus pandemiyasına görə virusa yoluxmada artım müşahidə olunur. Bütün bunlara görə metronun bağlanması zəruri idi. Güman edirəm ki, bu problemlər qısa zamanda arxada qalacaq. Ona görə də sərnişinlər bir qədər anlayış nümayiş etdirməlidirlər".

97

Cəbhəyanı ərazilərdə onlarla tank piyada əleyhinə mina, bombacıqlar aşkarlandı

14
Mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

BAKI, 26 noyabr - Sputnik. Azərbaycan Respublikası Ərazilərinin Minalardan Təmizlənməsi üzrə Milli Agentliyə (ANAMA) Ağcabədi, Ağdam, Beyləqan, Füzuli, Goranboy, Göygöl, Tərtər rayonları ərazisində mərmilərin aşkar olunması barədə Daxili İşlər Nazirliyinin ″102″ Xidməti-Zəng mərkəzi sistemindən 38 və Fövqəladə Hallar Nazirliyinin Böhran Vəziyyətlərində İdarəetmə mərkəzindən 7 müraciət daxil olub.

ANAMA-dan Sputnik Azərbaycan-a verilən məlumata görə, daxil olmuş 45 çağırış əsasında agentliyin xüsusi mobil çevik əməliyyat qrupları tərəfindən Daxili İşlər Nazirliyinin əməkdaşları ilə birlikdə 28 operativ və təxirəsalınmaz əməliyyat çıxışı həyata keçirilib.

Aparılmış əməliyyat-axtarış tədbirləri zamanı 71 ədəd partlamamış hərbi sursat (PHS), 2 ədəd tank əleyhinə mina, 42 ədəd piyada əleyhinə mina, 4 ədəd bombacıq və 40 ədəd partlamış mərmi qalıqları aşkar olunub.

Agentliyin partlayış qrupu tərəfindən 26 ədəd mina və partlamamış hərbi sursat (PHS), 4 ədəd bombacıq zərərsizləşdirilib, mina təhlükəsinə dair maarifləndirmə üzrə mütəxəsisslər tərəfindən 80 141 nəfər mülki şəxs arasında mina təhlükəsizliyinə dair maarifləndirmə təbliğatı aparılıb.

14
Məktəbdə dərs prosesi, arxiv şəkli

Ümumi təhsil pilləsi nələri əhatə edəcək?

7
(Yenilənib 23:41 25.11.2020)
Ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

BAKI, 25 noyabr — Sputnik. Azərbaycan Respublikasında ümumi təhsil pilləsi məktəbəhazırlıq mərhələsini, ibtidai, ümumi orta və tam orta təhsil səviyyələrini əhatə edəcək.

Sputnik Azərbaycan-ın məlumatına görə, bu, Prezident İlham Əliyev tərəfindən bu gün təsdiqlənən "Təhsil haqqında" qanuna dəyişiklik edilməsi barədə qanunda əksini tapıb.

Qanuna əsasən, Ümumtəhsil məktəbi ibtidai, ümumi orta və tam orta məktəb formasında ayrı-ayrılıqda da təşkil oluna bilər.

Həmçinin, qanunda göstərilib ki, İbtidai təhsilin məqsədi təhsilalanlara oxu, yazı və hesablama bacarıqları, vətənpərvərlik və Azərbaycan xalqının dəyərlərinə, dövlət rəmzlərinə hörmət hissi aşılamaq, onlarda insan, cəmiyyət və təbiət haqqında ilkin biliklər, şəxsiyyətin formalaşdırılmasına yönəlmiş həyati bacarıqlar, sadə əmək vərdişləri, məntiqi təfəkkür elementləri, bədii-estetik keyfiyyətlər və digər xüsusiyyətlər formalaşdırmaqdan ibarətdir.

Eyni zamanda ümumi orta təhsilin məqsədi təhsilalanlarda nitq, yazı və ünsiyyət mədəniyyətinin, sağlam həyat tərzinin formalaşdırılmasını, onların dövlətə və dövlətçiliyə, Azərbaycan xalqının dəyərlərinə və ümumbəşəri dəyərlərə sədaqət ruhunda tərbiyə olunmasını, insan hüquq və azadlıqlarına hörmətlə yanaşmasını, idrak fəallığının və məntiqi təfəkkürünün inkişafını, müvafiq təhsil proqramı üzrə əldə etdiyi bilikləri tətbiq etmək, müasir informasiya-kommunikasiya texnologiyalarından istifadə etmək, cəmiyyətdə baş verən hadisələri dəyərləndirmək, öz gələcək həyat yolunu və fəaliyyət istiqamətlərini müəyyənləşdirmək, müstəqil öyrənmə və qərar qəbuletmə bacarığını, peşə seçiminə və əmək fəaliyyətinə hazırlığını təmin etməkdən ibarətdir.

7