İşğaldan azad edilmiş ərazilərdə hələ təmizləmə işləri aparılmır
(Yenilənib 09:01 01.10.2020)
Hazırda ANAMA-nın qrupları yaşayış məntəqələri, rayon mərkəzləri və Tərtər şəhərinin ərazilərinə düşmüş mərmilərin götürülməsi ilə məşğuldur.İradə Cəlilova, Sputnik Azərbaycan
BAKI, 01 oktyabr — Sputnik. "İşğaldan azad edilmiş ərazilərdə, kəndlərdə hələ ki, heç bir təmizləmə işləri aparılmır. Çünki həmin ərazilərdə döyüşlər davam edir və bizim ora daxil olmaq ixtiyarımız yoxdur".
Bu barədə Sputnik Azərbaycan-a Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) yanında hərbi rejimlə əlaqədar yaradılmış Operativ Qərargahın rəisi İdris İsmayılov məlumat verib. O qeyd edib ki, hazırda qurumun qrupları yaşayış məntəqələri, rayon mərkəzləri və Tərtər şəhərinin ərazilərinə düşmüş mərmilərin götürülməsi ilə məşğuldur.
"Ağdam, Goranboy, Beyləqan, Ağcabədi, Füzuli, Tərtər - bu istiqəmətlərdə bizim qruplar əməliyyatlar aparırlar. Bizim 12 qrupumuz var. Qruplarımız yalnız hələ ki, əkin sahələrinə, yaşayış məntəqələrinə düşmüş mərmilərin və raketlərin götürülüb, zərəsizləşdirilməsi ilə məşğuldur", - deyə bildirən Qərargah rəisi əlavə edib ki, əməliyyatlar Daxili İşlər Nazirliyinin (DİN) 102, Fövqəladə Hallar Nazirliyinin (FHN) 112 xidmətinə daxil olan müraciətlər əsasında həyata keçirilib.
Onun sözlərinə görə, həmin ərazilərdə vətəndaşlar özləri də mobil qruplara yaxınlaşaraq, məlumat verirlər.
Məlumatlar daxil olduqdan sonra Daxili İşlər Nazirliyi və rayon icra hakimiyyətləri nümayəndələri ilə əraziyə baxış keçirilir.
İ.İsmayılov vətəndaşlara müraciət edərək bildirib ki, ərazilərdə vətəndaşlar partlamamış mina, silah-sursat, raket qalıqları aşkar edərsə, dərhal rayon icra hakimiyyətlərinə, DİN-nin 102 və FHN-nin 112 xidmətlərinə dərhal məlumat verməlidirlər.
"Belə olan halda bizim qruplar aşkar edilmiş silah-sursatı dərhal götürüb zərərsizləşdirə, yerli sakinlərin təhlükəsiz yaşayını təmin edə bilər", - deyə qeyd edən Qərargah rəisi əlavə edib ki, mobil qruplar 24 saat fəaliyyət göstərir.
Qeyd edək ki, ANAMA-da ölkədə hərbi vəziyyətlə bağlı Operativ Qəragah yaradılıb. Müraciətlər 24 saat qəbul edilir və qruplar koordinasiya olunur.
Xatırladaq ki, son 27-29 sentyabr tarixində müvafiq qurumlara daxil olmuş 36 çağırış əsasında Agentliyin xüsusi mobil çevik əməliyyat qrupu tərəfindən Ağdam rayonunun 1-ci 4 Yol, Quzanlı qəsəbələri və Çəmənli kəndi, Ağcabədi rayonunun Qaradolaq, Ağgöl, Avşar, Hacılar kəndləri, Tərtər rayonun Qaynaq, Sarıcalı, Çəmənli kəndləri və Şıxarx qəsəbəsi, Füzuli rayonun Şükürbəyli və Horadiz kəndləri, Goranboy rayonunun Qaramusalı, Həmənli, Qaraçinar, Boluslu, Meşəli, Qırıqlı kəndləri, Biləsuvar rayonun Nəriman kəndi, Naftalan rayonunun Qaşaltı kəndi və Hacıqabul rayonu ərazisində Daxili İşlər Nazirliyinin və Dövlət Sərhəd Xidmətinin əməkdaşları ilə birlikdə 34 operativ və təxirəsalınmaz əməliyyat çıxışı həyata keçirilib.
"Eurovision" ulduzlarından Gəncə terroru barədə klip
(Yenilənib 20:03 28.10.2020)
"Say Hallelujah" mahnısına çəkilmiş videoklip Fidan Hüseynovanın rəsmi "Youtube" kanalında təqdim edilib. Sənətçilər klip vasitəsi ilə həqiqəti bütün dünyaya çatdırmağa çalışıblar.BAKI, 28 oktyabr — Sputnik. "Eurovision" mahnı müsabiqəsinin ulduzları Elnur Hüseynov və Fidan Hüseynova Ermənistanın Gəncədə törətdiyi terror aktları barədə klip çəkiblər. Sputnik Azərbaycan xəbər verir ki, "Say Hallelujah" mahnısına çəkilmiş videoklip Fidan Hüseynovanın rəsmi "Youtube" kanalında təqdim edilib. Sənətçilər klip vasitəsi ilə həqiqəti bütün dünyaya çatdırmağa çalışıblar.
Müğənni kliplə bağlı danışarkən bunları deyib: "Oktyabrın 4, 11 və 17-də Azərbaycanın hərbi əməliyyatlar zonasından kənarda yerləşən, əhalisinin sayına görə ikinci ən böyük şəhəri olan Gəncəyə üç raket hücumu nəticəsində 26 nəfər həlak olub. Həlak olanlar arasında 10 qadın və 6 uşaq var. Daha 138 nəfər yaralanıb. İndi informasiya müharibəsi gedir və hər kəsin öz silahı var: bizim mahnımız ingilis dilində olduğu üçün istədim ki, yenidən o mahnıya qayıdaq və bütün həqiqəti dünyaya çatdıraq. Bu arzumu Fidanın atası Yaqub müəllimə bildirəndə o, mənim ideyamı ürəkdən dəstəklədi".
Rejissor Ülviyyə Könül bildirib ki, bu klipin ərsəyə gəlməsində məqsəd həqiqəti bəşəriyyətə çatdırmaqdır: "Mənim fikrimcə, bu klip çox güclü material yaratmağa kömək edib, çünki bu mövzuya laqeyd qalmaq mümkün deyil".
Layihə müəlliflərinin sözlərinə görə, bu gün dünya birliyi anlamalıdır ki, Ermənistanın terrorçu qoşunları Azərbaycan ərazisində vuruşur, lakin Qarabağın hüdudlarından uzaqlarda dinc əhaliyə qarşı vəhşiliklər törədirlər.
Mahnının sözləri Cəlal Qurbanovundır. Misraları ingilis dilinə tərcümə etmiş şairə Nigar Həsənzadə deyir:
"Bu mahnı doğma Azərbaycanımızın övladlarına, müharibə nəticəsində həyatlarını itirmiş günahsız qurbanlara görə bizim ümumi harayımız və fəryadımızdır. Bu mahnı dünya birliyini həqiqətin gözünün içinə baxmağa, öz ambisiyalarını müvəqqəti də olsa, unutmağa, mənfur erməni diasporunun təsirinə uymamağa və terrorçu ermənilərin bəşəriyyət əleyhinə törətdiyi dəhşətli cinayətlərə görə onları mühakimə etməyə çağırışdır".
Türkiyədə general Həşimovun adına park salındı - VİDEO
(Yenilənib 20:31 28.10.2020)
Osmanqazi bələdiyyəsinin sədri Mustafa Dündar və Azərbaycanın Türkiyədəki səfirliyinin müşaviri Ruslan Abdullayev mərasimdə çıxış ediblərBAKI, 28 oktyabr - Sputnik. Ermənistan silahlı qüvvələrinin Tovuz rayonu istiqamətindən ölkəmizə xain hücumları nəticəsində şəhid olan Azərbaycan Silahlı Qüvvələrinin generalı Polad Həşimovun əziz xatirəsi Türkiyədə əbədiləşdirilib.
Sputnik Azərbaycan-ın məlumatına görə, Bursanın Osmanqazi rayonunun Dəmirtaş bölgəsində Polad Həşimovun adı verilən yeni park salınıb.
Parkın açılış mərasimi Azərbaycan və Türkiyənin dövlət himnləri səsləndirilməsi ilə başlayıb. Sonra şəhidlərimizin əziz xatirəsi bir dəqiqəlik sükutla yad olunub, onların ruhuna dualar oxunub.
Osmanqazi bələdiyyəsinin sədri Mustafa Dündar və Azərbaycanın Türkiyədəki səfirliyinin müşaviri Ruslan Abdullayev mərasimdə çıxış ediblər.
Aİ Dağlıq Qarabağ münaqişəsinin sülh yolu ilə həllinə dair substantiv danışıqlara çağırdı
BAKI, 29 oktyabr - Sputnik. Avropa İttifaqı Rusiya, Fransa və ABŞ-ın vasitəçiliyi ilə atəşkəsə dair üç razılaşmadan sonra Dağlıq Qarabağ və ətrafında döyüşlərin hələ də davam etdiyini və daha çox mülki şəxslərin hədəf alınmasını qəbuledilməz hesab edir.
Sputnik Azərbaycan xəbər verir ki, bu barədə Avropa İttifaqının xarici siyasət və təhlükəsizlik üzrə ali nümayəndəsi Jozep Borrelin mətbuat katibi Peter Stanonun atəşkəsə dair üç razılaşmadan sonra Dağlıq Qarabağ və ətrafında gedən döyüşlərlə bağlı verdiyi bəyanatda bildirilib.
Bəyanatda, o da qeyd edilib ki, Avropa İttifaqı münaqişə tərəflərinə beynəlxalq humanitar hüquqa əsasən, mülki şəxsləri qorumaq öhdəliklərini bir daha xatırladır.
"Avropa İttifaqı tərəfləri sonuncu dəfə 25 oktyabrda Vaşinqtonda razılaşdırıldığı kimi, gecikmədən Dağlıq Qarabağ münaqişəsinin sülh yolu ilə həllinə dair substantiv danışıqlara başlamağa çağırır", - deyə bəyanatda bildirilir.