Distant təhsil, arxiv şəkli

Təki oxumağa istək olsun: "Virtual məktəb"ə direktorlar da nəzarət edəcək

1025
(Yenilənib 20:00 18.09.2020)
Parolunu, şifrəsini unudan şagirdlər virtual.edu.az veb-saytında öz fin kodunu və istifadəçi adını yazaraq yenilənmiş şifrəni əldə edə bilər.

Zülfiyyə Quluyeva, Sputnik Azərbaycan

BAKI, 18 sentyabr — Sputnik. "Virtual məktəb"də qeydiyyat sistemi sentyabrın 14-dən etibarən yenidən aktivləşib. Ötən tədris ilində şagirdlərin çox hissəsi "Virtual məktəb"də qeydiyyatdan keçsə də, onların çoxu bu sistem vasitəsilə keyfiyyətli təhsil ala bilməyiblər. Hətta bir müddət "Virtual məktəb"ə qeydiyyat mümkün olmayıb. Cari tədris ilində şagirdlər üçün yenidən "Teledərs"lər, "Virtual məktəb" vasitəsilə təhsil almaq imkanı yaradılır. Amma nədənsə, müəllim və şagirdlərin çoxu ZOOM vasitəsilə dərs keçməyə üstünlük verirlər. Sputnik Azərbaycan "Virtual məktəb" vasitəsilə təhsil almağın üstünlükləri, eləcə də yeniliklərin nədən ibarət olacağını araşdırıb.

Təhsil Nazirliyi yanında İctimai Şuranın sədr müavini, təhsil eksperti Nadir İsrafilov Sputnik Azərbaycan-a açıqlamasında bildirib ki, "Teledərs"lərə və onlayn təhsilə nisbətən "Virtual Məktəb" daha interaktiv metoddur. Lakin məsafədən idarəolunan təhsil forması ənənəvi təhsili əvəz edə bilməz:

"Heç bir texnologioya canlı ünsiyyəti əvəz etməyə qadir deyil. Amma bu, bizim seçimimiz deyil. Bu problemlə bütün dünya üz-üzə qalıb, çünki zamanın çağırışıdır. Mənim fikrimcə "Virtual Məktəb" layihəsi daha yaxşıdır. Teledərsə kimsə baxmaya bilər, "Virtual Məktəb"də isə qeydiyyat var, nəzarət etmək mümkündür".

Ekspert qeyd edib ki, bütün bunlarla yanaşı, "Virtual Məktəb"də texniki problemlər mövcuddur. Şikayətlər var ki, "Virtual Məktəb"də qeydiyyatdan keçə bilmirlər. Üstəlik, Bakının özündə bir sıra müəllim və şagirdlər "Virtual Məktəb"lə dərs keçə bilmirdilər. İsrafilov ümid edir ki, cari tədris ilində bu problemlər təkrarlanmayacaq.

Onlayn təhsil, arxiv şəkli
© REUTERS / HAMAD I MOHAMMED

Təhsil Nazirliyi yanında Təhsilin İnformasiyalaşdırılması İdarəsinin şöbə müdiri Fidan Nəcəfova isə Sputnik Azərbaycan-a açıqlamasında bildirib ki, onlayn dərslərin təşkilində Təhsil Nazirliyi "Teledərs"lər və "Virtual məktəb" metodlarından istifadəyə üstünlük verib. Bu ilin martın 3-də respublikada tədris dayanandan nazirlik teledərslərin çəkilişinə başlayıb. Bunun da səbəbi televiziyanın bütün şagirdlər üçün əlçatan olmasıdır. 

Nəcəfovanın sözlərinə görə, "Virtual məktəb" aprelin 2-dən istifadəyə verilib. Burada da ən başlıca məqsəd teledərslərdə interraktivliyin təmin olunması, onun effektivliyinin müəyyən edilməsi olub:

"Çünki şagirdin öz biliyini möhkəmləndirməsi üçün başqa bir vasitə yox idi. Ona görə də "Virtual məktəb"də platforma yaradılıb. Burada həmin günün dərslərinə uyğun testlər yerləşdirilib. Bu zaman həmin şagirdin testi düz ya səhv işləməsini yoxlaması da mümkün idi. Daha sonra pandemiya uzandığından, ilin sonunda şagirlərin qiymətləndirilməsi üçün platformanın imkanlarından istifadə edib şagirdlə müəllimin görüntülü əlaqəsi təmin edildi. İlk başlanışda "Virtual məktəb" şagirdlər üçün olsa da daha sonra müəllimlər də qeydiyyatdan keçə bildi. Bu könüllü xarakter daşıyırdı. Biz hətta eyni evdən, bir mobil nömrə ilə bir neçə şagirdin qeydiyyatını da mümkün etdik. "Virtual məktəb"dən istifadə üçün rus və Azərbaycan bölmələrinin hər ikisi üçün iştirak mümkün idi".

F. Nəcəfova deyir ki, "Virtual məktəb"də ümumi qrupda şagirdlərin interaktiv alətlərə və testlərə əlçatanlığı təmin edilir. "Virtual məktəbdə" indeksli qruplarda şagirdlər öz sinif yoldaşlarını, müəllimlərini və özünü görürdü. Uşaqlara real məktəbdə hansı müəllim dərs deyirsə, virtualda da o müəllimin dərs deməsinə icazə verilir. Dərs zamanı şagirdlər müəllimlərini görə bilir, onlar yoldaşları ilə görüntülü və səsli əlaqə yaratmaq üçün "Chat" funksiyasından istifadə edə bilirlər.

Şöbə müdirinin sözlərinə görə, ötən tədris ili "Virtual məktəb"də qeydiyyatdan keçən şagirdin təkrar qeydiyyatına ehtiyac yoxdur. "Həmin şagirlər ötən il 4-cü sinifdə oxuyurdularsa, bu tədris ili "Virtual məktəb"də avtomatik 5-ci sinfə keçirlər. Hətta şagird başqa məktəbə köçürülübsə, "Virtual məktəb"də də bu əksini tapır. Bu zaman yeni siniflə yanaşı, şagirdin köhnə sinifi də göstərilir. Bəzən sinifin tərkibində dəyişiklik olmur.

F. Nəcəfova deyib ki, "Virtual Məktəb"də dərs keçən müəllimlərə direktorların nəzarət etməsi də mümkündür:

"Respublika üzrə qeydiyyatdan keçmiş direktorlar səhifələrində öz məktəblərinin bütün sinifləri görə bilirlər. Bu, yeni tədris ilində yenilikdir ki, direktor 1-ci sinifdən tutmuş yuxarı siniflərə qədər istədiyi dərsə daxil olub baxa və davamiyyətini yoxlaya bilər. Bu yenilik əsasında direktorlar öz profillərində dərs dedikləri bütün sinifləri görürlər".

O ki, qaldı "Virtual Məktəb"də dərslərə müəllimlərin necə daxil olmasına, Nəcəfova bildirir ki, direktorlarda cədvəl var və o cədvəl üzrə müəllimlər həmin qruplara daxil edilməlidir. Əgər hər hansı müəllimin profilində sinif görülmürsə, deməli direktor müəllimi əlavə etməyib. Bakı məktəblərində həddən artıq çox sinif olur ki, direktor siniflərə müəllimləri əlavə etməyə vaxt çatdırmır. Bu zaman bu işi müavinlər də edə bilər.

Nəcəfova "Virtual Məktəb" sisteminin tamamilə yeniləndiyini də qeyd edib:

"Şagirdlərin yerdəyişməsi sentyabrın 14-də tamamlanıb. Məktəblərdə siniflərin komplektasiyaları sentyabrın sonuna qədər davam edəcək. Bu da sinif bölgüsündə problem yarada bilər. Biz ona görə sistemi yenilədik ki, ən son yeniliklər əlavə olunsun".

Şöbə müdiri "Virtual Məktəb" də ötən ildən qeydiyyatdan keçən, amma parol və şifrəsini unudanların yenilənmiş şifrə əldə etməsinin mümkün olduğunu söyləyir: "Parolunu, şifrəsini unudan şagirdlər virtual.edu.az veb saytında öz fin kodunu və istifadəçi adını yazaraq yenilənmiş şifrəni əldə edə bilər. Bəzən qeydiyyatdan keçdiyi mailini unudanlar da var. Tims.edu.az saytı vasitəsilə bunu öyrənmək mümkündür. Virtual məktəbin dəstək xidməti var ki, bundan da yararlana bilərlər".

F. Nəcəfovanın fikrincə, "Virtual məktəb"in üstünlüyü odur ki, bu platformada hamıya bərabər şərait yaradılır və hamı öz müəllimini tapa bilir. Onun sözlərinə görə, "Virtual məktəb" UTİS-ə (Ümumi Təhsil İnformasiya Sistemi) inteqrasiya olunub. UTİS isə məktəblərin bazasıdır. Burada şagirdlər və müəllimlər yer dəyişdikdə UTİS də və avtomatik olaraq "Virtual məktəb" də dəyişir. Qeydiyyatdan keçməklə şagird indeksli sinfinə daxil olub öz sinif yoldaşlarını və müəllimini tapa bilir. Bundan əlavə, "Virtual məktəb"in daha bir üstünlüyü ondadır ki, dərs limiti yoxdur. Şagird 3-4 saat, hətta bütün gün də dərsə davam edə bilər. "Virtual məktəb"də keçirilən bütün dərslər avtomatik qeydə alınır. Şagirdlər o dərsə təkrar baxa bilirlər. Yeniliklərdən biri də odur ki, "Virtual məktəb" oktyabrdan Azərbaycan dilində də fəaliyyət göstərəcək.

Həmsöhbətimiz onu da bildirir ki, "Virtual məktəb"də qeydiyyata limit yoxdur. Bu sistem hətta Naxçıvan üçün də əlçatandır. Naxçıvanda 50 mindən çox şagird, Respublika üzrə 90 mindən çox müəllim bu sistemdə qeydiyyatdan keçib. Ümumi qeydiyyatdan keçənlərin sayı 1,5 milyondan çoxdur. Amma bu rəqəmlər hər saat dəyişir.

O ki qaldı "Virtual Məktəb"də qeydiyyatla bağlı problemlərə, F. Nəcəfova deyir ki, bu zaman həmin şəxslər Təhsil Nazirliyinin "Qaynar Xətti"nə də zəng vurub dəstək ala bilərlər.

Qeyd edək ki, sentyabrın 8-dən etibarən "Virtual məktəb"də qeydiyyat prosesi müvəqqəti olaraq dayandırılmışdı. Qeydiyyatın dayandırılması yeni tədris ilinin başlanması ilə əlaqədar profilaktik işlərin aparılması məqsədi daşıyırdı.

1025
Əlaqədar
Teledərslər dayandırılacaq
Nazirin açıqlaması ilə məhv olan ümidlər: onda bəs Virtual Məktəb nəyə gərək idi?
Teledərslər vasitəsilə tədrisin 100 faiz mənimsənilməsi mümkün deyil
Uşaqlar virtual və real məktəb arasında seçim edirlər – SORĞU
Virtual məktəbdə qeydiyyat dayandırılır
Böyük Britaniyada epidemioloji vəziyyət

Britaniyada bir aylıq karantin tətbiq ediləcək

5
(Yenilənib 23:52 31.10.2020)
Yeni qaydalara görə, məktəblər və universitetlər, zəruri mağazalar fəaliyyətlərinə davam edə biləcək.

BAKI, 31 oktyabr - Sputnik. İngiltərədə gələn həftədən bir aylıq karantin tətbiq ediləcək.

APA-nın verdiyi xəbərə görə, bu barədə Böyük Britaniyanın Baş Naziri Boris Conson keçirilən mətbuat konfransında məlumat verib.

Conson bildirib ki, 5 noyabrdan etibarən İngiltərədə restoranlar, kafelər, qeyri-zəruri mağazalar, əyləncə məkanları yenidən bağlanacaq. O qeyd edib ki, başqa bir alternativ olmadığı üçün hərəkətə keçməyin zamanı gəlib. Baş Nazir xalqa gələn həftədən etibarən evdə qalmalı olduqlarını deyib. Buna görə insanlar evdən işləməli, zəruri olmadıqca evdən çıxmamalıdırlar.

Conson qeyd edib ki, yeni karantin qaydaları 2 dekabr tarixinə qədər qüvvədə qalacaq. Ancaq yeni qaydalara görə, məktəblər və universitetlər, zəruri mağazalar fəaliyyətlərinə davam edə biləcək.

5
Teqlər:
Koronavirus, Böyük Britaniya, Boris Conson, İngiltərə
Rəşad Alızadə

Kəlbəcərlilər öz yurdlarına onları ölümdən qurtaran həmin QAZ-69-la qayıdacaqlar

82
Kəlbəcərdən çıxanda dörd yaşı olan Rəşad Alızadə o dəhşətli gecəni Sputnik Azərbaycan-a danışıb: "Qadının qucağındakı körpə ölmüşdü. O, qucağında körpənin cəsədi, gecə vaxtı yolu qışqıra-qışqıra qaçırdı.

Şahpəri Abbasova, Sputnik Azərbaycan

BAKI, 31 oktyabr — Sputnik. Rəşad Alızadə Kəlbəcər sakinidir. Oradan çıxanda heç 5 yaşı tamam olmamışdı. Yaşının az olmasına baxmayaraq, hər şeyi bugünkü kimi xatırlayır. Rəşadın ailəsi Kəlbəcərdən əliyalın çıxıb. Onları isə ölümün pəncəsindən QAZ-69 xilas edib. Qəhrəmanımız müharibənin onda buraxdığı acı xatirələri Sputnik Azərbaycan-a danışıb.

"Oradan gələndə, cəmi 4 yaşım var idi. Müharibə elə bir məfhumdur ki, adam onu neçə yaşda olur-olsun, xatırlayır. O ab-hava, o dəhşət insanın yaddaşından silinmir", - deyən Rəşad doğma yurdlarından çıxdıqları günü belə xatırlayır:

"Əslində 2 dəfə çıxmışıq oradan. İlk dəfə Laçın işğal olunanda Kəlbəcər sakinlərini çıxardılar. İkinci dəfə isə Kəlbəcər rayonu işğal olunanda oradan çıxdıq. Rayonun mərkəzində yaşayırdıq. Gecə saatları idi. Rayonun mərkəzinə "Qrad" mərmisi düşdü. Anam həmin vaxt pəncərənin qabağında mənə yemək yedizdirirdi. Ümumiyyətlə həmişə atışma səsi olurdu deyə, biz bu səsləri eşitməyə vərdiş eləmişdik. Gecə saatları olmasına baxmayaraq, elə bil gündüz idi, çünki hər tərəfdə atışma vardı. Anam məni necə bağrına basdısa, həmin ağrını hələ də hiss edirəm. Cavan ailə idilər, anam məni qorumağa çalışırdı, atam da çarəsiz qalmışdı. Çox dəhşətli mənzərə idi. Hər kəsə əmr verildi ki, evlər boşaldılsın. Hamımız QAZ-69-a minib ata-baba yurdumuzu tələsik tərk elədik".

© Photo : Najaf Ruslanoglu
QAZ-69

Alızadələr ailəsi çox böyük əzab-əziyyətlə rayonu tərk etməyə nail olublar:

"Kəlbəcərdən çıxdıq, Murov yolu ilə gəldik. Yolda maşında texniki problemlər oldu. Nəzərə alsaq ki, yayın ən qızmar ayında belə Murov dağında qar olur, aprel ayında vəziyyətin necə olacağını təsəvvür edin. Maşının istilik sistemində problem var idi. İstilik olsun deyə bir neçə heyvanı maşına atmışdılar ki, onların hənirtisi ilə isinə bilək. Yadımdadır ki, mənim boynuma balaca bir quzu qoymuşdular. Yanlarıma heyvan yığırdılar ki, isinə bilək".

Kəlbəcəri tərk edərkən qarşılaşdıqları mənzərə Rəşadın beyninə əbədi həkk olunub:

"Yol gələndə atışma oldu. Gecə saatları idi. Murovu qalxanda Yanışaq kəndini keçəndən sonra bir mənzərə ilə qarşılaşdıq. Qadının qucağında körpəsi var idi. Körpə ölmüşdü. Amma o, övladını buraxmırdı. Qışqıra-qışqıra yolun ortası ilə gedirdi. Sanki havalanmışdı. Bizim xalqımız bundan qat-qat betər dəhşətləri görüb. Bunları unutmaq olmaz".

Rəşad hesab edir ki, bu yaraların acısı ancaq torpaqlarımız tam azad olduqdan sonra bəlkə də bir az azalacaq.

© Photo : Najaf Ruslanoglu
QAZ-69

Qəhrəmanımızın ən böyük arzusu illər əvvəl yol yoldaşları olan QAZ-69-la doğma yurdlarına qayıtmaqdır:

"Çox şükür ki, bu gün müzəffər Ordumuz ard-ardına qələbələr qazanır. Bu xəbərlər biz qarabağlıların acısını az da olsa, azaldır. 1993-ü ildən maşının mühərriki işə salınmayıb. O maşın bizim Kəlbəcər xatirəmizdir, bizi ölümdən qurtarıb. Onu yenidən təmir etmək, qaçqın statusunu Bakıda qoyub, onunla ailəmi Kəlbəcərə aparmaq istəyirəm".

Uşaqlıq illərini məcburi köçkün kimi yaşayan Rəşad deyir ki, ermənilər onunla bərabər 100-lərlə uşağın uşaqlığını əlindən alıblar:

"Biz uşaqlıq yaşamadıq. Bunun bədəlini artıqlaması ilə ödəməlidirlər, ödəyirlər də. Bakıda Kooperativ Texnikumun 2 nömrəli yataqxanasında məskunlaşdıq. Təsəvvür edin, o binaya 365 ailə sığışmışdı. Müstəqilliyin ilk illəri, olduqca çətin dövrlər idi. 9-cu mərtəbəyə vedrə ilə su qaldırırdıq. Evləri qızdıra bilmirdik. İşsizlik baş alıb gedirdi. Normal məktəbimiz belə yox idi".

Həmsöhbətimiz onları xilas edən maşının tarixçəsindən də danışdı: "Maşın 1961-ci ildə istehsal olunub. Ana babama xidməti maşın kimi verilmişdi. O, rayonun baş aqronomu idi. Ata babam isə rayonun "bazarkom"u olub. 1974-cü ildə o maşını babama xidmətlərinə görə hədiyyə ediblər. Babam da maşını qızına cehiz verib. Həmin dövürdən o maşını atam sürüb".

© Photo : Najaf Ruslanoglu
QAZ-69

Həmsöhbətimiz hesab edir ki, erməni vandallarının törətdikləri vəhşiliklərlə bağlı nə qədər yazılsa da, azdır. O hissləri danışmaqla, göstərməklə çatdırmaq mümkün deyil:

"Allah bir də millətimizə bu hissləri yaşatmasın. Doğmalarımızı itirəndə düşünürük ki, bu, belə də olmalıdır. Amma vətəni itirəndə bununla barışmaq olmur. Boynubükük gəzirdik. Bu, millət üçün, dövlət üçün başıaşağılıq idi. İndi prezidentimizin iddialı çıxışlarını, o çıxışların arxasındakı qələbələri gördükcə, ürəyimiz dağa dönür. "Kişilər ağlamaz" deyirlər. Amma mən hər qələbə xəbərini eşidəndə, ağlayıram. Bilirəm ki, bütün azərbaycanlılar mənimlə eyni hissləri keçirirlər".

Rəşadın nənəsi Ruzigarın 100-dən artıq yaşı var. O da tezliklə doğulduğu torpaqlara qayıtmaq arzusundadır: "Ruzigar nənənin 100-dən artıq yaşı var. Nənəm deyir özümü sıxıb saxlamışam ki, ölməyim, Kəlbəcəri görüm. Nənəm dağ adamı idi, Bakının mərkəzində, yataqxana şəraitində yaşamaq onun üçün ölümdən betər idi. Düzdür, Bakı da bizimdir, paytaxtımızdır. Amma insanın doğulduğu yeri heç nə əvəz eləmir. Nənəm gecə-gündüz yatmır, televizorun qabağından çəkilmir. Qələbə xəbərini gözləyir".

82