Kişi mopeddə gedir, arxiv şəkli

Paytaxtda yeriyən təhlükələr: ölümdən qaça bilirlər, cərimədən

361
(Yenilənib 19:39 17.09.2020)
Elməddin Muradlı: "Moped və velosiped sahibləri tərəfindən törədilən qəzaların sayı artıq Daxili İşlər Nazirliyini də narahat edir. Bu səbəbdən də velosiped və moped istifadəçiləri haqqında ciddi tədbirlər görülür".

İradə Cəlilova, Sputnik Azərbaycan

BAKI, 14 sentyabr — Sputnik. Bu gün şəhərin küçələrində yol-hərəkəti qaydalarına önəm verməyən, piyada səkiləri ilə hərəkət edən, işıqforun işıqları, yol nişanlarının tələblərinə məhəl qoymayan moped, motosikl və velosiped sürücüləri ilə qarşılaşırıq. "Yol mənimdir, istədiyim kimi gedərəm" fikri ilə yollarda şütüyən belə sürücülərin iştirakı ilə baş verən qəzaların sayı da gündən günə artır.

Təkcə bu ilin 6 ayı ərzində moped və velosiped istifadəçilərinin iştirakı ilə 21 yol-nəqliyyat hadisəsi baş verib. Hadisələr zamanı 8 nəfər ölüb.

Araşdırmalar zamanı moped istifadəçilərinin çoxunun sürücülük vəsiqəsinin olmadığı müəyyən edilsə də, onlar haqqında hüquqi ölçü götürülməyib.

Nəqliyyat məsələləri üzrə ekspert Elməddin Muradlı Sputnik Azərbaycan-a açıqlamasında bildirib ki, moped və velosiped idarə edənlər arasında yol hərəkəti qaydalarını pozanların sayı kifayət qədər çoxdur. Onlar bu nəqliyyat vasitələrini oyuncaq kimi idarə edirlər.

"Yol hərəkəti haqqında qanun"un 38-ci maddəsində onların hüquq və vəzifələri yazılıb. İnzibati Xətalar Məcəlləsinin 338 –ci maddəsində isə, onları gözləyən məsuliyyət növləri barədə qeydlər var. Yəni moped və velosiped istifadəçiləri dəbilqə taxmalı, işıqforun tələblərinə riayət etməli, piyadalara yol verməli, idarə etdikləri nəqliyyat vasitələrini saz vəziyyətdə saxlamalı və digər bu kimi qaydaları yerinə yetirməlidirlər. Bunları pozduqda isə qanunvericilikdə 40 manat cərimə nəzərdə tutulub", - deyə ekspert bildirib.

Onun sözlərinə görə, moped və velosiped iştirakçıları tərəfindən baş verən qəzaların sayı artıq Daxili İşlər Nazirliyini də narahat edir. Bu səbəbdən velosiped və moped istifadəçiləri haqqında ciddi tədbirlər görülür. Lakin bütün tədbirlərə baxmayaraq, hələ də bu tipli yol-nəqliyyat hadisələri baş verir, ölüm, xəsarət alma halları qeydə alınır.

E.Muradlı əlavə edib ki, bu sahədə maarifləndirmə işlərinin aparılmasına ehtiyac var.

Motosikl sürücüsü Royal Hüseynov Sputnik Azərbaycan-a açıqlamasında bildirib ki, velosiped və moped qəzaları zamanı ölümə səbəb nəqliyyat vasitəsini əks istiqamətdə və kaskasız idarə etməkdir.

"Bəzi motosatış şirkətləri 49 kub motosikl-mopedləri (onların idarə edilməsi və satışı zamanı sürücülük vəsiqəsi tələb edilmir) istənilən yaşda yeniyetmə və gənclərə satır. 13-17 yaşlı uşaqlar bu mopedləri alıb, idarə edirlər. Yol hərəkəti qaydalarını düzgün bilməmək, 49 kub-a qədər olan mopedlərdə əyləc və mühərrik sisteminin yaxşı işləməməsi qəzaların baş verməsi ilə nəticələnir", - deyən sürücü bildirir ki, digər ölkələrdə mopedlərin satışı və isarəetməsi zamanı sürücülük vəsiqəsi və A1 kateqoriya tələb edilsə də, Azərbaycanda 49 kub-a qədər vasitələrə kateqoriya tələb edilmir.

R.Hüseynov hesab edir ki, sürücülük vəsiqəsi tələb edilərsə, qəzaların sayı azala bilər:

"Azərbaycanda motosikl sürücülərinə diqqət çox azdır. Avtomobil sürücüləri motosikl sürücülərinə əhəmiyyət vermir, avtomobilin yan güzgülərinə baxmırlar. Əsasən yaşlı sürücülər və qadınlar motosikl sürücülərinə fikir vermirlər. Baş verən qəzaların 70 faizi avtomobil sürücülərinin diqqətsizliyi üzündən baş verir. Motosikl sürücüləri tıxacda dayanıb gözləməməlidir. Ancaq avtomobil sürcüləri motosikl sürücülərinin hərəkətinə mane olmağa çalışırlar".

R. Hüseynovun sözlərinə görə, bəzi şirkətlər çatdırma xidməti üçün işçi götürəndə A kateqoriyası tələb edir: " Düzdür bəzi şirkətlər sifarişlərin çatdırılması üçün limit qoyur. Amma qəzaların baş verməsinə əsas səbəb motosikl və moped idarə edənlərin özgüvəni və qaydalara əməl etməməsidir".Bakı Şəhər Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polkovnik Vaqif Əsədov Sputnik Azərbaycan-a açıqlamasında bildirib ki, bu günə qədər yol hərəkəti qaydalarını pozan 30-a yaxın moped və motosikl hərəkətdən kənarlaşdırılaraq dayanacağa qoyulub.

Yol polisi velosipedçiləri və mopedçiləri nəzərətə götürür
© State Traffic Police Department of the Republic of Azerbaijan

"Onların sürücülük vəsiqəsi olmasa belə, hərəkət iştirakçılarıdır və qanunun tələblərinə uyğun məsuliyyət daşıyırlar. "Sürücülük vəsiqələri yoxdur deyə onlar heç bir məsuliyyət daşımır" fikri düzgün deyil. Onların arasında skeyt, moped, velosiped, motosikl iştirakçıları da var. Bu hərəkət iştirakçılarının nömrəsi, sürücülük vəsiqəsi yoxdur deyə istədikləri kimi hərəkət edə bilməzlər", - deyə V. Əsədov bildirib.

Onun sözlərinə görə, hazırda həmin nəqliyyat vasitələrinin qeydiyyata alınması ilə bağlı məsələlər müzakirə ediləcək.

Qeyd edək ki, 50 kub sm-ə qədər mexaniki nəqliyyat vasitələrinin 18 yaşından yuxarı şəxslərə sürücülük vəsiqəsi olmadan idarə edilməsinə icazə verilir.

"Hazırda isə belə hərəkət istifadəçiləri saxlanılır, sənədləri yoxlanılır. Hadisə baş verdikdən sonra, iştirakçı hadisə yerindən gedibsə və onun sürücülük vəsiqəsi, idarə etdiyi nəqliyyat vasitəsinin nömrəsi yoxdursa, o zaman onun şəxsiyəti təhlükəsizlik kameraları tərəfindən müəyyən edilir. Bizim tanıdan kameralarımız var", - deyə Əsədov vurğulayıb.

Bakı Şəhər Dövlət Yol Polis İdarəsinin əməkdaşı Toğrul Nəsirli də deyib ki, motosiklet və moped idarə edənlər tez-tez yol hərəkəti qaydalarını pozurlar:

"Bəzən onlar sıxlıq olan ərazilərdə moped və motosikllərlə piyaların hərəkəti üçün nəzərdə tutulmuş zolaqlarla hərəkət edirlər. Bu da digər hərəkət iştirakçısı olan piyadalar üçün təhlükə yaradır. Motosiklet və moped idarə edənlər də hərəkət iştirakçılarıdır və qaydalara əməl etməlidirlər".

Nəsirli velosiped sürücülərinə tövsiyə edir ki, onlar üçün ayrılmış zolaqlardan istifadə etsinlər. Bu olmadığı təqdirdə, yol kənarı ilə hərəkət edib, işıqforun, yol nişanlarının tələblərinə riayət etsinlər.

"Bu hərəkət istifadəçiləri düşünməsin ki, qaydaları pozsalar, onları heç kim müəyyən edə bilməyəcək və ya heç bir məsuliyyət daşımırlar. Əməkdşalarımız tərəfindən kobud qayda pozan velosiped istifadəçiləri saxlanılır. Onlar haqqında İnzibati Xətalar Məcəlləsinin 338-ci maddəsinin müəyyən bəndinə əsasən tədbirlər görülür", - deyən T. Nəsirli vurğulayıb ki, məqsəd cərimə tətbiq etmək deyil, amma qayda pozan sürücülərə cərimələr tətbiq edilir.

Sürücülərə motodəbilqədən, şlemdən istifadəni tövsiyə edən Nəsirlinin sözlərinə görə, sürücülük vəsiqəsi olmayan hərəkət istifadəçiləri qayda pozduğu halda cərimə onların şəxsiyyət vəsiqəsi əsasında yazılır.

"Əgər bu vəsait ödənilməsə, müəyyən müddətdən sonra üzərinə dəbbəpulu gəlir. Yenə ödənilməsə, şəxs məhkəməyə verilir. Hər bir vətəndaş, hər bir hərəkət iştirakçısı qanun qarşısında eynidir", - deyə Nəsirli əlavə edib.

361
Böyük Britaniyada epidemioloji vəziyyət

Britaniyada bir aylıq karantin tətbiq ediləcək

5
(Yenilənib 23:52 31.10.2020)
Yeni qaydalara görə, məktəblər və universitetlər, zəruri mağazalar fəaliyyətlərinə davam edə biləcək.

BAKI, 31 oktyabr - Sputnik. İngiltərədə gələn həftədən bir aylıq karantin tətbiq ediləcək.

APA-nın verdiyi xəbərə görə, bu barədə Böyük Britaniyanın Baş Naziri Boris Conson keçirilən mətbuat konfransında məlumat verib.

Conson bildirib ki, 5 noyabrdan etibarən İngiltərədə restoranlar, kafelər, qeyri-zəruri mağazalar, əyləncə məkanları yenidən bağlanacaq. O qeyd edib ki, başqa bir alternativ olmadığı üçün hərəkətə keçməyin zamanı gəlib. Baş Nazir xalqa gələn həftədən etibarən evdə qalmalı olduqlarını deyib. Buna görə insanlar evdən işləməli, zəruri olmadıqca evdən çıxmamalıdırlar.

Conson qeyd edib ki, yeni karantin qaydaları 2 dekabr tarixinə qədər qüvvədə qalacaq. Ancaq yeni qaydalara görə, məktəblər və universitetlər, zəruri mağazalar fəaliyyətlərinə davam edə biləcək.

5
Teqlər:
Koronavirus, Böyük Britaniya, Boris Conson, İngiltərə
Rəşad Alızadə

Kəlbəcərlilər öz yurdlarına onları ölümdən qurtaran həmin QAZ-69-la qayıdacaqlar

80
Kəlbəcərdən çıxanda dörd yaşı olan Rəşad Alızadə o dəhşətli gecəni Sputnik Azərbaycan-a danışıb: "Qadının qucağındakı körpə ölmüşdü. O, qucağında körpənin cəsədi, gecə vaxtı yolu qışqıra-qışqıra qaçırdı.

Şahpəri Abbasova, Sputnik Azərbaycan

BAKI, 31 oktyabr — Sputnik. Rəşad Alızadə Kəlbəcər sakinidir. Oradan çıxanda heç 5 yaşı tamam olmamışdı. Yaşının az olmasına baxmayaraq, hər şeyi bugünkü kimi xatırlayır. Rəşadın ailəsi Kəlbəcərdən əliyalın çıxıb. Onları isə ölümün pəncəsindən QAZ-69 xilas edib. Qəhrəmanımız müharibənin onda buraxdığı acı xatirələri Sputnik Azərbaycan-a danışıb.

"Oradan gələndə, cəmi 4 yaşım var idi. Müharibə elə bir məfhumdur ki, adam onu neçə yaşda olur-olsun, xatırlayır. O ab-hava, o dəhşət insanın yaddaşından silinmir", - deyən Rəşad doğma yurdlarından çıxdıqları günü belə xatırlayır:

"Əslində 2 dəfə çıxmışıq oradan. İlk dəfə Laçın işğal olunanda Kəlbəcər sakinlərini çıxardılar. İkinci dəfə isə Kəlbəcər rayonu işğal olunanda oradan çıxdıq. Rayonun mərkəzində yaşayırdıq. Gecə saatları idi. Rayonun mərkəzinə "Qrad" mərmisi düşdü. Anam həmin vaxt pəncərənin qabağında mənə yemək yedizdirirdi. Ümumiyyətlə həmişə atışma səsi olurdu deyə, biz bu səsləri eşitməyə vərdiş eləmişdik. Gecə saatları olmasına baxmayaraq, elə bil gündüz idi, çünki hər tərəfdə atışma vardı. Anam məni necə bağrına basdısa, həmin ağrını hələ də hiss edirəm. Cavan ailə idilər, anam məni qorumağa çalışırdı, atam da çarəsiz qalmışdı. Çox dəhşətli mənzərə idi. Hər kəsə əmr verildi ki, evlər boşaldılsın. Hamımız QAZ-69-a minib ata-baba yurdumuzu tələsik tərk elədik".

© Photo : Najaf Ruslanoglu
QAZ-69

Alızadələr ailəsi çox böyük əzab-əziyyətlə rayonu tərk etməyə nail olublar:

"Kəlbəcərdən çıxdıq, Murov yolu ilə gəldik. Yolda maşında texniki problemlər oldu. Nəzərə alsaq ki, yayın ən qızmar ayında belə Murov dağında qar olur, aprel ayında vəziyyətin necə olacağını təsəvvür edin. Maşının istilik sistemində problem var idi. İstilik olsun deyə bir neçə heyvanı maşına atmışdılar ki, onların hənirtisi ilə isinə bilək. Yadımdadır ki, mənim boynuma balaca bir quzu qoymuşdular. Yanlarıma heyvan yığırdılar ki, isinə bilək".

Kəlbəcəri tərk edərkən qarşılaşdıqları mənzərə Rəşadın beyninə əbədi həkk olunub:

"Yol gələndə atışma oldu. Gecə saatları idi. Murovu qalxanda Yanışaq kəndini keçəndən sonra bir mənzərə ilə qarşılaşdıq. Qadının qucağında körpəsi var idi. Körpə ölmüşdü. Amma o, övladını buraxmırdı. Qışqıra-qışqıra yolun ortası ilə gedirdi. Sanki havalanmışdı. Bizim xalqımız bundan qat-qat betər dəhşətləri görüb. Bunları unutmaq olmaz".

Rəşad hesab edir ki, bu yaraların acısı ancaq torpaqlarımız tam azad olduqdan sonra bəlkə də bir az azalacaq.

© Photo : Najaf Ruslanoglu
QAZ-69

Qəhrəmanımızın ən böyük arzusu illər əvvəl yol yoldaşları olan QAZ-69-la doğma yurdlarına qayıtmaqdır:

"Çox şükür ki, bu gün müzəffər Ordumuz ard-ardına qələbələr qazanır. Bu xəbərlər biz qarabağlıların acısını az da olsa, azaldır. 1993-ü ildən maşının mühərriki işə salınmayıb. O maşın bizim Kəlbəcər xatirəmizdir, bizi ölümdən qurtarıb. Onu yenidən təmir etmək, qaçqın statusunu Bakıda qoyub, onunla ailəmi Kəlbəcərə aparmaq istəyirəm".

Uşaqlıq illərini məcburi köçkün kimi yaşayan Rəşad deyir ki, ermənilər onunla bərabər 100-lərlə uşağın uşaqlığını əlindən alıblar:

"Biz uşaqlıq yaşamadıq. Bunun bədəlini artıqlaması ilə ödəməlidirlər, ödəyirlər də. Bakıda Kooperativ Texnikumun 2 nömrəli yataqxanasında məskunlaşdıq. Təsəvvür edin, o binaya 365 ailə sığışmışdı. Müstəqilliyin ilk illəri, olduqca çətin dövrlər idi. 9-cu mərtəbəyə vedrə ilə su qaldırırdıq. Evləri qızdıra bilmirdik. İşsizlik baş alıb gedirdi. Normal məktəbimiz belə yox idi".

Həmsöhbətimiz onları xilas edən maşının tarixçəsindən də danışdı: "Maşın 1961-ci ildə istehsal olunub. Ana babama xidməti maşın kimi verilmişdi. O, rayonun baş aqronomu idi. Ata babam isə rayonun "bazarkom"u olub. 1974-cü ildə o maşını babama xidmətlərinə görə hədiyyə ediblər. Babam da maşını qızına cehiz verib. Həmin dövürdən o maşını atam sürüb".

© Photo : Najaf Ruslanoglu
QAZ-69

Həmsöhbətimiz hesab edir ki, erməni vandallarının törətdikləri vəhşiliklərlə bağlı nə qədər yazılsa da, azdır. O hissləri danışmaqla, göstərməklə çatdırmaq mümkün deyil:

"Allah bir də millətimizə bu hissləri yaşatmasın. Doğmalarımızı itirəndə düşünürük ki, bu, belə də olmalıdır. Amma vətəni itirəndə bununla barışmaq olmur. Boynubükük gəzirdik. Bu, millət üçün, dövlət üçün başıaşağılıq idi. İndi prezidentimizin iddialı çıxışlarını, o çıxışların arxasındakı qələbələri gördükcə, ürəyimiz dağa dönür. "Kişilər ağlamaz" deyirlər. Amma mən hər qələbə xəbərini eşidəndə, ağlayıram. Bilirəm ki, bütün azərbaycanlılar mənimlə eyni hissləri keçirirlər".

Rəşadın nənəsi Ruzigarın 100-dən artıq yaşı var. O da tezliklə doğulduğu torpaqlara qayıtmaq arzusundadır: "Ruzigar nənənin 100-dən artıq yaşı var. Nənəm deyir özümü sıxıb saxlamışam ki, ölməyim, Kəlbəcəri görüm. Nənəm dağ adamı idi, Bakının mərkəzində, yataqxana şəraitində yaşamaq onun üçün ölümdən betər idi. Düzdür, Bakı da bizimdir, paytaxtımızdır. Amma insanın doğulduğu yeri heç nə əvəz eləmir. Nənəm gecə-gündüz yatmır, televizorun qabağından çəkilmir. Qələbə xəbərini gözləyir".

80