Bakı metrosunda

Pandemiya dövründə vacib olan aparatlar metroda yoxdur - təhlükəsizliyə riskdir

43
(Yenilənib 13:36 15.09.2020)
"Bakı Metropoliteninin fəaliyyətə başlaması ölkədəki epidemik vəziyyətin normallaşmasından xəbər verir.  Biz bu vəziyyəti qorumaq istəyiriksə, mütləq şəkildə qaydalara riayət etməliyik"

Nigar İsgəndərova, Sputnik Azərbaycan

BAKI, 15 sentyabr — Sputnik. Bakı metrosunun stansiyalarında dezinfeksiyaedici maddələr olan aparatlar axtarmaq fikriniz olsa, həmən daşının. Yəni tamamilə yoxdur demirik, təbii ki, qurumun əməkdaşları üçün iş otaqlarında mütləq var. Amma vasvası sərnişinlər koronavirusa yoluxmamaq üçün “suda boğulanın xilası suda boğulanın öz əlindədir” prinsipini rəhbər tutacaqlar – spirtiniz çantanızda, maskanız üzünüzdə, əlcəyiniz əlinizdə olsun. 

Dərhal təşvişə düşməyə gərək yoxdur, 72 gün fasilədən sonra dünən yenidən fəaliyyətə başlayan Bakı Metropoliteni elə bu qurumun mətbuat katibi Bəxtiyar Məmmədovun dediyinə görə, iki istiqamətdə dezinfeksiya olunur.

"İlk olaraq əsaslı dezinfeksiya aparılır. Yəni gecə növbəsində stansiya və qatarlarda dezinfeksiya işləri öncədən müəyyən edilən qrafik əsasında aparılır. Bütün qatar və stansiyalar tam olaraq dezinfeksiya olunur. Gündəlik olaraq isə bununla bağlı metropolitenin stansiya və qatarlarında fərqli-fərqli yanaşmalar tətbiq olunur. Stansiyalarda əllə təmas olan bütün səthlər birmənalı şəkildə gündə azı 6 dəfə olmaqla xüsusi dezinfeksiyaedici məhlullarla silinib-təmizlənir. Bu dezinfeksiya işlərinin 6 dəfədən də çox olması mümkündür. Bu da təbii ki, hər bir stansiyanın öz xüsusiyyətləri və oradakı sanitar-gigiyenik norma və qaydalardan asılıdır”, - deyə B.Məmmədov Sputnik Azərbaycan-a bildirib.

Dezinfeksiya məhluluna gəlincə, mətbuat katibinin sözlərinə görə, o, insan sağlamlığı üçün tamamilə zərərsiz, iysiz, qoxusuzdur: “Bundan başqa, Nərimanov Elektrik deposuna təmir-baxış üçün gün ərzində bir neçə dəfə yola salınan qatarlar açıq hava şəraitində tamamilə havalandırılır və daha sonra depoya daxil olan qatarlarda sanitar-giyiyenik qaydalara uyğun olaraq bütün tədbirlər görülür".

“Vaqonlarda dezinfeksiyaedici məhlullar niyə yoxdur?” sualına cavab olaraq B.Məmmədov deyib ki, təhlükəsizlik, yanğın təhlükəsinin qarşısını almaq məqsədi ilə bu cür aparatlar Bakı Metropoliteninin stansiya və qatarlarında qoyulmamalıdır:

"Həm də qeyd edim ki, dezinfeksiyaedici məhlulları elə seçmişik ki, onların qalıcılığı uzunmüddətlidir. Ümumiyyətlə, dezinfeksiya baxımından sərnişinlər Bakı Metropoliteninə tam etibar edə bilərlər. Yəni hansısa problemin olması mümkün deyil. Dezinfeksiya məhluluna nəzarət qat-qat artıqdır".

Təhlükəsizlik məqsədilə vaqonlarda dezinfektorların qoyulmasına icazə verilməsə də, metropoliten rəsmisi bildirir ki, sərnişinlər şəxsi gigiyena - tibbi məqsədlə öz çantalarında kiçik ölçülü bu cür vasitələrdən gəzdirə və istifadə edə bilərlər. 

Stansiyalarda müşahidə apararkən diqqətimizi çəkən bir məqamı da soruşmağı vacib saydıq – o da bütün sərnişinlərin hərarətinin ölçülməməsidir.

"Sərnişinlərin hərarəti selektiv qaydada, yəni seçmə üsulla yoxlanılır. Metropolitenin işçi heyətinin xüsusən də günün pik saatlarında bütün sərnişinlərin hərarətini yoxlaması qeyri-mümkündür. Bu səbəbdən müəyyən əlamətlərə görə, yalnız seçmə yolla sərnişinlərin hərarəti yoxlanılır və hərarəti olan sərnişinlər stansiyalara buraxılmırlar", - B.Məmmədov aydınlaşdırıb.

Nəzarətə gəldikdə isə metropoliten rəsmisi qeyd edib ki, stansiyalara daxil olan sənişinlərdən birmənalı şəkildə tibbi maska tələb olunur: "Maskanın ağız və burun boşluğunu örtməsi ilk növbədə hər kəsin öz sosial məsuliyyəti kimi qəbul edilməlidir. Çünki maskanı düzgün taxmaqla, yəni ağız-burun boşluğunu örtməklə ilk növbədə öz sağlamlığımızı qoruyuruq. Digər tərəfdən də bu, həm də ətraf mühitin sağlamlığı deməkdir. "Birlikdə güclü olaq, qalib olaq!" prinsipi də elə buradan qaynaqlanır".

"Bakı Metropoliteninin fəaliyyətə başlaması ölkədəki epidemik vəziyyətin normallaşmasından xəbər verir.  Biz bu vəziyyəti qorumaq istəyiriksə, mütləq şəkildə qaydalara riayət etməliyik. Sosial məsuliyyət mütləq olmalıdır", - deyən B.Məmmədov əlavə edib ki, qatar və stansiyalarda sərnişinlərin maska taxıb-taxmamasını yoxlamaq və nəzarəti gücləndirmək məqsədilə metropolitenin əməkdaşları tərəfindən növbəli prinsip əsasında vəziyyət nəzarətə alınıb.

"Hazırda apardığım müşahidələr və monitorinqlərin nəticəsinə uyğun olaraq deyə bilərəm ki, sıxlıq o həddədir ki, sosial məsafəni də gözləmək mümkündür. Hələlik sərnişinlər tibbi maska taxır, qaydalara əməl edirlər. Bu an üçün vəziyyət normal və sabitdir", - metropoliten rəsmisi razılığını bildirib.

43
Teqlər:
stansiya, Bakı Metropoliteni, dezinfeksiya, virus, pandemiya, Koronavirus, epidemiya, COVID-19
Əlaqədar
Metroya minmək üçün gərək bunları biləsiz
Əziz-xələf koronavirus, səni niyə gizlədirlər?
Yeni metro stansiyası ilin sonunadək təhvil verilə bilər
Bakı metropoliteni sərnişinlərə çağırış etdi: Stansiyanı tərk edənədək maskanı çıxarmayın!
Toyuq budları, arxiv şəkli

Azərbaycanın aparıcı broyler müəssisəsi müflis olur

23
(Yenilənib 16:58 23.01.2021)
“İmişli-Quşçuluq” MMC 2003-cü ildə dövlət qeydiyyatına alınıb. Onun nizamnamə kapitalı 1,073 mln manat, qanuni təmsilcisi isə Gözəl Əmirxan qızı Səfərovadır.

BAKI, 23 yanvar - Sputnik. İmişli rayonunda fəaliyyət göstərən “İmişli-Quşçuluq” MMC iflas mərhələsində olduğunu elan edib.

“Report” xəbər verir ki, “İmişli-Quşçuluq”un müflis elan olunması ilə bağlı məhkəmə baxışı yanvarın 29-u, saat 11:00-da Şirvan Kommersiya Məkəməsində keçiriləcək.

Xatırladaq ki, “İmişli-Quşçuluq” MMC 2003-cü ildə dövlət qeydiyyatına alınıb. Onun nizamnamə kapitalı 1,073 mln manat, qanuni təmsilcisi isə Gözəl Əmirxan qızı Səfərovadır.

23
Şəhid Rahim Mikayılovun dəfni

İtkin xəbərindən bir neçə gün sonra oğlu dünyaya gələn şəhid torpağa tapşırıldı

18
(Yenilənib 16:09 23.01.2021)
Sentyabr ayının 29-da şəhid xəbəri çıxsa da, nəşi gəlmədiyindən itkin kimi qeydə alınan Rahim Mikayılovun şəhid olma xəbəri son iki gündə tam təsdiqlənib

Leyla Abdullayeva, Sputnik Azərbaycan

BAKI, 23 yanvar — Sputnik. Bu gün barəsində 107 gün heç bir xəbər çıxmayan şəhid baş leytenant Rahim Qabil oğlu Mikayılov doğulduğu Quba rayonunun İkinci Nügədi kəndində dəfn olunub. Sentyabr ayının 29-da şəhid xəbəri çıxsa da, nəşi gəlmədiyindən itkin kimi qeydə alınan Rahim Mikayılovun şəhid olma xəbəri son iki gündə tam təsdiqlənib və o, bu gün dəfn olunub.

  • Şəhid Rahim Mikayılov
    © Photo : Courtesy of Leyla Abdullayeva
  • Şəhid Rahim Mikayılovun dəfni
    © Sputnik / Leyla Abdullayeva
  • Şəhid Rahim Mikayılovun dəfni
    © Sputnik / Leyla Abdullayeva
1 / 3
© Photo : Courtesy of Leyla Abdullayeva
Şəhid Rahim Mikayılov

Rahim Mikayılov ailəlidir. Şəhid olandan bir neçə gün sonra oğlu dünyaya gəlib.

Onu da qeyd edək ki, Quba bu gün Vətən müharibəsində qurban verdiyi 48-ci şəhidini dəfn edir.

18
SOCAR-ın baş ofisi, arxiv şəkli

Prezidentdən SOCAR barədə mühüm qərar - Şirkətə bu struktur nəzarət edəcək

15
(Yenilənib 16:59 23.01.2021)
Fərmanla Azərbaycan Respublikası Dövlət Neft Şirkətinin (bundan sonra – SOCAR) fəaliyyətinə ümumi rəhbərliyi və nəzarəti həyata keçirmək üçün SOCAR-ın Müşahidə Şurası (bundan sonra – Müşahidə Şurası) yaradılır.

BAKI, 23 yanvar - Sputnik. Prezident İlham Əliyev Azərbaycan Respublikası Dövlət Neft Şirkətinin idarə edilməsinin təkmilləşdirilməsinə dair tədbirlər haqqında fərman imzalayıb.

Sputnik Azərbaycan-ın məlumatına görə, fərman qabaqcıl təcrübə və müasir idarəetmə tələbləri çərçivəsində Azərbaycan Respublikası Dövlət Neft Şirkətinin fəaliyyətində səmərəliliyi artırmaq, onun idarə edilməsini müasir korporativ idarəetmə standartları nəzərə alınmaqla təkmilləşdirmək məqsədilə imzalanıb.

Fərmanda bildirilir ki, Azərbaycan Respublikasının Dövlət Neft Şirkəti yarandığı dövrdən böyük inkişaf yolu keçərək ölkənin sosial-iqtisadi tərəqqisində mühüm rol oynayıb.

Ümummilli lider Heydər Əliyevin qətiyyətli siyasəti nəticəsində 1994-cü ildən başlayaraq həyata keçirilən uğurlu neft strategiyası Azərbaycan Respublikasının beynəlxalq iqtisadiyyata inteqrasiyasında və ölkəyə xarici investisiyaların cəlb edilməsində müstəsna rol oynamaqla yanaşı, Azərbaycan Respublikası Dövlət Neft Şirkətinin fəaliyyətində mühüm dəyişikliklərlə müşayiət olunub. Xəzər dənizinin Azərbaycan sektorunda yerləşən karbohidrogen yataqlarının işlənilməsinə dair dünyanın qabaqcıl neft şirkətləri ilə bağlanılmış “Əsrin müqaviləsi” respublikanın neft-qaz sənayesinin inkişafında yeni mərhələ olmuşdur. Hazırda Azərbaycan Respublikasının Dövlət Neft Şirkəti neft-qaz hasilatı, nəqli və emalı ilə məşğul olan müəssisədən transmilli şirkətə çevrilərək, iştirakçısı olduğu beynəlxalq layihələrdə Azərbaycan Respublikasını uğurla təmsil edir, ölkənin iqtisadi potensialının güclənməsinə, sosial-iqtisadi tərəqqisinə, eləcə də milli maraqlarımızın həyata keçirilməsinə mühüm töhfə verir.

Qlobal iqtisadiyyatda, o cümlədən xarici neft bazarında baş verən prosesləri və qeyri-müəyyənlikləri nəzərə alaraq, Azərbaycan Respublikası Dövlət Neft Şirkətinin korporativ idarəetmə sisteminin və biznes modelinin təkmilləşdirilməsi yolu ilə onun beynəlxalq mühitdə rəqabətədavamlılığı, orta və uzunmüddətli perspektivdə maliyyə dayanıqlığı, idarəetmənin, habelə sərmayələrin effektivliyinin və aktivlərinin dəyərinin əhəmiyyətli dərəcədə artırılması əsas çağırışa çevrilmişdir.

Fərmanla Azərbaycan Respublikası Dövlət Neft Şirkətinin (bundan sonra – SOCAR) fəaliyyətinə ümumi rəhbərliyi və nəzarəti həyata keçirmək üçün SOCAR-ın Müşahidə Şurası (bundan sonra – Müşahidə Şurası) yaradılır.

Müəyyən edilib ki, Müşahidə Şurası Azərbaycan Respublikası Prezidentinin vəzifəyə təyin və vəzifədən azad etdiyi sədr də daxil olmaqla 7 (yeddi) üzvdən ibarətdir.

3. SOCAR-ın ümumi yığıncağının səlahiyyətlərinin həyata keçirilməsi aşağıdakılara həvalə edilsin:

3.1. Azərbaycan Respublikasının Prezidentinə:

3.1.1. SOCAR-ın yenidən təşkili və ləğvi;

3.1.2. SOCAR-ın Müşahidə Şurasının və icra orqanının üzvlərinin vəzifəyə təyin və vəzifədən azad edilməsi;

3.2. Azərbaycan Respublikasının Prezidenti ilə razılaşdırmaqla Azərbaycan İnvestisiya Holdinqinə:

3.2.1. SOCAR-ın nizamnaməsinin və strukturunun təsdiq edilməsi, nizamnamə kapitalının miqdarının müəyyən edilməsi;

3.2.2. SOCAR-ın illik hesabatlarının, maliyyə hesabatlarının təsdiq edilməsi, mənfəətinin və zərərinin bölüşdürülməsi;

3.2.3. SOCAR-ın dividend siyasətinin təsdiq edilməsi;

3.2.4. SOCAR-ın qiymətli kağızlarının buraxılması barədə qərar qəbul edilməsi;

3.2.5. SOCAR-ın xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), eləcə də müstəqil auditorun rəyi ilə aidiyyəti şəxslə dəyəri SOCAR-ın aktivlərinin 5 (beş) faizini və daha çox hissəsini təşkil edən əqdin bağlanması haqqında qərar qəbul edilməsi.

4. Müəyyən edilsin ki, SOCAR-ın Müşahidə Şurasının səlahiyyətləri aşağıdakılardır:

4.1. SOCAR-ın uzunmüddətli inkişaf strategiyasını təsdiq etmək;

4.2. SOCAR-ın xərclər və gəlirlər smetasını təsdiq etmək və onun icrasına nəzarəti həyata keçirmək;

4.3. SOCAR-ın xalis aktivlərinin dəyərinin 25 (iyirmi beş) faizindən artıq məbləğdə olan əqdin (xüsusi əhəmiyyətli əqdin), eləcə də müstəqil auditorun rəyi ilə aidiyyəti şəxslə dəyəri SOCAR-ın aktivlərinin 5 (beş) faizini və daha çox hissəsini təşkil edən əqdin bağlanması ilə bağlı ümumi yığıncağa təkliflər vermək;

4.4. aidiyyəti şəxslərlə bağlanması nəzərdə tutulan və dəyəri SOCAR-ın aktivlərinin 5 (beş) faizinədək hissəsini təşkil edən əqdləri təsdiq etmək;

4.5. mövcud normativ hüquqi aktların tələbləri nəzərə alınmaqla SOCAR-ın aktivlərinin idarəetməyə verilməsi və özəlləşdirilməsi ilə bağlı əqdlərin bağlanmasına razılıq vermək;

4.6. fəaliyyətinin ayrı-ayrı sahələri üzrə siyasəti, daxili qaydaları, habelə filial və nümayəndəliklərinin əsasnamələrini təsdiq etmək;

4.7. SOCAR-ın korporativ strukturunun və ştat cədvəlinin təsdiq edilməsinə razılıq vermək;

4.8. SOCAR-ın Audit Komitəsini və digər komitələrini yaratmaq, onların əsasnamələrini təsdiq etmək, rəhbərlərini və üzvlərini vəzifəyə təyin və vəzifədən azad etmək;

4.9. bu Fərmanın 3-cü hissəsi nəzərə alınmaqla, Azərbaycan Respublikasının Mülki Məcəlləsi, SOCAR-ın nizamnaməsi və Azərbaycan Respublikasının bu sahədə münasibətləri tənzimləyən digər normativ hüquqi aktları ilə Müşahidə Şurasının səlahiyyətlərinə aid edilmiş digər məsələləri həll etmək.

5. Azərbaycan İnvestisiya Holdinqi:

5.1. SOCAR-ın idarə olunmasına dair korporativ idarəetmə standartlarını, habelə SOCAR-ın idarəetmə orqanlarının üzvlərinin fəaliyyətinin qiymətləndirilməsi sistemini altı ay müddətində təsdiq etsin;

5.2. beynəlxalq məsləhətçi şirkət cəlb etməklə, SOCAR-ın mövcud müqavilə öhdəliklərinə riayət olunması şərtilə onun hüquq, maliyyə, vergi və kommersiya sahələrində fəaliyyətinin nəticələrinin diaqnostikasının aparılmasını altı ay müddətində təmin edib nəticəsi barədə Azərbaycan Respublikasının Prezidentinə məlumat versin;

5.3. bu Fərmanın 5.2-ci bəndində nəzərdə tutulan diaqnostika başa çatdıqdan sonra onun nəticəsindən asılı olaraq SOCAR-ın yeni nizamnaməsinin və strukturunun layihəsini iki ay müddətində hazırlayıb razılaşdırılmaq üçün Azərbaycan Respublikasının Prezidentinə təqdim etsin;

5.4. bu Fərmandan irəli gələn digər məsələləri həll etsin.

6. Azərbaycan Respublikasının Nazirlər Kabineti:

6.1. SOCAR-ın Müşahidə Şurasının yaradılması ilə əlaqədar onun nizamnaməsinin 4-cü və 5-ci hissələrinin bu Fərmana uyğunlaşdırılmasına dair təkliflərini 15 (on beş) gün müddətində Azərbaycan Respublikasının Prezidentinə təqdim etsin;

6.2. Azərbaycan Respublikası Prezidentinin aktlarının bu Fərmana uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etsin;

6.3. Azərbaycan Respublikası Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat versin;

6.4. mərkəzi icra hakimiyyəti orqanlarının normativ hüquqi aktlarının və normativ xarakterli aktların bu Fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının Prezidentinə məlumat versin;

6.5. bu Fərmandan irəli gələn digər məsələləri həll etsin.

15