Tibbi maskada olan məktəblilər, arxiv şəkli

Yağışdan çıxdıq, yağmura düşdük Valideynlərin virus xofunu necə aradan qaldıraq?

96
(Yenilənib 01:13 02.09.2020)
Məktəblər qapadılanda hamı tədrisin keyfiyyətinin aşağı düşməsindən şikayət edirdi. İndi tədris prosesi bərpa edilir, hamı qorxusundan danışır.

Zülfiyyə Quluyeva, Sputnik Azərbaycan

BAKI, 1 sentyabr — Sputnik. Sentyabrın 15-dən etibarən Azərbaycanın ümumtəhsil müəssisələrində yeni tədris ilinə mərhələli şəkildə başlanılması müəllim və şagirdlər arasında virusa yoluxma ilə bağlı narahatlıqlar yaradıb. Hətta bəzi valideynlər siniflər üzrə yaradılan WhatsApp qruplarında uşaqlarını məktəbə göndərməklə onların sağlamlığını təhlükəyə atdıqlarını, bu səbəbdən övladlarını dərsə göndərməyəcəklərini söyləyiblər. Valideynlər bu barədə Facebook sosial şəbəkəsində də paylaşımlar ediblər.

Təhsil naziri Emin Əmrullayev koronavirus pandemiyası dövründə məktəblərdə xüsusi qaydaların tətbiq olunacağını açıqlasa da, göründüyü kimi, valideynlər arasında narahatlıq qalmaqdadır.

Halbuki yeni tədris ilinə başlayan ölkələrin çoxunda Azərbaycanla oxşar qaydalar tətbiq edilib. Buraya müəllim və şagird heyətinin gündəlik temperaturunun ölçülməsi, tibbi maskadan istifadə, eləcə də koronavirus qeydə alınacaq məktəblərdə lokal olaraq dərslərin dayandırılması və sair profilaktik tədbirlər daxildir. Azərbaycanda da koronavirusa yoluxma qeydə alınacaq məktəblərdə lokal tədbirlərin görülməsi nəzərdə tutulub. Qonşu Rusiyada isə koronavirusa yoluxma qeydə alınan məktəbin yox, ancaq siniflərin karantinə alınması nəzərdə tutulub.

Sputnik Azərbaycan yeni təklif edimiş qaydalar əsasında tədrisin bərpasının müəllim və şagirdlər arasında virusa yoluxma riskini və əlavə hansı tədbirlərin tətbiqinə ehtiyac olduğunu araşdırıb.

Səhiyyə Nazirliyinin baş infeksionisti Cəlal İsayev bildirib ki, qapalı məkanlarda xəstəliyin yayılmasına əlverişli şərait yaranır. Bu baxımdan valideynlərin narahatlığı başa düşüləndir: "Hələ ki, məktəblərlə bağlı qaydalar Operativ Qərargah tərəfindən təsdiqlənməyib. Amma bəzi məsələlər var ki, məktəblərdə ona əməl edilməsi çox vacibdir. Çünki məktəblər qapalı məkandır. Qapalı mühitdə isə bir nəfərdə virusa yoluxma olursa, digərləri də müşahidə altına alınmalıdır. Bu məsələyə təhsil müəssisələrində necə əməl ediləcək, artıq bu, Operativ Qərargahın qərarından asılı olacaq".

C. İsayev ən vacib şərtin məktəblərə virusa yoluxma olan ailələrdən gələn şagirdlərin buraxılmaması olduğunu söyləyir:

"Nazir də qeyd etdi ki, hansı ailədə virusa yoluxma halı varsa, o evdən şagird məktəbə gəlməməlidir. Burada söhbət təkcə şagirdin yox, məktəblinin ailəsinin də sağlamlığından gedir. Bundan əlavə, övladında virusa yoluxma əlamətləri hiss edən valideyn uşağını məktəbə göndərməməlidir. Evdə kimsə xəstədirsə, virusla bağlı test aparılıb müsbət nəticə əldə edildikdən sonra şagird məktəbə göndərilməlidir. Bütün bu tələblərə əməl edilməlidir ki, biz maksimum məktəblərdə virusa yoluxma riskini azaldaq".

C.İsayev şagirdlər arasında virusa görə kütləvi test aparılması ilə bağlı səslənən fikirləri düzgün saymır. O deyir ki, ancaq şübhəli məqam olarsa, şagirdlərdən test götürülməlidir.

Təhsil üzrə ekspert Kamran Əsədov isə bildirib ki, məktəblərdə koronavirusa yoluxma riskini azaltmaq üçün dünyanın əksər ölkələrində tətbiq edilən qaydalardan istifadə edilməlidir: "Sinqapurda və Yaponiyada təhsilalanların məktəbin girişində yox, sinifdə temperaturları ölçülür. Çünki bayırdan gələn şagirdin temperaturu otaqda fərqli ola bilər. Fikrimcə, eyni qayda bizdə də tətbiq olunmalıdır. Bundan əlavə, şagirdlər arasında təhsil prosesində yoluxma baş verdikdə həmin sinifdə təhsil dayandırılmalıdır. Buna görə bütün məktəbdə, yaxud digər məktəblərdə təhsili dayandırmaq düzgün deyil. Azərbaycanda da bunun tətbiqi düzgündür".

K. Əsədovun sözlərinə görə, bu gün yaranan suallardan biri məktəbdə temperaturu olan şagirdlərin hansı formada karantinə alınacağı ilə bağlıdır: "Ola bilər ki, dərs prosesində hansısa şagirdin temperaturu yüksəlsin. Bu zaman həmin şagirdin evə, yaxud müalicə müəssisəsinə göndəriləcəyi dəqiqləşdirilməlidir. Bu məsələ qaydalarda öz əksini tapmalıdır".

K.Əsədov deyir ki, yeni dərs ilində məktəblərdə virusa yoluxma riskini azaltmaq üçün atılacaq daha bir addım pedaqoji heyətlə bağlı olmalıdır:

"Mümkün qədər yeni tədris ilində yaşlı və yanaşı xəstəlikləri olan müəllimləri gənc və sağlam müəllimlər əvəzləməlidir. Yaşı 50-dən keçən müəllimlər yalnız onlayn təhsilə cəlb olunmalıdır. Fələstində bir müəllimin 6 müəllim həmkarını yoluxdurması faktı baş verib. Ona görə də tədris həyata keçirilən təhsil müəssisələrində yoxlama çox obyektiv və dəqiq aparılmalıdır. Əks halda bizi çox çətin dövr gözləyəcək".

K. Əsədov bildirir ki, bununla yanaşı, müəllimlər tərəfindən şagirdlərin ailələrində sağlamlıqla bağlı gündəlik sorğu-sual aparılmalıdır: "Düzdür, əksər şagirdlər ailədə yoluxma faktını gizlədə bilərlər. Dövlət İmtahan Mərkəzinin keçirdiyi imtahanda da bununla bağlı abituriyentlər bəyannamə imzalasalar belə, aralarında ailədə yoluxma faktını gizlədənlər oldu. Amma hər bir halda şagirdlərin ailələrində virusa yoluxma məsələsi diqqətdə saxlanılmalıdır".

96
Əlaqədar
Maskalı, yuxulu, amma əzmli: onlar bu gün məktəbə getdilər
Tələbələrin Bakıya gəlməsinin mexanizmi işlənilir
Valideynlərin uşaqlarını məktəbə göndərməmək hüququ olacaq
"Distant təhsil metodu real, ənənəvi təhsili əvəzləyə bilməz"
Təhsil Nazirliyi valideynlərə xəbərdarlıq edib
Azərbaycanın Xalq artisti Emin Ağalarov

Emin Ağalarov Fatimə adlı qıza həsr etdiyi mahnını paylaşdı

26
(Yenilənib 23:47 20.09.2020)
Emin Ağalarov: "Bəlkə də bu mənim üçün çox gözlənilməz bir mahnıdır. Ancaq həmişə olduğu kimi - çox ürəyimcədir və hər şey sənin sayəndədir, Maks".

BAKI, 20 sentyabr — Sputnik. Azərbaycanın xalq artisti Emin Ağalarov "Fatimə" adlı yeni mahnısının təqdimatını keçirib. Sputnik Azərbaycan-ın məlumatına görə, müğənni mahnını bütün Fatimə adlı qızlara həsr edib.

Ağalarov yeni kompozisiyanı özünün YouTube kanalında paylaşıb. Mahnıya sözləri və musiqini tanınmış rusiyalı ifaçı və bəstəkar Maksim Fadeyev yazıb.

"Bəlkə də bu mənim üçün çox gözlənilməz bir mahnıdır. Ancaq həmişə olduğu kimi - çox ürəyimcədir və hər şey sənin sayəndədir, Maks", - deyə Ağalarov yazıb.

Bu yeni lirik mahnı müğənninin pərəstişkarlarının da xoşuna gəlib. Eyni zamanda, onların bir çoxuna Fadeyevin qeyri-adi şərq adı olan Fatimədən istifadə edərək mahnı yazması qəribə gəlib.

https://www.youtube.com/watch?v=Wyzb1C0j_8U&feature=emb_logo

Maksim Fadeyev Azərbaycanın xalq artistinin bir çox hitlərinin, o cümlədən "Azərbaycan", "Gəl bir-birimizi tapaq", Bağışla mənim məhəbbətim", "Birinci Qar" hitlərinin, Ani Lorakla "Vidalaşmaq", "Deyə bilmərəm" kimi məşhur duetlərinin, həmçinin onun "MMM"adlı son hitinin müəllifidir.

Ağalarov "World Music Awards", "Azərbaycandan Ən Yaxşı İfaçı", "Qızıl Qrammofon", "MUZ-TV Mükafatı" və s. kimi beynəlxalq mükafatların laureatıdır. O, dünyanın müxtəlif ölkələrində konsertlərlə çıxış edir. Müğənninin musiqi xəzinəsində doqquz ingilis dilli albom, "Warner Music" və "Sony ATV Music Publishing" aparıcı musiqi şirkətləri ilə müqavilələr var.

26
Teqlər:
xalq artisti Emin Ağalarov, Emin Ağalarov, Emin Ağalarov
Əlaqədar
Çox sağ ol, müəllimim! Emin yeni mahnıya görə Fadeyevə təşəkkür edib
Emin Alyona Qavrilovadan boşanmasının səbəbini açıqladı
Emin onun həyatına təsir edən qeyri-adi oğlana sənədli film həsr edib
Emin Ağalarovdan şəhidlərimizlə bağlı paylaşım
Emin Ağalarovun oğlu yeni klipini təqdim edib

Azərbaycanda qeyri-adi tamaşa - Kələxana türbələri canlı dekorasiya oldu

136
(Yenilənib 22:38 20.09.2020)
Rejissor Cavid Təvəkkül: "Bu tipli tamaşalar həm tarixi abidələrin tanınması, həm də pandemiya dövründə aktyorların boş qalmaması üçün bir imkan idi"

Şahpəri Abbasova, Sputnik Azərbaycan

BAKI, 20 sentyabr — Sputnik. Azərbaycan teatr tarixində bir ilkə imza atıldı və bu imzanı Mingəçevir Dövlət Dram teatrı atdı. Şamaxının Kələxana kəndində yerləşən XVI əsrə aid "Kələxana türbələri"ndə şifahi xalq ədəbiyyatı incilərindən sayılan "Apardı sellər Saranı" xalq dastanı əsasında hazırlanan "Sara" tamaşasıyla Mingəçevir Dövlət Dram teatrı həm də 52-ci teatr mövsümünü açıq elan etdi. Tamaşanın quruluşçu rejissoru Cavid Təvəkkül tamaşa barədə Sputnik Azərbaycan-a danışıb:

"Canlı dekorasiyadan istifadə edilərək açıq səma altında oynanılan bu tamaşa teatr tarixində ilk idi. Azərbaycan teatrları arasında Mingəçevir teatrı Kələxana türbələrindən canlı dekorasiya kimi istifadə edərək sözün həqiqi mənasında bir ilkə imza atdı".

Rejissor əlavə edib ki, tamaşanın qurluşundan tutmuş nümayişinə qədər Nazirlər Kabineti Yanında Operativ Qərargahın bütün şərt və tələblərinə əməl edilib:

"Mizanlardan başlayaraq premyera öncəsinə kimi Operativ Qərargahın tövsiyələri, tələbləri nəzərə alınıb. Tamaşadan öncə tibbi personalın iştirakı ilə yaradıcı heyət yoxlanışlardan keçdi və premyeraya izn verildi. Tamaşa uğurla nümayiş olundu".

  • Kələxanada tamaşa
    © Sputnik / Shahperi Abbasova
  • Kələxanada tamaşa
    © Sputnik / Shahperi Abbasova
  • Kələxanada tamaşa
    © Sputnik / Shahperi Abbasova
  • Kələxanada tamaşa
    © Sputnik / Shahperi Abbasova
  • Kələxanada tamaşa
    © Sputnik / Shahperi Abbasova
1 / 5
© Sputnik / Shahperi Abbasova
Kələxanada tamaşa

Qeyd edək ki, "SARA" tamaşası şifahi xalq ədəbiyyatı nümunələrindən sayılan "Apardı sellər Saranı" xalq dastanının motivləri əsasında hazırlanıb. Tamaşada respublikanın xalq artisti Ella Yaqubova, əməkdar artist Şıxı Yaqubov, tərəqqi medallı Aydın Quliyev və teatrın gənc aktyorları rol alıb.

Onu da qeyd edək ki, bu tamaşada nümayiş boyu əntiq teatra cəhdlər təqdim edilib. Açıq səma altında tarixi abidələrdən fon kimi istifadə olunub. Yəni, bu dəfə adət etdiyimiz kimi dekorasiyalar dekoratorlar tərəfindən tamaşa üçün xüsusi olaraq hazırlanmayıb, tarixi memarlıq abidələri canlı dekorasiya rolunu oynayıb.

Tarixi abidələrinə, coğrafi şəraitinə, müasir infrastrukturuna görə qədim Şamaxı rayonu daim turistləri özünə cəlb edib. Sözügedən türbələr Şamaxı turizm xəritəsinə daxil ediləŕək istər xarici, istərsə də yerli turistlər tərəfindən tez-tez ziyarət olunan məkanlardan hesab olunur.

Cavid bəyin sözlərinə görə, bu tipli tamaşaların davamı gələ bilər:

"Bu tipli tamaşalar həm tarixi abidələrin tanınmasına, həm də pandemiya dövründə aktyorların boş qalmaması üçün bir imkan idi. Düşünürəm ki, bunun davamı gələcək. Şirvanşahlar sarayında, Xan sarayında da tamaşalar hazırlana bilər".

136
Teqlər:
Sara, Mingəçevir Dövlət Dram Teatrı, Nazirlər Kabineti yanında Operativ Qərargah, tamaşa, teatr, Şamaxı
Əlaqədar
Yararsız hala düşmüş Kələxana türbələri