Bakıda karxana, arxiv şəkli

Daşı daş üstünə qoya bilməyəcəyik... Belə getsə, ölkədə dişə çəkməli daş da olmayacaq

649
(Yenilənib 23:08 28.08.2020)
İndi yeni mərhələ başlayır: Karxanalar bağlanır, mişar daşının və müvafiq olaraq mənzillərin qiymətinin qalxması gözlənilir.

Xalid Məmmədov, Sputnik Azərbaycan

BAKI, 29 avqust — Sputnik. "Yaxın gələcəkdə bir sıra karxanalar öz fəaliyyətini dayandıra bilər. Bu gün tikinti bazarında müxtəlif kirəmit maddələr, rezin və digər süni materiallardan hazırlanan tikinti materialları meydana çıxıb və ona görə karxanaların sayının azalması təbiidir. 

Karxanaların ətraf mühitə mənfi təsiri var və buna görə onlara fərdi qaydada illik ödəmələr müəyyən edilir". Sputnik Azərbaycan xəbər verir ki, bunu Ekologiya və Təbii Sərvətlər Nazirliyi Dövlət Ekoloji Təhlükəsizlik Xidmətinin rəisi Hikmət Əlizadə deyib.

Qeyd edək ki, hazırda Bakıda bir mişar daşının qiyməti təxminən 45-50 qəpiyədir. Əvvəlki illərə nisbətən mişar daşının qiymətində artım var. Bəs bütün bu proseslər tikinti bazarına və mişar daşının qiymətinə necə təsir edəcək?

İqtisadçı-ekspert Natiq Cəfərli Sputnik Azərbaycan-a deyib ki, daş karxanaların fəaliyyətini ekoloji standartlara uyğunlaşdırmaq üçün qanunvericilikdə kifayət qədər müddəalar var: "Daş karxanalarının fəaliyyətini ekoloji standartlara uyğunlaşdırmaq daha doğrudur. Əgər bir sıra karxanalar fəaliyyətini dayandırsa, bu, tikinti bazarında qiymət artımına, tikinti obyektlərində müəyyən materialların çatışmazlığına səbəb ola bilər. Ona görə də ekoloji standartların tətbiqi ilə karxanaların fəaliyyətinə şərait yaratmaq daha doğru yanaşma olardı".

"İndiki dövrdə düşünmürəm ki, çox qısa zamanda daş karxanaların məhsullarını əvəz edə biləcək tikinti materialları bazara çıxarılsın. Daş karxanaların məhsullarını əvəz edə biləcək yeni tikinti materialları bazara çıxarılsa belə, insanlar onların qiyməti ilə mişar daşının qiyməti arasındakı fərqə baxacaqlar. Hansı daha sərfəli və dayanıqlı olacaqsa, əhali ona üstünlük verəcək. Bunu da bazar tənzimləyəcək. Mişar daşının qiyməti qalxacaqsa, bunun evlərin qiymətinə təsiri olacaq", – deyə ekspert qeyd edib.

İqtisadçı-ekspert Rəşad Həsənov isə Sputnik Azərbaycan-a deyib ki, daş karxanaların hansı əsaslarla bağlanacağı məsələsinə diqqət etmək lazımdır: "Bir var ki, bazarda tələb aşağı düşür, məhsula ehtiyac olmur və daş karxanalar fəaliyyətini dayandırır. Belə olanda bunun mişar daşının qiymətinə ciddi təsiri olmur. Amma bir də var ki, ekoloji standartlara cavab verməyən müəssisələrin fəaliyyəti dayandırılır. Yəni ekoloji baxımdan daş karxanalarının fəaliyyəti məqsədəuyğun hesab edilmirsə, fəaliyyəti dayandırılırsa, bu zaman bazarda təklif aşağı düşəcək və bazarda qiymətlər artacaq".

Qeyd edək ki, Ekologiya və Təbii Sərvətlər Nazirliyi Dövlət Ekoloji Təhlükəsizlik Xidmətinin rəisi Hikmət Əlizadə bildirib ki, 3 il əvvəl Azərbaycanda 800-dən artıq daş, çınqıl və qum karxanası fəaliyyət göstərirdisə, hazırda onların sayı 300-ə düşüb: "Ümumilikdə fəaliyyəti dayandırılan karxanalara tətbiq edilən ziyanın həcmi 30 milyon manat həddində olub. Bunun 15 milyon 600 min manatı Ətraf Mühitin Mühafizəsi Fonduna artıq ödənilib, ödənilməyən hissəsi ilə əlaqədar hüquq-mühafizə orqanlarına müraciət edilib, hətta bir hissəsi barədə qərar çıxarılıb və məcburi qaydada ödənilməsi həyata keçiriləcək".

649
Kino lenti, arxiv şəkli

"Kinematoqrafiya uğurlarına görə" beynəlxalq mükafatına kim layiq görüldü?

14
(Yenilənib 23:58 01.12.2020)
Festival zamanı dünyanın hər bir ölkəsindən olan kino mütəxəssisləri öz filmlərini nümayiş etdirir, sərgilərdə, treninqlərdə, seminarlarda iştirak edirlər.

BAKI, 1 dekabr — Sputnik. "Narimanfilm" kinostudiyasının direktoru, Azərbaycan Respublikası Əməkdar mədəniyyət işçisi Nəriman Məmmədov 2020-ci il noyabrın 27-də 13-cü Global Film Festival Noida və "MARWAН STUDIOS" (Hindistan) tərəfindən kinematoqrafiyanın irəliləyişi işində göstərdiyi əməyinə görə "Kinematoqrafiya uğurlarına görə" beynəlxalq mükafatı ilə təltif olunub.

Sputnik Azərbaycan-ın məlumatına görə, 13-cü Global Film Festival Noida 2020-ci il noyabr ayının 26-28 tarixlərində Hindistanda, Noida şəhərində yerləşən "MARWAН STUDIOS"-da keçirilmişdir. Bu, tələbələr, entuziastlar və kino professionalları daxil olmaqla, bütün dünya kinematoqrafiya cəmiyyəti ilə birlikdə kinonun gücünü tərənnüm edən ən böyük və tanınmış festivallardan biridir. Festival zamanı dünyanın hər bir ölkəsindən olan kino mütəxəssisləri öz filmlərini nümayiş etdirir, sərgilərdə, treninqlərdə, seminarlarda iştirak edirlər. Festivalın prezidenti məşhur Hindistan rejissoru, prodüseri, jurnalisti, həmçinin, Asiya Kino və Televiziyası Akademiyasının təsisçisi və prezidenti cənab Sandip Marvadır.

14
Teqlər:
tələbələr, rejissor, Hindistan, prodüser, mükafat
Quşlar

Quş qripi ilə bağlı epizootoloji monitorinqlər keçirilib

7
(Yenilənib 23:48 01.12.2020)
Monitorinqlər zamanı çöl quşlarından götürülmüş patoloji materiallar və ev quşlarından alınan diaqnostik nümunələr AQTİ-nin Mərkəzi Baytarlıq Laboratoriyasında müayinə olunub.

BAKI, 1 dekabr — Sputnik. Respublika ərazisini yüksək patogen quş qripi xəstəliyindən qorumaq məqsədilə mövsümü epizootoloji monitorinqlərə başlanılıb. İlk monitorinq 2-6 noyabr 2020-ci il tarixlərində Azərbaycan Respublikası Qida Təhlükəsizliyi Agentliyi, Azərbaycan Respublikası Ekologiya və Təbii Sərvətlər Nazirliyi, Azərbaycan Respublikası Kənd Təsərrüfatı Nazirliyi yanında Aqrar Xidmətlər Agentliyinin və Azərbaycan Qida Təhlükəsizliyi İnstitutunun nəzdində fəaliyyət göstərən laboratoriyaların əməkdaşlarının iştirakı ilə keçirilib. Agentlikdən Sputnik Azərbaycan-a verilən məlumata görə, çöl quşları arasında monitorinqlər Abşeron yarmadasını, Şirvan Milli Parklarının ərazisini, Ağzıbir ovçuluq təsərrüfatını və Qızılağac Milli Parkı ilə yanaşı, su-bataqlıq ərazilərini, eləcə də respublikamızın dənizsahili zonalarını əhatə edib. Eyni zamanda, Bakı şəhərindəki, Abşeron, Şabran, Salyan və Lənkəran rayonlarındakı ailə təsərrüfatlarında müxtəlif növ quşdan, o cümlədən Bakı və Sumqayıt şəhərlərindəki, Abşeron, Salyan, Neftçala, Sabirabad, Lənkəran, Cəlilabad, Xızı və Siyəzən rayonlarında yerləşən sənaye əsaslı iri və kiçik həcmli quşçuluq müəssisələrində ev quşundan diaqnostik materiallar götürülərək laboratoriya müayinələrinə cəlb edilib.

Monitorinqlər zamanı çöl quşlarından götürülmüş patoloji materiallar və ev quşlarından alınan diaqnostik nümunələr AQTİ-nin Mərkəzi Baytarlıq Laboratoriyasında müayinə olunub. Müayinə zamanı yüksək patogen quş qripi xəstəliyinin törədicisi aşkar edilməyib.

Qeyd edək ki, keçirilən monitorinqlər çərçivəsində xəstəlik əlamətləri müşahidə edilən quşlara və ya quş cəsədinə rast gəlinməyib.

7