Sabit Orucov küçəsində avtomobil hərəkatı

Sürücülərin nəzərinə! Bu yolda istiqamət dəyişdi - cərimə edilə bilərsiniz - FOTO

174
(Yenilənib 15:18 10.08.2020)
"Hazırkı vəziyyət onu bir daha sübut edir ki, sürücülər yollarda nişanlama xətlərinə baxmır, şüuraltı hərəkət edirlər" - Elməddin Muradlı

İradə Cəlilova, Sputnik Azərbaycan

BAKI, 10 avqust — Sputnik. Bu gün səhər saatlarından "Xətai" metrosu yaxınlığında, Sabit Orucov küçəsində yol nişanlarında dəyişiklik edilib. Əvvəllər iki istiqamətli olan yol bir istiqamətli edilib.

Bu barədə Sputnik Azərbaycan-a sürücülərdən biri məlumat verib.

O bildirib ki, sürücülərin əksəriyyəti bu dəyişiklikdən xəbərsiz olduğu üçün qarşı yola çıxaraq, qayda pozmaqla yanaşı, tıxacın yaranmasına səbəb olub.

© Sputnik / Irade JELIL
Sabit Orucov küçəsində avtomobil hərəkatı

Nəqliyyat məsələləri üzrə ekspert Elməddin Muradlı Sputnik Azərbaycan-a açıqlamasında bildirib ki, belə hallarla bağlı müvafiq qurum mətbuat vasitəsilə ilə sürücülərə xəbərdarlıq etməlidir. Bundan sonra həmin yol nişanları çəkilib, quraşdırılmalıdır: "Düzdür, bəzi sürücülər öz adətlərindən əl çəkmirlər. Belə düşünürlər ki, həmişə haradan getmişəmsə, yenə oradan getməliyəm. Amma qaydalar hamı üçündür və yol xətlərində dəyişiklik varsa, hamı buna əməl etməlidir. Hazırkı vəziyyət onu bir daha sübut edir ki, sürücülər yollarda nişanlama xətlərinə baxmır, şüuraltı hərəkət edirlər".

© Sputnik / Irade JELIL
Sabit Orucov küçəsi

Ekspert həmçinin vurğulayıb ki, bu, həm də müvafiq qurumların məsuliyyətsizliyidir. Həmin qurumlar yolda dəyişikliklə bağlı mətbuatda ətraflı məlumat verməli idi:

"Bu qayda pozuntusu İnzibati Xətalar Məcəlləsinin 327.4 maddəsilə tənzimlənir. Və sürücülər birtərəfli hərəkət yollarında müəyyən edilmiş hərəkət istiqamətinin əksinə hərəkət etdiklərinə görə 100 manat - 4 bal cərimə edilirlər".

Bakı Şəhər Dövlət Yol Polisi İdarəsinin (BŞDYPİ) şöbə rəisi Vaqif Əsədov Sputnik Azərbaycan-a bildirib ki, bir müddət öncə Xətai rayonunda iki küçə - Sabit Orucov və ona paralel küçələrdə hərəkətin istiqaməti dəyişdirilib. Sürücülərə qaydalara əməl etmək tövsiyə edilir.

174
Əlaqədar
BNA: Bakı küçələrində sıxlıq müşahidə olunur - FOTO
Bakı tıxaclarına necə də dərman olardı – yeniliyi məmurlara təqdim elədilər - VİDEO
Bu günü də gördük: Daha Xırdalan dairəsində ilişib qalmayacaqsınız
Avtomobil tıxacı, arxiv şəkli

Yolları zəbt etmək üçün icazə almaq lazımdır

33
(Yenilənib 19:50 19.09.2020)
Bir çox tikinti şirkətləri müvəqqəti narahatlığa görə üzr istəyib küçə və yolları aylarla bağlı saxlayır, küçələrdə avtomobillərin hərəkətinə maneə yaradır, süni tıxaca səbəb olurlar.

İradə Cəlilova, Sputnik Azərbaycan

BAKI, 19 sentyabr — Sputnik. "Paytaxtın küçələri darısqaldı", "qanunsuz park edilmiş avtomobillər yolları darlaşdırır", "tıxaclara səbəb avtomobil sıxlığıdır" və s. bu kimi fikirlərlə tez-tez qarşılaşırıq.

Bəli, etiraf etməliyik ki, paytaxtda avtomobil sıxlığı var. Ancaq küçələrdə sıxlıq və tıxac çox zaman süni şəkildə yaradılır - yolların və küçələrin tikinti şirkətlərinin qanunsuz mənimsəmələri, ağır texnikalarının yerləşdirilməsi, qanunsuz hasarlamalar və s. nəticəsində.

Bir çox tikinti şirkətləri müvəqqəti narahatlığa görə üzr istəyib küçə və yolları aylarla bağlı saxlayır, küçələrdə avtomobillərin hərəkətinə maneə yaradır, süni tıxaca səbəb olurlar.

Bəzi şirkətlər isə zəhmət çəkib heç müvəqqəti narahatlığa görə üzr istəməyi də özlərinə rəva bilmirlər. İstədikləri əraziyə texnikalarını yerləşdirib, işlərini görürürlər. Sanki elə belə də olmalı imiş.

Ötən gün belə hallardan biri Fəhlə Prospektində yaşanıb. Belə ki, dördzolaqlı yolun iki zolağı böyük texnika tərəfindən zəbt edilib. Gündüz saatlarında belə texnikanın yolda yaratdığı problem o qədər nəzərə çarpmasa da, axşam saatlarında böyük sıxlığa və tıxaca səbəb olur.

Tikinti şirkətləri yolları hansı halda zəbt edə bilər? Sputnik Azərbaycan bu məsələni araşdırıb.

Yol-nəqliyyat məsələləri üzrə ekspert Azər Allahverənov Sputnik Azərbaycan-a açıqlamasında bildirib ki, müşahidələr əsasında yolların və səkilərin çox zaman tikinti şirkətləri tərəfindən zəbt edildiyini deyə bilər:

"Çox zaman tikinti şirkətləri hərəkət zolaqlarını zəbt edir. Bu da yollarda hərəkət iştirakçılarına, hərəkətin intensivliyinə mane olur. Həmin yolda hərəkətin sürəti azalır və sıxlıq müşahidə edilir. Bəzi hallarda yollar zəbt edilsə də, avtomobillər üçün alternativ yollar təqdim edilmir.

A.Allahverənov bildirir ki, yolların zəbt edilməsi ilə bağlı, qanunvericilikdə müddəalar olsa da, bu proses xüsusi qurumlarla razılaşdırıldıqdan sonra baş tutmalıdır. Bu halda belə yol müəyyən müddətə bağlana bilər:

"Yollar tikinti şirkətləri tərəfindən bütünlüklə zəbt edilə bilməz. Bu o zaman baş verə bilər ki, hərəkət iştirakçılarına alternativlər təqdim edilsin".

Mütəxəssisin fikrincə, bu məsələdə ictimai rəyin də kifayət qədər təsiri var.

Hüquqşünas Fərid Həmidlinin sözlərinə görə, "Avtomobil yolları haqqında qanun"un 15-1-ci maddəsinə görə, yaşayış məntəqələrinin hüdudlarında yerləşən avtomobil yolları istisna olmaqla, ümumi istifadədə olan avtomobil yolları üçün qorunma (mühafizə) zolaqları müəyyən edilir:

"Ümumi istifadədə olan avtomobil yollarının qorunma (mühafizə) zolaqlarında avtomobil yollarının tikintisi, saxlanılması, təmiri, yenidən qurulması və yol hərəkətinin təhlükəsizliyi, sərnişin və yük daşımaları sahəsində nəzarəti həyata keçirən müvafiq icra hakimiyyəti orqanının fəaliyyəti ilə əlaqədar olan tikililər və qurğular, habelə yolkənarı xidmət obyektləri istisna edilməklə, digər tikililərin və qurğuların yerləşdirilməsi qadağandır".

Hüquqşünasın sözlərinə görə, qurğular yerləşdirilən zaman avtomobil yollarının sahibindən icazə alınmalıdır.

Mütəxəssis əlavə edib ki, avtomobil yollarının tikinti şirkəti və ya şəxslər tərəfindən zəbt edilməsi hərəkət iştirakçılarının - sürücülərin də hüquqlarını pozur. Məhz bu səbəbədən də, hər hansı şirkət və ya şəxs yolu zəbt edib, iş görmək barədə düşünürsə, bunun üçün əvvəlcə ərazi üzrə icra hakimiyyəti, Azərbaycan Avtomobil Yolları Agentliyi və Dövlət Yol Polisindən icazə almalıdır.

33
İnsanın kölgəsi, arxiv şəkli

Şirkət rəhbərinin cinayət işi məhkəməyə göndərildi

3
(Yenilənib 18:13 19.09.2020)
Toplanmış sübutlara əsasən, Füzuli Adıgözəlov Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib.

BAKI, 19 sentyabr — Sputnik. Xəbər verildiyi kimi, "Güllübulaq" Məhdud Məsuliyyətli Cəmiyyətinin təsisçisi və faktiki rəhbəri Füzuli Adıgözəlovun qanunsuz əməlləri ilə bağlı Cinayət Məcəlləsinin 179.3.2 (külli miqdarda mənimsəmə) və 213.2.2-ci (külli miqdarda vergiləri ödəməkdən yayınma) maddələri ilə Baş Prokuror yanında Korrupsiyaya qarşı Mübarizə Baş İdarəsində cinayət işi başlanaraq istintaq aparılıb.

Baş Prokurorluqdan Sputnik Azərbaycan-a bildirilib ki, istintaq zamanı toplanmış sübutlarla "Güllübulaq" MMC-nin təsisçisi və faktiki rəhbəri Adıgözəlov Füzuli Qəşəm oğlunun 2011-2015-ci illər ərzində Türkiyə Respublikasından müxtəlif məhsullar idxal edib "Güllübulaq" MMC-nin anbarına mədaxil etmədən həmin Cəmiyyətə məxsus 1 milyon 885 min manat məbləğində pul vəsaitinin hesabına malların dəyərini və gömrük rüsumlarını ödəməsinə, habelə malların satışından əldə etdiyi gəlirdən Cəmiyyətə ödəniş etməyərək mənimsəməsinə və bununla da, "Güllübulaq" MMC-yə külli miqdarda ziyan vurmasına əsaslı şübhələr müəyyən edilib.

Bundan başqa, Füzuli Adıgözəlovun Cəmiyyətin fəaliyyətinə faktiki rəhbərliyi həyata keçirən maddi məsul rəhbər vəzifəli şəxs kimi sahibkarlıq fəaliyyəti ilə məşğul olub, dövlət büdcəsinə ödənilməsi vəzifəsini nəzərdə tutan əməliyyatlar apararaq 2011-2015-ci illər ərzində ümumilikdə 8 milyon 396 min manat məbləğində vergiləri dövlət büdcəsinə ödəməkdən qəsdən yayınmasına da şübhələr üçün əsaslar yaranıb.

Toplanmış sübutlara əsasən, Füzuli Adıgözəlov Cinayət Məcəlləsinin qeyd edilən maddələri ilə təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib.

18 sentyabr 2020-ci il tarixdə cinayət işi üzrə istintaq yekunlaşdırılaraq, baxılması üçün aidiyyəti üzrə Gəncə Ağır Cinayətlər Məhkəməsinə göndərilib.

3