Pəncərdən baxan adam, arxiv şəkli

Yayın cırhacırında qışın problemini həll edirik: Borc var, borc ödəyən isə yox

759
(Yenilənib 12:55 11.07.2020)
Ekspert: "Bir problem də həmin qurumların menecmentindəki boşluqlar ilə bağlıdır. İstilik tariflərin qaldırılması çıxış yolu deyil, xüsusən indiki şəraitdə"

Xalid Məmmədov, Sputnik Azərbaycan

BAKI, 11 iyul — Sputnik. "Bu gün "Azəristiliktəchizat" ASC-nin "Azəriqaz"a 30 milyon manatdan çox borcu var". Sputnik Azərbaycan xəbər verir ki, bunu bir neçə gün öncə Xəzər TV-də yayımlanan "Birinci Studiya" verilişinə açıqlamasında "Azəriqaz" İstehsalat Birliyinin baş direktoru Ruslan Əliyev deyib.

O, bildirib ki, borc məsələsinin köklü həlli yoxdur: "Yenə də yəqin ki, "Azəristiliktəchizat" ilin sonunda dövlətə müraciət edəcək və quruma köməklik göstəriləcək. Bizdə olan məlumata görə, "Azəristiliktəchizat"da istiliyin dəyəri qazın borcunu tam ödəməyə imkan vermir. Yenə borc problemi yaranıb. İlin sonuna bu borcun artacağı istisna deyil".

Borc problemi ilə bağlı Azərbaycan Dövlət İqtisad Universitetinin professoru Elşad Məmmədov Sputnik Azərbaycan-a deyib ki, ölkədə pul kütləsinin azlığı prosesi müşahidə edilir: "Pul kütləsinin az olması ödənişlərlə bağlı ləngimələrin, problemlərin yaranmasını şərtləndirir. Pul kütləsinin aşağı olması işgüzar fəallığın aşağı olması deməkdir. İşgüzar fəallığın aşağı olması gəlirlərin aşağı olmasıdır. Ona görə də ödəmə qabiliyyəti həm müəssisələrdə, həm də fiziki şəxslərdə olduqca aşağıdır. Belə olan halda biz görürük ki, qurumlar arasında, eyni zamanda fiziki şəxslər tərəfindən ödənişlərin reallaşdırılması ilə bağlı ciddi problemlər yaranıb. Bunun başlıca səbəbi pul kütləsinin az olması və işgüzar fəallığın aşağı olmasıdır".

"Azəristiliktəchizat" dövlət tərəfindən dəstək almazsa, borcların ödənilməsində problemlər yaranacaq. Burada bir problem də həmin qurumların menecmentindəki boşluqlar ilə bağlıdır. İstilik tariflərin qaldırılması çıxış yolu deyil, xüsusən indiki şəraitdə" – deyə ekspert bildirib.

"Azəristiliktəchizat" ASC-nin Abonent və Müştəri Xidmətlərinin rəisi Rafiq Əliyev isə bildirib ki, istilik tarifləri dövlət tərəfindən tənzimlənən tariflər siyahısında getdiyinə görə, bu, Tarif Şurası tərəfindən müəyyən edilir: "İstilik tarifləri maya dəyərindən bir neçə dəfə aşağıdır. Hətta istilik haqlarının 100 faiz yığıldığı halda belə "Azəristiliktəchizat" zərərlə işləyir və borcu ödəmə imkanı olmur. Borcun tam ödənilməməsi bununla bağlıdır".

Onu da qeyd edək ki, hazırda əhali qrupu üçün istilik tarifləri 1 kvadratmetr yaşayış sahəsi 0,15 manat (aylıq), qeyri-əhali üçün 1 kubmetr isidilən həcm 0,25 manatdır (aylıq).

759
Kino lenti, arxiv şəkli

"Kinematoqrafiya uğurlarına görə" beynəlxalq mükafatına kim layiq görüldü?

14
(Yenilənib 23:58 01.12.2020)
Festival zamanı dünyanın hər bir ölkəsindən olan kino mütəxəssisləri öz filmlərini nümayiş etdirir, sərgilərdə, treninqlərdə, seminarlarda iştirak edirlər.

BAKI, 1 dekabr — Sputnik. "Narimanfilm" kinostudiyasının direktoru, Azərbaycan Respublikası Əməkdar mədəniyyət işçisi Nəriman Məmmədov 2020-ci il noyabrın 27-də 13-cü Global Film Festival Noida və "MARWAН STUDIOS" (Hindistan) tərəfindən kinematoqrafiyanın irəliləyişi işində göstərdiyi əməyinə görə "Kinematoqrafiya uğurlarına görə" beynəlxalq mükafatı ilə təltif olunub.

Sputnik Azərbaycan-ın məlumatına görə, 13-cü Global Film Festival Noida 2020-ci il noyabr ayının 26-28 tarixlərində Hindistanda, Noida şəhərində yerləşən "MARWAН STUDIOS"-da keçirilmişdir. Bu, tələbələr, entuziastlar və kino professionalları daxil olmaqla, bütün dünya kinematoqrafiya cəmiyyəti ilə birlikdə kinonun gücünü tərənnüm edən ən böyük və tanınmış festivallardan biridir. Festival zamanı dünyanın hər bir ölkəsindən olan kino mütəxəssisləri öz filmlərini nümayiş etdirir, sərgilərdə, treninqlərdə, seminarlarda iştirak edirlər. Festivalın prezidenti məşhur Hindistan rejissoru, prodüseri, jurnalisti, həmçinin, Asiya Kino və Televiziyası Akademiyasının təsisçisi və prezidenti cənab Sandip Marvadır.

14
Teqlər:
tələbələr, rejissor, Hindistan, prodüser, mükafat
Quşlar

Quş qripi ilə bağlı epizootoloji monitorinqlər keçirilib

7
(Yenilənib 23:48 01.12.2020)
Monitorinqlər zamanı çöl quşlarından götürülmüş patoloji materiallar və ev quşlarından alınan diaqnostik nümunələr AQTİ-nin Mərkəzi Baytarlıq Laboratoriyasında müayinə olunub.

BAKI, 1 dekabr — Sputnik. Respublika ərazisini yüksək patogen quş qripi xəstəliyindən qorumaq məqsədilə mövsümü epizootoloji monitorinqlərə başlanılıb. İlk monitorinq 2-6 noyabr 2020-ci il tarixlərində Azərbaycan Respublikası Qida Təhlükəsizliyi Agentliyi, Azərbaycan Respublikası Ekologiya və Təbii Sərvətlər Nazirliyi, Azərbaycan Respublikası Kənd Təsərrüfatı Nazirliyi yanında Aqrar Xidmətlər Agentliyinin və Azərbaycan Qida Təhlükəsizliyi İnstitutunun nəzdində fəaliyyət göstərən laboratoriyaların əməkdaşlarının iştirakı ilə keçirilib. Agentlikdən Sputnik Azərbaycan-a verilən məlumata görə, çöl quşları arasında monitorinqlər Abşeron yarmadasını, Şirvan Milli Parklarının ərazisini, Ağzıbir ovçuluq təsərrüfatını və Qızılağac Milli Parkı ilə yanaşı, su-bataqlıq ərazilərini, eləcə də respublikamızın dənizsahili zonalarını əhatə edib. Eyni zamanda, Bakı şəhərindəki, Abşeron, Şabran, Salyan və Lənkəran rayonlarındakı ailə təsərrüfatlarında müxtəlif növ quşdan, o cümlədən Bakı və Sumqayıt şəhərlərindəki, Abşeron, Salyan, Neftçala, Sabirabad, Lənkəran, Cəlilabad, Xızı və Siyəzən rayonlarında yerləşən sənaye əsaslı iri və kiçik həcmli quşçuluq müəssisələrində ev quşundan diaqnostik materiallar götürülərək laboratoriya müayinələrinə cəlb edilib.

Monitorinqlər zamanı çöl quşlarından götürülmüş patoloji materiallar və ev quşlarından alınan diaqnostik nümunələr AQTİ-nin Mərkəzi Baytarlıq Laboratoriyasında müayinə olunub. Müayinə zamanı yüksək patogen quş qripi xəstəliyinin törədicisi aşkar edilməyib.

Qeyd edək ki, keçirilən monitorinqlər çərçivəsində xəstəlik əlamətləri müşahidə edilən quşlara və ya quş cəsədinə rast gəlinməyib.

7