Dezinfeksiya da olunur, tədbirlər də ləğv edilir - Amma bağlanmaq qərarı hələ yoxdur

Zülfiyyə Quluyeva, Sputnik Azərbaycan

BAKI, 11 mart — Sputnik. Ümumdünya Səhiyyə Təşkilatı son günlərdə koronavirus xəstəliyinə yoluxma hallarının artmasını, virusun coğrafiyasının genişlənməsini nəzərə alaraq dövlətlər tərəfindən müvafiq preventiv tədbirlərin gücləndirilməsi, eləcə də kütləvi tədbirlərin təxirə salınması təşəbbüsü ilə çıxış edib. 

Həmçinin adamların sıx toplaşdığı məkanlarda virusa yoluxma riski yüksək olduğundan qarşıdakı aylarda toy və bu cür məclislərin təxirə salınması, yas mərasimlərinin isə kütləvi keçirilməməsi tövsiyə edilir.

Artıq Bakı şəhərində və respublikanın müxtəlif regionlarında mart ayında keçirilməli olan ənənəvi Novruz şənlikləri ləğv edilir. Bu günlərdə isə paytaxtda fəaliyyət göstərən iri ticarət mərkəzlərindən olan "Mall"ların da öz işini müvəqqəti dayandıracağı barədə məlumatlar yayılıb. Sputnik Azərbaycan məktəblərdə tətil müddətində şagirdlərin ən çox üz tutduğu məkanlardan olan "Mall"ların bağlanması barədə məlumatların nə dərəcədə həqiqətəuyğun olduğunu araşdırıb.

PAŞA İnşaat Ticarət Mərkəzlərinin Marketinq meneceri Nuranə İsgəndərova Sputnik Azərbaycan-a açıqlamasında bildirib ki, yayılan xəbərlər şayiədir. N.İsgəndərovanın sözlərinə görə, PAŞA İnşaat Ticarət Mərkəzlərinin tərkibindəki bütün "Mall"lar fəaliyyətlərini davam etdirir: "Bizim 6 əməliyyatda olan iri ticarət mərkəzimiz fəaliyyət göstərir. Bunlar "28 Mall", "Gənclik Mall", "Port Baku Mall", "Şüvəlan Park" , "Amburan Mall" və Gəncədəki "Gəncə Mall"dur. Martın 12-də "Dəniz Mall"-un açılışı nəzərdə tutulsa da virusun geniş yayılmasının qarşısının alınması məqsədilə Azərbaycan hökuməti tərəfindən aparılan tədbirlərə dəstək olaraq bu mərkəzin açılışını təxirə salmışıq. "Mall"ların fəaliyyətinin dayandırılması barədə rəhbərlik tərəfindən heç bir göstəriş verilməyib. Bu barədə sosial şəbəkələrimizdəki səhifələrimizdə də rəsmi məlumat yaymışıq. Qeyd edim ki, əlavə olaraq bütün "Mall"larda dezinfeksiya işləri aparılır və sanitar tədbirlər gücləndirilib. Heç bir kafe və restoranların bağlanması nəzərdə tutulmayıb. Hər hansı dəyişiklik olarsa, bu barədə rəsmi məlumat veriləcək".

N.İsgəndərova deyib ki, "Mall"larda Novruz şənlikləri koronavirusa görə təxirə salınıb.

Səhiyyə Nazirliyinin baş infeksionisti Cəlal İsayev Sputnik Azərbaycan-a açıqlamasında bildirib ki, tətil müddətindən istifadə edərək valideynlərin övladlarını böyük ticarət mərkəzlərinə, kafe və restoranlara aparması düzgün deyil: "Bu ticarət mərkəzləri öz gəlirlərini düşünürlər. 

Valideynlər də öz övladlarının sağlamlığını düşünməlidirlər. Təhsil Nazirliyi tətili ona görə elan edib ki, uşaqlar bu virusa yoluxmasın. Əgər valideyn bunu dərk etməyib uşağını könüllü olaraq iri ticarət mərkəzlərinə aparırsa, bu zaman əsas məsuliyyət həmin valideynlərin üzərinə düşür. Valideyn bilməlidir ki, uşağın belə məkanlarda yoluxma ehtimalı var. Ona görə də, maksimum əyləncə mərkəzlərindən, iri-alış-veriş məkanlarından, kafe-restoranlardan uzaq durmalıdırlar. Çünki, qapalı məkanlarda, adamların sıx toplaşdığı yerlərdə virusun yayılma ehtimalı daha böyükdür. Biz həmin "Mall"ların qapısına gedib qıfıl vura bilmərik. Valideynlər öz övladlarını virusdan qorumaq üçün belə məkanlardan uzaq durmalıdır".

Məlumat üçün qeyd edək ki, Ümumdünya Səhiyyə Təşkilatının tövsiyələrində adamların sıx toplaşdığı yerlərdən, qapalı məkanlardan uzaq durmaq da yer alıb.