Biləcəridə su kəmərinin üzərində tikilmiş evlər

"Nəhənglər"in boğazına çökənlər. Onlar ölümü gözə alıblar - FOTO

717
(Yenilənib 12:20 27.01.2020)
Bu gün Bakı və onun ətrafında 500 mindən çox qanunsuz fərdi evlər salınıb. Qanunsuz tikintilərin aparılmasının kökü isə iki istiqamətə bölünüb

İradə Cəlilova, Sputnik Azərbaycan

BAKI, 24 yanvar — Sputnik. 90-cı illərin ortalarından başlayaraq kommunal infrastruktur obyektlərinin, xüsusi ilə magistral və məhəllədaxili su kəmərlərinin yerləşdiyi ərazilərdə qeyri-qanuni şəkildə fərdi yaşayış evlərinin və kommersiya obyektlərinin tikintisi başlayıb.

"Azərsu" ASC-nin apardığı araşdırmalara görə, təkcə Bakı şəhərində belə mənzil və obyektlərin sayı minlərlədir.

Belə evlərin əksəriyyəti Biləcəridə yerləşir. Sputnik Azərbaycan xəbər verir ki, bu gün də yüzlərlə ailə su kəmərlərinin üzərində tikilmiş evlərdə yaşayır.

Küçələr darısqal, evlər kiçik və bir tərəfdə də iri həcmli su boruları keçir. Əgər bir gün bu boruların birində qəza baş versə, yəqin ki, yaxınlıqdakı evləri su basar.

© Sputnik / Irade JELIL
Biləcəridə su kəmərinin üzərində tikilmiş ev

Əmlak məsələləri üzrə ekspert Elnur Azadov Sputnik Azərbaycan-a açıqlamasında bildirib ki, Azərbaycanda qanunsuz tikililər daha çox Bakı, Gəncə, Sumqayıt şəhərlərində var.

"Bu kimi qanunsuz tikintilərin aparılmasının kökü iki istiqamətə bölünüb. Qanunsuz tikililər əhalinin daha çox sıx olduğu ərazilərdə tikilir. Bu tikililərin tarixi sovet dönəminə və ondan sonrakı vaxta təsadüf edir. Sovet dövründə əhali çox sıx idi deyə bir çox yaşayış məntəqələri özbaşına salınırdı. Həmin dövrlərdə "Kubinka", "Sovetski", "Alatava", Xətai, Sabunçu ərazilərində evlər salınırdı. Buna da göz yumulurdu. Çünki hökumət özü ev tikib verə bilmirdi", - deyə ekspert vurğulayıb. Onun sözlərinə görə, bu artıq böyük bir miqyas almışdı. Keşlə, Yeni Yasamal, NZS, Bibiheybət, 20-ci Sahə, Bayıl həmin dövrlərdə salınmışdı.

E.Azadovun sözlərinə görə, ikinci bum sovet dövründən sonra başlandı. 90-cı illərin əvvələrində Bakıya çox sayda qaçqın və məcburi köçkünlər gəldilər. Onlar da qanunsuz tikintilər inşa etməyə başladılar.

2000-ci ilin əvvəllərində isə Bakı şəhərində bəzi ərazilər bələdiyyələr tərəfindən satılmağa başladı.

"Həmin ərazilər neft kəmərlərinin yaxınlığı, neftlə çirklənmiş, qadağan olunmuş ərazilər idi. Orada yerin altı ilə kommunikasiya xətləri, üstü ilə yüksək gərginlikli naqillər keçirdi. Belə ərazilərdə hər hansı tikintinin aparılması qanunla qadağan idi. Məsələn, mərkəzi qaz xətləri var ki, 30 metrdən yaxın ev tikmək olmaz. Dəmir yollarının 60 metr yaxınlığınadək tikinti aparmaq olmaz", - deyə Azadov vurğulayıb.

© Sputnik / Irade JELIL
Biləcəridə su kəmərinin üzərində tikilmiş evlər

Ekspertin fikrincə, bələdiyyə torpaqları bələdiyyələrə veriləndən sonra bu qurumlar öz balansındakı torpaqları satıb qurtardı və sonra digər ərazilərdə olan torpaqların satışına keçdi. Hətta qanunla icazə verilməyən torpaqlar satıldı və tikinti aparıldı.

Elə bu səbəbdən də bu gün Bakı və onun ətrafında 500 mindən çox qanunsuz fərdi evlər salınıb.

Ekspert deyir ki, şəhərsalma və arxitektura üzrə qanunvericiliyə görə, torpaqlar yaşayış, istehsalat təyinatlı və digər təyinatlar üzrə bölünür: "Daha sonra həmin torpaqların istifadəsinə icazə planlama üzrə verilir. Yəni müəyyən planlar üzrə tikintilər inşa edilməlidir. Həmin planda kommunikasiya xətlərinin yeri qeydə alınır və onların icazəsi müvafiq şəhərsalma və yerli icra strukturlarından alınır. Bunlara riayət edilmədiyinə görə tikintilərin çoxu qanunvericiliyin icazə vermədiyi yerlərdə inşa edilir".

Məsələ ilə bağlı Azərsu ASC-nin mətbuat katibi Anar Cəbrayıllı Sputnik Azərbaycan-a bildirib ki, bir neçə il əvvəl qurumun mütəxəssisləri araşdırma aparıblar.

© Sputnik / Irade JELIL
Su kəmərlərinin üzərində tikilmiş evlər

"Azərsu ASC-yə məxsus magistral xətlərin, hidrotexniki qurğuların və digər obyektlərin mühafizə olunan ərazilərində 5000-dən çox ev, sənaye obyekti, kommersiya obyekti aşkar edilib. Bunların 4000-i Bakı şəhərində yerləşir. Biləcəri ərazisində həqiqətən yüksək təzyiqli xətlər var. Həmin xətlər 20-15-10 atmosferə malik xətlərdir. Və onlar bu evlər və obyektlər üçün həqiqətən ciddi təhlükə mənbəyidir. Biləcəri qəsəbəsində bir dəfə qəza olmuşdu. Biz məcbur olub, evin döşəməsini söküb, xətti təmir etdik. Deməli, orada elə bir vəziyyət var ki, xətti kənara çıxarmaq da mümkün deyil. Ətraf tikililər, fərdi yaşayış evləridir. Orada xəttin üzərində, yanında tikilən çox sayda ev var", - deyə o bildirib.

A.Cəbrayıllı bildirib ki, magistral xətlər üzərində, yaxınlığında olan evlər o qədər çoxdur ki, onları məhkəməyə verib, kompensasiya ödənilməsini tələb etmək çox ağır məsələdir. Və bu səbəbdən də hansısa evin sökülməsi gündəmdə deyil: "Yəni biz bu işlərə kütləvi şəkildə getmirik. Ancaq xüsusi bir hal baş verərsə, o zaman biz bu məsələyə baxa bilərik".

Onun sözlərinə görə, son 6-7 ildə qurumun kommunikasiyaya nəzarət şöbəsi ərazilərə nəzarət edir və heç bir tikintinin aparılmasına icazə verilmir.

© Sputnik / Irade JELIL
Biləcəridə su kəmərinin üzərində tikilmiş evlər

A.Cəbrayıllı xatırladab ki, ərazidə gələcəkdə qəza baş verərsə, həmin evlərin çox ciddi təhlükə ilə qarşı-qarşıya qalması istisna edilmir: "Bəli, bu gün mühafizə zonasındakı tikililər xətlərdə profilaktika işlərinin aparılmasına imkan vermir, baş verən qəzaların aradan qaldırılmasını çətinləşdirir".

Qurum rəsmisi bir daha qeyd edib ki, magistral su kəmərlərinin mühafizə zolağında fərdi yaşayış evi, kommersiya obyekti və ya digər tikilinin inşası yolverilməzdir. Belə ki, fərdi yaşayış evi və ya kommersiya obyektlərinin tikintisi zamanı ərazilər seçilərkən kommunal infrastruktur şəraiti düzgün qiymətləndirilməli, tikinti işlərinin aparılması üçün müvafiq dövlət qurumlarından, o cümlədən kommunal xidmət müəssisələrindən müvafiq rəy alınmalıdır.

717
Teqlər:
magistral su xətti, "Azərsu" ASC, qanunsuz tikili
Əlaqədar
Bundan sonra daşı-daş üstə qoya bilməyəcəklər
Sığorta şirkətlərinin yeni fırıldağı – Bir mənzildən iki dəfə pul istəyirlər
İlham Əliyev tikinti şirkətlərinə xəbərdarlıq etdi
Neft ərazisində tikilən evlər: Sənəd verilə də bilər, verilməyə də
Rahatlıq üçün açılan qapılar ölümə aparır - yanğına ondan əvvəl hazırlaşmaq gərəkdir
Hirkan Milli Parkında ayı

Heyvanları qəfəsdə saxlayan restoran sahibi cəzalanıb

9
(Yenilənib 23:56 07.08.2020)
R.Bağırov onu da qeyd edib ki, aparılan araşdırma zamanı heyvanların vaxtlı-vaxtında qidalandığı, onlara baytar nəzarətinin həyata keçirildiyi və saxlanıldığı yerlərin təmizləndiyi müəyyən olunub.

BAKI, 8 avqust — Sputnik. İsmayıllı rayonu "Günəş Park" restoranında heyvanların qəfəsdə saxlanılması ilə bağlı şikayət Dövlət Ekoloji Təhlükəsizlik Xidmətinin əməkdaşları tərəfindən yerində araşdırılıb.

Sputnik Azərbaycan xəbər verir ki, bu barədə xidmətin rəis müavini Ramal Bağırov danışıb.

O bildirib ki, aparılan araşdırma zamanı sözügedən istirahət mərkəzində qəfəslərdə saxlanılan zebra, dovşan, dəvə, meymun, maral, tovuzquşu, qırqovul və dəvəquşunun xaricdən gətirilməsinə dair rəsmi təsdiqedici sənədlərinin olduğu, lakin saxlanılması üçün müvafiq icazə sənədinin olmadığı məlum olub.

"Faktla bağlı istirahət mərkəzinin rəhbəri Sərxan İsgəndərov barəsində akt, protokol tərtib olunub və o, 2000 manat məbləğində cərimə edilib.

Zooloji kolleksiyanın yaradılması məqsədilə icazə sənədinin alınması üçün restoran sahibinə icrası məcburi olan "məcburi göstəriş" verilib".

R.Bağırov onu da qeyd edib ki, aparılan araşdırma zamanı heyvanların vaxtlı-vaxtında qidalandığı, onlara baytar nəzarətinin həyata keçirildiyi və saxlanıldığı yerlərin təmizləndiyi müəyyən olunub.

9
FHN yanğın söndürənləri, arxiv şəkli

İlin birinci yarısında Azərbaycanda baş verən partlayışlarda 4 nəfər ölüb

5
2020-ci ilin I yarımilliyi ərzində respublika ərazisində 43 partlayış hadisəsi baş verib ki, bu da 2019-cu ilin I yarımilliyi ilə müqayisədə 2 hadisə və ya 5% çoxdur.

BAKI, 7 avqust — Sputnik. Bu ilin birinci yarısında Azərbaycanda baş verən partlayışların statistikası açıqlanıb.

Fövqəladə Hallar Nazirliyindən Sputnik Azərbaycan-a verilən məlumata görə, 2020-ci ilin I yarımilliyi ərzində respublika ərazisində 43 partlayış hadisəsi baş verib ki, bu da 2019-cu ilin I yarımilliyi ilə müqayisədə 2 hadisə və ya 5% çoxdur.

Baş verən partlayışlar zamanı 4 nəfər ölüb, 45 nəfər xəsarət alıb.

5