Bankada manat, arxiv şəkli

Hansı hallar sığorta hadisəsi hesab olunur Ödənişlər necə olacaq

1285
(Yenilənib 17:54 14.01.2020)
Ekspert: "Böyük tikililərdə ana xətdə boruların partlaması, yuxarı qonşunun evə su axıtması subasma hesab edilir. Əgər mənzilin içərisindəki su borusu partlayırsa, sığorta şirkətləri sığorta ödənişi verməyə bilər. Çünki bu məsələdə vətəndaşın özü günahkardır"

Xalid Məmmədov, Sputnik Azərbaycan

BAKI, 14 yanvar — Sputnik. Artıq ölkəmizdə daşınmaz əmlakın icbari sığortası tətbiq edilib. İnsanlar əmlaklarını sığorta etdirsələr də, ortada hələ də açıq qalan, əhalinin bilmədiyi suallar var. Daşınmaz əmlakın icbari sığortası üzrə sığorta hadisəsi baş verən zaman nə dərəcədə sığorta ödənişləri verilir? Hansı hallar nəticəsində daşınmaz əmlakın zədələnməsi, məhv olması, yaxud hər hansı digər formada itkisi sığorta hadisəsi hesab olunur?

Qeyd edək ki, daşınmaz əmlakın icbari sığortası "İcbari sığortalar haqqında" qanunda nəzərdə tutulub. Daşınmaz əmlakın icbari sığortası daşınmaz əmlakın yanğın və ya digər hadisələr nəticəsində zədələnməsi, məhv olması, yaxud hər hansı formada itkisi ilə bağlı dəyən zərərin əvəzinin ödənilməsi məqsədi ilə tətbiq edilir. Bu məqsədlər üçün hüquqi və fiziki şəxslərə məxsus tikililərin, yaşayış və qeyri-yaşayış sahələrinin, yaşayış evləri, binalarının və mənzillərin, habelə dövlət əmlakının sığortası icbaridir.

Sığorta üzrə ekspert İlkin İbrahimov Sputnik Azərbaycan-a açıqlamasında deyib ki, sığorta şirkətləri tərəfindən fiziki şəxslərin daşınmaz əmlaklarında baş verən hadisələrə görə ödənişlər aşağı səviyyədədir: "Bununla bağlı baryerlər var. Burada arayışlar məsələsi mövcuddur. "İcbari sığortalar haqqında" qanunun 17-ci maddəsi "Sığorta ödənişinin vеrilməsi üçün tələb olunan sənədlər" adlanır. Sığorta şirkətləri həmin maddəni əsas tuturlar. Sığorta şirkətləri bir neçə orqandan hadisəni dəqiqləşdirmək üçün arayışlar tələb edirlər. Bununla bağlı sığorta şirkətləri müxtəlif yerlərə çoxlu sorğular verirlər".

"Qanuna görə həmin sorğuların cavabı gəldikdən sonra sığorta şirkəti 7 iş günü müddətində sənədləri toplayıb ya vətəndaşa imtina verməli, ya da sığorta ödənişi ilə bağlı məlumat verməlidir. Amma sığorta şirkətləri bu hissəni o qədər mürəkkəbləşdiriblər ki, bununla bağlı vətəndaşlar aylarla, hətta illərlə gözləyə bilərlər. Bu təcrübə var. Məsələn, müvafiq orqan sorğulara gec cavab verirsə, sığorta şirkəti də deyir ki, cavab hələlik gəlməyib və buna görə də vətəndaşa cavab vermirik. Sığorta ödənişləri ilə bağlı bu sahədə nəzarətedici orqan qaydaları sərtləşdirməli və bununla bağlı sığorta şirkətlərinə göstəriş verməlidir. İş məhkəməyə gedəndə də məsələ illərlə uzana bilər" – deyə o qeyd edib.

Ekspert daşınmaz əmlakın icbari sığortası üzrə sığorta hadisələrindən danışarkən deyib ki, daşınmaz əmlakın üçüncü şəxslərin hərəkətləri nəticəsində zədələnməsi, məhv olması, yaxud hər hansı digər formada itkisi sığorta hadisəsi hesab olunur: "Yəni yuxarı qonşudan sizin mənzilinizə hər hansı bir ziyan (subasma və s.) vurulursa, bu, üçüncü şəxslərin hərəkətləridir. Su, istilik, kanalizasiya kəmərlərinin və yanğınsöndürmə sistemlərinin qəzası, habelə qonşu tikililərdən, yaşayış və qeyri-yaşayış sahələrindən, yaşayış evlərindən və binalarından, mənzillərdən, otaqlardan daxil olan su nəticəsində subasma sığorta hadisəsi hesab olunur".

Şirkətlərin yeni sığorta oyunu - Daha əl atmadıqları variant qalmayıb

O bildirib ki, böyük tikililərdə ana xətdə boruların partlaması, yuxarı qonşunun evə su axıtması subasma hesab edilir: "Əgər mənzilin içərisindəki su borusu partlayırsa, sığorta şirkətləri sığorta ödənişi verməyə bilər. Çünki bu məsələdə vətəndaşın özü günahkardır və burada sığorta ödənişindən söhbət gedə bilməz. Ana xətdə olan borudan evə su daxil olubsa, bu zaman sığorta ödənişi düşür. Amma mənzilin içərisindəki boru partlaması nəticəsində subasma olursa, buna ödəniş düşmür. Əgər elektrik naqillərində qısa qapanma baş verirsə və evdə yanğın olursa, bu zaman sığorta ödənişi verilir. Yuxarı mərtəbədə yaşayanlar bilərəkdən və ya bilməyərəkdən aşağı mərtəbəyə su axıdırsa, sığorta ödənişi verilir".

"Məişətdə və istehsalatda istifadə olunan qazın partlayışı sığorta hadisəsi hesab olunur. Ümumiyyətlə, yanğın ilə bağlı sığorta ödənişinin verilməsi üçün Fövqəladə Hallar Nazirliyinin istintaq orqanının qərarı lazımdır" – deyə o qeyd edib.

Ekspert bildirib ki, daşınmaz əmlakın icbari sığortası üzrə sığorta hadisələrinin siyahısı var və bu, standart formadadır: "Bu məsələ "İcbari sığortalar haqqında" qanunla tənzimlənir. Bu məsələdə bütün sığorta şirkətinin hamısında sığorta təminatları eynidir. Daşınmaz əmlakın icbari sığortası sosial məhsuldur, heç bir sığorta şirkətinin şəxsi məhsulu deyil. Daşınmaz əmlakın icbari sığortası üzrə sığorta şirkəti sığorta təminatında dəyişiklik edə bilməz. Bu məsələdə 12 sığorta şirkətinin hər biri vətəndaşla eyni müqavilə bağlayır".

Şərtsiz azadolma məbləğindən danışan ekspert bildirib ki, bu, sığortaya daxil olmayan hissədir: "Bakı şəhərində yerləşən daşınmaz əmlaklar (yaşayış sahələri) üçün şərtsiz azadolma məbləği 250 manatdır. Yəni 250 manata qədər baş verən sığorta hadisələrini sığorta şirkəti qarşılamayacaq. Əgər evə 1000 manat ziyan dəyibsə, nəticədə vətəndaşa 750 manat (1000-250=750) sığorta ödənişi veriləcək. Mənzilə 300 manat ziyan dəyibsə, 50 manat ödəniş olacaq. 25 min manat ziyan dəyibsə, 24 min 750 manat ödəniş ediləcək. Digər şəhərlərdə isə şərtsiz azadolma məbləği 150 manatdır".

"Bu sığorta məhsulu vətəndaşlar üçün çox məqbuldur. Vətəndaş illik 30-50 manat pul verməklə 15-25 min manat hər sığorta hadisəsinə görə ödəniş ala bilər. Yəni bir il ərzində istənilən sayda sığorta hadisəsinə görə sığorta ödənişi verilir. Hazırda burada cərimə mexanizmi yoxdur. Protokolun nümunəsini Nazirlər Kabineti təsdiq etməlidir" – deyə ekspert əlavə edib.

Qeyd edək ki, yaşayış binalarının, yaşayış evlərinin və mənzillərin icbari sığortası onların konstruktiv elementlərinə, otaqlarına, o cümlədən şüşələr də daxil olmaqla qapı və pəncərə konstruksiyalarına, su, kanalizasiya və qaz təchizatına, habelə istilik sisteminə aid borulara, rabitə, elektrik və digər naqillərinə, bəzək elementlərinə, o cümlədən bütün növ xarici, yaxud daxili mala və suvaq işlərinə, divar, tavan və döşəməyə dəyən zərərlərə təminat verir.

Mülki Məcəllənin 180-ci maddəsinə uyğun olaraq özbaşına tikinti sayılan daşınmaz əmlak, Mülki Məcəlləyə və Şəhərsalma və Tikinti Məcəlləsinə uyğun olaraq sökülməsi barədə qərar qəbul edilmiş, eləcə də, tikintisi başa çatmayan və qəzalı vəziyyətdə olan daşınmaz əmlak icbari sığortaya cəlb olunmur.

1285
Cəbhəyanı ərazilərdə top mərmiləri və dron aşkarlandı

Cəbhəyanı ərazilərdə top mərmiləri dron aşkarlanıb

14
(Yenilənib 08:57 20.10.2020)
Ümumilikdə Agentlik tərəfindən 27 sentyabr – 19 oktyabr 2020-ci il tarixlərində 708 siqnal əsasında 588 operativ və təxirəsalınmaz əməliyyat çıxışı olub.

BAKI, 20 oktyabr - Sputnik. 2020-ci il 19 Oktyabr tarixində Agentliyə Ağcabədi, Ağdam, Bərdə, Füzuli, Goranboy, Kürdəmir, Tərtər rayonları və Gəncə şəhəri ərazisinə mərmilərin düşməsi barədə Daxili İşlər Nazirliyinin ″102″ Xidməti-Zəng mərkəzi sistemindən - 19 (on doqquz) və Fövqəladə Hallar Nazirliyinin Böhran Vəziyyətlərində İdarəetmə mərkəzindən – 1 (bir) müraciət daxil olub. Bu barədə Sputnik Azərbaycan-a ANAMA-dan məlumat verilib.

Daxil olmuş 20 çağırış əsasında Agentliyin xüsusi mobil çevik əməliyyat qrupları tərəfindən Ağcabədi rayonunun Şənlik, Nəcəfqulubəyli, Poladlı kəndləri, Ağdam rayonunun Çəmənli, Alıbəyli, Paşabəyli kəndləri və Ergi qəsəbəsi, Bərdə rayonunun Qaradağlı, Soğanverdilər, Təhlə kəndləri, Füzuli rayonunun Horadiz şəhəri, Goranboy rayonunun Tapqaraqoyunlu kəndi, Kürdəmir rayonunun Karrar kəndi, Tərtər rayonunun Seydimli, Əskipara, Ələsgərli kəndləri və H.Aslanov küçəsi və Gəncə şəhəri ərazisində Daxili İşlər Nazirliyinin əməkdaşları ilə birlikdə 12 operativ və təxirəsalınmaz əməliyyat çıxışı həyata keçirilib. Aparılmış əməliyyat-axtarış tədbirləri zamanı 1 ədəd 30 mm-lik zenit top mərmisi (OFZ), 2 ədəd 152 mm-lik top mərmisi (OF-45), 1 ədəd 240 mm-lik top mərmisi (M24F), 1 ədəd dron və 11 ədəd partlamış mərmi qalıqları aşkar olunub.

Cəbhəyanı ərazilərdə top mərmiləri və dron aşkarlandı
ANAMA
Cəbhəyanı ərazilərdə top mərmiləri və dron aşkarlandı

Agentliyin partlayış qrupu tərəfindən 1 ədəd 9N235 bombacığı zərərsizləşdirilmiş, Mina Təhlükəsinə dair Maarifləndirmə üzrə mütəxəsisslər tərəfindən 2 028 nəfər mülkü şəxs arasında mina təhlükəsizliyinə dair maarifləndirmə təbliğatı aparılıb.

Ümumilikdə Agentlik tərəfindən 27 sentyabr – 19 oktyabr 2020-ci il tarixlərində 708 siqnal (əməliyyat çağırışı) əsasında 588 operativ və təxirəsalınmaz əməliyyat çıxışı olub ki, nəticədə Ağdam, Ağdaş, Ağcabədi, Bərdə, Beyləqan, Biləsuvar, Cəbrayıl, Goranboy, Naftalan, Füzuli, Tərtər, Tovuz, Şəmkir, Hacıqabul, Kürdəmir, Zərdab, Xızı, Oğuz rayonları, Gəncə və Mingəçevir şəhərləri ərazisində ev və həyətyanı sahəyə, neft kəmərinin yaxınlığına, Mingəçevir İES-in ərazisinə, Bakı-Tbilisi-Ceyhan Boru Kəmərinin yaxınlığına, əkin və otlaq sahələrinə, yol kənarına, meşə massivinə, məktəbə baxış keçirilib, 99 ədəd partlamamış hərbi sursat (PHS), 1 143 ədəd bombacıq, 1 180 ədəd müxtəlif çaplı patronlar, 10 ədəd hərbi məqsədlər üçün istifadə olunan meteoroloji radiopelenqator, 6 ədəd dron (zərərsizləşdirilmişdir), 2 ədəd raketin mikrosxemi və 289 ədəd partlamış raket hissələri aşkar olunub.

14
Əllərində smartfonlar olan gənclər, arxiv şəkli

Alternativ kanallar: daha çox imkanın olması hava-su kimi əhəmiyyətlidir

23
(Yenilənib 18:15 19.10.2020)
Texnologiya nə qədər inkişaf etsə də, həyatda həmişə alternativ olmalıdır. Deyək, əgər dünyada hər bir məsələ internetə bağlanıbsa, bu halda istənilən bir ciddi internet problemi müasir sivilizasiyanın süqutuna apara bilər.

Amerikanın məşhur fantast yazıçısı Rey Bredberinin bir hekayəsində bir-biri ilə çarpışan iki ölkənin texnoloji qarşıdurması əks olunub. Uzun sürən müharibədə hər gün bir yeni silah icad olunsa da, qarşı tərəf tezliklə daha yenisini yaradırmış. Beləliklə, çarpışma heç vaxt bitmirmiş. Hər yeni texnologiya başqa birisinin ərsəyə gəlməsinə səbəb olurmuş. Beləliklə, bütün köhnə biliklər də unudulurmuş.

Həyatda həmişə alternativlər olmalıdır

Günlərin bir günü bir şəxs köhnə dədə-baba qaydasına qayıtmağa qərar verir. Adi kağızda klassik metodla hesablama aparır. Onun bu yanaşması yaşadığı ölkənin rəhbərliyində bir şok yaradır, çünki artıq heç kim hesablamanı kalkulyatorsuz apara bilmirmiş. Yəni bütün inkişaf mərhələsini keçəndən sonra insanlar yenidən sadə bir qaydaya üz tutmalı olurlar, çünki irəli getməyə yer qalmır.

Rey Bredberinin hekayəsi, əslində, daha ciddi problemi ortaya qoyub. Texnologiya nə qədər inkişaf etsə də, həyatda həmişə alternativ olmalıdır. Deyək, əgər dünyada hər bir məsələ internetə bağlanıbsa, bu halda istənilən bir ciddi internet problemi müasir sivilizasiyanın süqutuna apara bilər. İnternetə alternativ hər hansı informasiya kanalı varmı? Bəli, hələ var.

Ənənəvi şəhər telefonları informasiya ötürülməsində yararlı bir vasitədir

Məsələn, radio və televiziya siqnalları hələ də köhnə qayda ilə ötürülür. İnternet olmadan belə ölkənin istənilən yerində radionu dinləmək və ən azı yerli kanallara pulsuz baxmaq olur. Bəzi aparatların köməyi ilə pul ödəyib internetsiz, peyk vasitəsilə gələn televiziya siqnallarının köməyi də kanallara baxmaq, məlumat almaq olur.

Köhnə ənənəvi şəhər telefonları informasiya ötürülməsində yararlı bir vasitədir. İşıq da sönsə, internet də qırılsa, ona heç bir təsiri olmur. İşlədiyi kimi işləyir, əgər qarşı tərəfdə də belə bir telefon varsa, rahatlıqla pul ödəmədən danışmaq olur.

Texnologiya nə qədər inkişaf etsə də, nədənsə hələ də “köhnə”, bəlkə də yararsız kimi görünən bir çox vasitə hələ də praktik xeyir gətirməkdədir. “İnternetdə hər şey var, nəyisə yaddaş kartında saxlamaq nəyə lazım” deyənlərin bir çoxu hərdən ehtiyac duyulan bir məlumatı tapa bilmir. Bu gün bu kitab, film və ya digər informasiya açıq mənbədə var, sabah isə kiminsə tələbi ilə yığışdırıla da bilər.

Ailə şəkillərindən tutmuş şəxsi yazı-pozusuna kimi hər bir məlumatı internetdə saxlayan nə qədər insan var. Əvvəl bu şəkillər üçün albom alardıq, xüsusi səliqə ilə düzərdik. Hətta əsgərlikdən nə qədər gözəl albom gətirənlər var. Hərbi qulluğun son 6 ayını məhz bu işə sərf edərmişlər. İndisə hər nəyimiz varsa, vermişik “quql”un ixtiyarına. Açar cansız bir süni intellektin, axtarış sisteminin əlindədir, hara istəsə, ora da fırladacaq. Qapada da bilər, aça da.

Həmin texnologiya tam itmir, bir çoxu hələ də yaşamaqda davam edir

Deyirlər, “ehtiyatlı oğulun anası ağlamaz”. Yəni hər bir çətin durum üçün bir ehtiyat variantının olmalıdır. Ən çətin iş məlumatı qoruyub saxlamaq olub, çünki haraya yerləşdirsən belə, həmin sərt disk yanıb sıradan çıxa bilər. Adi disklər bəlkə də kompüterin yaddaş kartından daha etibarlı qoruyurlar məlumatı. Hətta özünün DVD diskinə 100 il təminat verən şirkət də var. Kifayət qədər bahalı olsa da, informasiya itmir.

Əslində, ehtiyat variantları, alternativlər bizim həyatımızı olduqca zənginləşdirir. Hər yeni texnologiya köhnəsini sırada çıxara bilər, amma həmin texnologiya tam itmir, bir çoxu hələ də yaşamaqda davam edir. Bunun yüzlərlə nümunəsini görürük. Hazırda dünya yeni enerji mənbələri axtarır, istehsal edilən avtomobillərin artıq tam elektrik enerjisi ilə çalışacağını proqnozlaşdırılır. Neft-qaz erasının bitəcəyini iddia edənlər də az deyil. Amma bütün bunlar bir əlavə ehtiyat variantı kim hələ uzun müddət bəşəriyyətə xeyir verə biləcəklər.

Dünyada ən böyük enerji ehtiyatı isə məhz daş kömür formasında toplanıb. Bəli, bu gün müasir şəhəri onunla qızdırmağa icazə yoxdur, amma bu enerji forması bizim sivilizasiyanı hələ uzun müddət məhv olmaqdan xilas edə bilər. Hələ neçə əsr onu yerin altında çıxarmaq imkanı var. Hələ də daş kömürdən dünya iqtisadiyyatında geniş istifadə edilir.

Braziliyada ən dəbdə olan yanacaq növü texniki spirtdir. Həm ekoloji təmizdir, həm də ondan avtomobillərin bir çoxu yararlanır. Həm istehsalı böyükdür, həm də hara gedəcəyi məlumdur. Deməli, dünyada baş verə biləcək neft-qaz böhranı bu ölkə üçün elə də təhlükəli deyil.

Müharibə dövründə alternativlərin qiyməti birə on artır

Vinil valların dövranı çoxdan bitib, amma hələ də onları sifariş edən, aparatını alıb musiqini dinləyən nə qədər insan var. Səbəbini özləri də bilmirlər bəlkə də. Ya deyək, kimi dindirsən, deyəcək kənd təsərrüfatında artıq yalnız və yalnız texnikadan istifadə edilir. Nə ata, nə eşşəyə yer yoxdur. Amma bu heç də belə deyil. Bir çox kiçik təsərrüfatda hələ də atdan yararlanırlar, çünki iri texnika saxlamaq həm bahadır, həm də problemli. Bunun benzini var, texniki qulluğu. 5 hektardan az olan fermer təsərrüfatında elə atdan istifadə daha məqsədəuyğundur. Dağ ərazilərində, texnika və avtomobillərin keçə bilmədiyi yerlərdə at da, eşşək də işə yarayır. Benzin və ya detalların olmadığı şəraitdə bir qədər otla işi yola vermək olar.

Müharibə dövründə alternativlərin, hər hansı bir əlavə variantların qiyməti birə on artır. Döyüş zonasında həm müvəqqəti, həm də daimi sülhə nail olmaq olar, amma informasiya müharibəsində atəşkəs olmur. Hamı deyir, daha vacibi internet və sosial şəbəkədir, burada gərək döyüşəsən. Əlbəttə, internetin imkanları olduqca yüksəkdir, amma bəzən internetin çatmadığı yerlərdə kiçik bir yerli radiostansiya əhəmiyyət kəsb edir. Elə Azərbaycanın özündə çoxlu peyk antenası var. Nə qədər insan bu alternativ informasiya kanalından yararlanır.

Azərbaycana bu gün hətta “dolma müharibəsində” belə qalib olmaq asan deyil

Axı, İsveçin də, Danimarkanın da xeyli kiçik şəhəri var. Bunların bir çoxunda heç Azərbaycanın varlığından xəbəri olmayan yüzlərlə insana lap elə yerli qəzet vasitəsilə ölkəmiz barədə faydalı bir məlumat vermək özü də bir qəhrəmanlıqdır. Qəzeti, radiosu, televiziyası hələ də məlumat ötürülməsində böyük əhəmiyyət daşıyan yüzlərlə ölkə var. Hər ölkənin kitabxanasına yerli dildə Azərbaycan barədə 10-15 kitab verə bilsək, xaricdə təhsil alan hər azərbaycanlı tələbə öz ölkəsi və Dağlıq Qarabağ münaqişəsindən ara-sıra 5-10 kəlmə danışa bilsə, informasiyanın çatdırılmasında irəli gedə bilərik. Görə biləcəyin kiçik bir işi bacarsan, deməli ümumi prosesdə qalib gələ bilərik.

Erməni tərəfi artıq əsrləridir hər bir alternativ kanaldan informasiya ötürməklə məşğuldur. 300 növ dolması olan Azərbaycana bu gün hətta “dolma müharibəsində” belə qalib olmaq asan deyil. Hələ sovet dönəmində “Aşpaz müsabiqəsinə gəlmişik” adlı erməni filmində dolma ilə bağlı yaddaqalan bir epizod nəzər çəkir. Moskvaya yarışmaya gələn erməni aşpazları məhz dolma bişirir və vaxtında onu jüriyə verə bilmirlər. Yer tutmasalar da, dolmanın çox dadlı olması ilə bağlı xeyli tərif eşidirik. Yəni hələ 1977-ci ildə ekrana çıxan bu film Sovet İttifaqının hər yerini gəzmişdi. Gəl, bundan sonra sübut elə ki, dolma türk mənşəli sözdür və Azərbaycanda daha dadlısı bişirilir.

Hər bir mümkün ehtiyat kanalları ilə məlumat ötürməyi bacarmalıyıq. Məlumatın yalnız Facebook və ya Twitter-lə ötürüldüyünü düşünmək doğru deyil. Hərtərəfli ehtiyat sistemləri, alternativ kanallar olmalıdır. İnformasiyanın ötürülməsində daha çox imkanın olması hava-su kimi əhəmiyyətlidir. Bu baxımdan daha çox çalışmağa ehtiyac duyulur.

23
Tərtər rayonunda erməni qüvvələrinin açdıqları atəşin nəticəsi

Tərtər Ağdam rayonları yenidən atəşə tutulub

0
Ermənistan silahlı qüvvələri yaşayış mənətəqələrimizin atəşə tutulmasını davam etdirirlər. Ağdam və Tərtər yenə atəşə məruz qalıblar.

BAKI, 20 oktyabr - Sputnik. Ermənistan silahlı qüvvələri Tərtər və Ağdam rayonlarının yaşayış məntəqələrini artilleriya atəşinə tutur. Bu barədə Sputnik Azərbaycan Müdafiə Nazirliyinə istinadən məlumat verir.

Dağıntı və tələfat barədə hələlik məlumat yoxdur.

0
Mövzu:
Azərbaycan və Ermənistan arasında müharibə