Telefon

Başqaları az qala telefonla ulduzlara uçur, biz heç danışa bilmirik

43
(Yenilənib 18:50 01.12.2019)
Bərdədə telefon və internetin keyfiyyətinin aşağı olması barədə hamı danışır. Problemin aradan qaldırılması üçün isə iş görülmür

Musa Muradlı , Sputnik Azərbaycan

BAKI, 1 dekabr — Sputnik. Bərdə rayon  Telekommunikasiya İdarəsi 3 aydan çoxdur ki, Mustafaağalı sakininin telefonunu bərpa edə bilmir

İdarənin yarıtmaz işinin nəticəsi olaraq, rayonda nə telefon, nə də internet xəttləri düz əməlli işləmir.

Bərdədə rabitənin durumu heç də ürəkaçan deyil. Telefon xətləri normal işləmir, internetin surətindən danışmağa dəyməz. Özü də bu, Azərbaycanın kosmosa peyk göndərdiyi bir vaxtda baş verir.

Bərdə sakinləri dərdlərini Sputnik Azərbaycan-a danışıblar.

Mustafaağalı kənd sakini Əsli Muradova aylıq abunə pulunu ödəsə də telefonu ilin çox vaxtı işləmir: “Mənə məxsus telefon işləmir. Buna görə kənd ATS-nə dəfələrlə müraciət eləsəm də, düzəlmir. Düzələcəyini  deyirlər, ancaq yaranmış texniki nasazlığı aradan qaldırmırlar. Bərdə Rayon Telekommunikasiya İdarəsinin rəisi Rəfail Məmmədov mənim istifadə etdiyim telefona texniki qulluq göstərilməsindən faktiki olaraq imtina edir. 3 aydan artıqdır ki, mən ümumiyyətlə telefonla danışa bilmirəm”.

Bərdə şəhər sakini Nilufər Əliyeva isə yaşadığı ünvan dəyişikliyindən sonra ailəsinə məxsus telefon nömrəsini köçürmək üçün Bərdə rayon Telekommunikasiya İdarəsinə müraciət edib. İdarədən isə telefonun yeni ünvana daşınmasından imtina olunub. Bərdə rayon Telekommunikasiya İdarəsinin baş mühəndisi vətəndaşın müraciətinə müsbət cavab verə bilməyəcəklərini bildirib. Səbəb də evlə nömrə yuvaları arasında məsafənin uzaq olması kimi izah olunub .

Bərdə rayon Mehdili İnzibati Ərazi Dairəsində yerləşən Qaradəmirçi kəndində də rabitənin günü ürəkaçan deyil. Kənd sakini İsrafil Paşayev deyir ki, telefon və internetdən istifadə eləmək imkanından tez-tez məhrum olurlar. Bu barədə Bərdə rayon Telekommunikasiya İdarəsinin rəisinə məlumat versələr də, heç nə dəyişməyib.

Bərdə rayon Telekommunikasiya İdarəsinin rəisi Rəfail Məmmədovun məsələyə aydınlıq gətirməsi üçün cəhd etsək də, adı çəkilən şəxslə danışmaq mümkün olmadı. İdarənin baş mühəndisi Yunis Məmmədov isə “düzələcək” deyərək, yaranmış problemin kabellə əlaqəli olduğunu bildirir.

“Telefon kabelin zədələnməsinə görə işləmir. Kabel magistral yolun altından keçdiyinə görə texniki nasazlığın aradan qaldırılması çətinləşib. Orada görüləsi xeyli iş var. Yol yarılmalı, kabel çıxarılıb, dəyişdirilməlidir. Bunun üçün də razılıq alınmalıdır. Gecikməyə səbəb də budur” – deyə baş mühəndis bildirib.

Bərdədə telefon və internetin keyfiyyətinin aşağı olması barədə hamı danışır. Problemin aradan qaldırılması üçün isə iş görülmür. Ölkə başçısının məmurlar üçün müəyyən etdiyi prioritet vəzifə - vətəndaş məmnunluğunu təmin etmək tapşırığına Bərdə Rayon Telekommunikasiya İdarəsinin rəhbərliyinin özünəməxsus yanaşması var.

43
Elektrik yarımstansiyası, arxiv şəkli

Azərbaycanda yeni istilik elektrik stansiyalarının tikilməsinə ehtiyac yaranıb

4
(Yenilənib 00:22 21.10.2020)
"Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

BAKI, 21 oktyabr — Sputnik. "Koronavirus (COVID-19) pandemiyasının qlobal energetika sektorunda enerjiyə tələbatın azalması ilə müşayiət olunan təsirləri bu il ölkəmizin elektrik enerjisi ilə bağlı göstəricilərini qismən azaldıb".

Sputnik Azərbaycan xəbər verir ki, bunu Energetika naziri Pərviz Şahbazov 20 oktyabr - Azərbaycan energetiklərinin peşə bayramı günü münasibətilə rəsmi mətbuatda dərc etdirdiyi məqalədə bildirib.

Onun sözlərinə görə, bu ilin 9 ayı ərzində elektrik enerjisinin istehsalı ötən ilin müvafiq dövrü ilə müqayisədə 0,8% azalaraq, 19,4 milyard kVt·st təşkil edib.

P.Şahbazov bildirib ki, qarşıdakı illərdə isə elektrik enerjisinə tələbat və istehsal həcmləri ilə bağlı dinamikada əhəmiyyətli dərəcədə artım gözlənilir:

"2025-ci ilə qədər ölkəmizdə elektrik enerjisinə tələbatın 25,5 milyard kVt·st-a qədər artacağı, ixrac da nəzərə alınmaqla elektrik enerjisi istehsalının isə ötən ilə nisbətən 15% artımla 30 milyard kVt·st-a çatacağı proqnozlaşdırılır. Bu istehsal həcmlərinin bir qismi ötən il istismara verilmiş, qoyuluş gücü 409 МVt olan "Şimal-2" elektrik stansiyası, bu il təməli qoyulmuş və 2022-ci ildə istifadəyə verilməsi planlaşdırılan 385 МVt gücündə "Qobu" elektrik stansiyası hesabına əldə ediləcək".

Nazirin fikrincə, həmçinin bu prosesdə "Azərenerji" ASC-nin istehsal güclərinin optimallaşdırılması və bərpası nəticəsində yenidən istismara cəlb edilən 1300 MVt imkan gücündən istifadə ediləcək: "Eyni zamanda, təhlillər göstərir ki, tələbatın tam qarşılanması üçün yeni istilik elektrik stansiyalarının tikilməsinə də ehtiyac var".

4
Su təhcizatı işləri, arxiv şəkli

Həm Azərbaycanın, həm İranın arzusu reallaşır - "Xudafərin" hidroqovşağından şad xəbər

19
(Yenilənib 23:50 20.10.2020)
Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir.

BAKI, 20 oktyabr — Sputnik. "Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir.

Sputnik Azərbaycan xəbər verir ki, bunu Energetika naziri Pərviz Şahbazov deyib.

O vurğulayıb ki, Azərbaycan, İran və Rusiyanın enerji sistemlərinin əlaqələndirilməsi üzrə proses davam edir: "Hər üç ölkənin müvafiq enerji şirkətlərinin razılığı ilə müəyyən edilmiş məsləhətçi şirkət tərəfindən layihənin texniki-iqtisadi əsaslandırılmasının hazırlanmasına başlanılıb. Eyni zamanda, "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız Qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş"dən irəli gələn vəzifələr də yerinə yetirilməkdədir.

"Xudafərin" hidroqovşağı bəndinin tikintisi demək olar ki, tamamlanıb, "Qız Qalası" hidroqovşağının bəndində isə işlər yekunlaşmaq üzrədir. "Xudafərin" hidroqovşağı üzrə tikinti xərclərinin və dəymiş ziyanın hesablanması, habelə su elektrik stansiyalarının qurğu və avadanlıqlarının alınması və quraşdırılması məsələlərinə baxılır. 1,6 milyard kubmetrdən çox sututumuna malik bu hidroqovşaqlar və ümumi qoyuluş gücü 280 meqavat gücündə olan bu stansiyalar Araz çayının su və enerji ehtiyatlarından hər iki tərəfin birgə istifadəsinə imkanlar yaradır".

O bildirib ki, bu layihələr iqtisadi və strateji aspektdən ölkəmiz üçün çox əhəmiyyətlidir:

"Bu layihələrin reallaşması Azərbaycana illik 368 milyon kilovat/saat elektrik enerjisi istehsalı, mövcud 252 min hektar torpaq sahəsi üzrə suvarmanın yaxşılaşdırılması və 8 min hektar yeni əkin sahələrinin suvarılması imkanı yaradacaq. Azərbaycanın suverenliyi, ərazi bütövlüyü əsas götürülməklə 2016-cı ildə bu layihələr üzrə sazişin imzalanması işğal olunmuş ərazilərimizin geri qaytarılacağına böyük inamın ifadəsi idi".

"Bu günlərdə müzəffər Ordumuzun Cəbrayıl şəhəri və rayonunun bıra sıra kəndlərini azad etməsi də Azərbaycan Prezidentinin uzaqgörən siyasətini, həmin ərazilərin bərpası zamanı bu hidroqovşaqlar və stansiyaların istifadəsinə əvvəlcədən hazırlıqla bağlı strateji baxışlarını bir daha nümayiş etdirdi. Azərbaycan və İran arasında birgə həyata keçirilən "Ordubad" və "Marazad" su elektrik stansiyaları layihələri üzrə işlər davam etdirilir", - deyə nazir bildirib.

19
Əlaqədar
İranla Azərbaycan arasında tarixi "Xudafərin Sazişi" imzalandı
İlham Əliyev: Xudafərin körpüsünün üzərində Azərbaycan bayrağı qaldırıldı
Nazirlikdən sərhədlərimizi qoruyanlara Xudafərin naminə zirehli hədiyyə - FOTO
Xudafərin körpüsünün üzərində Azərbaycan bayrağı - VİDEO
Ermənistan Xudafərin istiqamətində əməliyyat keçirməyə qadir deyil - MN