Bakıda turistlər, arxiv şəkli

On iki ay qonaq-qaralı olacağıq: Planlar var, mövsümilikdən xilas oluruq

1377
(Yenilənib 13:21 09.11.2019)
Azərbaycan Dövlət Turizm Agentliyi və Azərbaycan Turizm bürosunun 2020-ci il fəaliyyət planında qış xizək kurortlarında turizm fəaliyyət istiqamətlərinin genişləndirilməsi nəzərdə tutulub

Zülfiyyə Quluyeva, Sputnik Azərbaycan

BAKI, 8 noyabr — Sputnik. Turizm Azərbaycanda qeyri-neft sektorunun mühüm inkişaf istiqamətinindən biridir. Artıq bu sektorda dinamik inkişaf müşahidə olunur. Bunu ölkəmizə gələn turistlərin artan statistikası da təsdiqləyir. Dövlət Turizm Agentliyinin məlumatına görə, təkcə bu ilin yanvar-avqust dövrü ərzində Azərbaycana səfər edən xarici vətəndaşların sayı 8.3% artaraq 2.1 milyona çatıb. Bu isə 2018-ci ilin analoji dövrü ilə müqayisədə 42 min və ya 13.2% artım deməkdir.

Azərbaycana gələn turistlərin sayının ili-ildən artması ölkəmizdə bu sahənin inkişafından xəbər versə də, turizm sektorunda mövsümilik problem olaraq qalır. Hətta Dövlət Turizm Agentliyinin sədri Fuad Nağıyev də öz çıxışlarında Azərbaycanın turizm sektorunda mövsümilik probleminin mövcud olduğunu təsdiqləyib. O, bildirib ki, problemin aradan qaldırılması istiqamətində işlər gedir.

Qeyd edək ki, turizm sektorunda mövsümilik amili qışda Azərbaycana gələn turistlərin sayına təsirsiz ötüşmür. Halbuki, ölkəmizdə qış turizminin inkişafı üçün böyük potensial var.

Azərbaycan Dövlət Turizm Agentliyinin mətbuat katibi Kənan Quluzadə Sputnik Azərbaycan-a açıqlamasında bildirib ki, qış turizmi Azərbaycan Dövlət Turizm Agentliyi və Azərbaycan Turizm bürosunun builki fəaliyyət planında geniş yer alıb. K. Quluzadənin sözlərinə görə, “Şahdağ” və “Tufandağ” kurortlarının turizm təkliflərini turistlərə aşılamaq məqsədilə, hədəfə götürülən ölkələri nəzərdə tutan onlayn kampaniyalar həyata keçiriləcək: “Həmçinin bizim agentlik qış kurortları ilə Bakı və digər şəhərlərin nəqliyyat əlaqələrini nəzərdən keçirib, qış turizmi üçün çatışmazlıqların aradana qaldırılması üçün aidiyyatı qurumlarla iş birliyi yaradır. Əlavə olaraq, turistlər üçün xizək kurortlarının əlçatanlığını artırmaq məqsədilə Azərbaycan Turizm Bürosu www.skiazerbaijan.com vebsaytını hazırlayıb istifadəyə verib. Azərbaycan Dövlət Turizm Agentliyi və Azərbaycan Turizm Bürosunun 2020-ci il fəaliyyət planında isə qış xizək kurortlarında turizm fəaliyyət istiqamətlərinin genişləndirilməsi nəzərdə tutulubr. Bundan əlavə, işgüzar turizmin potensialının daha geniş təbliğatı aparılıb ki, qış mövsümündə bu istiqamətdən daha effektiv bəhrələnə bilək”.

Çağırılmayan qonağa süpürülməmiş yer və ya Turist kəndin dadını necə çıxarsın?>>

K. Quluzadə bildirir ki, Azərbaycanın regionlarında böyük turizm potensialı var. Bu isə yeni turizm məhsulları yaratmağa imkan verir: “Bir çox regionlarda sahibkarlar artıq aktivdirlər. Bundan əlavə, bu gün qış mövsümü deyəndə mütləq Bakı-Abşeronun və dörd dəhliz üzrə bütün rayonları nəzərdə tutmaq lazımdır. Bakı-Şimal, Bakı-Balakən, Bakı-Gəncə və ətrafı, eləcə də Bakı-Cənub istiqamətlərində hər bir mövsüm üçün infrastruktur var. Bunun üçün kadr potensialı formalaşır”.

Aidiyyatı qurumlar və turizm üzrə ekspertlər də bu sahədə artıq ciddi işlərə başlanıldığını bildirirlər. Azərbaycan Turizm Agentlikləri Assosiyasının idarə heyətinin üzvü Göydəniz Qəhrəmanov Sputnik Azərbaycan-a açıqlamasında bildirib ki, turizmdə mövsümilik faktoru bu sahəni inkişafdan saxlayan amillərdən biridir: “Artıq turizmin inkişaf etdiyi bölgələrdə infrastruktur təkmilləşdirilir. Yeni otellər inşa edilir, turizm sahəsində xidmətin səviyyəsi artırılır. Sözsüz ki, hər birimiz istəyərdik ki, Azərbaycan ilin bütün fəsillərində turistlərin axın etdiyi məkan olsun. 

Artıq ötən illərlə müqayisədə ölkəmizə gələn turistlərin sayındakı artım, görülən işlərin bəhrə verdiyini sübut edir. Bununla belə, yay ayları ilə müqayisədə qışda turistlərin sayında azalma müşahidə edilir. Araşdırmalar göstərir ki, Azərbaycana gələn turistlər Bakı ilə yanaşı, qış aylarında daha çox xizək turizminə maraq göstərir. Qəbələ və Qusarda xizək turizmi ilə bağlı böyük infrastruktur var. Ölkəmizin digər qış turizminin inkişafı üçün imkan olan ərazilərində də yeni otellər tikilir, infrastruktur qurulur. Naxçıvanda xizək marşrutunun açılması istiqamətində işlər aparılır. Otellərin sayının artması Azərbaycana turist axınını da artırır”.

Otellər və Restoranlar Assosiasiyası (DAİR) İdarə Heyətinin sədri Samir Dübəndi Sputnik Azərbaycan-a açıqlamasında deyib ki, Azərbaycanda ixtisaslaşmış turizm sənayesinin inkişafına dair Strateji Yol Xəritəsində də turizmin mövsümülük məsələsi öz əksinin tapıb. Odur ki, turizm sektorunda mövsümdən asılılıq ili-ildən azalmalıdır. Onun sözlərinə görə, Strateji Yol Xəritəsi ilə bağlı qəbul olunmuş Tədbirlər Planında yerli və xarici turistlər üçün turizmdə mövsümilik problemini regional səviyyədə aradan qaldıran turizm xidməti infrastrukturunun inkişaf etdirilməsi qeyd olunub.

Rusiya paytaxtı ən populyar dini turizm şəhəri siyahısında>>

S. Dübəndi bildirir ki, bütün ölkələrdə turizm yay mövsümündə canlanır. Odur ki, dünyanın turizmin inkişaf etdiyi ölkələrində də qış aylarında turist sayı azalır: “Amma biz çalışmalıyıq ki, mövsümdən asılı olmamaq üçün qış turizmini daha da inkişaf etdirək. Qışda “Şahdağ” və “Tufandağ” hesabına turistləri cəlb edə bilirik. Azərbaycan artıq 10 ildir ki, qış turizm sektorunda xidmət təklif edir. Amma çalışmalıyıq ki, bu sahədə də qonşu ölkələrlə rəqabət aparaq. Bunun üçün qiymətlərin azbüdcəli turistlərə uyğunlaşdırılmalı, qış turizm mərkəzlərinin ətrafında daha ucuz yerləşmə mərkəzləri, restoranlar yaradılmalıdır. Etiraf edək ki, bu gün qış turizmi daxili turistlərin hamısının cibinə uyğun deyil. Qış turizmi üçün lazım olan geyim və avadanlığın ucuz qiymətə kirayə verilməsi qış turizminə əlçatanlığı artırar. Həmçinin, bölgələrimizdə inşa edilən hava limanlarının fəaliyyəti gücləndirilməlidir. Turistlərin çoxu regionlara birbaşa reyslərdən istifadə etməklə yox, Bakıya gəlməklə gedir”.

S. Dübəndi deyir ki, həmçinin turizmin müxtəlif növləri üzrə, xüsusilə xizək turizmi üzrə kadr hazırlığı davam etdirilməlidir. 

Bakı Turizm Peşə Məktəbinin direktoru Nilufər Kərimova isə Sputnik Azərbaycan-a bildirib ki, hazırda turizmin bəzi növləri üzrə ixtisaslı kadr hazırlamaq çətindir: “Beş il bundan əvvəl bizim peşə məktəbində qış turizmi üzrə kadr hazırlığı vardı. Amma bu elə ixtisasdır ki, nəzəri bilikdən çox, praktiki bilik tələb edir. O vaxt bu peşəyə qış turizminin inkişaf etdiyi bölgələrdəki məzunların marağı böyük idi. O tələbələr bu ixtisasa qəbul olsalar da, qış turizm mərkəzlərinin direktorları tələbələrə praktika keçmək üçün şərait yaratmırdı. Həmin tələbələr xizək taxıb gəzməyi bacarmalıdırlar ki, təlim ustası kimi çalışa bilsinlər. Bu ixtisası seçən tələbələrə qalmaq üçün yer verilmədiyindən, biz o ixtisası ləğv etdik. İndi biz bu ixtisas üzrə 3 aylıq kurs keçirik. Sabah qış turizmində xizək təlimi üzrə ixtisaslı kadr tələb olunsa, bu sahədə kadr problemi üzə çıxacaq. Ona görə də, turizmdə mövsümülükdən uzaqlaşmaqla paralel şəkildə kadr hazırlığı da aparılmalıdır".

“Millennium Turizm Lufthansa City Center” şirkətinin prezidenti Ruslan Quliyev Sputnik Azərbaycan-a bildirib ki, turizmi inkişafdan saxlayan əsas amil elə mövsümiliyin olmasıdır: “Hansı ölkənin turizmi mövsümdən asılıdırsa, həmin ölkədə turizm sektorunda həm qiymətlər yüksək olur, həmçinin də turist axını azalır. Odur ki, Azərbaycan bu məsələdə düzgün yol seçib. Əsas hədəf 12 ay turizmi təbliğ etməkdir. Bunun üçün yeni turizm məhsulları təqdim etməklə yanaşı, qış turizm mərkəzlərimizi daha cəlbedici etməliyik. 

Həmin bölgələrə mütəmadi üz tutan turistlər üçün cəlbedici endirim kampaniyaları tətbiq etmək lazımdır. Həmçinin yaydan başlayaraq  qış turizmi növləri tanıdılmalıdır. Məsələn, turistlərin Yeni ili Bakıda qarşılaması turizm məhsulu kimi bu il daha populyar olacaq. Regiondan olan turistlərin Azərbaycana axınını artırmaq məqsədilə qış turizm komplekslərində müxtəlif mövsümlərdə böyük və cəlbedici festivallar keçirilməlidir”.

R. Quliyev deyir ki,  bundan başqa Destinasiya Menecmenti Təşkilatları iri tur operatorlarını regionlarda keçirilən tədbirlərə dəvət etməlidir ki, bölgələrdə təklif olunan turizm xidmətləri, suvenir satışı barədə məlumatlı olsunlar: “Qarşıya məqsəd qoyulub ki, 2025-ci ilə qədər Azərbaycan artıq sağlamlıq, qış, mədəni və ekoturizm kimi bir çox ixtisaslaşmış turizm növləri üzrə kifayət qədər tanınmış olacaqdır. Artıq Dövlət Turizm Agentliyi hədəf ölkələrində tanıtım tədbirləri keçirir”.

Məqalə Dövlət Turizm Agentliyi tərəfindən elan edilmiş müsabiqəyə təqdim edilir.

1377
Kubadan gələn tibb işçiləri

Bizi onlar xilas edəcək! Kubalı həkimləri koronavirusla mübarizə üçün Bakıya gəldilər

26
(Yenilənib 18:12 13.07.2020)
Kubadan gələn peşəkar həkimlər Azərbaycan həkimləri ilə birgə pandemiyaya qarşı mübarizə tədbirlərində iştirak edəcəklər

BAKI, 13 iyul — Sputnik. İyulun 13-ü Azərbaycanın milli aviadaşıyıcısı (AZAL) Havanadan (Kuba) Bakıya xüsusi reys yerinə yetirdi. Bu barədə Sputnik Azərbaycan-a AZAL-dan məlumat verilib.

Bildirilib ki, Azərbaycan Respublikasının Nazirlər Kabineti yanında Operativ Qərargahın tapşırığı ilə təşkil olunan bu reyslə ölkəmizə koronavirus infeksiyasına qarşı mübarizə aparmaq üçün 115 mütəxəssisdən ibarət həkim qrupu gətirilib.

Kubadan gələn peşəkar həkimlər Azərbaycan həkimləri ilə birgə pandemiyaya qarşı mübarizə tədbirlərində iştirak edəcəklər.

Qeyd edək ki, bu uçuş "Azərbaycan Hava Yolları" aviaşirkətinin tarixində Bakı-Havana-Bakı marşrutu üzrə başqa məntəqələrdə enmə icra edilmədən həyata keçirilən ilk birbaşa uçuşdur. Uçuş genişfüzelyajlı "Boeing 787" tipli təyyarə vasitəsilə həyata keçirilib. Uçuşun müddəti 13 saat, Azərbaycan və Kuba paytaxtları arasındakı məsafə 11880 km təşkil edib.

26
 Dövlət Təhlükəsizliyi Xidməti

Azərbaycanın keçmiş müdafiə naziri təxribat maddəsi ilə saxlanıldı

97
(Yenilənib 18:05 13.07.2020)
Rəhim Qazıyev Azərbaycan Respublikası Cinayət Məcəlləsinin 281-ci (Dövlət əleyhinə yönələn açıq çağırışlar) və 282-ci (Təxribat) maddələri ilə başlanılmış cinayət işi üzrə şübhəli şəxs qismində saxlanılmışdır.

BAKI, 13 iyul – Sputnik. Məlum olduğu kimi, 2020-ci il iyulun 12-də Ermənistanın silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu istiqamətində atəşkəs rejimini kobud şəkildə pozaraq artilleriya qurğularından mövqelərimizi atəşə tutmuşlar. Görülən adekvat tədbirlər nəticəsində düşmənə ağır zərbə endirilib və o, ciddi itkilər verərək geri oturdulmuşdur. Düşmən təxribatlarının qarşısı alınarkən Azərbaycan Ordusunun şəhid olmuş hərbi qulluqçularının ailələrinə dərin hüznlə başsağlığı verir, yaralılara tez bir zamanda sağalmaları üçün şəfa diləyirik.

Cəbhədə baş vermiş döyüşlər zamanı xalqımızın hər zaman olduğu kimi nümayiş etdirdiyi milli həmrəylik və birliyindən, vətəndaş-dövlət vəhdətindən narahat olan düşmən dairələr və antimilli qüvvələrin respublikada ictimai-siyasi sabitliyi, əmin-amanlığı pozmağa, dövlətin, onun ordusunun və digər strukturlarının sistemli fəaliyyətinə zərbə vurmağa uğursuz cəhdləri müşahidə edilməkdədir. Bir qrup şəxs öz çirkin niyyətlərini yerinə yetirmək üçün dövlət sərhədində baş vermiş düşmən təxribatlarından sui-istifadə edərək Silahlı Qüvvələrimizi, Azərbaycan əsgərini, həmçinin hakimiyyət və hüquq mühafizə orqanlarını gözdən salmaq, onlara inamsızlıq yaratmaq, Azərbaycan Respublikasının müdafiə qabiliyyətinə xələl gətirmək məqsədilə sosial media səhifələrində əhali arasında çaşqınlıq, ölkədə qarışıqlıq yaratmağa yönələn məlumatlar yaymağa başlamış və dövlət əleyhinə açıq çağırışlar etmişlər.

Sputnik Azərbaycan-ın xəbərinə görə, bu barədə Dövlət Təhlükəsizliyi Xidməti və Baş Prokurorluğun Mətbuat xidmətlərinin məlumatında bildirilir. 
2020-ci il iyulun 12 və 13-də sabiq müdafiə naziri Rəhim Qazıyevin Azərbaycan-Ermənistan sərhədində düşmənin təxrtibatları ilə bağlı döyüş əməliyyatlarının aparıldığı və bu barədə Azərbaycan Respublikası Müdafiə Nazirliyi tərəfindən ictimaiyyətə müntəzəm rəsmi məlumatlar verildiyi bir vaxtda, məqsədyönlü şəkildə sosial şəbəkələr vasitəsi ilə hadisələrin mahiyyəti barədə aşkar surətdə həqiqətə uyğun olmayan xəbərlər yayıb Azərbaycan Respublikasının müdafiə qabiliyyətini zəiflətməyə yönələn hərəkətlər edərək, insanları iğtişaşlara, dövlət hakimiyyətini zorla ələ keçirməyə açıq çağırışlar etməklə təxribat törətməsinə əsaslı şübhələr müəyyən olunmuşdur.

© Photo : TREND
Экс-министр обороны Рагим Газиев


Rəhim Qazıyev Azərbaycan Respublikası Cinayət Məcəlləsinin 281-ci (Dövlət əleyhinə yönələn açıq çağırışlar) və 282-ci (Təxribat) maddələri ilə başlanılmış cinayət işi üzrə şübhəli şəxs qismində saxlanılmışdır.
Azərbaycan Respublikasının informasiya sahəsində milli maraqlarına, həmçinin “Dövlət sirri haqqında”, “Kütləvi informasiya vasitələri haqqında” Azərbaycan Respublikasının qanunlarının və digər qanunvericilik aktlarının tələblərini qəsdən pozaraq dövlət sirri təşkil edən, ölkəmizin müdafiə potensialına, Silahlı Qüvvələrimizin və ordumuzun döyüş qabiliyyətinə zərər vuran dəqiqləşdirilməmiş, qərəzli, ictimai rəyi çaşdırmaq məqsədi güdən məlumatların yayılması yolverilməzdir.
Eyni zamanda bir daha diqqətə çatdırılır ki, Azərbaycan Respubliksının milli mənafelərinin və təhlükəsizliyinin qorunmasında xalqın həmrəyliyi sarsılmazdır, düşmən həmlələrinə, antiazərbaycan qüvvələrə və onların maraqlarına xidmət edənlərin xaos, anarxiya və təxribat cəhdlərinin qarşısı qətiyyətlə alınmışdır və bundan sonra da qətiyyətlə alınacaqdır.
Hazırda Dövlət Təhlükəsizliyi Xidmətində başlanılmış cinayət işi üzrə istintaq-əməliyyat tədbirləri davam etdirir.

97
Atışma, arxiv şəkli

Müdafiə Nazirliyi: Ermənistan KİV-i dezinformasiya yayır

0
(Yenilənib 18:38 13.07.2020)
Erməni tərəfinin yaydığı fotonun üzərində onun 2018-ci ilin 12 dekabr tarixində çəkildiyi qeyd olunub

BAKI, 13 iyul – Sputnik. Azərbaycan Müdafiə Nazirliyinin Mətbuat Xidmətinin rəisi, polkovnik Vaqif Dərgahlı Ermənistan kütləvi informasiya vasitələrində (KİV) düşmən ölkənin hərbi bölmələrinin guya Tovuz rayonunun Ağdam kəndi istiqamətində yerləşən Qaraqaya yüksəkliyini ələ keçirtməsi barədə yayılan məlumata münasibət bildirib.

Sputnik Azərbaycan-ın xəbərinə görə, V.Dərgahlı deyib ki, yayılan məlumatlar yanlışdır və ictimai fikri çaşdırmaq məqsədi daşıyır: "Dezinformasiya ilə birlikdə yayılan fotonun üzərində onun 2018-ci ilin 12 dekabr tarixində çəkildiyi qeyd olunub. Təkcə bu fakt məlumatın yanlış olduğunu sübut edir. Bir daha xalqımızdan, o cümlədən kütləvi informasiya vasitələrindən və sosial şəbəkə istifadəçilərindən ancaq Müdafiə Nazirliyinin rəsmi məlumatlarına istinad etmələrini xahiş edirik".

0