Ailə, arxiv şəkli

Ölkədə boşanmaların sayının artmasının səbəbi açıqlandı

2067
(Yenilənib 00:12 28.10.2019)
Aynur Veysəlova: "Ailədə övladlara müxtəlif əmək bacarıqları aşılanmalı, qayğı hissi təlqin edilməlidir ki, böyüyəndə, ailə başçısı olanda, artıq məsuliyyətlərinin nə olduğunu dərk edə bilsinlər".

Nigar İsgəndərova, Sputnik Azərbaycan

BAKI, 27 oktyabr — Sputnik. 2019-cu ilin 9 ayı ərzində 46.745 nəfər nikaha daxil olub. 2018-ci ilin 9 ayında bu rəqəm 45.963 olub. Bu barədə Ədliyyə Nazirliyindən Sputnik Azərbayan-ın sorğusuna cavab olaraq bildirilib. Qeyd olunub ki, 2019-cu ildə respublikanın rayon (şəhər) qeydiyyat şöbələri tərəfindən 50 yaşdan yuxarı şəxslərlə 2.453 nikah qeydiyyata alınıb. Onlardan 814-ü 60 yaşdan yuxarı, 197-si isə 70 yaşdan yuxarı, 54-ü 80 yaşdan yuxarı şəxslərin nikahının qeydiyyatıdır. 2019-cu ilin 9 ayı ərzində nikahın pozulmasının sayı 12.814 olub, 2018-ci ilin 9 ayında 11.191

Əcnəbi və vətəndaşlığı olmayan şəxslərlə bağlanan nikahıların sayı 2019-cu ilin 9 ayı ərzində 1.669, 2018-ci ilin 9 ayı ərzində 1.666 olub. Əcnəbi və vətəndaşlığı olmayan şəxslərlə boşanmaların sayı 2019-cu ilin 9 ayı ərzində 324, 2018-ci ilin 9 ayı ərzində 299 olub.

Maraqlıdır, boşanmaların sayının artmasının səbəbləri nədir?

Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin baş məsləhətçisi Aynur Veysəlova Sputnik Azərbaycan-a açıqlamasında deyib ki, ailədə tərəflərin bir-birinə güzəşt edə bilməmələri boşanmalara səbəb olan başlıca amillərdəndir:

"Rəsmi statistikalar göstərir ki, boşanmalar daha çox evliliyin ilk illərində qeydə alınır. Bu da ailə həyatında evliliyin ilk illərinin böhran dövrü hesab edilməsi ilə əlaqədardır. Bu dövr birgə yaşayışın təməlinin qoyulması, tərəflərin bir-birini daha yaxşı tanımasıdır. Əgər ailə mənəvi cəhətdən möhkəm olarsa, bir o qədər uğurlu olar. Biz boşanmaların səbəblərini araşdırdıqda bu pillədə ilkin yerdə tərəflərin xasiyyətinin uyğun olmamasını görürük. Xasiyyətlərin uyğun olmamasının səbəbi, ailədə "mən" və "sən"in olmasıdır. Ailədə "biz" ifadəsi olmalıdır. Ailədə məsləhətləşmək, birgə qərar vermək lazımdır. Çünki ailədə güzəşt olanda söz-söhbət də az olur".
Aynur Veysəlova
© Photo : REPORT IA
Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin baş məsləhətçisi Aynur Veysəlova

Veysəlova hesab edir ki, ailədə tərəflərin bir-birlərinə güzəşt etməməsi, hörmətsizlik varsa, bu zaman davamlı münaqişələr boşanmalara səbəb olur. Bundan başqa, ailənin uğurlu olması həm də ailədə görülən tərbiyədən, təhsil səviyyəsindən də asılıdır. Buna görə, ilk növbədə övladlarımıza normal təhsil verməliyik ki, digərlərinə qarşı tolerantlığı, ədalətliliyi, empati duyğusunu öyrənə bilsin.

Komitə yetkilisinin fikrincə, ailədə övladlara müxtəlif əmək bacarıqları aşılanmalı, qayğı hissi təlqin edilməlidir ki, böyüyəndə, ailə başçısı olanda, artıq məsuliyyətlərinin nə olduğunu dərk edə bilsinlər. Təəssüf ki, bəzən bu cür nüanslar hələ erkən yaşlarda nəzərə alınmır.

Veysəlova deyib ki, ailədə qadın və kişi hüquqlarının bərabərliyinin pozulması da müəyyən problemlərə səbəb olur:

"Ana mətbəxdə qab yuyarkən ata da uşaqla vaxt keçirməlidir. Bu hiss uşağın gələcəyi, onun özünün ailə modelinin qurulması üçün müsbət töhfə verəcək. Öhdəliklərin bərabər olması isə o deməkdir ki, ailədə bütün yük qadının üzərinə düşməyəcək. Ailədə normal münasibətlər görən uşaq gələcəyin gözəl ailə başçısı olacaq. Mənfi tendensiyalar görən uşaq elə düşünəcək ki, ata imici, ya da ki, ana imici elə bu cür də olmalıdır. Belə olan halda ana obrazı qız, ya oğlan uşağının düşüncəsində bütün öhdəlikləri, işləri üzərinə götürən şəxs kimi qalacaq". 

Qeyd edək ki, ötən ilə aid rəqəmlərə nəzər yetirdikdə əksəriyyətin evliliklərinin 5 ilədək olan müddətdə boşandığını görmək mümkündür. Belə ki, ötən il 5 ilədək boşanan kişilərin sayı 5 min 296, 5-9 ilədək olanların sayı 4 min 188, 10-19 ilədək olanlar isə 3 min 441 olub. 20 il evlilikdən sonra boşanan kişilərin sayı cəmi 1 932 olub.

Bu ilin ilk 7 ayında ən çox boşanan kişilər 25-29 yaş aralığında olublar. Onların sayı 2 min 862 olub. Onların 2 min 25-i isə 25-29 yaşlarda boşanıb. 50-54 yaşda boşanan kişilərin sayı 872 olub.

İllər üzrə rəqəmlərə də nəzər yetirdikdə, boşanmaların sayının getdikcə artdığını görə bilərik. Belə ki, 2010-cu ildə 9 min 61, 2011-ci ildə  10 min 747, 2012-ci ildə 11 min 87, 2013-cü ildə 11 min 730, 2014-cü ildə 12 min 88, 2015-ci ildə 12 min 764, 2016-cı ildə 13 min 114, 2017-ci ildə 14 min 514, 2018-ci ildə isə 14 min 857 boşanma qeydə alınıb.

2067
Maliyyə hesabatı, arxiv şəkli

Məcburi dövlət sosial sığorta haqqı müvəqqəti azaldılıb

13
(Yenilənib 22:37 03.06.2020)
Sumqayıt və Gəncə şəhərlərində 90 faizi, digər şəhərlərdə 80 faizi, rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faizi, kənd yerlərində isə 50 faizi miqdarında məcburi dövlət sosial sığorta haqqı ödəniləcək.

BAKI, 3 iyun — Sputnik. Azərbaycanda sahibkarlar bu il aprelin 1-dən dekabrın 31-dək məcburi dövlət sosial haqlarını güzəştlə ödəyəcək.

Sputnik Azərbaycan-a bununla bağlı Prezident İlham Əliyev “Sosial sığorta haqqında” qanuna dəyişiklikləri təsdiqləyib. Beləliklə, bu ilin 9 ayı üçün sahibkarlıq fəaliyyəti üzrə minimum aylıq əməkhaqqının tikinti və ticarət sahələrində 25 faizi, digər sahələrdə 15 faizi miqdarının Bakı şəhərində 100 faizi, Sumqayıt və Gəncə şəhərlərində 90 faizi, digər şəhərlərdə 80 faizi, rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faizi, kənd yerlərində isə 50 faizi miqdarında məcburi dövlət sosial sığorta haqqı ödənilməlidir.

2021-ci il yanvarın 1-dən 2025-ci il dekabrın 31-nə qədər isə əvvəlki qaydada - sahibkarlıq fəaliyyəti üzrə minimum aylıq əməkhaqqının tikinti sahəsində 50 faizi, digər sahələrdə 25 faizi miqdarının Bakı şəhərində 100 faizi, Sumqayıt və Gəncə şəhərlərində 90 faizi, digər şəhərlərdə 80 faizi, rayon inzibati ərazi vahidlərinin inzibati mərkəzi olan inzibati ərazi vahidlərində və qəsəbələrdə 60 faizi, kənd yerlərində isə 50 faizi miqdarında məcburi dövlət sosial sığorta haqqı ödəniləcək.

13
Bakıda yaşayış kompleksi, arxiv şəkli

Güzəştli mənzillər adlarına uyğundurmu yaxud bunun nəyi güzəştdir?

146
(Yenilənib 22:02 03.06.2020)
Mənzil 10% ilkin ödəniş edilərək, 4% dərəcəsi ilə 30 il müddətinə güzəştli ipoteka krediti ilə alındıqda 1 otaqlı mənzil üçün aylıq 138-143 manat, 2 otaqlı mənzil üçün 182-230 manat, 3 otaqlı mənzil üçün isə 245-268 manat ödəniləcək.

Xalid Məmmədov, Sputnik Azərbaycan

BAKI, 3 iyun — Sputnik. Mənzil İnşaatı Dövlət Agentliyi (MİDA) Hövsan qəsəbəsindəki yaşayış kompleksində güzəştli mənzillərin satışını elan edib. Satışa ümumilikdə 249 mənzil çıxarılır. Bütün mənzillər tam təmirli, mətbəx mebeli, kombi isitmə sistemi (kombi cihazı daxil olmaqla), su, qaz və elektrik sayğacları ilə təmin edilmiş vəziyyətdə təklif olunur.

Sputnik Azərbaycan xəbər verir ki, MİDA-nın məlumatına görə, Agentliyin sərəncamında olan mənzillərin əldə edilməsi "Elektron hökumət" portalı üzərində (www.e-gov.az) "Güzəştli mənzil" sistemi vasitəsilə elektron qaydada həyata keçirilir. Yalnız "Güzəştli mənzil" sistemində elektron kabinetə sahib olmuş vətəndaşlar mənzil almaq hüququna malikdir. Elektron kabinetə sahib olmuş bütün vətəndaşlar qeydiyyat tarixindən və sıra nömrəsindən asılı olmayaraq, mənzillərin seçimində bərabər hüquqa malikdir.

Əmlak məsələləri üzrə ekspert Ramil Osmanlı Sputnik Azərbaycan-a açıqlamasında satışa çıxarılan mənzillərin qiymətlərindən, tətbiq edilən güzəştlər və əlavə endirimlərdən danışıb.

Ekspert bildirib ki, MİDA-nın bu istiqamətdə kifayət qədər təcrübəsi var: "Mənzil İnşaatı Dövlət Agentliyinin ilk layihəsi olan Yasamal Yaşayış Kompleksi istər qiymət, istər prosesin icrası baxımından özünü doğruldub. Digər tərəfdən, bu yaxınlarda güzəştlə mənzil əldə etmək hüququ olan vətəndaşların kateqoriyaları da genişləndirilib. Artıq gənc ailə üzvü olan müəllimlər üçün əmək stajı tələbi 5 ildən 3 ilə endirilməklə yanaşı, yalnız ümumtəhsil məktəbində işləyən deyil, digər ümumi təhsil müəssisələrində çalışan gənc ailə üzvü olan müəllimlər də güzəştli mənzil əldə edə biləcəklər. Eyni zamanda buraya "ən azı 15 il dövlət ümumi təhsil müəssisəsində müəllim işləyən şəxs" kateqoriyası da əlavə olunub. Həmin kateqoriyaya aid olan vətəndaşlar yaşından və ailə vəziyyətindən asılı olmayaraq güzəştlə mənzil əldə etmək hüququndan yararlana biləcəklər".

Hövsan yaşayış kompleksi, arxiv şəkli
© Official website of President of Azerbaijan Republic

Bu kateqoriyaları daha da genişləndirmək mümkündürmü sualına ekspert belə cavab verib: "Güzəştlə mənzil əldə etmək hüququ olan vətəndaşların kateqoriyalarını daha da genişləndirmək olar, amma bu məsələ hələlik bu gün üçün aktual hesab edilmir. Onsuzda müraciətlərin sayı çoxdur. Məsələn, Yeni Yasamal layihəsində təxminən 1800 mənzil üçün 20 minə yaxın müraciət var idi. Bu mənada hesab edirəm ki, indiki halda kateqoriyaların genişləndirilməsi müraciətlərin sayını bir qədər də artıracaq və əlavə texniki problemlər yarada bilər. Amma layihələrin istiqamətləri genişlənərsə, bu addımı atmaq olar".

Mənzillərin qiymətlərindən danışan ekspert bildirib ki, mənzillərin qiymətini normal hesab etmək olar: "Hövsanda 1 otaqlı mənzillərin qiyməti 32 min 130 manatdan, 2 otaqlılar 42 min 415 manatdan, 3 otaqlılar 57 min 120 manatan başlayır. Hazırda əvvəlki texniki və digər qüsurlar yoxdur, aradan qaldırılıb. Mənzili ipoteka krediti ilə deyil, nağd şəkildə alanlara 10% güzəşt ediləcək. Yəni şəxs mənzilin pulunu tam ödəyirsə, həmin vəsaitdə 10 faiz güzəşt nəzərdə tutulur. Belə ki, mənzilə öz vəsaiti hesabına birdəfəlik ödəniş edərək sahib olmaq istəyən vətəndaş üçün mənzillərin satışı 1 otaqlılar üçün 28 min 917 manatdan, 2 otaqlılar üçün 38 min 174 manatdan, 3 otaqlılar üçün 51 min 408 manatan başlayır".

O qeyd edib ki, gələcəkdə MİDA-nın həyata keçirdiyi layihələrə alternativ başqa layihələr təklif olunarsa, o halda qiymətlərə düzəlişlər qaçılmaz olacaq: "Amma bugünkü şərtlər daxilində tələb yüksəkdir və tələb yüksək olduğu dövrdə MİDA-nın təqdim etdiyi qiymətlər mövcud bazar qiymətlərindən aşağıdır. Məsələn, MİDA tərəfindən Yeni Yasamalda təmirli mənzilin 1 kvadratmetri 950 manata təklif olunurdu. Nağd alışlarda bu rəqəm hətta 860 manatadək gəlib düşürdü. Amma biz faktiki olaraq Yeni Yasamalın mənzil bazarını araşdırdıqda orada təmirli mənzilin bir kvadratmetrinin 1150-1200 manatdan başladığının şahidi oluruq. Burada növbəlilik mütləq şəkildə gözlənilir".

Qeyd edək ki, Bakı şəhəri, Suraxanı rayonu, Hövsan qəsəbəsi Zığ şosesi - Hava Limanı 12-ci km. "22" ünvanında yerləşən Hövsan Yaşayış Kompleksinin 1 saylı binası üzrə 249 mənzilin satışı 30 iyun 2020-ci il tarixində saat 11:00-da başlayacaq və 7 iyul 2020-ci il tarixi saat 11:00-dək davam edəcək. Bu elan çərçivəsində mənzillərin satışı həm ipoteka kreditindən istifadə etməklə, həm də öz vəsaiti hesabına ödəniş üsulu ilə nəzərdə tutulub. Mənzillərin satış qiymətinə ƏDV daxildir. Mənzillərin sahəsi isə 1 otaqlılarda 38-39 kvadratmetr, 2 otaqlılarda 50-63 kvadratmetr, 3 otaqlılar 67-73 kvadratmetr arasında dəyişir. Bu, mənzillərin daxili perimetrlə ölçülən sahəsidir.

Vətəndaş mənzili İpoteka və Kredit Zəmanət Fondunun güzəştli ipoteka krediti vəsaiti hesabına aldıqda 10 faiz minimal ödəniş tələb olunur. Mənzil 10% ilkin ödəniş edilərək, 4% dərəcəsi ilə 30 il müddətinə güzəştli ipoteka krediti ilə alındıqda 1 otaqlı mənzil üçün aylıq 138-143 manat, 2 otaqlı mənzil üçün 182-230 manat, 3 otaqlı mənzil üçün isə 245-268 manat ödəniləcək. Qeyd edək ki, kredit illik 4 faiz dərəcəsi ilə 3-30 il müddətinə verilir.

146
“Keşikçidağ”da Keşikçi qala” sərhəd zastavası kompleksi istifa­dəyə verilib

Bu gün "Keşikçidağ" istiqamətində təxribat törədiləcək?

0
DSX: “Keşik­çidağ” ərazisində bir qrup Gürcüstan vətəndaşının dövlət sərhədini pozmaqla təxribat törədəcəyi barədə məlumat­lar əldə olunub

BAKI, 4 iyun - Sputnik. İyun ayının 4-də Azərbaycan-Gürcüstan dövlət sərhədində “Keşik­çidağ” Dövlət Tarix-Mədəniyyət Qoruğunun ərazisində bir qrup Gürcüstan vətəndaşı  tərəfindən dövlət sərhədini pozmaqla təxribat xarakterli hərəkətlərin törədiləcəyi barədə məlumat­lar əldə olunub. Əldə olunmuş məlumatlar barədə Gürcüstanın Sərhəd Mühafizəsi rəsmi qaydada məlumatlandırılıb.

Sputnik Azərbaycan xəbər verir ki, bu barədə Dövlət Sərhəd Xidmətinin Mətbuat Mərkəzinin yaydığı məlumatda qeyd edilir.

Məlumata görə, Dövlət Sərhəd Xidməti bununla əlaqədar rəsmi olaraq bildirir ki, dövlət sərhədində istənilən təxribatın qarşısı qətiyyətlə alınacaq və bu zaman baş verə biləcək fəsadlara görə təxribatın təşkilatçıları məsuliyyət daşıyacaqlar.

0