Zülfiyyə Quluyeva, Sputnik Azərbaycan
BAKI, 15 oktyabr — Sputnik. Rusiyanın Kaluqa vilayətinin Borovski rayonunda yerləşən müəssisənin istehsal etdiyi kolbasada Afrika donuz qızdırması virusunun DNT-si tapılıb.
Hazırda kolbasanı istehsal edən müəssisə bağlanılıb. Hazırda mütəxəssislər "Buterbrodnaya" kolbasa istehsalında istifadə edilən yoluxmuş ətin haradan alındığını araşdırırlar. Nümunələr Federal Tədqiqat Viroloji və Mikrobiologiya Mərkəzinə göndərilib.
Qeyd edək ki, Rusiyadan Azərbaycana ət və ət məhsulları idxal edilir. Azərbaycan bazarında xüsusilə Rusiya istehsalı olan kolbasaların çeşidləri genişdir. Bəs görəsən, Afrika donuz vəbası virusu aşkarlanan "Buterbrodnaya" kolbasasından ölkəmizə idxal edilirmi?
Sputnik Azərbaycan bu sorğu ilə Azərbaycan Qida Təhlükəsizliyi Agentliyinə müraciət edib. Agentlikdən Sputnik Azərbaycana bildiriblər ki, sorğuya müvafiq olaraq araşdırma aparılıb: "Qeyd ediyiniz sorğu ilə bağlı tərəfimizdən aparılan araşdırılmalar nəticəsində məlum oldu ki, "Buterbrodnaya" əmtəə nişanlı kolbasa Rusiyanın "Ermolina" şirkəti tərəfindən istehsal olunur. Bu şirkətin istehsalı olan məhsullar Agentliyin fəaliyyəti dövründə ölkəmizə idxal olunmamışdır".
