Tuneldə hərəkət edən avtomobillər, arxiv şəkli

Satıcı fəryad edir, alıcı da dad çəkir, amma alan da var, satan da

629
(Yenilənib 15:35 13.10.2019)
Rüsumların yüksək, avtomobil kreditlərinin rəsmiləşdirilməsi çətin, faizlərin isə yüksək olması vətəndaşların komfortlu, təhlükəsiz avtomobil almasına maneə yaradır

İradə Cəlilova, Sputnik Azərbaycan

BAKI, 13 oktyabr — Sputnik. Son aylar avtomobillərin qiymətində azalma olsa da, ümumi mənzərə ürəkaçan deyil. Satıcılar alıcı qıtlığından, alıcılar isə qiymətlərin yenə də yüksək olmasından şikayətlənirlər. Amma bir tərəfdən də, ölkəyə gətirilən avtomobillərin sayının durmadan artdığı da bildirilir.

Bəs görəsən, Azərbaycan avtomobil bazarında real vəziyyət necədir? Sputnik Azərbaycan bu məsələni araşdırıb.

Nəqliyyat eksperti Eldəniz Cəfərin sözlərinə görə, hazırda ölkədə daha çox Rusiya istehsalı olan avtomobillər, ikinci yerdə komfortlu Avropa və etibarlı Yaponiya avtomobilləri satılır.

Onun sözlərinə görə, Rusiya istehsalı olan avtomobillər müasir təhlükəsizlik tələblərinə cavab vermir: "Amma buna baxmayaraq, vətəndaşlar onu ucuz qiymətinə görə alır və istismar edir. Təəssüf olsun ki, qəza zamanı bu avtomobillərdə xəsarətlər də çox olur. Rəsmi dilerlər tərəfindən təqdim edilən və ikinci əl maşın bazarında satılan avtomobillərin qiymətini təhlil edəndə müəyyən etmək olur ki, rəsmi dilerlər tərəfindən satılan yeni avtomobil bazarında qiymət eyni olaraq qalır. İkinci əl avtomobil bazarı üçün bunu demək mümkün deyil. İkinci əl avtomobil bazarında avtomobillər dəyərindən daha ucuz təklif edilir".

E.Cəfər hesab edir ki, ümumilikdə isə avtomobillərin qiymətlərində stabillik var: "2019-cu ilin yanvar-avqust ayları ərzində ölkəyə 26 695 ədədə nəqliyyat vasitəsi idxal edilib. Bu, 2019-cu ilin eyni dövrü ilə müqayisədə 1,9 dəfə çoxdur. 12 801 ədəd avtomobil Gürcüstandan, qalanı isə Rusiya və digər ölkələrdən idxal olunub. Ölkədə 8 ay ərzində 1 496 ədəd minik avtomobili istehsal edilib. Ümumi mənzərə budur ki, avtomobil bazarında artım müşahidə edilir. Lakin bu komfortlu və təhlükəsiz avtomobillər deyil, yararsız, təhlükəli və müasir standartlara cavab verməyən avtomobillərin hesabına artır".

E.Cəfər vurğulayıb ki, rüsumların yüksək, avtomobil kreditlərinin rəsmiləşdirilməsi çətin, faizlərin isə yüksək olması vətəndaşların komfortlu, təhlükəsiz avtomobil almasına maneə yaradır.

HAŞİYƏ: Qeyd edək ki, 2019-cu ildən etibarən ölkəyə idxal edilən avtomobillərin aksiz vergisi 50 faiz artırılıb. Hazırda ölkəyə gətirilən avtomobillərə görə eyni zamanda bir neçə vergi tutulur.

E. Cəfər bildirib ki, avtomobilin gömrük dəyəri hesablanarkən alındığı qiymət, ölkəyə gətirmək üçün xərclənən məbləğ və ƏDV hesablanır.

"Bundan başqa, avtomobilin mühərrik həcmi, istehsal tarixi və ölkəsindən asılı olaraq gömrük rüsumu tətbiq edilir. Məsələn, əvvəllər Azərbaycana gətirilən 2000 kub mühərrikli bir avtomobilin hər kub santimetrinə 20 qəpik alınırdısa, 2019-cu ildən bu rəqəm 30 qəpiyə qaldırıldı. 

Və böyük mühərrikli avtomobillər üçün bu çox böyük bir rəqəmdir. 4500 kub mühərrikli avtomobilin yalnız aksiz vergisi 36 100 manatdır. Bu səbəbdən də belə mühərrikli avtomobillərin satışı 70 faiz azalıb. Bu da öz növbəsində vətəndaşlara zərər vurur", – deyə ekspert bildirib.

O əlavə edib ki, vətəndaşlar hal-hazırda daha çox qənaətcil avtomobillərə üstünlük verirlər.

Əmlak eksperti Ramil Osmanlı isə açıqlamasında bildirib ki, son zamanlar avtomobil idxalının məhdudlaşması ilə bağlı qiymətlər də qalxıb: "Devalvasiyanın da buna təsiri vardı. Faktiki olaraq, idxal azaldığına görə, təklif də azalmışdı. Düzdür, artıq bu proses dayanıb. Stabilləşmə müşahidə edilir və idxalda da müəyyən artım tempi var. Bu səbəbdən də qiymət artımı yüksək səviyyədə deyil".

Ramil Osmanlının sözlərinə görə, yay aylarında bazarda qiymət artımı müşahidə edilib. Bu isə təklifin azalması ilə bağlıdır: "Bu aylarda bir çox avtomobillər bazardan çıxarılır. Təklif azaldığı üçün qiymətlər artır. Artıq qiymətlərin azalması başlayıb".

"Ümumiyyətlə Azərbaycanda avtomobil parkının yenilənməsi prosesi gedir. Əvvəllər ili köhnə olan ucuz avtomobil vasitələrinə tələb var idi. Bu da Almaniyadan ölkəyə idxal edilən bir sıra markalar üzrə tələbi artırırdı. Amma indi 2011-2012-ci illərdən bu yana istismara verilmiş avtomobillərin alqı-satqısı demək olar ki, artıb. Yaxın dövrlərdə bazar üçün əsaslı bir dəyişiklik gözlənilmir", – deyə Ramil Osmanlı bildirib.

Aksiz qiymətlərinin artması məsələsinə gəldikdə isə R.Osmanlı əlavə edib ki, bu proses daha çox mühərrik həcmi 3000 kubdan yuxarı olan avtomobillərin qiymətində özünü göstərib: "Düzdür, bu ilkin avtomobil bazarında böyük mühərrikli avtomobillərin qiymətində özünü fantastik artım şəklində göstərdi. Amma təkrar avtomobil bazarında bu proses dayanıb".

Ekspert hesab edir ki, ilin sonuna kimi qiymətlərdə bir qədər də azalma müşahidə ediləcək.

629
 Azərbaycan hərbçiləri, arxiv şəkli

Azərbaycan Respublikasının ən ali fərqlənmə dərəcəsi bəlli oldu

2
(Yenilənib 14:43 26.11.2020)
"Vətən Müharibəsi Qəhrəmanı" adının xüsusi fərqlənmə nişanı - "Vətən Müharibəsi Qəhrəmanı" Azərbaycan Respublikasının medalıdır

Xalid Məmmədov, Sputnik Azərbaycan

BAKI, 26 noyabr — Sputnik. Milli Məclisin bu gün keçirilən plenar iclasında "Azərbaycan Respublikasının "Vətən Müharibəsi Qəhrəmanı" adının təsis edilməsi haqqında" qanun layihəsi üçüncü oxunuşda müzakirəyə çıxarılıb.

Sputnik Azərbaycan xəbər verir ki, qanun layihəsinə görə, "Vətən Müharibəsi Qəhrəmanı" Azərbaycan Respublikasının ən ali fərqlənmə dərəcəsidir.

"Vətən Müharibəsi Qəhrəmanı" fəxri adı Azərbaycanın işğal olunmuş ərazilərinin azad olunması zamanı düşmənin əlverişli ərazilərdə yerləşməsinə və inadlı müqavimətinə baxmayaraq, düşmənin qüvvələrinin tam məğlub edilməsi üzrə qarşıya qoyulmuş döyüş tapşırıqlarına və Azərbaycanın dövlət sərhədlərinin bərpa edilməsi üzrə döyüş əmədiyyatlarına yüksək peşəkarlıqla rəhbərlik edilməsinə, həmçinin döyüş əməliyyatlarında göstərdiyi şəxsi qəhrəmanlığa görə verilir.

"Vətən Müharibəsi Qəhrəmanı" müvafiq icra hakimiyyəti orqanının müəyyən etdiyi orqan (qurum) tərəfindən onun öz təşəbbüsü ilə və ya müvafiq icra hakimiyyəti orqanının müəyyən etdiyi orqan (qurum) tərəfindən irəli sürülmüş vəsatətlərə əsasən verilir.

"Vətən Müharibəsi Qəhrəmanı" adının xüsusi fərqlənmə nişanı - "Vətən Müharibəsi Qəhrəmanı" Azərbaycan Respublikasının medalıdır.

"Vətən Müharibəsi Qəhrəmanı" medalının təsviri qanunla müəyyən olunur. "Vətən Müharibəsi Qəhrəmanı" medalı döşün sol tərəfinə, digər orden və medallardan yuxarıda taxılır.

"Vətən Müharibəsi Qəhrəmanı" adı almış şəxsə aşağıdakılar təqdim edilir:

- "Vətən Müharibəsi Qəhrəmanı" medalı;

- "Vətən Müharibəsi Qəhrəmanı" adının verilməsi haqqında müvafiq icra hakimiyyəti orqanının müəyyən etdiyi orqanın (qurumun) aktı.

"Vətən Müharibəsi Qəhrəmanı" eyni şəxsə bir dəfə verilir. "Vətən Müharibəsi Qəhrəmanı" adı almış şəxslər qanunla müəyyənləşdirilmiş güzəştlərdən istifadə edirlər. "Vətən Müharibəsi Qəhrəmanı" adı almış şəxslər həmin addan Azərbaycan Respublikasının fəxri adları üçün müəyyən olunmuş qaydada məhrum edilir.

Qanuna layihəsi müzakirələrdən sonra üçüncü oxunuşda qəbul edilib.

2
Teqlər:
Milli Məclis, medal, Azərbaycan
Bakıda karantin rejimi zamanı insanlar

Böyük dövlətlərin oyunu "əjdaha" gənclərimiz - Bakılılara çənəni sevdirən qadağa - FOTO

7
(Yenilənib 14:38 26.11.2020)
"Xəstəlikdən qorxacağam? Boş şeydir. Lap yoluxsam da ağır keçirəcəyimi düşünmürəm. Sapsağlam adamam. Heç bir xəstəliyim yoxdur. Odur ki, maskanı sadəcə cərimə edilməmək üçün çənəmin altına taxıram" - Bakı sakini

İradə Cəlilova, Sputnik Azərbaycan

BAKI, 26 noyabr — Sputnik. 2020-ci il 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.

Paytaxtda maskalardan istifadə qaydalarına nəzarət rejimi daha da sərtləşdirilib.

Müvafiq yerlərdə tibbi maskadan istifadə olunmaması və ya tələb olunan normalara uyğun taxılmaması qanunla müəyyən edilmiş qaydada məsuliyyət yaradır.

Şəhərimizin bəzi sakinləri isə belə düşünmürlər. Sputnik Azərbaycan bu gün paytaxt sakinlərinin karantin qaydalarına necə əməl etdiklərini müşahidə edib.

Əksər vətəndaşlar karantin qaydalarına əməl edərək maskalardan istifadə edirlər.

© Sputnik / Irade JELIL
Bakıda karantin rejimi zamanı insanlar

Bəziləri isə maskanı sadəcə cərimə edilməmək üçün çənələrinin altına taxırlar.

Məsələn, Bakı sakini 56 yaşlı Əsəd Əliyev deyir ki, koronavirus infeksiyasının varlığına inanmır. Bakı sakini elə hesab edir ki, bu, dünyanı idarə edən ölkələrin oyunudur.

Maska taxmaq məsələsinə gəldikdə isə, o deyib ki, maskanı sadəcə cərimə edilməmək üçün taxır: "Görürsünüz ki, çənəmin altında maska var. Yəni qanuna tabe oluram. Amma xəstəliyə inanmıram".

Qeyd edək ki, paytaxtda daha çox yaşlılar karantin qaydalarına əməl etmirlər. Yaşı 60-ı ötmüş vətəndaşlar maska taxmağı əhəmiyyətli hesab etmirlər.

Gənclər isə maskanı çənənin altına taxmağa üstünlük verirlər.

İnsanların kütləvi toplaşdığı yerlərdə, məsələn, dayanacaqlarda sosial məsafəyə əməl edilməsə də, vətəndaşlar maska taxırlar.

© Sputnik / Irade JELIL
Bakıda karantin rejimi zamanı insanlar

Nigar Eyyubova deyir ki, pandemiya başlayan gündən maska taxıb. Və o, bunu hansısa məbləğdə cərimə edilməmək üçün yox, sağlamlığın önəmli olduğunu fikirləşdiyi üçün edib:

"Mənim evimdə yaşlı anam-atam var. Mən özümü qorumalıyam ki, onları da qoruya bilim. Virusun olduğuna inanıram. Belə yalan ola bilməz. Buna görə də, özümü qoruyuram ki, yoluxmayım. Maska da taxıram, çantamda spirt və antibakterial salfet də gəzdirirəm. Bacardığım qədər insanlarla yaxın ünsiyyətdə olmuram".

28 yaşlı Ələddin Məmmədov isə hesab edir ki, virus gənclərə yoluxmur. Yoluxsa da, gənclər bu xəstəliyi ağır keçirmirlər.

"Xəstəlikdən qorxacağam? Boş şeydir. Lap yoluxsam da ağır keçirəcəyimi düşünmürəm. Sapsağlam adamam. Heç bir xəstəliyim yoxdur. Odur ki, maskanı sadəcə cərimə edilməmək üçün çənəmin altına taxıram. Cəmi 500 manat maaş alıram. Onun da 100 manatını cəriməyə versəm, nə qaldı ki..."

  • Bakıda karantin rejimi zamanı insanlar
    © Sputnik / Irade JELIL
  • Bakıda karantin rejimi zamanı insanlar
    © Sputnik / Irade JELIL
  • Bakıda karantin rejimi zamanı insanlar
    © Sputnik / Irade JELIL
1 / 3
© Sputnik / Irade JELIL
Bakıda karantin rejimi zamanı insanlar

Ə.Məmmədov siqaret aludəçisi olduğu üçün maska taxmaq ona bəzən yorucu gəlir. Amma cərimə edilməmək üçün siqaret çəkmədiyi zamanlar da olur.

Şəhərimizdə qanunlara tabe olub maska taxanlar da var, cərimə edilməkdən qorxub maska taxanlar da, özünü xəstəlikdən qorumaq üçün maska taxanlar da... Maska taxmayanlar isə bunu maska almağa pulları olmaması ilə izah edirlər. Məsələn, süpürgəçi işləyən 58 yaşlı Naibə xanımın sözlərinə görə, hər gün maska almağa pulu çatmır. Deyir, özü üçün evdə xüsusi maska tikməyə də vaxtı yoxdur. Amma söz verir ki, bu həftəsonu qanunlara tabe olmaq adına özü üçün maska tikəcək.

Belə...

Xatırladaq ki, hazırda dünyada yeni növ koronavirus (COVID-19) infeksiyasına yüksək yoluxma dinamikası müşahidə olunur. Bu səbəbdən virusun geniş yayılmasının qarşısının alınması üzrə müvafiq tədbirlər həyata keçirilir, bir çox ölkələr sərt karantin qaydaları tətbiq edir.

© Sputnik / Irade JELIL
Bakıda karantin rejimi zamanı insanlar

Pandemiya əleyhinə rejimin, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti tərəfindən müəyyən edilən tələblərin pozulmasına görə, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslərə 100 manat məbləğində, vəzifəli şəxslərə 200 manat məbləğində, hüquqi şəxslərə 400 manat məbləğində cərimə tətbiq edilir.

Eyni zamanda, bu xətanın inzibati tənbeh almış şəxs tərəfindən inzibati tənbeh vermə haqqında qanun qüvvəyə mindiyi gündən 1 il ərzində təkrar törədilməsinə görə fiziki şəxslər 200 manat məbləğində, vəzifəli şəxslər 400 manat məbləğində, hüquqi şəxslər 800 manat məbləğində cərimə edilirlər.

Epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslərə 200 manatdan 400 manatadək, vəzifəli şəxslərə 3 min manatdan 4 min manatadək, yaxud işin hallarına görə xətanı törədənin şəxsiyyəti nəzərə alınmaqla 1 ayadək müddətə inzibati həbs tətbiq edilir. Hüquqi şəxslər isə 4 min manatdan 10 min manatadək məbləğdə cərimə edilirlər.

© Sputnik / Irade JELIL
Bakıda karantin rejimi zamanı insanlar

Qüvvədə olan İnzibati Xətalar Məcəlləsinə əsasən, fiziki şəxslər 100 manatdan 200 manatadək məbləğdə, vəzifəli şəxslər 1500 manatdan 2000 manatadək məbləğdə cərimə edilir, yaxud işin hallarına görə xətanı törədənin şəxsiyyəti nəzərə alınmaqla 1 ayadək müddətə inzibati həbs tətbiq olunur, hüquqi şəxslər 2 min manatdan 5 min manatadək məbləğdə cərimə edilirdilər.

7
Teqlər:
cərimə, maska, qaydalar, Koronavirus, epidemiya, COVID-19, Bakı