Bal yarmarkası, arxiv şəkli

Bal özü müştərilərin ayağına gəlib - REPORTAJ

640
(Yenilənib 11:55 01.10.2019)
"Görünən dağa nə bələdçi? Alıcıları barmaqla saymaq olar. Yəqin ki, hələ də yarmarkada satılan balın keyfiyyətinə şübhə edənlər var"

Zülfiyyə Quluyeva, Sputnik Azərbaycan

BAKI, 30 sentyabr — Sputnik. Adət etmişik ki, "keyfiyyətli balın müştərisi qapıda olar"... Amma bir neçə ildir ki, keyfiyyətli bal almaq üçün dağa-daşa düşməyə ehtiyac qalmayıb. Demək olar ki, hər il paytaxtda təşkil edilən arıçılıq məhsullarının satış yarmarkasına müxtəlif bal çeşidləri çıxarılır. Artıq iki gündür ki, Bakıda arıçılıq məhsullarının 20-ci Respublika Sərgi-Satış Yarmarkası işə başlayıb. Sputnik Azərbaycan-ın əməkdaşı arıçılıq məhsullarının satış yarmarkasının təşkil olunduğu Tofiq Bəhramov adına Respublika stadionunda olaraq yarmarkada ab-havanı müşahidə edib...

Əvvəlki illərdə keçirilmiş arıçılıq məhsullarının satış yarmarkasından fərqli olaraq, bu dəfəki yarmarkada təşkilatçılığın yüksək səviyyədə olduğu göz qabağında idi. Yarmarkaya müxtəlif bölgələrdən arıçılıq məhsulları çıxarılmışdı. Öz məhsullarını satışa çıxaran arıçılar da yubiley yarmarkasının təşkilatçılığından məmnun oluqlarını dilə gətirdilər.

 Bakıda arıçılıq məhsullarının 20-ci Respublika Sərgi-Satış Yarmarkası
© Sputnik / Zulfiyya Guluyeva.
Bakıda arıçılıq məhsullarının 20-ci Respublika Sərgi-Satış Yarmarkası

Əslən Tərtər rayonundan olan arıçı Oruc Əliyev bu il yarmarkanın yüksək səviyyədə təşkil olunduğunu söyləyir. Həmsöhbətimiz deyir ki, indiyədək dəfələrlə arıçılıq məhsullarının satış yarmarkasında iştirak etsə də, təşkilatçılıqdan heç vaxt budəfəki qədər qalmayıb: "Bu yarmarkada iştirak mənim üçün fəxrdir. Çünki bizim yarmarkamızın işə başlamasından 20 il ötür. O ki qaldı yarmarkada təşkilatçılığa, ona da söz ola bilməz. İlk dəfə idi ki, biz Bakıya gəlmədən yarmarkada iştirak üçün onlayn qeydiyyatdan keçdik. Deyim ki, budəfəki yarmarka satışa çıxarılan balların keyfiyyətinə görə də fərqlənir. Burada keyfiyyətsiz baldan söhbət gedə bilməz. Gətirdiyimiz ballar laboratoriyada yoxlanılıb".

O. Əliyev bircə alıcı qıtlığından narahat olduğunu söyləyir. Arıçı deyir ki, yarmarkada satılan balların keyfiyyəti yüksək olsa da, nədənsə alıcı azdır:

"Yarmarkaya 250 kiloqram balla qatılmışam. 35 arı ailəm var. Buraya gələndə inanırdım ki, ilk günlərdən balın xeyli hissəsini satacam. Amma gördüyünüz kimi, alıcı görəndə sevinirik. Gətirdiyim baldan bu iki gündə 10 kiloqramını ancaq sata bilmişəm".

Yarmarkada iştirak edən digər arıçı Məhəmməd Məhəmmədov isə yarmarkaya 150 kiloqram bal gətirib. Amma bu günə kimi iki kiloqram bal satıb. Həmsöhbətimiz deyir ki, yarmarkaya çıxarılan ballar keyfiyyətli olsa da, alıcıların balın keyfiyyətinə inamı azdır: "Görünən dağa nə bələdçi? Alıcıları barmaqla saymaq olar. Yəqin ki, hələ də yarmarkada satılan balın keyfiyyətinə şübhə edənlər var. İki günə iki kiloqram bal satmışamsa, deməli, alıcılarda keyfiyyətə inam yarada bilməmişik. Halbuki, balların keyfiyyətinə bu il çox ciddi nəzarət olub. Heç kəs deyə bilməz ki, yarmarkaya keyfiyyətsiz məhsul keçirdib".

Həmsöhbətimiz deyir ki, son illər Azərbaycanda arıçılıq təsərrüfatların sayının artması da bal satışına təsir edir.

 Bakıda arıçılıq məhsullarının 20-ci Respublika Sərgi-Satış Yarmarkası
© Sputnik / Zulfiyya Guluyeva.
Bakıda arıçılıq məhsullarının 20-ci Respublika Sərgi-Satış Yarmarkası

Arıçı ilə söhbət zamanı öyrənirik ki, balların bütün çeşidləri yaxşı olsa da, ən bahalısı çökə və şabalıd balıdır. Ümumilikdə isə yarmarkada satılan balların bir kiloqramının qiyməti 20-30 manat arasında dəyişirdi: "Ən yaxşı bal dağlıq ərazilərin balı sayılır".

Yarmarkada həmsöhbət olduğumuz Rəna Cənnətova adlı alıcı qiymətlərin münasib olduğunu söyləyir: "Ötən il yarmarkadan aldığım balın keyfiyyətindən o qədər də razı qalmadım. Bu il isə keyfiyyətə nəzarətin ciddi olduğunu eşidib gəlmişəm. İki kiloqram meşə balı almışam. Amma təmiz cökə balı hələ tapa bilməmişəm".

Alıcı balın bir kiloqramını 25 manata aldığını söylədi.

Arıçı İbad Əfkərov isə alıcı qıtlığının yarmarka barədə əhalinin məlumatsız olduğundan qaynaqlandığını söyləyir: "Bu yamarkaya qədər başqa ölkələrin balının sərgi-satış yarmarkasını keçirtdilər. Həmin yarmarkada bal satışı aylarla reklam olundu. Bizim yarmarkada isə alıcı təkəmseyrəkdir.

Alıcı az olanda yarmarkada iştirak etmək bizə də sərf etmir. Məsələn, mən yarmarkaya 300 kiloqram bal gətirmişəm. Təkcə yer üçün 150 manat pul ödəmişəm. Amma bu günə kimi 6 kiloqram bal satmışam. Yarmarkada iştirak edən digər arıçılar da yer haqqı və laborator analizlərə 300 manat pul xərcləyiblər. Belə getsə, deyəsən, xərcimizi çıxarda bilməyəcəyik.

Burada elə arıçılar var ki, heç siftə etməyiblər. Amma yarmarkada təşkilatçılıq çox yüksək səviyyədədir. İndiyədək bizə bal satışı üçün belə rahat şərait yaradan olmayıb".

Arıçı Rahim Mustafayev İsmayıllıdan yarmarkaya 200 kiloqram bal gətirsə də, ondan 10 kiloqramını satıb. Amma arıçılar arasında yarmarkada bal satışının gedişatından razı qalan da var. Astaranın Şüvi kənd sakini Bünyadov Bəqəli 400 kiloqram baldan 30 kiloqramını iki günün içərisində satdığını söyləyir. O, bu yarmarkanın keçirilməsinin arıçılara öz məhsullarını satmağa fürsət verdiyini söylədi.

Arıçılarla söhbət zamanı məlum oldu ki, yarmarkaya gətirilən ballar keyfiyyətcə ötən illərdən müsbət mənada fərqlənsə də, alıcı azdır.

Amma yarmarkanın oktyabrın 18-dək davam edəcəyini nəzərə alsaq, arıçıların öz məhsullarını satmaq üçün hələ kifayət qədər vaxtları var. Diqqət çəkən əsas məqamlardan biri də yarmarkanın keçirildiyi məkanda təhlükəsizliyə kameralar vasitəsilə nəzarətin təmin olunmasıdır. Yarmarkanın yanında Azərbaycan Qida Təhlükəsizliyi Agentliyinin səyyar laboratoriyası da fəaliyyət göstərir. Laboratoriyanın adının çəkilməsini istəməyən əməkdaşı bildirdi ki, bu gün ərzində 3 kiloqram balı alıcının tələbi ilə yenidən yoxlayıblar: "Biz səyyar laboratoriyanı qurmuşuq ki, alıcı balın keyfiyyətindən narazılıq etsə, yenidən yoxlayaq".

Arıçılar isə səyyar laboratoriyada balın təkrar yoxlanılmasına qarşı çıxmadıqlarını söyləyirlər. Arıçı O. Əliyev deyir ki, alıcı tələb etdikdə balı təkrar yoxladırlar. Amma gərək laboratoriyanın pulunu alıcı özü ödəsin.

 Bakıda arıçılıq məhsullarının 20-ci Respublika Sərgi-Satış Yarmarkası
© Sputnik / Zulfiyya Guluyeva.
Bakıda arıçılıq məhsullarının 20-ci Respublika Sərgi-Satış Yarmarkası

Qeyd edək ki, yarmarkaya qeydiyyatı təsdiqlənmiş arıçıların bal və digər arıçılıq məhsulları "Aqrar Tədarük və Təchizat" ASC-nin anbarında qəbul edilib. Məlumata görə, əməkdaşları tərəfindən yarmarkada satışa çıxarılacaq məhsullardan nümunələr götürülərək laboratoriya şəraitində yoxlanılıb. Yarmarkada yalnız yüksək keyfiyyətli və qida təhlükəsizliyi göstəriciləri uyğun olan məhsulların satışına icazə verildiyi bildirilir. Ümumilikdə, qeydiyyatı təsdiqlənmiş 347 arıçıdan 321 nəfəri məhsullarını anbara təhvil verib.

 25 nəfər isə qeydiyyatı təsdiqlənməsinə baxmayaraq yarmarkada iştirak üçün məhsullarını təqdim etməyib. Anbara təhvil verilən balın ümumi həcmi 123 tondur. Azərbaycan Qida Təhlükəsizliyi Agentliyinin əməkdaşları tərəfindən yarmarkada satışa çıxarılacaq məhsullardan ümumilikdə 3241 nümunə götürülüb ki, onların da 562-si, başqa sözlə, 17,34 faizi keyfiyyət və qida təhlükəsizliyi göstəricilərinə uyğun hesab edilməyib. Göstəriciləri keyfiyyət və qida təhlükəsizliyi standartlarına uyğun olmayan məhsullar satışa buraxılmayacaq və yarmarkanın sonuna qədər "Aqrar Tədarük və Təchizat" ASC-nin Xocahəsən yolu 57 (Meyvəli bazarı) ünvanında yerləşən anbarında karantin şəraitində saxlanılacaq.

Qeyd edək ki, builki yarmarka innovativ yenilikləri ilə ötən ilkilərdən fərqlənir. İlk dəfə olaraq bu il yarmarkaya qeydiyyat onlayn şəkildə www.bal.kendden.az saytı vasitəsi ilə həyata keçirilib. Yarmarka ərazisinin zonalara və sektorlara bölünməsi, həmçinin arıçıların yer bölgüsü püşkatma vasitəsilə müəyyən edilib. Eyni zamanda, arıçılar iştirak üçün tələb olunan ödənişi bank vasitəsilə həyata keçirib. Bu il tətbiq edilən növbəti yenilik isə satışına icazə veriləcək hər bir məhsulun qablaşmasının üzərində ştrix-kodun olmasıdır. Bu kod vasitəsi ilə müştərilər www.bal.kendden.az saytına daxil olaraq məhsulun hansı rayondan gətirildiyini və kim tərəfindən satışa çıxarıldığını öyrənmək imkanı əldə ediblər.

P.S. Təəssüf ki, bu reportaj hazırlanarkən bəzi xoşagəlməz məqamlar yaşanıb. Onların səbəbi isə əlaqədar qurumların əməkdaşlarının öz işlərini bilməməsidir. Maraqlıdır ki, işlərini bilməyən bu şəxslər əksinə, bizim əməkdaşımıza jurnalist peşəsini öyrətməyə girişiblər. Nə demək olar? Siz öz işinizi yerinə yetirərkən o jurnalist xanımın göstərdiyi peşəkarlığın yüzdə birini nümayiş etdirsəniz, hər kəs sizdən razı qalar. Hələlik bu qədər...

640
Teqlər:
Bakı, yarmarka, arıçılıq məhsullar, arı, bal
Əlaqədar
Bal yarmarkasında yenilik - barkod nömrələri olacaq
Ölkəyə bal gətirilməsi qadağan edilə bilər
Türkiyə türkü Qəbələnin "tərəkəmə" arıları ilə yerlilərə pul qazanmaq öyrədir
Adamdan çox arını sayırlar: gecikən itirdi
“Kəlbəcər”  tankeri

Odessada dizayn olunan "Kəlbəcər" suya salınıb - VİDEO

1
(Yenilənib 19:27 06.08.2020)
Unikal dizaynı ilə seçilən və texniki göstəricilərinə görə geniş imkanlara malik bu gəmi Bakı Gəmiqayırma Zavodunda inşa edilmiş sayca ikinci neftdaşıyan tankerdir

BAKI, 6 avqust — Sputnik. "Azərbaycan Xəzər Dəniz Gəmiçiliyi" Qapalı Səhmdar Cəmiyyətinin (ASCO) sifarişi ilə "Bakı Gəmiqayırma Zavodu" MMC-də inşa edilən "Kəlbəcər" neftdaşıyan tankeri növbəti mərhələsinin tikintisinin aparılması üçün suya salınıb. Bu barədə "Azərbaycan Xəzər Dəniz Gəmiçiliyi" QSC-dən Sputnik Azərbaycan-a verilən məlumatda bildirilib.

Qeyd olunub ki, gəminin gövdə hissəsinin inşası 100% başa çatıb. Qalan tamamlanma işləri Gəmiqayırma Zavodunun yanalma körpüsündə davam etdiriləcək. Bu məqsədlə "Kəlbəcər" tankeri zavodun tikinti-quraşdırma sahəsindən üzən dok üzərindən hidravlik arabacıqlar vasitəsilə suya salınıb.

Qeyd edək ki, bu gəminin konsepsiyası Odessa Dəniz Mühəndisliyi Bürosu və ASCO-nun təcrübəli mütəxəssisləri ilə birgə hazırlanıb. Volqa-Don MAX layihəsi olan gəmi maksimum yükgötürmə qabiliyyəti ilə Volqa-Don çayından keçmək imkanına malikdir.

Yeni nəsil "Kəlbəcər" tankerinin uzunluğu 141, eni 16.9, bortunun hündürlüyü isə 6 metrdir. 15 nəfərlik heyətlə idarə edilən gəmi saatda 10 knot sürətlə hərəkət edə biləcək. Tanker xam neft və neft məhsulları daşınması üçün nəzərdə tutulmuş ümumi tutumu 9212 kub metr olan 6 yük çəninə malikdir. Dedveyti dənizdə 7,875 T və çayda 5,447 T olan gəmi hər biri 1,200 kW gücə malik iki ədəd "Wartsila" istehsalı mühərriklərlə təchiz edilib.

Zavodun yanalma körpüsündə istismar sınaqları başa çatddıqdan sonra "Kəlbəcər" tankerinin dəniz-istismar sınaqlarına başlanacaq.

Yeni nəsil "Kəlbəcər" tankerinin xarici sularda istismarı nəzərdə tutulur.

Unikal dizaynı ilə seçilən və texniki göstəricilərinə görə geniş imkanlara malik bu gəmi Bakı Gəmiqayırma Zavodunda inşa edilmiş sayca ikinci neftdaşıyan tankerdir. Ötən ilin sonunda istismara verilmiş "Laçın" adlı ilk tanker artıq üçrəngli bayrağımız altında xarici sularda istismar olunur. Eyni zamanda, ASCO-nun sifarişinə uyğun olaraq daha iki ədəd eyni tipli gəminin tikintisi işləri də qrafikə uyğun davam edir.

Bununla belə, hazırda ASCO-nun donanmaları üçün zəruri olan müxtəlif təyinatlı gəmilərin inşası ilə bağlı Gəmiqayırma Zavodu ilə danışıqlar davam etdirilir.

1

Salam, dəniz! Biz gəldik...

3
(Yenilənib 19:25 06.08.2020)
Nazirlər Kabineti yanında Operativ Qərargah çimərliklərlə bağlı qadağanı müəyyən qaydalara riayət etmək şərtilə aradan qaldırıb. Bu hadisə dəniz istirahəti həvəskarlarının sevincinə səbəb olub və paytaxt əhalisi Abşeron çimərliklərinə axışıb.

 

BAKI, 6 avqust — Sputnik. Yayın sonunadək çox az vaxt qalıb. Azərbaycanın çimərlikləri koronavirus pandemiyası səbəbindən yay mövsümünün əvvəlindən indiyədək bağlı idi. Avqustun 5-də Nazirlər Kabineti yanında Operativ Qərargah çimərliklərlə bağlı qadağanı müəyyən qaydalara riayət etmək şərtilə aradan qaldırıb. Bu hadisə dəniz istirahəti həvəskarlarının sevincinə səbəb olub və paytaxt əhalisi Abşeron çimərliklərinə axışıb. Abşeron sahillərində vəziyyətin necə olduğuna Sputnik Azərbaycan-ın fotolentində baxın.

Koronavirus pandemiyasına görə gecikmiş çimərlik mövsümü bu il çox çəkməyəcək. Abşeron, Sumqayıt, Lənkəran, Xaçmaz, Siyəzənin bütün çimərliklərində, eləcə də Azərbaycanın bir sıra digər şəhər və rayonlarında çimməyə qadağa qaldırılsa da, karantin dövrü qaydalarına və tibbi-profilaktik tədbirlərə riayət etmək məcburidir.

İstirahət edənlər heç bir icazə olmadan dənizdə çimməyə gedə bilərlər. Lakin əvvəlcədən xüsusilə yaradılmış cimerlik.az portalında çimərliyin dolu olub-olmadığını yoxlamaq lazımdır.

Hər bir çimərlikdə istirahət edənlər üçün kvota müəyyən olunub və ASAN könüllüləri buna nəzarət edirlər. Çimərliklərin doluluq səviyyəsi portalda yaşıl, sarı və qırmızı rənglərlə təsvir olunur. Çimərlik dolursa, vətəndaşlar bunu əvvəlcədən öyrənirlər.

Həmçinin çimərliklərdə sosial məsafə və gigiyena qaydalarına riayət etmək lazımdır.

Beləliklə, dəsmalları, çətirləri və çimərlik kostyumlarını götürərək təcili isti Xəzər sahillərinə gedin ki, qarşıdan gələn qış üçün bolluca D vitamini toplaya biləsiniz.

3
  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

  • © Sputnik / Murad Orujov

    Bakıda karantin rejiminin yumşaldılmasından sonra Buzovna çimərliyi

Teqlər:
fotolent