Yeməkxana, arxiv şəkli

Yemək üçün "işıqfor" - məktəblərdə yeni sistem tətbiq olunacaq

536
(Yenilənib 15:50 09.09.2019)
"İl yarım ərzində aparılan monitorinqlərin nəticəsində müəyyən olunub ki, ilkin istehsal müəssisələrində qida təhlükəsizliyi daha çox gözlənir, bundan fərqli olaraq ictimai iaşə yerlərində qida təhlükəsizliyi isə daha çox pozulur"

Nigar İsgəndərova, Sputnik Azərbaycan

BAKI, 9 sentyabr — Sputnik. "Trans yağların faizinin yüksək olması insan orqanizmi üçün təhlükəlidir. Təşəbbüsümüz ondan ibarətdir ki, Azərbaycana idxal olunacaq və istehlak olunacaq yağlarda trans yağların faiz və miqdarı iki faizi ötməməlidir. Buna nail olduqdan sonra isə idxal və istehsal zamanı bu göstəricinin 2 faizdən yuxarı olmamasına nəzarət olacaq".

Sputnik Azərbaycan-ın xəbərinə görə, bu barədə Azərbaycan Qida Təhlükəsizliyi Agentliyinin sədri Qoşqar Təhməzli jurnalistlərə açıqlamasında deyib. O, bağça və məktəblərdə də qidalanma məsələsinə toxunub: "AQTA tərəfindən 500-dən artıq uşaq bağçasında monitorinqlər keçirilib. Bu barədə yaxın zamanlarda ətraflı məlumat verəcəyik. Bundan başqa, qeyd edim ki, cari ildə də Təhsil Nazirliyi ilə birgə məktəblərdə qidalanma məsələsinə nəzarət edəcəyik".

Q.Təhməzlinin sözlərinə görə, Səhiyyə Nazirliyi tərəfindən qida rasionunun hazırlanması ilə bağlı təklif hazırlanaraq Nazirlər Kabinetinə təqdim olunub: "Səhiyyə Nazirliyi tərəfindən təklif olunan qida rasionunda məktəbəqədər müəssisələrdə və orta məktəblərdə yeniyetmə yaşına qədər olan uşaqların qidalanmasının necə olması qeyd edilib. Təklif Nazirlər Kabineti tərəfindən təsdiq olunduqdan sonra biz həmin qidaların nə qədər təhlükəsiz olduğuna baxacağıq".

AQTA sədri eyni zamanda qeyd edib ki, tövsiyə üçün yaşıl, sarı və qırmızı vərəqələr hazırlamışıq, bunları daha sonra ictimaiyyətə açıqlayacağıq: "Yaşıl vərəqələrdə məktəbəqədər müəssisələrdə və orta məktəblərdə uşaqlara hansı qidalara tamamilə icazə verilməli olduğu qeyd edilib. Sarı vərəqələrdə əksini tapan qidalar diqqətli olmağı tələb edən qidalardır. Qırmızı vərəqələrdəki qidalar isə uşaqların qida rasionundan tamamilə çıxarılmalıdır. Bu vərəqələrdə qeyd olunanlar Qida Təhlükəsizliyi Agentliyinin mövqeyidir".

O, bildirib ki, il yarım ərzində aparılan monitorinqlərin nəticəsində müəyyən olunub ki, ilkin istehsal müəssisələrində qida təhlükəsizliyi daha çox gözlənir, bundan fərqli olaraq ictimai iaşə yerlərində qida təhlükəsizliyi isə daha çox pozulur. Onun sözlərinə görə, qeydə alınan zəhərlənmə faktlarının 95 faizində insanlar bir sıra normalara, şəxsi gigiyena amillərinə əməl etmirlər və bu səbəbdən də həmin qida onlar üçün təhlükəli məhsula çevrilir: "Qida təhlükəsizliyi mürəkkəb bir məsələdir.

 Qida istənilən mərhələdə təhlükəli məhsula çevrilə bilər. Yəni tarladan süfrəyədək bütün risklər aradan qaldırılmalıdır. Qida təhlükəsizliyi məsələsi təkcə qidanın öz tərkibi deyil, həmçinin də qidanın hazırlanma prosedurunda iştirak edən şəxslərin də gigiyenik amillərə əməl etməsi deməkdir. Bundan başqa, heyvan, bitki sağlamlığına da nail olunmalıdır. Bu maariflənmə işlərinə dəstək olaraq KİV-i də bizimlə əməkdaşlığa dəvət edirəm".

"Biz 7 illik bir dövlət proqramı qəbul etmişik. Bu dövlət proqramında iri qida müəssisələrində 90, orta ölüçülü qida müəssisələrinin isə 50 faizində qida təhlükəsizliyi sisteminin beynəlxalq standartlara uyğunlaşmasına nail olacağıq. Daha sonra isə kiçik sahibkarlıq subyketlərində də buna nail olmağa çalışacağıq", - deyə o əlavə edib.

Q.Təhməzli qida təhlükəsizliyi üçün ciddi ictimai nəzarətin, beynəlxalq standartların tətbiqinin vacibliyini vurğulayıb.

536
Teqlər:
Qida Təhlükəsizliyi Agentliyi, təhlükəsizlik, məktəbli, məktəb, qida
Əlaqədar
"Fast food" yeyən gənc kor və kar qaldı
Mövsümü gəldi: Balıqdan zəhərlənməmək üçün bunlara nəzər yetirin
Hamilələrdə qanazlığı problemini həll etmək üçün ən ucuz üsul təklif edildi
Nazirlikdən sərt qərar: daha əsl bal üçün dağa-daşa dırmanmağa gərək yoxdur

Cənubi Qafqazda bir ilk Azərbaycanda gerçəkləşir - VİDEO

8
(Yenilənib 15:35 13.04.2021)
Azərbaycan paytaxtını turistlər üçün maraqlı olan bölgələrlə birləşdirən yolda yeraltı tunel və ən uzun asma körpü tikilir. İşlərin gedişatını Sputnik Azərbaycan-ın videosunda izləyin.

Əhalinin rahat gediş-gəlişində xüsusi əhəmiyyətə malik Bakı-Şamaxı-Muğanlı-İsmayıllı-Qəbələ avtomobil yolunun Muğanlı-İsmayıllı-Qəbələ hissəsinin yenidən qurulması istiqamətində işlər davam edir. Ölkəmizdə ilk dəfə olaraq məhz bu yolda asma körpü və yeraltı tunel çəkilir. Sözügedən avtomobil yolu paytaxtımızı İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa yol olacaq.

Sürücü Cəlal Eyyubov Sputnik Azərbaycan-a deyir ki, qışda həmin yolda sürüşmə çox olur: "Yollar buz bağlayır, sürücülər üçün, yolu yaxşı bilməyən insanlar üçün narahatlıq yaradır. Yayda da çox sıxlıq olur. Yay aylarında gəlib-gedən insanlar çox olur, yol isə dardır, ona görə də çox sıxlıq yaranır".

Digər sürücü Zabit Əzizov da bu qənaətdədir ki, əgər bu yol yenidən təmir olunarsa, inkişafımıza böyük təsiri olar: "Azərbaycanda ilk dəfə asma körpünün olması həm turist cəlb edəcək, həm də ölkənin prespektivli inkişafına böyük təsir edəcək. Asma körpünün qurulması tezliklə başa çatdırılsa, daha yaxşı olar. Tunel də bizdə birinci dəfə olacaq. Bizim bölgə turist bölgəsi olduğu üçün bunların olması daha çox turist cəlb edəcək".

Lahiyə rəhbəri Zahir Həsənovun sözlərinə görə, Muğanlı-İsmayıllı-Qəbələ avtomobil yolunun 4.5-ci kilometrliyində, Ağsu çayı üzərində tikilən asma körpünün ümumi uzunluğu 1135 metr, hündürlüyü çay səviyyəsindən 76.5 metr, asma qüllələrin hündürlüyü isə 142 metr olacaq:

"Eyni zamanda yol 4 hərəkət zolağından ibarətdir. Körpünün bu parametrlərdə layihəndirilməsində əsas məqsəd mövcud Muğanlı-İsmayıllı avtomobil yolunda olan dolamacların sayının minimuma endirmək və bu yolda baş verə biləcək sürüşmələrin qarşını mümkün qədər almaqdır".

Yol ilk 2 km-lik ərazidə Muğanlı qəsəbəsinə çatmamış mövcud lokal sürüşmə sahəsindən əvvəl başlanıb, sözügedən qəsəbədən və qəsəbədən sonrakı enişdə aktiv sürüşmə sahəsindən yan keçməklə layihələndirilib. Nəticədə yolun Ağsu çayınadək olan hissəsində trassa 1.1 km, Ağsuçaydan sonrakı hissədə yeni Ağsuçay körpüsü və tunel hesabına 1.4 km qısalır. Qeyd edilən körpünün tikintisi və Muğanlı-İsmayıllı-Qəbələ avtomobil yolunun yenidən qurulması işləri tamamlandıqdan sonra bu region üzrə insanların rahat gediş-gəlişinin təmin edilməsi ilə yanaşı, turizm və kənd təsərrüfatının da inkişafına böyük töhfə verəcək.

Qeyd edək ki, respublikanın mühüm turizm bölgələrinə gedən və ilk dəfə ötən əsrin 70-ci illərində salınmış bu yolun yenidən qurulması Prezident İlham Əliyevin verdiyi tapşırığa əsasən layihələndirilib.

8
Dollar əskinasları və cüzdan, arxiv şəkli

"Dollar avronun devalvasiyası qaçılmazdır"

138
(Yenilənib 15:24 13.04.2021)
Azərbaycanda avro niyə ucuzlaşır? İqtisadçılar ölkədə avronun ucuzlaşmasının səbəblərindən danışıblar. "Ucuzlaşma ilk növbədə Avropa Mərkəzi Bankı tərəfindən avronun emissiyasının kəskin şəkildə artırılması, pul-kredit siyasətinin yumşaldılması ilə bağlıdır".

Xalid Məmmədov, Sputnik Azərbaycan

BAKI, 13 aprel — Sputnik. Bu il ilk dəfə martın 30-da Azərbaycanda avronun məzənnəsi 2 manatdan aşağı düşərək 1,9998 manat olub. Cari ilin yanvarın 7-də ölkədə avronun məzənnəsi 2,0958 manata çataraq 32 aylıq maksimumu yeniləmişdi. Həmin tarixdən avro manata nisbətdə 4,6% dəyər itirib.

Bəs maraqlıdır, Azərbaycanda avronun ucuzlaşmasının səbəbləri nədir və bu proses davam edəcəkmi?

İqtisadçı-ekspert Rəşad Həsənov Sputnik Azərbaycan-a deyib ki, Azərbaycanda avronun ucuzlaşması dünya bazarında avro-dollar paritetindən yaranmış nəticədir: "Azərbaycanda manatın məzənnəsi ABŞ dolları ilə müqayisədə formalaşır və dolların məzənnəsi 1,7000 manat saxlanılıb. Ona görə adətən deyilir ki, manatın məzənnəsi sabitdir. Amma digər bütün valyutaların məzənnəsi manatla dollar arasında olan münasibətdən formalaşır, yəni çarpaz məzənnə hesablaması aparılır. Dünya bazarlarında valyutaların ABŞ dollarına qarşı mövqeyinin dəyişməsi son nəticədə manata qarşı da mövqeyinin dəyişməsinə, yəni ucuzlaşmasına və yaxud bahalaşmasına gətirib çıxarır. Xüsusilə Co Bayden ABŞ Prezidenti seçiləndən sonra dollar dünya bazarlarında öz mövqeyini möhkəmləndirir. Bu, Azərbaycanda da avronun məzənnəsinin zəifləməsinə gətirib çıxarıb".

"Növbəti aylarda avronun bahalaşması gözlənilirmi?" sualına ekspert belə cavab verib: "Avropada pandemiyanın təsirlərini azaltmaq məqsədilə yumşaq şəkildə monetar və fiskal siyasət həyata keçirməyə çalışacaqlar. Bu da avronun mövqeyinin zəifləməsini şərtləndirə bilər. Əgər belə olsa, bu proses Azərbaycanda da avronun ucuzlaşmasını şərtləndirəcək".

"Ölkədə avronun ucuzlaşması kimlərə sərf edir?" məsələsinə gəlincə, iqtisadçı bildirib ki, bu, vətəndaşın və biznesin mövqeyindən asılıdır: "Avropadan idxal edənlər, Avropa ilə biznes əlaqələri olanlar üçün sərfəlidir. Lakin Avropaya məhsul satanlar üçün sərfəli deyil. Əgər şəxs aktivlərini avroda yerləşdiribsə və avro ucuzlaşırsa, bu, müəyyən itkilərə gətirib çıxarır".

Azərbaycan Dövlət İqtisad Universitetinin (UNEC) professoru Elşad Məmmədov isə Sputnik Azərbaycan-a deyib ki, Azərbaycanda avronun ucuzlaşmasının səbəbi ilk növbədə Avropa Mərkəzi Bankı tərəfindən avronun emissiyasının kəskin şəkildə artırılması, pul-kredit siyasətinin yumşaldılması ilə bağlıdır: "Avronun devalvasiya prosesi davam edəcək. Dollarda da artıq devalvasiya baş verir. Dolların xüsusi çəkisi dünya ticarətində, dünya iqtisadiyyatında azalır. Dollar və avronun devalvasiya prosesinin baş verməsi qaçılmazdır. Eyni zamanda, Avropa iqtisadiyyatındakı problemlər, qeyri-tarazlıq və s. avronun tədricən ucuzlaşmasına səbəb olacaq".

Professor bildirib ki, Azərbaycanın xarici ticarət dövriyyəsi əsasən dollarla aparılır: "Amma ümumiyyətlə, ixracat baxımından aparıcı ehtiyat valyutalarının zəifləməsi Azərbaycan üçün problemlərin yaranmasına səbəb olur. Çünki manat sabitdir, amma ixracat nəticəsində ölkəyə gələn valyuta zəifləməkdədir. Belə olan halda bunun ixracata mənfi təsiri olur. Lakin bütün bunlara baxmyaraq, manatın məzənnəsinin sabitliyi qorunmalıdır. Əks-halda, bu, ölkə iqtisadiyyatında ciddi qeyri-tarazlıqların dərinləşməsinə səbəb ola bilər. Ona görə də avronun ucuzlaşmasının beynəlxalq ticarətə, o cümlədən Azərbaycanın xarici ticarətinə təsiri olacaq".

"Biz ixracatda ilk növbədə yüksək texnoloji tutumlu sahələrin xüsusi çəkisinin artırılmasına nail olmalıyıq. Eyni zamanda tədricən texnologiyaların idxalına nail olmalıyıq ki, ölkəmizin rəqabət üstünlüyünün gücləndirilməsinə şərait yarada bilək", - deyə o əlavə edib.

138
Teqlər:
idxal, ixrac, dollar, Azərbaycan, ucuzlaşma, avro
Ukrayna hərbçisi , arxiv şəkli

Stoltenberq: "NATO Ukraynanın tərəfindədir"

0
(Yenilənib 16:42 13.04.2021)
"Böyük dövlətlər digərlərinə nəyi etmələrini diktə edə bilməzlər. Biz bu dünyanı keçmişdə qoymaq istəyirik. Biz Ukraynanın modernləşmə və islahatlara istiqamətlənən səylərini dəstəkləyirik".

BAKI, 13 aprel — Sputnik. NATO Ukraynanın tərəfindədir, müttəfiqlər Ukraynanın özünün təhlükəsizliyini təmin etməsi üçün dəstək göstərirlər. Sputnik Azərbaycan xəbər verir ki, bunu Ukraynanın xarici işlər naziri Dmitri Kuleba ilə birgə keçirdiyi mətbuat konfransında NATO-nun baş katibi Yens Stoltenberq bildirib.

"NATO-nun Ukraynanın suverenliyinə və ərazi bütövlüyünə dəstəyi dəyişməz olaraq qalır. Biz Krımın qanunsuz anneksiyasını tanımırıq, tanımayacağıq. Rusiyanı Ukraynanın şərqindəki silahlılara dəstəyi dayandırmağa, qoşunlarını Ukrayna ərazisindən çıxarmağa çağırırıq", - deyə Stoltenberq bildirib.

O əlavə edib ki, Ukraynanın NATO-ya üzvlüyü məsələsini yalnız alyansın 30 üzvü və Kiyev həll etməlidir, Rusiya buna qarışmamalıdır:

"Böyük dövlətlər digərlərinə nəyi etmələrini diktə edə bilməzlər. Biz bu dünyanı keçmişdə qoymaq istəyirik. Biz Ukraynanın modernləşmə və islahatlara istiqamətlənən səylərini dəstəkləyirik. İslahatlar sonrakı Avroatlantik inteqrasiya üçün ən yaxşı vasitədir".

Stoltenberq vurğulayıb ki, Rusiya təhlükəsizlik sahəsində digər ölkələrin əvəzinə qərar verə bilməz və bu, NATO-ya üzvlük məsələsinə də aiddir.

0