BAKI, 22 iyul — Sputnik. Sputnik Azərbaycan BİA-nın və Mətbuat Şurasının nümayəndələri Həsən bəy Zərdabinin AMEA-nın Botanika İnstitutunun həyətində yerləşən büstünü ziyarət edib, önünə əklil qoyublar.
"Bu gün Azərbaycanda Milli Mətbuat günü qeyd olunur. Artıq dördüncü ildir ki, biz onu Həsən bəy Zərdabinin büstü önündə qeyd edirik. Bildiyiniz kimi, o, yalnız Azərbaycan mətbuatının banisi, ilk qəzetin redaktoru olmayıb, həm də təbiətşünas olub. Ona görə də bu gün biz burada Azərbaycan jurnalistikasının yaranmasında əvəzsiz rol oynamış şəxsin abidəsi önünə gül qoyuruq", - Sputnik Azərbaycan BİA-nın rəhbəri Əziz Əliyev bildirib.
Mətbuat Şurasının sədri Əflatun Amaşov vurğulayıb ki, hazırda Azərbaycan mətbuatı öz sahəsində bölgənin lideridir və bu məsələdə Sputnik Azərbaycan-ın da rolu var.
"Biz artıq dördüncü dəfədir ki, bu tədbiri Sputnik Azərbaycan İnformasiya Agentliyi ilə keçiririk. Sputnik Azərbaycan ölkəmizin ən əhəmiyyətli kütləvi informasiya vasitələrindən biridir. O, Azərbaycan reallıqlarının bütün dünyaya çatdırılmasında vacib rol oynayır", – Mətbuat Şurasının sədri qeyd edib.
Xatırladaq ki, Azərbaycanın ilk mətbu nəşri "Əkinçi" 22 iyul 1875-ci ildə Həsən bəy Zərdabinin rəhbərliyi altında işıq üzü görüb. Bu hadisə Azərbaycanda milli mətbuat tarixinin başlanğıcı kimi qəbul edilir və Milli Mətbuat Günü kimi qeyd olunur.
Milli Mətbuat Günündə Azərbaycan mətbuatının yaradıcısı Həsən bəy Zərdabinin abidəsinə çiçəklərin qoyulması ənənəsi 2016-cı ildə "Sputnik Azərbaycan" xəbər agentliyinin əməkdaşları tərəfindən qoyulub.
