İlham Əhmədov, Sputnik Azərbaycan
BAKI, 24 iyun — Sputnik. Qəbələ Peşə Tədris Mərkəzində aprel şəhidi, leytenant Sahil Şirinovun doğum günü ilə əlaqədar tədbir keçirilib. “Zəfər” Şəhid Ailələrinə Dəstək İctimai Birliyinin təşkilatçılığı ilə keçirilən tədbirdə şəhidin yaxın qohumları, ailə üzvləri və ictimaiyyətin nümayəndələri iştirak edib.
Sputnik Azərbaycan-ın bölgə muxbiri xəbər verir ki, Dövlət himninin səsləndirilməsi ilə başlayan tədbirdə torpaqlarımızın bütövlüyü uğrunda gedən döyüşlərdə həlak olmuş bütün şəhidlərimizin xatirəsi bir dəqiqəlik sükutla yad edilib. Tədbirdə Qəbələ Rayon İcra Hakimiyyətinin İctimai-siyasi və humanitar məsələlər şöbəsinin müdiri, “Zəfər” Şəhid Ailələrinə Dəstək İctimai Birliyinin sədri Sevinc Alızadə, “Qəbələ” İdman Klubunun rəhbəri Fariz Nəcəfov və başqaları çıxış ediblər.
Çıxış edənlər Azərbaycanın azadlığı və ərazi bütövlüyü uğrunda həlak olan bütün oğul və qızlarımızın xatirəsinin xalqımızın qəlbində yaşayacağını vurğulayaraq, tezliklə torpaqlarımızın işğaldan azad ediləcəyinə əmin olduqlarını bildiriblər.
Tədbirdə Sahil Şirinovun həyatının müxtəlif anlarını əks etdirən videoçarx nümayiş olunub. Mərasimdə çıxış edən şəhidin anası Şəhla Şirinova övladı ilə bağlı xatirələrini bölüşərək, tədbirin təşkilatçılarına öz minnətdarlığını bildirib.Yekunda şəhid Sahil Şirinovun təhsil aldığı Təbriz Yaqubov adına Bum qəsəbə tam orta məktəbin şagirdlərinin hazırladığı ədəbi-bədii kompozisiya nümayiş etdirilib.Sonra tədbir iştirakçıları Bum qəsəbəsində şəhidin məzarını ziyarət edib, üzərinə gül dəstələri düzüblər.
