Xırdalan şəhəri 30-cu məhəllədə məskunlaşan köçkünlərin yaşayış şəraiti

Köçkünlər şikayət edir, bu dəfə "uşaq bezi" problemi var

4990
(Yenilənib 11:09 18.05.2019)
Başlarına zibil atılmasın, tavanları qırılmasın, çay içdikləri zaman yuxarıdan başlarına "uşaq bezi" atılmasın

İradə Cəlil, Sputnik Azərbaycan

BAKI, 19 may — Sputnik. Xırdalan qəsəbəsi, 30-cu məhəllə sakinlərinin problemləri bitib-tükənmir. Burada Kəlbəcər, Laçın, Fizuli və digər rayonlardan köçkün düşən 60-a yaxın ailə yaşayır. Köçkünlərin yaşayış şəraiti yaxşı olmasa da, ərazidə çoxmərtəbli bina tikilənə qədər onların şikayətləri elə də çox olmayıb.

Xırdalan şəhəri 30-cu məhəllədə məskunlaşan köçkünlərin yaşayış şəraiti
© Sputnik / Irade JELIL
Xırdalan şəhəri 30-cu məhəllədə məskunlaşan köçkünlərin yaşayış şəraiti

Bina tikildikdən sonra sakinlərin qara günləri başlayıb. Əvvəl tikinti zamanı yaranan səs-küy, sonra da binaya köçən sakinlərin laqeydliyi.

Xocalı köçkünü Gülay Kərimovanın sözlərinə görə, 27 ildir ki, bu ərazidə yaşayır. Onun 61 yaşı var. Yaşayış şəraitləri pis olduğundan, oğlunu evləndirə bilmədiyindən şikayətlənir: "Hansı qızın qapısını döyürəm, gəlib evə baxırlar, deyirlər bu evə qız verməzlər. Evlərin üstü uçurdulanda hamı gəlmişdi. İnanın Allaha, oturduğun yerdə göydən başına uşaq bezi düşür. Çıxıb deyirəm ki, "ay adam, ay insan, mən də sənin kimi insanam, niyə atırsan?!", vecinə də alan olmur. Oturub həyətdə çay içirəm, niyə mənim çayıma, qəndimə uşaq bezi düşməlidir?! Bizim halımıza bir çarə qılsınlar".

Xırdalan şəhəri 30-cu məhəllədə məskunlaşan köçkünlər
© Sputnik / Irade JELIL
Xırdalan şəhəri 30-cu məhəllədə məskunlaşan köçkünlər

Köçkünlər deyir ki, ərazidə 6 ailə vaqonda - köçkün düşdükləri gündən məskunlaşdıqları qarajlarda yaşayır. Cəbrayıl rayonundan köçkün düşmüş Aybəniz Məmmədova da uzun illərdir vaqonda yaşayanlardandır. Elə qızını da bu vaqondan gəlin köçürüb. Hazırda bacısı ilə birlikdə yaşayır.

Köçkünlər iddia edir ki, binada yaşayan sakinlər onların üzünə baxa-baxa başlarına zibil tökürlər.

Qarabağ əlili İlhamə Rəcəbova bildirir ki, dəfələrlə yaşadığı birotaqlı mənzili təmir etsə də, yuxarıdan atılan əşyalar mənzili yaşamaq üçün yararsız  vəziyyətə salıb: "Şiferlərin üzərinə nə gəldi atırlar. Neçə dəfə təmir etdirmişəm. Yenə həmin vəziyyətdir. Dərdini kimə deyəsən bilmirsən".

Xırdalan şəhəri 30-cu məhəllədə məskunlaşan 80 yaşlı Dilşad nənə
© Sputnik / Irade JELIL
Xırdalan şəhəri 30-cu məhəllədə məskunlaşan 80 yaşlı Dilşad nənə

Qeyd olunan ərazidə yollar da sıradan çıxıb. Bir balaca külək olan kimi ərazi toz-dumana bürünür.

80 yaşlı Dilşad nənənin vəziyyəti isə daha çox acınacaqlıdır. Qadın 30 ilə yaxındır ayaqyolusu olmayan bir göz daxmada yaşayır.

Dilşad nənə deyir ki, bu günə qədər vəziyyəti birtəhər idarə edə bilib. Amma indi yaşlanıb, yerindən çətinliklə durur, qayğıya ehtiyacı var. Tək istədiyi isə, normal şəraitli birotaqlı mənzildir.

"Nə qədər yaşayacağam, bilmirəm. 3 il, 5 il... Amma heç olmasa ömrümün sonuna yaxın adam kimi yaşamaq istəyirəm. Tək yaşayıram. Daha gücüm yoxdur" - deyə yaşlı qadın bildirib.

Həyətində içməli su olmadığı üçün ahıl qadın suyu da başqa həyətlərdən daşıyır.

Burada yaşayan sakinlər mənzil və ya daha gözəl şəraitdə yaşamağı tələb etmir. Onların tək istəyi odur ki, rahatlıqları pozulmasın. Başlarına zibil atılmasın, tavanları qırılmasın, çay içdikləri zaman yuxarıdan başlarına uşaq bezi düşməsin. 

Qeyd edək ki, sözügedən çoxmərtəbəli bina (Freskonun binaları adlanır-red.) köçkünlərin məskunlaşdığı qarajlara, gecəqondulara bitişik vəziyyətdə tikilib. Tikinti zamanı həyət evlərinin divarlarında çatlar yarandığından, köçkünlər orada yaşamağa qorxurlar. 

Köçkünlərin başına zibil atan bina sakinlərinə gəlincə, onlar əməkdaşımızın suallarımıza cavab verməkdən yayınıblar.

4990

İcra başçısının müavinini maşın vurdu

13
Sosial-iqtisadi inkişafın təhlili və proqnozlaşdırılması şöbəsinin müdiri Vahid İsaxan oğlu Həsənovu avtomobil vurub. 

BAKI, 9 avqust - Sputnik. Sabirabad Rayon İcra Hakimiyyəti başçısının müavinini avtomobil vurub. 

APA-nın məlumatına görə, Sabirabad Rayon İcra Hakimiyyəti başçısının müavini - Sosial-iqtisadi inkişafın təhlili və proqnozlaşdırılması şöbəsinin müdiri Vahid İsaxan oğlu Həsənovu avtomobil vurub. 

V.Həsənov başından xəsarət alaraq Şirvan Şəhər Xəstəxanasına yerləşdirilib. 

Faktla bağlı araşdırma aparılır.

13

Pandemiyanın ən çox ziyan vurduğu sahə - Burada çalışanların yoluxma riski daha böyükdür

990
(Yenilənib 22:32 09.08.2020)
Bütün dünyanı bürüyən bu pandemiya təəssüf olsun ki, ölkəmizdən də yan keçməyib və daxili turizm böhran ilə üzləşib.

İradə Cəlilova, Sputnik Azərbaycan

BAKI, 9 avqust — Sputnik. Koronavirus pandemiyası bütün sahələrə təsir etdiyi kimi turizm sahəsindən də yan keçməyib. Bölgələrə gediş-gəlişin məhdud çərçivədə olması, bəzi bölgələrdə istirahət mərkəzlərinin, restoranların, otellərin fəaliyyətinin dayandırılması turizm sahəsini demək olar ki, dondurub.

Turizm eksperti Ramin Zamanovun fikrincə, pandemiya dövründə turizm sektoru arxa planda qalıb. Onun sözlərinə görə, bu sahədə çalışanların virusa yoluxma riski də böyükdür. Otellərdə, restoran və istirahət mərkəzlərində yoluxma ehtimalı daha böyükdür.

Ekspert deyir ki, rayonlara gediş-gəlişin məhdudiyyətlərlə olması, ölkədə koronavirusun yayılma səviyyəsini azaltma məqsədi daşıyır. Onun fikrincə, bəzi rayonlarda virusa yoluxma faktının az olması məhdudiyyətlərin nəticə verdiyini göstərir və daha uzun müddət davam etməsinə əsas yaradır.

"Rayonlarda olan otellərin əksəriyyəti demək olar ki, fəaliyyətini dayandırıb. İşlə bağlı regionlara üz tutanlar xüsusi icazə ilə həmin otellərdə qala bilər. Rayonlara istirahət məqsədi ilə gedib, oteldə qalmaq isə mümkün deyil" – o vurğulayıb.

Millət vəkili Malik Həsənov Sputnik Azərbaycan-a açıqlamasında bildirib ki, pandemiya təkcə bizi yox, bütün dünyanı iflic edib, 6 aya yaxındır bütün dünya ölkələrinin sərhədləri bağlıdır, sərhədlərin pandemiyadan əvvəlki vəziyyətə qayıtmaq ehtimalı hələ yoxdur: "Bəlkə də ən çox itki, ən böyük böhran ilə üzləşən turizm sektoru olub. Nəinki Azərbaycanda, bütün dünyada tarixdə belə hal olmayb".

Onun sözlərinə görə, pandemiya səbəbindən daxili turizm böhranla üzləşib.

Millət vəkili Azərbaycanda koronovirus pandemiyasının qarşısının alınması üçün görülən tədbirləri təqdirəlayiq hesab edir: "Koronavirusa qarşı mübarizədə imzalanan sərəncamlar, həyata keçirilən operativ və təxirəsalınmaz tədbirlər nəticəsində ölkəmiz koronavirus pandemiyasına qarşı səmərəli mübarizə aparır. Ölkə başçısı pandemiyaya qarşı mübarizədə hər zaman vətəndaşların sağlamlığını ön planda tutub. Bu səbəbdən də bir sıra önləyici tədbirlər görülüb. Vətəndaşların sağlamlığını düşünərək, ölkə ərazisində xüsusi karantin rejimi tətbiq edilib və ölkə daxilindəki epidemiya demək olar ki, idarə olunan vəziyyətə gəlib".

M. Həsənov qeyd edib ki, bunun bariz nümunəsi son günlər yoluxma sayının azalması və sağalanların üstünlük təşkil etməsidir. Bütün bunları nəzərə alaraq ölkə əhalisinin sağlamlığı turizm sektorunda olan problemlərlə müqayisədə daha önəmlidir.

990
Belorusda seçkinin gedişi zamanı

Belarus MSK ilkin nəticələri açıqlayıb

0
Komissiyanın məlumatına görə, beş regionun səsvermələrinin nəticələrinə əsasən hazırkı dövlət başçısı Aleksandr Lukaşenko seçkilərdə liderdir.

BAKI, 10 avqust - Sputnik. Belarusun Mərkəzi Seçki Komissiyası bu gün ölkədə keçirilən prezident seçkilərinin ilkin nəticələrini açıqlayıb.

Bu barədə Sputnik Azərbaycan RİA Novosti-yə istinadən xəbər verir.

Komissiyanın məlumatına görə, beş regionun səsvermələrinin nəticələrinə əsasən hazırkı dövlət başçısı Aleksandr Lukaşenko seçkilərdə liderdir. O, seçicilərin 82%-nin səslərini toplayıb. 

Qeyd edək ki, Lukaşenko altıncı dəfədir prezident seçkilərində namizəddir.  

0