Fermer Eldar Əmirov

Yerli məmurlar qonşunu qonşu, qohumu qohumla üz-üzə qoyublar - Torpaq davası

5743
(Yenilənib 16:23 04.05.2019)
Apelyasiya və Ali Məhkəmənin qətnamələri kağız üzərində qalıb, icra edilmir

Musa Muradlı, Sputnik Azərbaycan

BAKI, 5 may — Sputnik. Bərdə rayon Aqrar İslahat Komissiyasının 1998-ci ildə apardığı torpaq islahatı zamanı Qaraqoyunlu kəndində pay torpaqları dövlət aktında göstərilən yerdən deyil, başqa-başqa yerlərdən verilib. Nəticədə kənd sakinlərinə sənədsiz torpaq paylanıb ki, bu da sonralar vəzifəli adamların sui-istifadəsinə gətirib çıxarıb - qonşu qonşu ilə, qohum qohumla üz-üzə qalıb.

Kənd sakini Eldar Əmirov həmkəndliləri Qurban Tağıyev, Nizami Quliyev və Vaqif Quliyevlə neçə illərdi torpaq davasında. Davaya səbəb də E.Əmirovun istifadə etdiyi torpağın üç həmkəndlisi tərəfindən ələ keçirilməsidir.

Sənədlər, məhkəmə qətnamələri E.Əmirovun haqlı olduğunu göstərsə də, faktiki olaraq torpağı başqaları əkib-becərir. E.Əmirov dövlət orqanlarına müraciətlər etsə də, haqqını bərpa edə bilmir. Gəncə Apelyasiya və Azərbaycan Respublikası Ali Məhkəməsinin qətnamələri də kağız üzərində qalıb, icra edilmir.

Fermer Eldar Əmirov
© Sputnik / Musa Muradli
Fermer Eldar Əmirov

Sputnik Azərbaycan-ın bölgə müxbirinə danışan Eldar Əmirov yerli hakimiyyət orqanlarının ona məxsus olan torpağı qanunsuz olaraq əlindən aldıqlarını bildirir. Şikayətçi ilə söhbət zamanı məlum olur ki, o, hələ islahatdan əvvəl, SSRİ dağılmamışdan, Qorboçovun yenidənqurma siyasəti illərində, yəni 1990-cı ildə kiçik müəssisə yaradaraq ilk dəfə torpaq alıb, müstəqil təsərrüfatçılıqla məşğul olub.

1998-ci ildə dövlətin həyata keçirdiyi torpaq islahatı zamanı ona pay torpağı qanunauyğun olaraq elə həmin kiçik müəssisəyə ayrılmış sahədən verilib. İslahat zamanı pay torpağından artıq qalan torpaqdan isə bələdiyyə ilə icarə müqaviləsi bağlamaqla istifadə edib. Lakin 2015-ci ildə onun istifadəsində olan torpaq bələdiyyə sədrinin göstərişi ilə başqa adamların istifadəsinə verilib.

E.Əmirov bu məsələdə Bərdə rayon Qaraqoyunlu bələdiyyəsinin sədri Nicat Məmmədovu günahlandırır: "Qanunsuz əməllərin başında duran bələdiyyə sədri icarəyə götürüb, istifadə etdiyim torpaq sahəsinin mənə məxsus sənədlərinin olmasına baxmayaraq, əlimdən alıb, qohumlarına verib. Ali Məhkəmənin qüvvəyə minmiş qətnaməsinin mövcudluğuna baxmayaraq, hələ də istifadə etməli olduğum torpağı özümə qaytarmırlar".

Fermer problemini həlli etmək üçün lazım olan bir çox instansiyalara müraciət etsə də, köməklik olmayıb: "Yalnız yalan vədlər verməklə bizi aldadırlar. Ali Məhkəmənin qərarı yerinə yetirilmir. Qaraqoyunlu bələdiyyəsinin sədri Bərdə Rayon İcra Hakimiyyətindən aldığı cürət hesabına qanunsuz əməllərini davam etdirir. Həmin adamlar himayə olunduqları üçün mənim istifadə etməli olduğum torpağı qaytarmırlar".

E.Əmirovun dediyinə görə, dəfələrlə yonca əkilmiş sahəsinə traktor salıb əkdirməklə ona külli miqdarda ziyan vurublar: "Rayon rəhbərliyinin bələdiyyə sədrini müdafiə etdiyinə görə polis, prokurorluq şikayətimizə baxmayıb. Bütün cinayət işləri ört-basdır edilir. Bələdiyyə sədri səlahiyyətlərini aşaraq, 20 nəfərlik ailənin yeganə gəlir yeri olan 9 hektar torpağı əlimizdən almaqla bizi səfalətlə üz-üzə qoyub".

Bərdəli fermer son ümid yeri kimi Prezident İlham Əliyev və Birinci vitse-prezident Mehriban Əliyevaya müraciət etməyi görür: "Xahiş edirəm ki, Ali Məhkəmənin qərarı ilə olan torpağımızı əsassız olaraq əlimizdən alıb başqa adamlara verdikləri üçün Qaraqoyunlu kənd bələdiyyəsinin sədri Nicat Məmmədov barəsində tədbir görülməsinə göstəriş verilsin. Torpağımızın özümüzə qaytarılmasına köməklik edilsin. Ümidimiz Prezidentimiz İlham Əliyev və Mehriban xanım Əliyevadır".

Bərdə rayon Qaraqoyunlu Bələdiyyəsinin sədri N.Məmmədov isə, Sputnik Azərbaycan-a açıqlamasında E.Əmirovun iddia etdiyi torpaq sahəsinin bələdiyyə mülkiyyətində olmadığını, vətəndaşların pay torpağı qismində şəxsi mülkiyyət olduğunu deyib. Ancaq kimə məxsus olması barədə heç bir məlumat verməyib.

Sədr əlavə olaraq onu da bildirib ki, məhkəmə Eldar Əmirova torpağın verilməsi barədə qərar çıxarsa da, haradan verilməsi konturda dəqiq göstərilməyib: "Ona görə də icraçılar məhkəmə qətnaməsini icra edə bilmirlər".

Məsələ ilə bağlı əməkdaşımız Bərdə Regional Ədliyyə İdarəsinin baş məsləhətçisi Eldəniz İbrahimovla da əlaqə saxlayıb. O, Qaraqoyunlu kənd sakini Eldar Əmirovun şikayəti əsasında bələdiyyə sədri Nicat Məmmədovun fəaliyyətinin araşdırıldığını bildirib: "Bir sıra qanun pozuntularının aşkar olunması ilə bağlı Ədliyyə Nazirliyinin Bələdiyyələrlə İş Mərkəzinə məlumat verilib. Həmçinin sübutlar Azərbaycan Respublikasının Baş Prokurorluğu yanında Korrupsiyaya Qarşı mübarizə İdarəsinə göndərilib".

Məhkəmə qətnamələrinin yerinə yetirilməsinin icra məmurlarının səlahiyyətinə aid olduğu üçün Eldar Əmirovun iddia etdiyi torpağın onun istifadəsinə qaytarılmasının həmin qurumun işi olduğunu bildirən E.İbrahimov məsələnin qanuni həllini tapacağına ümidvardır.

Biz də ümid edirik ki, bərdəli fermer Eldar Əmirovun torpaq mübahisəsinə ədalətlə baxılacaq və bu davaya son qoyulacaq.

5743
Teqlər:
islahat, kənd, Bərdə, fermer, torpaq
Əlaqədar
Neftlə çirkləndirilmiş torpaqların xəritəsi yaradılacaq
Məcburi köçkünlərə torpaq sahələrinin ayrılması qaydasına dəyişiklik edilib
Dövlət ehtiyacı üçün yeni torpaq sahələri alınacaq
Qarabağda döyüşən livanlı muzdlu terrorçu Eulcekcian Viken Abrahamın cinayət işi üzrə prosess

Bakıda 14 erməni terrorçunun məhkəməsi başlayır

7
Əfqan Hacıyevin sədrliyi ilə keçiriləcək məhkəmədə təqsirləndirilən şəxslərin anket məlumatları dəqiqləşdiriləcək və cinayət işi məhkəmə baxışına təyin ediləcək.

BAKI, 16 iyun — Sputnik. Bu gün Azərbaycan ərazisində terror-təxribat və digər əməllər törətməkdə təqsirləndirilən erməni silahlı dəstələrinin 14 üzvü - Avakyan Qraç Arzumanoviç, Serobyan Geğam Samveloviç, Baqasyan Armen Yegizari, Qasparyan Qor Vaqramini, Sefilyan Kamo Karenoviç, Hakobyan Volodiya Vaçaqani, Asetryan Gevorq Norairoviç, Yenqoyan Sisak Qrişai, Petrosyan Albert Kamoyeviç, Sedrakyan Romik Misakini, Minasyan Aram Qarnikoviç, Minosyan Mkrtıç Simonoviç, Matesyan Edqar Vaçaqanoviç və Karapetyan Yuri Tiqranoviçin cinayət işi üzrə məhkəmə prosesi başlayır.

Sputnik Azərbaycan xəbər verir ki, proses Bakı Ağır Cinayətlər Məhkəməsində keçiriləcək.

Əfqan Hacıyevin sədrliyi ilə keçiriləcək məhkəmədə təqsirləndirilən şəxslərin anket məlumatları dəqiqləşdiriləcək və cinayət işi məhkəmə baxışına təyin ediləcək.

Xatırladaq ki, 10 noyabr 2020-ci il tarixində Azərbaycan, Rusiya və Ermənistan arasında imzalanmış üçtərəfli bəyanatla atəşkəsin elan olunmasından sonra Azərbaycan Respublikasının ərazisinə qanunsuz olaraq gizli yollarla keçib Xocavənd rayonunun Hadrut qəsəbəsinin şimal-qərb hissəsində meşəlik ərazidə mövqe tutaraq hərbi qulluqçularımıza və mülki şəxslərə qarşı terror-təxribat və digər cinayət əməlləri törədən erməni silahlı dəstələrinin Dövlət Təhlükəsizliyi Xidməti tərəfindən 13 dekabr 2020-ci il tarixdə keçirilmiş anti-terror əməliyyatı nəticəsində tərksilah edilmiş üzvləri barəsində DTX-nin İstintaq Baş idarəsində başlanmış cinayət işi üzrə ibtidai istintaq yekunlaşıb.

Aparılmış istintaqla müəyyən edilib ki, Ermənistan Respublikasının vətəndaşlarından ibarət bir qrup şəxs qanunsuz şəkildə odlu silah, onun komplekt hissələrini, döyüş sursatı, partlayıcı maddələr və qurğular əldə edərək qanunvericiliklə nəzərdə tutulmayan silahlı birləşmələr yaradıblar. Həmin birləşmələrin üzvləri 26-27 noyabr 2020-ci il tarixdə Azərbaycan Respublikasının dövlət sərhədini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar etmiş, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Sadalanan faktlarla bağlı qanunsuz silahlı birləşmənin üzvləri Avakyan Qraç Arzumanoviç, Serobyan Geğam Samveloviç və digərlərinin, ümumilikdə 14 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Azərbaycan Respublikası Baş Prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.

DTX-nın aniterror əməliyyatı

Qeyd edək ki, Dövlət Təhlükəsizliyi Xidməti tərəfindən 13 dekabr 2020-ci il tarixdə keçirilmiş antiterror əməliyyatı nəticəsində tərksilah edilmiş Ermənistan Respublikasının vətəndaşları olan silahlı dəstələrin üzvləri barəsində DTX-nin İstintaq Baş idarəsində başlanmış cinayət işi üzrə ibtidai istintaq yekunlaşıb.

İstintaq nəticəsində müəyyən edilib ki, cinayətkar silahlı birləşmələrin üzvləri 2020-ci ilin 26-27 noyabr tarixlərində Azərbaycan Respublikasının dövlət sərhədini qanunsuz olaraq mütəşəkkil dəstə halında keçməklə Xocavənd rayonunun Hadrut qəsəbəsinin şimal-qərb hissəsində meşəlik və digər ərazilərində döyüş mövqeləri tutaraq 13 dekabr 2020-ci il tarixədək olan müddət ərzində ölkə ərazisində yerləşən müəssisə, idarə, təşkilatlara, habelə ayrı-ayrı şəxslərə silahlı basqınlar edib, ictimai təhlükəsizliyi pozmaq, əhali arasında vahimə yaratmaq, Azərbaycan Respublikasının dövlət hakimiyyət orqanları və beynəlxalq təşkilatlar tərəfindən qərar qəbul edilməsinə təsir göstərmək məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması və başqa ictimai təhlükəli nəticələrin baş verməsi təhlükəsi yaradan partlayış, yanğın və digər terror əməlləri törədiblər.

Məlumat verildiyi kimi, silahlı dəstənin əvvəlcə 14, sonra isə daha 13 nəfər üzvü barəsində cinayət işinin istintaqı yekunlaşdırılaraq təsdiq edilmiş ittiham aktı ilə birlikdə baxılması üçün məhkəməyə göndərilib.

Sadalanan faktlarla bağlı qanunsuz silahlı birləşmənin digər üzvlərinin – Mikaelyan Andranik Vazgenoviç, Soğomonyan Setrak Samveloviç, Karapetyan Rafik Robertoviç və qeyriləri də daxil olmaqla, ümumilikdə daha 26 təqsirləndirilən şəxsin Azərbaycan Respublikası Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə), 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə), 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə ittiham olunmalarına dair cinayət işinin istintaqı yekunlaşdırılaraq Azərbaycan Respublikasının Baş prokurorunun müavini tərəfindən təsdiq edilmiş ittiham aktı ilə birlikdə baxılması üçün məhkəməyə göndərilib.

7
 Pandemiya zamanı imtahan

DİM imtahanların vaxtını dəyişdi

318
(Yenilənib 10:53 16.06.2021)
İyulun 1-də keçiriləcək imtahanda sıxlığın yaşanmaması üçün Dövlət İmtahan Mərkəzi tərəfindən addım atılıb.

BAKI, 16 iyun — Sputnik. Məlum olduğu kimi, Dövlət İmtahan Mərkəzi tərəfindən 1 iyul 2021-ci il tarixində müxtəlif növ imtahanların keçirilməsi nəzərdə tutulurdu. Bu imtahanlarda iştirak etmək üçün 26 mindən artıq abituriyent qeydiyyatdan keçib. İmtahanlarda iştirakçıların sıxlığının azaldılması məqsədilə Mərkəz tərəfindən bu imtahanların iyulun 1-də və 2-də müxtəlif şəhər və rayonlarda keçirilməsi qərara alınıb.

İyulun 1-də və ya 2-də imtahan keçiriləcək şəhər və rayonların siyahısı yaxın günlərdə elan olunacaq.

Qeyd edək ki, iyulun 1-də və 2-də aşağıdakı imtahanlar keçiriləcək.

- əvvəlki illərin məzunları üçün qəbul imtahanının I mərhələsi, V ixtisas qrupu üzrə ali təhsil müəssisələrinə və 11 illik təhsil bazasında kolleclərə qəbul imtahanı;

- müsabiqədə buraxılış imtahanında verdiyi xarici dildən fərqli dil üzrə iştirak etmək istəyənlər üçün əlavə xarici dil imtahanı;

- qəbul imtahanını buraxılış imtahanında verdiyi dildən fərqli dil üzrə vermək istəyənlər üçün əlavə imtahan;

- aprel ayında keçirilən buraxılış imtahanlarında üzrlü səbəbdən iştirak edə bilməyən XI sinif şagirdləri üçün buraxılış imtahanı;

- eksternat qaydasında imtahan verənlər üçün buraxılış imtahanı.

318
Füzuli hava limanının tikintisi

Füzuli aeroportunda ilk sınaq uçuşunun keçiriləcəyi tarix açıqlanıb

0
İşğaldan azad edilmiş ərazilərdə tikiləcək hava limanlarından biri olan Füzuli aeroportunda işlər sürətlə sona yaxınlaşır.

BAKI, 16 iyun — Sputnik. Füzuli rayonunda səfərdə olan media nümayəndələri Füzuli Beynəlxalq Hava Limanında tikinti işlərinin gedişi ilə tanış olublar.

"Report"un məlumatına əsasən, AZAL-ın nümayəndəsi Valeh Əmiraslanov jurnalistlərə açıqlamasında bildirib ki, Füzuli Beynəlxalq Hava Limanında ilk sınaq uçuşun sentyabrın 5-də keçirilməsi planlaşdırılır:

"Yanvar ayının 14-də başlayan işlər çərçivəsində geniş fizolajlı hava gəmilərinin qəbul olunması üçün uzunluğu 3 km, eni 60 m olan uçuş enmə zolağının torpaq yatağı tamamlanıb. Hazırda əsas layın asfalt beton örtüyünün salınması işləri davam etdirilir. Sahəsi 60 min kvadrat metr olan 8 hava gəmisini saxlaya biləcək peronun tikintisinin torpaq yatağı tamamlanmaq üzrədir. Terminal binasında dəmir beton konstruksiya işləri 100 faiz tamamlanıb. Dəmir beton konstruksiyanın quraşdırılma prosesi gedir. Italiya istehsalı olan dam örtükləri a rtıq Azərbaycana gətirilib, Türkiyədən sifariş olunan fasad elementləri gətirilmək üzrədir".

O bildirib ki, hava hərəkətinin təmin edilməsi üçün qüllənin tikintisinin dəmir beton konstruksiyasının işlərinin 1 həftə ərzində yekunlaşdırlması planlaşdırılır:

"İstifadə olunan avadanlıqların hamısı avropa istehsalıdır və testdən keçirilərək Bakıya gətirilib. Bu sahədə beton özüllərin quraşdırılması isə bu ayın sonuna planlaşdırılır. Uçuş enmə zolağında tikinti işləri sentyabrın 5-nə kimi tamamlanacaq".

Füzuli beynəlxalq hava limanı

2020-ci il noyabrın 26-da Azərbaycan Nəqliyyat, Rabitə və Yüksək Texnologiyalar Nazirliyi ICAO-nun Füzulidəki hava limanı da daxil olmaqla 6 hava limanının beynəlxalq yer indeksləri kataloquna daxil edilməsi barədə Dövlət Mülki Aviasiya Agentliyinin müraciətini təmin etdiyini bildirib.

2021-ci ilin yanvarında Azərbaycan Prezidenti Füzulidə beynəlxalq hava limanının tikintisi barədə sərəncam verib. Gələcək hava limanının təməlqoyma mərasimi həmən ilin yanvar ayının 14-də baş tutub.

Köhnə aeroportun yerində tikilən Füzuli beynəlxalq hava limanında uçuş-enmə zolağının inşası ilə bu sahədə böyük təcrübəsi olan "AzVirt" MMC məşğul olur. Hava limanının tikintisi yanvar ayında başlayıb. Plana əsasən ilin sonuna kimi uçuş-enmə zolağı, eləcə də peron istifadəyə veriləcək. Yeni hava limanının uçuş-enmə zolağının uzunluğu 3 000 metr olacaq.

0