Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri

Moskvalı tələbələr Bakıda, yaxud da rusiyalıların qeyri-adi sərgüzəştləri

127
(Yenilənib 20:29 27.03.2019)
Moskva Dövlət Universitetinin Asiya və Afrika ölkələri İnstitutunun bir neçə tələbəsi ilk dəfə Bakıda olublar və buradan inanılmaz təəssüratlarla ayrılıblar

Kəmalə Əliyeva, Sputnik Azərbaycan

BAKI, 27 mart — Sputnik. Mixail Lomonosov adına Moskva Dövlət Universitetinin Asiya və Afrika ölkələri İnstitutunun bir neçə tələbəsi ilk dəfə Bakıya səfər edib. Onlar Bakının gözəlliyinə və arxitekturasına heyran olublar. Şəhərin görməli yerlərinin ziyarət ediblər və Azərbaycan yeməklərinin dadına baxıblar. Asiya və Afrika ölkələri İnstitutunun tarix bölməsinin tələbəsi Serafim Mixaylov Sputnik Azərbaycan-a müsahibəsində bu səfərlə bağlı ətraflı məlumat verib.

Tələbələr Bakıya martın 21-də gəliblər və üç gün burada qalıblar. Onlar üçün ekskursiyaçı və mini-avtobus ayrılıb. Tələbələrin cədvəli çox sıx tərtib olunub və hər dəqiqəyə qənaət etməli olublar. Onlar səfərlərinin ilk günü otelə yerləşəndən dərhal sonra "Şirvanşah" restoranına gediblər. Onları təkcə Azərbaycan mətbəxinin inciləri olan yeməklər və içkilər deyil, həm də diqqətlə bərpa edilmiş qədim tikililər və şərq əzəmətinin inanılmaz atmosferi təəccübləndirib.

Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri
© Serafim Mixaylov tərəfindən təqdim olunub
Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri

"Biz birinci gün Şəhidlər Xiyabanını ziyarət etdik. Gidimiz Vəfa xanım bizimlə burada dəfn olunmuş günahsız və qəhrəman qurbanların tarixçəsini bölüşdü. Müşahidə platformasında biz ilk dəfə olaraq parlaq Bakı gecələrini, paytaxtın göbəyində vüqarla dayanmış, onun vizit kartı olan Flame Towers-i gördük. Bu peyzaj və onun kölgəsi uzun müddət gözümüzün qabağından getməyəcək" - deyə Mixaylov şövqlə bildirib.

Səfərin ikinci günü – martın 22-də tələbələr İçərişəhəri gəziblər, Məhəmməd məscidini, Şirvanşahlar saray kompleksini ziyarət ediblər. Onlar burada Azərbaycan tarixi və o zamanların saray adət-ənənələri barədə maraqlı məlumatlar əldə ediblər. Saraydakı daşların üzərinə həkk olunmuş müxtəlif dillərdə - ərəb, ivrit, fars və s. olan yazılar onların böyük marağına səbəb olub. Onlar həmçinin Azərbaycanın və Bakının mirvarisi olan Qız qalasını ziyarət ediblər. Burada onların gözü qarşısında günəşlə haşiyələnmiş panorama açılıb.

"İçərişəhər açıq səma altında əbədi sənət sərgisidir. Burada yaşayan rəssamlar öz yaradıcılıq güclərini Bakı küçələrindən alırlar və onları öz əsərlərində təcəssüm etdirirlər. Biz buradakı iki rəssamlıq emalatxanasında olduq. Onlardan biri müasir tendensiyaları ehtiva edən şəkillərlə dolu idi və ziyarətçilərin gələcəkdə kim olacağı barədə arzularını əks etdirirdi. İkincisi isə bir ev idi. Onun iç və xarici divarları çox mürəkkəb və təsəvvürə gəlməz dərəcədə orijinal məzmunlu gil plitələrlə örtülmüşdü" - deyə Mixaylov heyranlığını gizlədə bilmir.

Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri
© Serafim Mixaylov tərəfindən təqdim olunub
Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri

Tələbələr həmçinin şəhərin mərkəzini gəziblər, bayram yarmarkalarında olublar, buradakı ənənəvi Novruz şirniyyatlarını dadıblar, Xalça muzeyini ziyarət ediblər. Daha sonra isə onlar Bakı həyətlərinə ekskursiya ediblər.

"Gidimiz bizi sovet qəsəbələrinə, Hacı Zeynalabiddin Tağıyev tərəfindən tikilmiş bitki örtüklü evlərin həyətlərinə, sənaye məhəllələrinə apardı. Biz hətta bu binaların sakinlər yaşayan yerlərinə getdik, onlarla söhbətləşdik. Bu mühit möhtəşəm və inanılmaz idi. Onların birində biz hətta bir filmin çəkiliş qrupuna rast gəldik. Onlar bizə ekranlarda "Gilas səbəti" komediyasını gözləməyi tövsiyə etdilər. Və bütün bunlar müasir dinamik şəhərin mərkəzində baş verirdi. Biz Bakının sirrli yerlərini ziyarət etdik və bu, bizim bu şəhərlə əlaqəmizi daha da gücləndirdi" - deyə Mixaylov bildirib.

Tələbələr həyətlərdən birində Qafqaz rəqsləri öyrədən rəqs məktəbinə gedib çıxıblar. Yarım saat sonra onların hər biri artıq Qafqaz rəqslərini ifa etməyi bacarıblar.

Səfərin üçüncü günündə tələbələr dəniz sahilini və Heydər Əliyev Mərkəzini ziyarət edib. O, qonaqları təkcə öz tikilişi ilə deyil, həm də sərgi materiallarının orijinallığı ilə valeh edib. Mixaylovun sözlərinə görə, XX əsrin Rus təsviri sənətinin sərgisini görmək onlara xoş təsir bağışlayıb. Tələbələr burada həmçinin böyük Heydər Əliyevin həyat yolu və onun güclü Azərbaycanı qurmaq istiqamətində göstərdiyi önəmli fəaliyyəti ilə tanış olublar.

Rusiyalı tələbələrə Atəşgahı da ziyarət etmək nəsib olub. Orada onlara Azərbaycanda zərdüştiliyin tarixindən və bu məbədin necə tikildiyindən danışılıb. Daha sonra onlar "Qala" muzey-qoruğuna gediblər. Burada beş min il əvvəl yaşayan insanların qazıntılar nəticəsində aşkarlanmış və yenidən inşa edilmiş yaşayış məskənləri arasında dolaşaraq, onların adət-ənənələri haqqında çox şey öyrəniblər.

Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri
© Serafim Mixaylov tərəfindən təqdim olunub
Mixail Lomonosov adına Moskva Dövlət Universitetinin Asiya və Afrika ölkələri İnstitutunun tələbələri

Onlar üçün gözlənilməz olan kiçik bir zooparka gəlib çıxıblar və burada ilk dəfə canlı surətdə at və dəvə görüblər, onları yemləyiblər.

Mixaylov Bakı təəssüratlarını qısaca belə ifadə edib: "Bakı səmimi və mehriban insanları olan çox isti bir şəhərdir. Memarlıq müasir olmağa meylliliyi ilə yanaşı, Şərq motivlərinin möhtəşəmliyini də qoruyur. Ənənəvi azərbaycanlı yeməkləri və içkilər uzun müddət bizim mədələrimizi Moskva yeməklərinə laqeyd qalmağa vadar edəcək. Buradakı tarix və sənət təkcə ağır mühafizə altında olan muzeylərin divarları arasına qapılaraq qalmır, həm də qonaqları əhatə edir və bura gələnlərin düşüncələrini öz əsarəti altına alır".

Bir sözlə, tələbələr Bakıdan razı və yaxşı dincəlmiş şəkildə ayrılıblar. Serafim Mixaylov və onun tələbə yoldaşları səbirsizliklə Azərbaycana növbəti səfərlərini gözləyirlər ki, bura haqqında daha çox şey öyrənsinlər.

127
İmtahan, arxiv şəkli

Nazirlikdən imtahanlarla bağlı açıqlama

10
(Yenilənib 22:45 15.01.2021)
Nicat Məmmədlinin sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib.

BAKI, 15 yanvar — Sputnik. "Pandemiyadan sonra – ola bilər ki, yaz, yaxud da daha sonrakı semestrdə ənənəvi imtahan sessiyasına keçəcəyik". Sputnik Azərbaycan-ın məlumatına görə, bunu Təhsil Nazirliyinin Elm, ali və orta ixtisas təhsili şöbəsininn müdiri Nicat Məmmədli deyib. Onun sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib. "İmtahanların təşkilində güzəştlərin olması ilə bağlı təkliflər edilir. Amma hazırkı pandemiya dövrü bizdən təhsilə daha məsuliyyətli yanaşmağı tələb edir".

Şöbə müdiri bildirib ki, ötən ilin dekabrında imtahan sessiyasının keçirilməsi haqqında əmr imzalanıb: "Sessiya imtahanları onlayn qaydada 4 həftə ərzində keçiriləcək. Əslində keçən ilin son semestrindən dərslər onlayn keçirilir. Bu, bütün təhsil sistemi üçün bir çağırışdır. Əsas vacib məsələ bir çox hallarda imtahanların formalarının keçirilməsi idi. Bundan əvvəl imtahanlar daha çox yazılı şəkildə keçirilirdi".

10
Bakıda avtomobil tıxacı, arxiv şəkli

Dünyada yollar, məsafələr qısaldılsa da, Azərbaycanda əksinədir

30
(Yenilənib 22:25 15.01.2021)
Hazırda orta hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib.

Nigar İsgəndərova, Sputnik Azərbaycan

BAKI, 15 yanvar — Sputnik. Bu gün dünyanın bir çox ölkələri məhz yolları, məsafələri qısaltmaq, xüsusən də işçi qrupun rahatlığı üçün müəyyən planlar üzərində çalışırlar. Lakin Azərbaycanda bu müddət azalmaq əvəzinə daha da artırılır. Pandemiyadan öncə getdiyimiz yarım saatlıq yol bu gün 2 saatlıq yola çevrilib. Ümumiyyətlə, pandemiyadan əvvəl də Azərbaycanda bənzər mənzərə müşahidə edilirdi. Bu isə xüsusən gündəlik olaraq işə gedən şəxslər üçün böyük problemə səbəb olur. Yəni, qısa məsafəni hər iki istiqamət üçün qət edən şəxs gününün 4-5, indiki halda isə hətta 6-7 saaatını da yolda keçirmiş olur. Bəs nə etməli?

Öncə dünya ölkələrinin təcrübəsinə nəzər yetirək. Bu gün əksər ölkələrdə artıq şəhərin mərkəzində avtobusların hərəkəti məhdudlaşdırılır. Belə ki, müəyyən məsafədən gələn şəxslər şəhərin mərkəzində avtomobilini park edərək mərkəzdən lazım olan ünvana ya velosiped, ya da ki, ictimai nəqliyyatdan istifadə etməklə çatmış olur. Belə olan halda həm əlavə yanacağa qənaət edilmiş olur, həm havanın çirklənməsinin qarşısı alınır, həm şəhər mrəkəzi sərnişin və piyadalar üçün daha uyğun bir vəziyyətə gəlir, həm də avtomobillərin olmaması səbəbi ilə əlaqədar olaraq tıxaclar yaranmır və beləcə məsafə daha da qısaldılmış olur. 

Sputnik Azərbaycan bu problemlərin həlli barədə nəqliyyat üzrə ekspert Hüseyn Abdullayevlə söhbətləşib. "Azərbaycanda avtobus marşrut xətlərinin planlaşdırılmasında böyük problemlər var. Ümumiyyətlə, heab edirəm ki, Bakının avtobus-marşrut şəbəkəsi yenidən müasir prinsiplərlə qurulmalıdır. Vaxt itkisinə səbəb olan nüanslar aradan qaldırılmalıdır. Avtobuların yollarda gecikməsinin qarşısını almaq üçün müəyyən addımlar atılmalı, ayrıca zolaqlar salınmalı, dəhlizlərdə avtobuslara üstünlük verilməlidir. Bir sözlə ümumilikdə nəqliyyat infrastrukturu ilə bağlı islahatlar aparılmalıdır" - ekspert deyib.

"Magistral avtobus xətlərinin də köməkçi avtobus xətləri olmalıdır. İyerarxiyalı sistemdə mütləqdir ki, bir nəqliyyatdan digər nəqliyyat xəttinə keçid mümkün qədər tez baş versin. Bunun üçün bu marşrutlar hamısı qısa intervalla işləməlidir. Bundan başqa, insanlar böyük məsafələr qət etməməli və hər mübadilə üçün əlavə gediş haqqı ödəməməlidirlər. Lakin qeyd edim ki, Azərbaycanda nəqliyyat sistemində bir pərakəndəlik var, avtobus, metro və dəmiryolu xətti ilə ayrılıqda müəyyən qurumlar məşğul olurlar. Əsas dəhlizlərdə isə avtobuslara üstünlük verilmir", - deyə eskpert bildirir.

Xarici təcrübədən danışdıqda isə, o qeyd edir ki, avtobus marşrutları, həm də digər nəqliyyat növəri arasında konkret iyerarxiya olmalıdır: "Yəni, müəyyənləşir ki, bu xətlərdən hansılar magistral, hansılar köməkçi nəqliyyat yollarıdır. Əsas magistral marşrut xətlərinə sərnişinlərin çıxışını təmin etməkdir", - deyə ekspert əlavə edib.

Millət vəkili Fazil Mustafa isə fərqli fikirdədir. Bu barədə Sputnik Azərbaycan-a danışan millət vəkili belə bir infrastrukturun qurulmasının mümkünsüzlüyündən bəhs edir: "Hazırda yollarda yaranan sıxlıq ilk növbədə metro ilə bağlıdır. Bu səbəbdən əksəriyyət minik avtomobilindən istifadə etmək məcburiyyətində qalır. Məktəblər açılmasa da, şəhərdə fəlakətli səviyyədə tıxaclar var. Pandemiya şəraitində yaranan vəziyyət təbiidir. Çünki avtobuslar da riskli olduğundna insanlar şəxsi avtomobillərə üstünlük verirlər. Bu səbəbdən hələlik çıxış yolu haqda danışmaqda çətinlik çəkirəm. Amma düşünürəm ki, tədricən metronun açılmasını görməliyik. Çünki nəqliyyatda hədsiz yüklənmə var".

Millət vəkili heab edir ki, şəhərin mərkəzinə çatmamış avtomobillərin park edilməsi təcrübəsini Azərbaycanda tətbiq etmək çətin olar: "Düşünürəm ki, bunun heç faydası da olmayacaq. Çünki bizdə normal elektrik qatarı yoxdur. Bu təcrübə yalnız düzgün infrastrukturun qurulduğu şəhərlər üçün keçərlidir. Bizdə isə düzgün infrastruktur qurulmayıb, şəhərsalmanın prinsipləri pozulub. Xaricdə belədir ki, məktəbəqədər yaşda olan uşaqlar üçün xüsusi avtobuslar var. Bizdə məktəbəqədərlər 25 faiz təşkil etsə də, heç bunu da təmin edə bilmirik".

Bir sözlə, hazırda gündəlik hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib. 

Qeyd edək ki, pandemiyadan öncə isə gündəlik olaraq işə gedib-gələn və bir qədər şəhərin mərkəzindən kənarda qalan şəxslər 4 saatını yola sərf edirlər. Yəni, aylıq olaraq bu 80 saat, illik olaraq isə 960 saatdır.

Hələlik isə ümid təkcə metronun açılmasına qalır...

30
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0