Bərdənin Əliyanlı kəndindən rayon mərkəzinə gedən yol

Kənd sakinləri qızınmaq üçün bağdakı ağacları kəsir

7159
(Yenilənib 15:04 26.01.2019)
Əliyanlılılar mavi qaza görə vaxtlı-vaxtında ödəniş etsələr də, qazın alovuna isinə bilmirlər

Musa Muradlı, Sputnik Azərbaycan

BAKI, 26 yanvar — Sputnik. Bərdə rayonunun Əliyanlı kənd sakinləri qışın oğlan çağında mavi qazın yoxluğuna görə çətin duruma düşüblər. Sputnik Azərbaycan-ın bölgə müxbiri Əliyanlı kəndində olarkən yaranmış çətinliyi özü müşahidə edib. Belə ki, evlərə mavi qazın çəkilişi həyata keçirilsə də, qaz normal təzyiqdə verilmir. Əliyanlılılar çıxış yolu kimi odun yandırmağa məcbur olublar.

Kənd sakini Yasin Gülməmmədov problemlə bağlı dəfələrlə qaz idarəsinə müraciət etdiklərini deyib: "Bildirmişik ki, təzyiq zəifdir. Gəlin, səbəbini aydınlaşdırın. Niyə zəifdir? Ancaq nə gələn, nə də cavab verən olub. Şikayətimizə baxan yoxdur. Evdə xəstəmiz, körpə uşağımız var. Özüm hazırda xəstəyəm. Evimiz buz kimidir".

"Evlərə baş çəkib baxa da bilərsiniz. Görərsiniz ki, necə acınacaqlı şəraitdəyik. Ancaq gecələr saat 12-dən sonra mavi qazın təzyiqi artır ki, onda da heç kimə lazım olmur" - deyə o əlavə edib .

Digər kənd sakini Vüqar Məmmədov da yaranmış durumdan gileylənib: "Evimizi isidə bilmirik. Yandırdığımız qaz çaydanı çətinliklə qızdırır. Bir çox sakinlərin evində vəziyyət belədir. Dəfələrlə qaz idarəsinə, "Azəriqaz"ın qaynar xəttinə müraciət etsək də, laqeyd münasibətlə üzləşmişik".

Əliyanlılılar mavi qaza görə vaxtlı-vaxtında ödəniş etsələr də, qazın alovuna isinə bilmirlər. Kənd sakini Sadiq Gülməmmədovun həyətində elektrik mişarı ilə doğranmış odun, çır-çırpı qalaqlanıb. İndi onlar sobanı mavi qazla deyil, odun və çırpıyla qızdırmağa məcbur olublar.

Kənd sakinlərinin probleminə işıq tutmaq məqsədilə Tərtər Regional Qaz İdarəsinin Bərdə rayon bölməsinin Qaz Qəza Xidmətinin rəisi Bəxtiyar Aslanovla əlaqə saxladıq. O, əliyanlılıların qazla bağlı problemlərindən məlumatsız olduğunu bildirdi. Ümumiyyətlə, həmin ərazidə qazın təzyiqi barədə deyilənləri inkar etdi. Ancaq əraziyə mütəxəssislərin ezam olunması, faktın araşdırılması, problemin mövcudluğu təsdiq olunarsa, tədbir görülməsi barədə göstəriş verəcəyini də qeyd etdi.

Sonra bizə məlumat verildi ki, günün sonunda əraziyə mütəxəssis göndərilib. Lakin kənd sakinlərinin qazın evlərə verilişi ilə bağlı hər hansı bir narazılığının olmadığı məlum olub.

Aldığımız məlumatdan sonra yenidən Əliyanlı kənd sakini Yasin Gülməmmədovla əlaqə saxladıq. O bildirdi ki, idarənin əməkdaşları həqiqətən də kənddə olublar. Lakin küçənin başlanğıcında yaşayan sakinlərlə görüşüblər. Y.Gülməmmədov onu da əlavə etdi ki, 1-ci, 2-ci küçələrdə qaz yaxşı yanır, lakin 3-cü və onların yaşadığı 4-cü küçədə mavi yanacaq evləri isitmə gücündə deyil.

Ümid edirik ki, ən azından, uşaqların, qocaların xəstələnməməsi üçün Tərtər Regional Qaz İdarəsinin Bərdə rayon bölməsində əliyanlılıların şikayətinə baxılacaq.

7159
İlham Əliyev, arxiv şəkli

Dövlət başçısı: Hər gün bayrağımız yeni bir yaşayış məntəqəsində ucaldılır

4
Ölkə başçısı Azərbaycan vətəndaşlarının bu gün işğaldan azad edilmiş bütün torpaqlara qayıdacağına əmin olduğunu vurğulayıb.

BAKI, 21 oktyabr — Sputnik. "Öz doğma torpaqlarını görməyən, işğaldan sonra dünyaya göz açan hər bir azərbaycanlı həmin torpaqlara qayıtmaq arzusu ilə yaşayıb".

Sputnik Azərbaycan xəbər verir ki, bu barədə Azərbaycan Prezidenti İlham Əliyev öz "Twitter" hesabında yazıb.

Ölkə başçısı Azərbaycan vətəndaşlarının bu gün işğaldan azad edilmiş bütün torpaqlara qayıdacağına əmin olduğunu vurğulayıb.

"Hər gün bayrağımız yeni bir yaşayış məntəqəsində ucaldılır. Budur Azərbaycan dövlətinin, Azərbaycan xalqının gücü", - deyə o əlavə edib.

4
Mövzu:
Azərbaycan və Ermənistan arasında müharibə
Bakıda yağışlı hava

Sabaha hava proqnozu açıqlandı

6
Tibbi-meteoroloji proqnoza gəldikdə isə, oktyabrın 22-23-də Abşeron yarımadasında meteoroloji amillərin mülayim tərəddüdü meteohəssas insanlar üçün əsasən əlverişlidir.

BAKI, 21 oktyabr — Sputnik. Sabah Bakıda və Abşeron yarımadasında havanın dəyişkən buludlu olacağı, arabir tutulacağı, günün birinci yarısında bəzi yerlərdə duman olacağı, çiskinli yağış yağacağı gözlənilir. Mülayim cənub küləyi əsəcək.

Sputnik Azərbaycan Milli Hidrometeorologiya Xidmətinin verdiyi məlumata istinadla xəbər verir ki, havanın temperaturu Bakıda və Abşeron yarımadasında gecə 12-14, gündüz 18-20 dərəcə isti olacaq. Atmosfer təzyiqi normadan yüksək 771 mm civə sütunundan 767 mm civə sütununa enəcək, nisbi rütubət gecə 70-80, gündüz 55-60 faiz təşkil edəcək.

Oktyabrın 22-də Azərbaycanın rayonlarında hava şəraitinin əsasən yağmursuz keçəcəyi, lakin gecə və səhər bəzi yerlərdə duman olacağı, yağış yağacağı gözlənilir. Mülayim şərq küləyi əsəcək. Havanın temperaturu gecə 10-15, gündüz 18-23, dağlarda gecə 3-7, gündüz 14-18 dərəcə isti olacaq.

Tibbi-meteoroloji proqnoza gəldikdə isə, oktyabrın 22-23-də Abşeron yarımadasında meteoroloji amillərin mülayim tərəddüdü meteohəssas insanlar üçün əsasən əlverişlidir.

6