Sumqayıt-Bakı yolunda tıxac

Bakı-Sumqayıt yolu yenidən gözlənilmədən təmirə bağlanıb

7232
(Yenilənib 15:58 17.01.2019)
"Alternativi olmayan yollarda təmir aparan zaman zərurət yoxdursa pik saatlarda işləmək olmaz"

Təranə Xudabaxşiyeva, Sputnik Azərbaycan

BAKI, 17 yanvar — Sputnik. Bakı-Sumqayıt yolu sürücülərin hər zaman narazılıq etdiyi, tıxacların səngimək bilmədiyi bir magistrala çevrilib. Demək olar ki, hər gün müxtəlif səbəblərdən bu yolda güclü tıxac müşahidə olunur.

Səbəblərdən biri də Azərbaycan Avtomobil Yolları Dövlət Agentliyinin (AAYDA) iki gündən bir Bakı-Sumqayıt yolunda təmir işi aparmasıdır. Üstəlik, təmir işləri günün pik saatlarında həyata keçirilir. Bu da yolda yaranmış tıxacın saatlarla davam etməsinə səbəb olur.

Dünən də axşam saat 17.00-dan sonra, yəni hərəkətin gur vaxtında Bakı-Sumqayıt yolunda sürücülər tıxacda qalıblar. Səbəb isə Bakı-Sumqayıt yolunun Abşeron Gənclər Şəhərciyindən bir neçə yüz metr üzü Bakıya tərəf olan hissəsində yolun təmirə bağlanması olub.

Həmin vaxt tıxacda qalmış sürücülər Sputnik Azərbaycan-a şikayət məktubu göndəriblər. Onlar iddia edirlər ki, yolun təmiri üçün heç bir ciddi zərurət, daha doğrusu, məhz pik saatlarda təcili müdaxiləyə ehtiyac olmadığı halda, xəbərdarlıqsız-filansız yol təmirə bağlanıb. Yəni yolda yamaq işləri görülüb ki, bunu da nədənsə şənbə-bazar günlərinə, yaxud hərəkətin nisbətən az olduğu gündüz saatlarında deyil, məhz pik saatlarda həyata keçirməyə qərar veriblər.

Sputnik Azərbaycan-ın əməkdaşı sürücülərin narazılığına aydınlıq gətirmək üçün Azərbaycan Avtomobil Yolları Dövlət Agentliyinin (AAYDA) mətbuat xidmətinin rəhbəri Anar Nəcəfli ilə əlaqə saxlayıb. Qurumun sözçüsü bildirib ki, AAYDA tərəfindən təmir işləri hava şəraitindən, bayram və həftə sonlarından, eyni zamanda günün pik saatlarından asılı olmayaraq, həyata keçirilir.

"Dünən də pik saatda apardığımız təmir işləri normaldır. Zəruri işlər olanda biz pik saatlarda belə, işləmək məcburiyyətindəyik. Amma çalışırıq zərurət olmadıqda, belə təmirləri bir az gecikdirək. Dünən də təmir zəruri olduğundan təxirə salmaq mümkün deyildi" - deyə Nəcəfli qeyd edib.

Şikayətlə bağlı nəqliyyat məsələləri üzrə ekspert Azər Allahverənovun da fikirlərini öyrəndik. Onun sözlərinə görə, yollarda təmir aparılan zaman bir neçə qurum birlikdə işləməlidir: "Xüsusilə pik saatlarda hansısa bir yerdə təmir işi gedirsə, Dövlət Yol Polisi sürücülərin alternativ yollardan istifadə etməsinə şərait yaratmalıdır. Eyni zamanda, tıxacın yaranmaması üçün nəzarət etməlidir".

"Yolda təmir işlərinin həyata keçirilməsi üçün həm də optimal vaxt seçilməli dir. Hətta çıxılmaz vəziyyət yarandıqda belə, təmir işlərinin yerinə yetirilməsi əlaqələndirilmiş şəkildə icra olunmalıdır. Zərurət yaranmadıqca, alternativi olmayan yollarda günün pik saatlarında təmir işləri aparmaq olmaz" - deyə ekspert əlavə etdi.

7232
Teqlər:
tıxac, sürücü, saat, təmir, Bakı-Salyan yolu
Əlaqədar
Bakı-Sumqayıt yolunda müdhiş qəza, çoxlu sayda yaralı var
Bakı-Sumqayıt-Bakı qatarının hərəkəti ləğv edilir
Bakı-Sumqayıt yolunda ölümlə nəticələnən qəza baş verib — VİDEO

Təhsil naziri: "Öyrənmə motivasiya arasında çox böyük əlaqə var"

8
Emin Əmrullayev: "Mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır".

BAKI, 22 yanvar - Sputnik. Təhsil naziri Emin Əmrullayev pandemiya ilə əlaqədar şagirdlərin dərslərində bəzi geriləmələrin olması ilə bağlı səsləndirilən fikirlərə münasibət bildirib.

Xəzər Televiziyasında yayımlanan “Vaxt gəldi” proqramında nazir övladlarından birinin 1-ci sinfə getdiyini, digərinin isə məktəbəqədər yaşda olduğunu deyib. O, distant təhsilin problemlərindən bəhs edərkən deyib:  

“Distant təhsil və teledərslər öz-özlüyündə izləmə baxımından maraqlı prosesdir. Eyni zamanda bu, çox çağırışlı məsələdir, o mənada ki, problemlidir. Belə ki, avadanlıqdan istifadə və ya müxtəlif problemlər meydana çıxır. Misal olaraq, hava soyuq olanda işıqlar sönə bilər. Bunu uşağa izah etmək məsələsi var. Odur ki, mövcud problemlərin şagirdin biliyində geriləmə və ya irəliləməyə səbəb olması ilə bağlı müəyyən ölçmələr aparmaq lazımdır”.

Nazir ibtidai siniflərdə şagirdlərin sosial-psixoloji, sosial-emosional inkişafına fokuslaşmalı olduğumuzu da qeyd edib:

“Biz emosiyalara və ya hansısa gümanlara yox, faktlara, ölçmələrə, elmə inanmalıyıq. Hazırda bununla bağlı planlar var və bunlardan biri də şagirdlərin biliyinin qiymətləndirilməsinin aparılmasıdır. Təbii, şagirdlər də dərsə qayıtmalıdır ki, biz bunu edə bilək. Yaxud başqa formatlar da düşünə bilərik. İnandığım budur ki, fokuslanmalı olduğumuz məsələ, xüsusilə də ibtidai sinifdə şagirdlərin sosial-psixoloji, sosial-emosional inkişafıdır. Mənə görə məktəb insanın sosial emosional inkişafını irəli aparan yer olmalıdır. Çünki öyrənmə və motivasiya arasında çox böyük əlaqə var”.

8
Teqlər:
Azərbaycanın təhsil naziri, təhsil naziri, Emin Əmrullayev

Təhsil naziri şikayətləndi: Fikirlərim təhrif edilib, elə demək istəmirdim

59
(Yenilənib 23:16 22.01.2021)
Emin Əmrullayev: "Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir".

BAKI, 22 yanvar - Sputnik. "Öyrənmək məqsədli olmalıdır. Əgər valideyn övladı üçün hansısa öyrənmək imkanı yaratmaq istəyirsə, öyrənmənin məqsədlərini izah etməlidir. Bu həmçinin müəllim üçün də önəmlidir".

Sputnik Azərbaycan xəbər verir ki, bunu Təhsil naziri Emin Əmrullayev Xəzər Televiziyasında yayımlanan “Vaxt gəldi” proqramında çıxışı zamanı deyib.

Nazir bildirib ki, tədris prosesin məqsədi öyrənən adama məlum deyilsə, onun motivasiyası yoxdursa, yəqin ki, öyrənmə baş vermir:

"Məqsədli öyrənmə ilə bağlı mətbuatda təhrif olunan fikirləri o mənada demişdim ki, valideyn övladını bir neçə yerə hazırlığa göndərir, amma bunun məqsədi barədə övladı ilə çox az söhbət edir. Uşaq da başa düşmür ki, hazırlığa və ya məktəbə nə üçün gedir. O, bunun niyəsini başa düşmürsə, ehtimal ki, öyrənmənin keyfiyyəti aşağı düşür".

"Mən bunu demək istəyirdim. Təəssüf, fikrim elə təqdim edildi ki, guya öyrənmək olmaz demişəm. Demək istədiyim odur ki, məqsədli öyrənmək başqa şeydir”, - deyə nazir əlavə edib.

59
Teqlər:
Emin Əmrullayev, Azərbaycanın təhsil naziri, təhsil naziri

Yanvarın 25-nə qədər ölkədə ictimai nəqliyyat işləməyəcək

0
(Yenilənib 00:11 23.01.2021)
Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

BAKI, 23 yanvar - Sputnik. Bu gündən yanvarın 25-i saat 06:00-dək bütün ölkə ərazisində ictimai nəqliyyatın fəaliyyəti dayandırılıb.

Sputnik Azərbaycan-ın məlumatına görə, Nazirlər Kabineti yanında Operativ Qərargahın qərarına əsasən, bütün ölkə ərazisində şənbə və bazar günləri ictimai nəqliyyatın fəaliyyəti dayandırılır.

Bununla əlaqədar 23 yanvar saat 00:00-dan 25 yanvar saat 06:00-dək ölkə ərazisində ictimai nəqliyyat fəaliyyət göstərməyəcək.

Qeyd edək ki, Bakı metropolitenində də sərnişindaşıma dayandırılıb.

0