Bakı şəhəri

Yaxşı ki, Abşeron yarımadası çökmədi...

17750
(Yenilənib 15:56 06.01.2019)
Onsuz da necə olacağı əvvəlcədən bəllidir, heç olmasa ümid verməyin

BAKI, 7 yanvar — Sputnik. Sanki, bəzi qurumlar məzələnirlər camaatla və bundan həzz alırlar. Ya da nə bilim, deyib, arxasında dura bilmirlər. Və bu proses hər gün, hər ay, hər il təkrarlanır.

Biri burdan qalxıb deyir ki, "bayram günlərində əhaliyə fasiləsiz elektrik enerjisinin verilməsi üçün bütün imkanlar səfərbər olunub, vətəndaşların ürəyi rahat olsun, bir dəqiqə belə, işığınız sönməyəcək". Gəlir, elə dekabrın 31-i axşam işıqlar sönür. Ya zəlzələdən, ya vəlvələdən.

O biri tam məsuliyyəti ilə bəyan edir ki, "qarşıda bizi heç bir qiymət artımı gözləmir, boşuna həyacanlanmayın". Sözü ağzında qalmışın söz ağzından çıxmamış, dükan-bazarda muştuluq paylanılır: Gözünüz aydın, filan şey bu qədər, bəsmən şey o qədər, digəri 10 faiz, qalanları da 15 faiz bahalaşıb.

Sürət qatarı "icad" edirik. Əvvəlcədən bütün ictimaiyyətə boy-boy xəbər paylaşırıq. Hələ bərk-bərk tapşırırıq ki, ildırım sürətinə hazır olun, özünüzlə ürəkbulanmasına, başgicəllənməsinə qarşı preparatlar götürün. Üstəlik bir yığın jurnalisti də yığırıq o qatara ki, Bakıdan Gəncəyə və əksinə hansı sürətlə gedib-gələcəyimizə özünüz şahid olun.

... və gözləyənlərin gözünün kökü saralır ki, "a balam, bunlar harda qaldı". Elə bir sürətlə iki şəhər arasında gediş-gəliş edirik ki, sovet hökumətinin köhnə "Moskviç"i ondan bir xeyli tez gedib-gələrdi. Bu azmış kimi, həmin sürətlə də yolda xarab olub qalır qatarımız. Sürət qatarımız. Əvvəlcədən hamını sürətə səslədiyimiz texnika.

Bu tərəfdən də bir neçə sanballı qurum birləşib dəli yadına daş salır: "Paytaxtda insanların sağlamlığına zərər yetirən, ictimai asayişin pozulmasına səbəb olan və əhalinin istirahətinə maneə yaradan partlayıcı və tezalışan maddələrin, pirotexniki məmulatların satışının və istifadəsinin qarşısının alınması istiqamətində qabaqlayıcı-profilaktik tədbirlər keçirilib. Aşkarlanan faktlar üzrə tədbirlər görülüb və görülməkdə davam edir".

Bakı-Gəncə sürət qatarı
© Azerbaijan Railways CJSC

Yəni ki, "Ölkəyə "zırpaket" gətirəni də, satanı da, onu alıb partladanı da... cəzalandırarıq. Heç kim belə bir qanunsuzluğa cəhddə bulanmasın".

Gözünə dönüm sənin Bakı, bu ilki bayram günlərini heç vaxt yaşamadığın kimi yaşadın. Elə bil, səngərdəki əsgərlərimizə həmrəylik nümayiş etdirirdik. O partıltı-gurtultudan, hər yanı ağuşuna alan partlayış səslərindən, yaxşı ki, Abşeron yarımadası çökmədi. Hələ ölkəyə indiyədək belə güclü səslərə malik partlayıcı maddələr gətirilməmişdi...

A başınıza dönüm, bu mərətə qalmış ümidi verməyin də bizə. Buraxın, ölək də öldüyümüz yerdə. Hər şey gözlənilmədən baş versin. Onsuz da hamı bilir ki, işıq sönəcək, qiymət qalxacaq, hara qədər sürət yığa bilərik, "zırpaket" gələcək də, satılacaq da, alınacaq da, partladılacaq da...

Niyə edirsiniz, axı belə? Yetimə kökə çatmayacağı zatən bəllidir, bari göstərib geri çəkməyin, etməyin-eləməyin, Allahınıza qurban olum!

17750
Teqlər:
camaat, işıq, qiymət, qatar, sürət, partlayıcı maddə, bayram
Əlaqədar
Bakı-Gəncə qatarı yolda qaldı
Mingəçevirdə əlində fişəng partlayan yeniyetmə Bakıya göndərilib
Abşeronda qəza: Böyük bir ərazi işıqsız qaldı
Səmra Rəhimli

Səmra açıq-saçıq klipi fotossesiyası ilə gündəmi zəbt edib - VİDEO/FOTO

2
(Yenilənib 15:42 02.03.2021)
"Hərdən mənə elə gəlir ki, əvvəl səhifəm dini səhifə və izləyicilərim isə dindarlar olub. Dini məsləhətlər vermişəm, bu gün də qəfil artist olmağa qərar vermişəm, izləyicilərim çaş-baş qalıblar" - Səmra Rəhimli

BAKI, 2 mart — Sputnik. Müğənni Səmra Rəhimli "Göz" adlı yeni klipini təqdim edib. Sputnik Azərbaycan xəbər verir ki, layihənin rəhbəri və rejissoru sənətçinin anası İlahə Baxşıyevadır. "Youtube" video hostinqində və "instagram" hesabında paylaşılan klip açıq-saçıq görüntülərinə görə müzakirə olunub. S.Rəhimli isə müzakirələrə səbəb olan klipi haqda bu sözləri yazıb:

Посмотреть эту публикацию в Instagram

Публикация от QUEEN SAMRA (@samraeurovision)

"Hərdən mənə elə gəlir ki, əvvəl səhifəm dini səhifə və izləyicilərim isə dindarlar olub. Dini məsləhətlər vermişəm, bu gün də qəfil artist olmağa qərar vermişəm, izləyicilərim çaş-baş qalıblar".

Посмотреть эту публикацию в Instagram

Публикация от QUEEN SAMRA (@samraeurovision)

Qeyd edək ki, mahnının söz və musiqisi Clavisə məxsusdur. Müğənni bundan başqa, fərqli fotosessiyası ilə hər kəsi təəccübləndirib.

2
Teqlər:
video, Səmra Rəhimli, klip
Bakıda avtobus dayanacağı, arxiv şəkli

Bakıda dayanacaq quraşdırıb, ad qoydular - VİDEO

8
Layihəyə əsasən, paytaxt ərazisindəki dayanacaq məntəqələrinin hər birinə individual olaraq adlar veriləcək

BAKI, 2 mart — Sputnik. Bakı şəhərində bio-smart avtobus dayanacaq pavilyonlarının quraşdırılmasına başlanılıb. Sputnik Azərbaycan-ın məlumatına görə, ilk belə dayanacaq pavilyonu Heydər Əliyev Mərkəzinin yaxınlığında quraşdırılıb. Ərazinin memarlıq üslubu ilə həmahəng olan pavilyon Heydər Əliyev prospektində, şəhər mərkəzi istiqamətində yerləşir. Bu dayanacaqdan 1, 2 və 13 nömrəli müntəzəm marşrut xətti üzrə avtobuslar keçir. Sərnişin axını baxımından əsas cəlbetmə məntəqələrindən hesab olunur.

Tamamilə yerli istehsal olan bio-smart avtobus dayanacaq pavilyonunun bir çox üstünlükləri var. Pavilyon günəş enerjisi ilə çalışır. Burada dezinfeksiya duşu quraşdırılıb ki, bunun sayəsində də müəyyən olunan vaxt aralığında avtomat rejimdə dərman məhlulu səpilir. Mobil qurğular üçün enerji portlarının olduğu pavilyonda "BakıKart" ödəmə terminalı da var. Bio-smart avtobus dayanacaq pavilyonunun quraşdırılması ilə digər bir layihənin də icrasına start verilib. Layihəyə əsasən, paytaxt ərazisindəki dayanacaq məntəqələrinin hər birinə individual olaraq adlar veriləcək. Adlar əsasən dayanacaq məntəqəsinin yerləşdiyi məkana, həmin məkanda olan mədəni-tarixi və digər əsas obyektlərə uyğun olaraq müəyyən ediləcək. Bu mənada ilk bio-smart pavilyon "Heydər Əliyev Mərkəzi" dayanacağı adlandırılıb.

8
Teqlər:
dayanacaq