Küsmüş uşaq

Məhkəmə icraçısının sahə müvəkkilinə telefon zəngi münaqişəyə səbəb olub

6334
(Yenilənib 16:14 10.12.2018)
Ceyranbatan məktəbinin 1-ci sinif şagirdi atasının ucbatından stress yaşayır

BAKI, 10 dekabr — Sputnik. Abşeron rayonunun Ceyranbatan qəsəbəsində arvadından boşanmış kişi altı yaşlı qızını məktəbin binasında görmək istəyib. Nəticədə uşağın psixoloji vəziyyətinə şiddətli təsir göstərən münaqişə baş verib. Bu barədə Sputnik Azərbaycan-a məktəblinin anası, 1977-ci il təvəllüdlü Ceyranbatan sakini Elmira Ağayeva məlumat verib.

Ağayevanın sözlərinə görə, o, Əsədov Ramil Bəhlul oğlu ilə 10 il birgə yaşayıb. Bu nikahdan onların bir oğlu və bir qızı doğulub.

"Mən nikahda olduğum bütün bu illər ərzində xoşbəxt deyildim, amma dözürdüm, boşanmırdım. Düşünürdüm ki, əgər boşansam, camaat nə deyər?! Amma bütün bu illər ərzində atamın evində yaşayırdım. 2013-cü ildə Ramili Sankt-Peterburqda qrup şəklində soyğunçuluq törətmək faktı üzrə həbs etdilər. Ondan sonra mən rəsmən boşandım. Qızım onda 1 yaş 2 aylıq idi, oğlum isə ondan böyükdür. Onun valideynlərindən heç kim mənə kömək etmədi və o, boşanmanın əleyhinə olmadı" - Ağayeva deyir.

Bir ildən sonra Əsədov həbsdən azad edilib və keçmiş arvadı ilə uşaqlarının yanına qayıdıb. Ağayevanın sözlərinə görə, əri ona deyib ki, boşanmalarına baxmayaraq, onu xoşbəxt olmağa qoymayacaq. 2014-cü ildə Əsədov oğlunu məktəbdən oğurlayaraq özü ilə aparıb. Həmin vaxt oğlanın hələ 10 yaşı yox imiş.

"Mən onda hələ rayonda yaşayırdım. Onların evlərinə getdim, polisə şikayət etdim, oğlumu qaytarmağa cəhd göstərdim, amma heç kəs mənə qulaq asmadı. Qanuna görə, onlar uşağın 10 yaşının tamam olmasını gözləməli idilər ki, uşaq kimin yanında - anası, yoxsa atası ilə qalmaq istədiyini seçsin. Rayon İcra Hakimiyyəti Başçısı yanında Qəyyumluq və Himayəçilik Komissiyası iki dəfə ekspertiza təyin edib. Nəticədə uşağın atası və onun qohumları oğlana psixoloji təzyiq göstəriblər. Lakin üç ay keçəndən sonra məhkəmə bu əhəmiyyətli məqamları nəzərə almadan, atanın xeyrinə qərar çıxardı" - Ağayeva bildirib.

Sonra Əsədov və onun anası Beyləqan Rayon Məhkəməsinə müraciət edərək qızı görmək istədiklərini bildiriblər. 27 dekabr 2017-ci il tarixində məhkəmə atanın qızını şənbə günləri saat 11:00-dan 16:00-dək görməsinə icazə verilməsinə dair qərar çıxarıb.

Lakin Əsədov məhkəmənin qərarına baxmayaraq, qızını həftənin cümə günləri görmək istəyib. Bunun üçün o, qızın anasından xəbərsiz məktəbə gedib. Məktəbin dərs hissə müdiri və müəllimi isə, birinci sinif şagirdinin əvvəllər heç vaxt görmədikləri kişi ilə təklikdə qalmasına icazə verməyiblər. Ağayeva məktəbin işçilərinə xəbərdarlıq edib ki, onlar dərsdən sonra uşağı ondan başqa heç kəsə verməsinlər. Bundan qəzəblənən Əsədov məktəbdə hay-küy salıb. İşə polis sahə müvəkkili Nəcəf Heydərov qarışmalı olub.

Nəcəf Heydərov isə öz növbəsində Sputnik Azərbaycan-a bildirib ki, ata ilə uşağın görüşü sahə müvəkkilinin yanında baş tutub. Onun sözlərinə görə, Beyləqan rayon məhkəmə qərarlarının icraçısı zəng edərək deyib ki, məhkəmənin qərarına görə, Əsədov qızı ilə görüşmək hüququna malikdir. Lakin görüşmə mexanizmi barədə məhkəmə qərarında heç nə qeyd edilməyib.

"Sonra məhkəmə qərarlarının icrasına nəzarət şöbəsinin əməkdaşları mənimlə əlaqə yaradaraq, məsələyə qanuni izahat verdilər. Qanuna görə, əgər valideyn könüllü şəkildə məhkəmənin qərarına məhəl qoymaq istəmirsə, onda qərarın icrası məhkəmə icraçılarının iştirakı ilə ərazidə həyata keçirilir. Yalnız məhkəmə icraçısı məhkəmə qərarını icra etmək hüququna malikdir" - deyə sahə müvəkkili bildirib.

Ramil Əsədov özü isə Sputnik Azərbaycan-a bildirib ki, dörd il qızını görməyib və məhkəmə qərarının icra olunacağını gözləməkdən yorulub. Dediyinə görə, onun uşağını görməyə tamamilə haqqı çatır.

Bununla yanaşı, Əsədov deyib ki, qızının ögey atanın yanında yaşadığı fikri onun ürəyini parçalayır: "Mən arvadımı bura evimə gətirə bilmərəm, o, artıq özünə ər tapıb. Mən bunu qəbul edə bilmirəm. Bu yad kişidir, ondan nə desən, gözləmək olar".

İşin materialları ilə tanış olan məşhur hüquqşünas Həsən Həsənov Sputnik Azərbaycan-a bildirib ki, uşaqların taleyi ilə bağlı olan məhkəmə qərarlarını icra etmək çox çətindir: "Bu proses onun iştirakçısı olanların psixoloji aspektləri ilə sıx əlaqədardır və bu, mütləq nəzərə alınmalıdır. Nəticədə, bir-birinə qarşı nifrət, xəyal qırıqlığı, hiddət hiss edən boşanmış valideynlərin münasibətləri uşaqlara da yansıyır. Uşaqların bu səbəblərə görə əziyyət çəkməsinə icazə verilməməlidir. Ona görə də bu məsələdə qanunun hər bir hərfinə riayət etmək lazımdır".

"Lakin burada qanun pozuntusu onunla əlaqədardır ki, əvvəla, Beyləqan rayon icra orqanından müvafiq orqana rəsmi bildiriş daxil olmalı idi. Burada isə sadəcə bir telefon zəngi nəticəsində polis işə müdaxilə edib ki, onun da məhkəmə qərarının məzmunu barədə heç bir fikri olmayıb. Bir polis əməkdaşının məhkəmə qərarının icrasına müdaxiləsi yolverilməzdir" - Həsənov deyib.

Hüquqşünas əlavə edib ki, Ağayeva bu ilin mayında apellyasiya instansiyasına Beyləqan Rayon Məhkəməsinin qızının atası ilə görüşməyə icazə verən qərarından şikayət ünvanlayıb: "Şikayət ünvanlanan vaxt vətəndaşın birinci instansiya məhkəməsinin qərarından apellyasiya şikayəti vermək üçün müəyyən edilmiş müddət keçməyib. Rayon məhkəməsi Apellyasiya Məhkəməsinə şikayət etməsi üçün Ağayevaya çıxardığı qərarın surətini təqdim edib. Lakin sonradan məlum olub ki, bu, prosedur səhvdir. Qərarı Apellyasiya Məhkəməsinə sorğu əsasında Beyləqan Məhkəməsi göndərməlidir".

"Lakin bu günə qədər Beyləqan məhkəməsi bunu etməyib. Üstəlik, nə qədər ki, birinci instansiya məhkəməsinin qərarından digər məhkəməyə şikayət ünvanlanıb, ikinci məhkəmə müvafiq qərar çıxarmayana qədər, birinci məhkəmənin hökmü icra edilə bilməz. Bu səbəbdən də Beyləqan məhkəmə qərarlarının icraçıları hələlik ata ilə qızın görüşdürülməsi barədə hökmün icrasını təxirə salmalı idi. Odur ki, məhkəmə icraçısının Əsədovu 6 yaşlı qızı ilə görüşdürmək istiqamətindəki bütün hərəkətləri qanunsuz sayılır" - Həsənov vurğulayıb.

6334
Teqlər:
Sputnik Azərbaycan, məktəb, Beyləqan, icra, qərar, məhkəmə, Boşanma, ailə, arvad, ər, qadın, kişi, övlad, ata, ana
Əlaqədar
Azərbaycanda uşaq yaşda ölüm sayı yüksəkdir
Dəmirə bağlanan iki uşaq xilas edildi - VİDEO
BŞİH-də uşaq bağçaları ilə bağlı müşavirə keçirilib
Azərbaycanda 4 yaşlı uşaqda nadir xəstəlik aşkarlanıb
Azərbaycanda uşaqlarla bağlı çox pis rəqəm açıqlandı
Azərbaycan manatı, arxiv şəkli

Pensiya kapitalı ədalət - qalaqlanan problemlər üçün çözüm təklifi

16
(Yenilənib 17:59 26.11.2020)
"Bəzi hallarda vətəndaş uzun müddət çalışır, lakin ya o, pensiya yaşına çatmır, ya da pensiya yaşına çatdıqdan müəyyən müddət sonra dünyasını dəyişir", - Vüqar Bayramov

Nigar İsgəndərova, Sputnik Azərbaycan

BAKI, 26 noyabr — Sputnik. Dünyanın ən yaxşı pensiya sisteminə malik olan 39 ölkəsinin adları açıqlanıb. "Mercer CFA" institutunun "Global Pension Index 2020" hesabatına görə, 2020-ci ildə dünyanın ən yaxşı pensiya sisteminə malik ölkəsi Niderland olub. Bu ölkənin indeksi ötən illə müqayisədə 81-dən 82,6-a yüksəlib. İkinci yerdə qərarlaşan Danimarkanın isə builki indeksi 80,3-dən 81,4 bəndə qədər yüksəlib. Siyahının üçüncü yerinə isə İsrail (74,2 bənd) layiq görülüb.

Hazırda Niderlandda pensiya yaşı 66-dır. 2024-cü ilədək ölkədə pensiya yaşının aylıq artım dinamikası dondurulur. Yalnız 2024-cü ildə ölkədə pensiya yaşı 67 olacaq və bundan sonra hər il bu müddət daha öncəki müddətlə müqayisədə çox cüzi olaraq artmaqda davam edəcək. Digər ölkələrlə müqayisədə Niderlandda pensionerlər daha firavan həyat yaşayırlar ki, bunun da səbəbi ölkədəki qanunlardır.

Ölkədə yaşlılığa görə verilən pensiya olan AOW-dan yararlanmaq üçün şəxslərin Niderlandda çalışdığı hər il üçün 2 faiz illik AOW vəsaiti toplanmalıdır. Məsələn, şəxs pensiya yaşına çatdıqda sadəcə olaraq 40 ildir ki, Niderlandda yaşamış olarsa, bu zaman AOW vəsaitinin 80 faizini əldə etmiş olacaq.

Bundan başqa, ölkə qanunları ağır işdə çalışanlara daha tez pensiyaya çıxmaq hüququnu verir. Bununla yanaşı, istəyən hər kəs 3 il daha tez yaşlılıq pensiyasına çıxa bilmək hüququna malik olur.

Pensiya sisteminə görə 39 ölkə arasında ikinci olan Danimarkada isə bu yaş həddinin aşağı endirilməsi müzakirə edilir.

Ölkənin Baş naziri Mette Frederiksen pensiya yaşının 65-dən 61-ə endirilməsi üçün təkliflərin verildiyini də vurğulayıb:

"Danimarka vətəndaşları hər gün işləmək, pul qazanmaq üçün səhər tezdən oyanır, ağrı və acı ilə işə gedirlər. Bəlkə də belləri, dizləri, çiyinləri ağrıyır, bəlkə də çox acı çəkirlər. Bu səbəbdən biz uzun illərdir çalışanlar, çalışdığı müddətdə vergilərini ödəyən və ağır işə cəlb olunanlar üçün təkliflər vermişik. Yeni qanun layihəsinə görə, 42-44 il çalışanlar 1-4 il daha tez pensiyaya çıxa biləcəklər. 2022-ci ildə 38 min şəxs bundan yararlana biləcək".

Qeyd edək ki, qarşıdakı 10 il ərzində Danimarkada pensiya yaşının 68 olacağı planlaşdırılır.

Son illərdə Azərbaycanda da pensiya sisteminin təkmilləşdirilməsi istiqamətində müxtəlif işlər görülüb. Lakin bununla belə, bəzi problemlər hələ də həllini tapmamış qalır. Bəs Azərbaycanda pensiya sistemində hansı qalaqlanmış problemlər həllini gözləyir?

Saxla samanı... Kartda olan pulları necə artırmalı?>>

Millət vəkili Vüqar Bayramov Sputnik Azərbaycan-a açıqlamasında bu haqda danışıb: "Son illər Azərbaycanda pensiya sistemində bir sıra islahatlar aparılıb. Xüsusən də 2018-ci ildən pensiya sisteminin təkmilləşdirilməsi müşahidə olunub. Biz mütəmadi olaraq pensiya islahatlarının davamlı olması və pensiya sisteminin daha da təkmilləşdirilməsi üçün təkliflərimizi təqdim edirik. Qiymətləndirmələr onu göstərir ki, indiki halda həm pensiya kapitalı ilə bağlı, həm də pensiya kartından istifadə ilə bağlı islahatların davam etdirilməsinə ehtiyac var".

"Nəzərə almalıyıq ki, minimum pensiya məbləği artdıqca tələb olunan minimum pensiya kapitalı da artır. Bu səbəbdən vacibdir ki, pensiya kapitalının müəyyən hissəsinin dövlət tərəfindən kompensasiya edilməsi mexanizminə baxılsın. Daha yaxşı olardı ki, vəsaitlərin, xüsusən də həssas qruplar üçün olan vəsaitlərin bir hissəsi kompensasiya olunsun", - deyə millət vəkili əlavə edib.

O bildirib ki, böyük pensiya kapitalına malik vətəndaşlarımıza ABŞ-da olduğu kimi daha tez pensiyaya çıxmaq hüququnun verilməsinə ehtiyac var: "Ona görə də biz minimum pensiya kapitalı ilə yanaşı, pensiyaya çıxmaqla bağlı minimum kapital yığıldıqdan sonra belə bir hüququn verilməsinin tərəfdarıyıq.

Yəni vətəndaşa pensiya yaşına çatmadan yığılan kapitaldan istifadə etmə hüququnun verilməsi məqsədəuyğundur. Bu da təbii ki, kapitalla bağlı yığımlara marağı artırmaqla yanaşı, eyni zamanda imkan verəcək ki, vətəndaşlarımız bəzi hallarda pensiya yaşını gözləmədən də pensiya kapitalının bir hissəsindən faydalana bilsinlər".

"Digər məsələ isə pensiya kapitalının müəyyən hissəsinin varisə transfer edilməsi ilə bağlıdır. Çünki bəzi hallarda vətəndaş uzun müddət çalışır, lakin ya o, pensiya yaşına çatmır, ya da pensiya yaşına çatdıqdan müəyyən müddət sonra dünyasını dəyişir. Bu səbəbdən həmin kapitalın bir hissəsinin vətəndaşın varisinə transfer edilməsi mexanizmi təqdirəuyğun olardı. Bu da nəticə etibarı ilə pensiya sistemində ədalətin daha da məqsədəuyğunluğu üçün önəmlidir", - deyə V.Bayramov əlavə edib.

16
Teqlər:
Vüqar Bayramov, təklif, varis, kapital, təqaüd, pensiya

Ermənistandakı hərbi bazada Rusiya hərbçisinin cəsədi tapılıb

17
(Yenilənib 21:33 26.11.2020)
Rusiya hərbi bazasının Ermənistandakı Cənub Hərbi Dairəsi üzrə komandanlığının komissiyası hüquq-mühafizə orqanları ilə birlikdə müqavilə əsasında hərbçinin ölümü ilə bağlı araşdırma aparır. H

BAKI, 26 noyabr - Sputnik. Ermənistanın Gümrü şəhərində Rusiyanın 102-ci hərbi bazasının hərbi qulluqçusu ölü tapılıb.

Bu barədə Sputnik Ermənistan-a Cənub Hərbi Dairəsinin mətbuat xidmətindən bildirilib. Ermənistan İstintaq Komitəsinin Şirak Regional İstintaq İdarəsi hazırda hərbçinin ölümü ilə bağlı materialları toplayır.

Bildirilir ki, 36 yaşlı rus hərbçinin həyat əlamətləri olmayan cəsədi onun hərbçi yoldaşları tərəfindən aşkar edilib. Onun üzərində hər hansı zorakılıq əlamətlərinə rast gəlinməyib: 

"Rusiya hərbi bazasının Ermənistandakı Cənub Hərbi Dairəsi üzrə komandanlığının komissiyası hüquq-mühafizə orqanları ilə birlikdə müqavilə əsasında hərbçinin ölümü ilə bağlı araşdırma aparır. Hərbçinin cəsədində zorakılıq əlamətlərinə rast gəlinməyib".

Hazırda hadisənin baş vermə şəraiti və səbəbləri araşdırılır.

Cinayət xəbərləri saytı shamshyan.com-un yazdığına görə, ölən şəxs 36 yaşlı müqaviləli hərbçi A.P.-dir.

17

Çavuşoğlu Qarabağ məsələsini NATO-nun gündəminə gətirdi

0
(Yenilənib 22:33 26.11.2020)
Türkiyənin xarici işlər naziri Mövlud Çavuşoğlu ilə NATO-nun baş katibi Yens Stoltenberq Dağlıq Qarabağ və digər regional münaqişələri müzakirə ediblər.

BAKI, 26 noyabr - Sputnik. Türkiyənin xarici işlər naziri Mövlud Çavuşoğlu və NATO-nun baş katibi Yens Stoltenberq arasında telefon danışığı olub.

Sputnik Azərbaycan Türkiyə mediasına istinadla xəbər verir ki, telefon danışığı zamanı tərəflər regional gündəmin aktual məsələlərini, o cümlədən Dağlıq Qarabağı müzakirə ediblər.

Türkiyə XİN rəhbəri və NATO-nun baş katibi Şərqi Aralıq dənizi, Əfqanıstan və Liviya böhranı barədə də fikir mübadiləsi aparıblar.

Çavuşoğlu Stoltenberqə İrini Hərəkatı çərçivəsində Aralıq dənizindəki Türkiyə ticarət gəmisində axtarış aparılmasının beynəlxalq hüquqa zidd və yolverilməz olduğunu bildirib.

0
Teqlər:
Aralıq dənizi, Liviya, Dağlıq Qarabağ, Türkiyə xarici işlər naziri Mövlud Çavuşoğlu, Mövlud Çavuşoğlu, baş katibi Yens Stoltenberq, Yens Stoltenberq, NATO