Məşhur azərbaycanlı rəqqasə Rəna Ağamuradova

"Kiminsə sevgilisi, saxladığı qadın deyiləm, gecələr rəqs edib çörək qazanıram"

4261
(Yenilənib 15:22 22.11.2018)
Məşhur rəqqasə: Axı oğlum mənə görə niyə utanmalıdır?!

Kəmalə Əliyeva, Sputnik Azərbaycan

BAKI, 22 noyabr — Sputnik. Ərəb rəqslərinin mahir ifaçısı olan məşhur azərbaycanlı rəqqasə Rəna Ağamuradova peşəsini dəyişmək və aparıcı olmaq qərarına gəlib. Rəqqasə özünün yeni sənəti, keçirdiyi plastik cərrahiyyə əməliyyatları və şəxsi həyatı barədə Sputnik Azərbaycan-a danışıb.

- Rəna, niyə tez-tez bədəninizin müxtəlif yerlərində cərrahiyyə əməliyyatı keçirirsiz?

- Düzünü desəm, burnumda problem var idi. Sadəcə, özümdə nəsə dəyişiklik etmək istədim və rinoplastika elətdirməyə qərar verdim. Əməliyyatı Türkiyədə elətdirdim və nəticədən razı qaldım. Çünki əməliyyatdan sonra üzümdə hər hansı şişkinlik, göyərmə, burnumda isə tampon olmadı. Həkim burnumu bir qədər korrektə elədi. Hələlik yalnız 3 əməliyyat keçirmişəm və hamısının da nəticəsindən razı qalmışam. Əvvəlcə çox qorxurdum, lakin birinci əməliyyatdan sonra başa düşdüm ki, burada qorxulu heç nə yoxdur.

Танцовщица и телеведущая Рена Агамурадова
© Sputnik / Murad Orujov
Məşhur azərbaycanlı rəqqasə Rəna Ağamuradova

Eyni zamanda bu yaxınlarda sinəmi böyütdürmüşəm və gözlədiyimdən böyük alınıb. Mən arığam və onu daşımaq mənə bir qədər çətindir. Bu əməliyyatın mənim peşəmlə heç bir əlaqəsi yoxdur. Mənim iki uşağım var. Və heç kəsə sirr deyil ki, hamiləlik vaxtı və doğuşdan sonra qadının fiqurasında dəyişikliklər əmələ gəlir. Mən həmişə qızlara uşaq doğandan və 30 yaşdan sonra estetik əməliyyat keçirməyi tövsiyə edirəm. Misal üçün mənim artıq 34 yaşım var və özümdə dəyişikliklər etməyə başlamışam. Biz səhnə adamları həmişə ideal görünməliyik. Etiraf edim ki, heç vaxt özümü ideal və gözəl hesab etməmişəm, sadəcə suyuşirinəm (gülür-red.).

- Bəlkə bu əməliyyatlar sizin çoxlu komplekslərinizin olması ilə bağlıdır?

- Yox, heç vaxt komplekslərim olmayıb.

- Özünüzdə başqa nəyi dəyişmək istəyirsiz?

- Hər şey yeni texnologiyalardan və mənim əhval-ruhiyyəmdən asılıdır. Mən risk etməyi çox sevirəm. Amma özümdə nəyisə həddindən artıq dəyişməyə hazırlaşmıram.

Танцовщица и телеведущая Рена Агамурадова
© Sputnik / Murad Orujov
Məşhur azərbaycanlı rəqqasə Rəna Ağamuradova

- Nə zamansa risk etdiyinizə görə peşman olmusuz?

- Dəfələrlə belə olub. Mən çox tez-tez riskə gedirəm. İndi isə özümə söz vermişəm ki, bundan sonra eyni səhvləri etməyəcəm. Mən artıq kamilləşmişəm.

- Rəna, siz Azərbaycana Nijni Tagildən gəlmisiz və qısa müddətdə şöhrət qazanmısız. Başqa nə arzulayırsız?

- Hazırda bütün arzularım uşaqlarımla bağlıdır. Çox istəyərdim ki, onlar öz sənət sahələrində məşhur insanlar olsunlar və uğur qazansınlar. Hər dəfə onlara deyirəm ki, məqsədlərə nail olmaq üçün daim işləməlisiz. Mən onlara pulu sevməyi və onun qədrini bilməyi öyrədirəm. Oğlum çox qənaətcildir, qızım isə yox. İndi mənə bir qədər çətindir, çünki oğlum keçid dövründədir. O, hətta artıq sevməyə başlayıb.

Həyatda mənim üçün ən vacib olan şey uşaqlarım və işimdir. Çox istəyirəm onlar mənimlə fəxr eləsinlər və əminəm ki, belə də olacaq. Çünki hər şeyi onlar üçün edirəm. Hər dəfə mənə sual verirlər: oğlun sənə görə utanmır ki? Mənsə onlara izah edirəm ki, o, niyə mənə görə utanmalıdır? Axı hamı mənim nə işlə məşğul olduğumu bilir. Hər gün evə gələndə onlar necə yorğun vəziyyətdə olduğumu görürlər. Mən çox asanlıqla kiminsə sevgilisi, saxladığı qadın ola bilərəm. Amma bunu etmirəm, bu, mənə lazım deyil. Bütün gecəni müxtəlif məclislərdə rəqs etməyə hazıram və pulu zəhmətlə qazanıram.

Танцовщица и телеведущая Рена Агамурадова
© Sputnik / Murad Orujov
Məşhur azərbaycanlı rəqqasə Rəna Ağamuradova

- Deməli, sizin heç bir şəxsi həyatınız yoxdur?

- Xaraktercə özümə oxşayan insanı tapa bilmirəm. O, məni necə varamsa, elə də qəbul etməlidir. Biri ilə ünsiyyət qurduğumda, o şəxs ikinci sualında oğlum və ya qızımı soruşmursa, dərhal onunla ünsiyyəti dayandırıram. Ümumiyyətlə, heç kəsi uşaqlarıma yaxın buraxmaq istəmirəm. Bir kişiyə əmin olmadan, onu uşaqlarımla tanış etmirəm. O, məni uşaqlarımla birlikdə qəbul etməlidir, amma bilirəm ki, belə adam heç vaxt olmayacaq.

- Sizə ona ərə getməyi təklif edən kişi olub?

- Evlənmək təklifini heç kəs etmir. Hamı görüşmək və birlikdə vaxt keçirmək istəyir. Mən ümumiyyətlə ərə getməyi planlaşdırmıram. Oğluma görə bunu edə bilmərəm.

- Rəna, siz rəqqasəsiz, indi isə aparıcılığa hazırlaşırsız. Bu necə baş verib?

- Bu, mənim ikinci arzumdur. Mənə çox çətindir. Çox yoruluram. Səhərlər verilişlərin çəkilişlərində oluram, axşamlar tədbirlərə rəqs etməyə gedirəm. Bəzən elə olur ki, bir gündə 9-dan artıq banketdə çıxış etməli oluram. Gələcəkdə öz rəqqasəlik karyeramı başa vurub yalnız aparıcı olmaq istəyirəm. Hazırda bunun üzərində işləyirəm. Düşünürəm ki, bacaracağam. Çünki təbiətən məqsədyönlü insanam. Axşamlar Azərbaycan dilində kitablar oxuyuram ki, bu dildə yaxşı danışa bilim.

Танцовщица и телеведущая Рена Агамурадова
© Sputnik / Murad Orujov
Məşhur azərbaycanlı rəqqasə Rəna Ağamuradova

- Bir çox müğənnilər bizneslə məşğul olur. Siz heç bu barədə fikirləşməmisiz?

- Arzum olub, amma bilirəm ki, biznes qadını deyiləm.

- Sizin şagirdiniz olmaq arzusunda olanlar var?

- Bəli, arzu edənlərin sayıl çoxdur, amma mən hamısından imtina edirəm. Buna sadəcə gücüm yetmir. Gündüzlər dərs deyib axşamlar mərasimlərdə çıxış edə bilmərəm.

- Hazırda nə üzərində işləyirsiz?

- Düzü planlarım çoxdur. Bu yaxında toy mövsümü başlayıb. Ona görə də, həmin planları təxirə salmalı olmuşam. Klip çəkdirməyi planlaşdırmıram, çünki onlar çoxlu baxış sayı toplamırlar. Mənim sosial şəbəkələrdə xeyli kiçik çarxlarım var. Hazırda daha çox öz verlişimlə məşğulam.

4261
Ofis, arxiv şəkli

İşədüzəltmə firmalarının fırıldaqçılığına son

5
(Yenilənib 22:44 06.07.2020)
İşədüzəltmədə vasitəçilik fəaliyyəti həyata keçirən hüquqi şəxslərlə daimi məlumat mübadiləsi təmin olunacaq

BAKI, 6 iyul — Sputnik. Əmək və Əhalinin Sosial Müdafiəsi Nazirliyinin tabeliyində yaradılan Dövlət Məşğulluq Agentliyinə həvalə olunan vəzifələrdən biri də işədüzəltmədə vasitəçilik fəaliyyəti ilə məşğul olan hüquqi şəxslərin elektron formada reyestrini aparmaqdır.

Bu barədə Sputnik Azərbaycan-a Nazirlikdən məlumat verilib. Xəbərə görə, həmin reyestrin yaradılması 2020–2021-ci illərdə nəzərdə tutulub və hazırda üzərində işlər aparılır. Bu reyestr müvafq sahədə vahid informasiya bazasının yaradılmasına imkan verəcək. Nəticədə işədüzəltmədə vasitəçilik fəaliyyəti həyata keçirən hüquqi şəxslərlə daimi məlumat mübadiləsi təmin olunacaq.  Hüquqi şəxslər onlarda olan mövcud vakansiyaları, həmçinin onlara işlə təmin edilmək üçün müraciət edən şəxslər və eləcə də işlə təmin etdikləri şəxslər barədə bütün məlumatları bu reyestrə daxil edəcəklər.

5
Bakıda yanğının nəticəsi

Paytaxtda üfunət qoxusu Yayılan iy “Sobsan”dan gəlir?

191
(Yenilənib 23:00 06.07.2020)
Üfunət iyi Bakının Binəqədi rayonunda daha çox hiss olunur, eyni zamanda Nərimanov və digər rayonların ərazilərini də bürüyüb.

BAKI, 6 iyul — Sputnik. Bakının bəzi ərazilərini üfunət iyi bürüyüb. Sputnik Azərbaycan-ın məlumatına görə, pis qoxu paytaxtın Binəqədi rayonunda daha çox hiss olunur.

Eyni zamanda üfunət iyi Nərimanov və digər rayonların ərazilərini də bürüyüb.

Hazırda atmosfer qatında mövcud olan qoxunun səbəbləri məlum deyil.

Qeyd edək ki, bir neçə gün öncə Binəqədi rayonundakı “Sobsan” boya fabrikində baş vermiş yanğın zamanı fabrikə yaxın ərazilərdə havaya qatı tüstü yayılıb. Yanğının ətraf mühitə təsirini müəyyənləşdirmək məqsədilə Ekologiya və Təbii Sərvətlər Nazirliyinin əməkdaşları dərhal hadisə yerinə yollanıb, ərazidə monitorinq keçirib və atmosfer havasından nümunələr götürüblər.

Analizlərin nəticələrinə əsasən, yanğının baş verdiyi ərazinin ətrafında dəm qazı 5,6, benzol 1,3, toluol 1,2, etil benzol 23,3, meta-ksilol 2,7, orto ksilol 2,4 dəfə yol  verilən qatılıq həddini keçib. Ərazidəki atmosfer havasının hazırkı vəziyyətinin öyrənilməsi məqsədilə, bu gün fabrikə yaxın yaşayış məntəqələrində havadan təkrar nümunələr götürülüb və nəticəsi barədə əlavə məlumat veriləcək.

191
Arxeoloji qazıntılar, arxiv şəkli

Yeddi min ilin sirri - Polşada qədim xəndəklər aşkar edilib

0
(Yenilənib 23:51 06.07.2020)
Polşada daha əvvəl buna bənzər tapıntı aşkarlanmayıb. Ancaq Slovakiyada, Çexiyada, Macarıstanda və digər ölkələrdə buna bənzər çıxıntılar - quruluşlar hələ də qalıb.

BAKI, 7 iyul — Sputnik. Arxeoloqlar qrupu Polşanın şimalında naməlum mənşəli xəndəklər sistemi aşkarlayıb. Sputnik Azərbaycan xarici mətbuata istinadla xəbər verir ki, tədqiqatlarla müəyyən edilib ki, hündürlükdən onlar tək şəkil kimi görünürmüş.

Xəndəklər ilk dəfə "Google Maps" və "Google Earth" xəritələrinin köməyi ilə gözə çarpıb. Alimlərin fikrincə, obyektlərin 7 minə yaxın yaşı var.

Polşada daha əvvəl buna bənzər tapıntı aşkarlanmayıb. Ancaq Slovakiyada, Çexiyada, Macarıstanda və digər ölkələrdə buna bənzər çıxıntılar - quruluşlar hələ də qalıb.

Xəndəklər bir mərkəz ətrafında oval şəklində qazılıb və bəzi yerlərdə torpaq "körpülər" qorunub saxlanılıb.

Xəndəklərin eni üç metr, dərinliyi iki metrdir. Ən böyüyünün diametri 85 metr təşkil edir. Yəqin ki, qədim tayfalar onları sümük alətlərinin köməyi ilə qazıblar, bu da çox səy və vaxt tələb edib. Arxeoloqların sözlərinə görə, gil torpaqlarda müasir avadanlıqlarla belə qaıntı aparmaq çətindir.

Elm adamları bu quruluşların ritual məna kəsb etdiyini düşünürlər. Ancaq burada hansı ayinlərin keçirildiyi hələ müəyyən edilməyib. İçəridə olan qədim kömür izləri burada hansısa tikilinin olduğunu və sonradan yandığını sübut edir.

0