Круг 20 января, фото из архива

Paytaxtın şimal giriş-çıxışında "barrikada" qurulub - "20 Yanvar" keçilməz!

15250
(Yenilənib 17:35 18.11.2018)
Taksi sürücülərinin təklifləri var, BNA çıxış yolları axtarır, DYP reyd keçirir

Nigar Məhərrəm, Sputnik Azərbaycan.

BAKI, 19 noyabr — Sputnik. Günün pik saatlarında, yəni hər kəsin işdən çıxaraq evə tələsdiyi vaxtda "20 Yanvar" metrostansiyasının ətrafında böyük sıxlıq müşahidə edilir. Müxtəlif səbəblərdən qaynaqlanan sıxlığı aradan qaldırmaq üçün, dəfələrlə müəyyən addımlar atılsa da, problem həllini tapmayıb.

Sputnik Azərbaycan-ın əməkdaşı sözügedən ərazidə sıxlığın yaranma səbəblərini aydınlaşdırmağa çalışıb. Bunun üçün öncə "20 yanvar" dairəsi adlanan əraziyə yollanaraq, oradakı taksi sürücüləri ilə həmsöhbət olub. Sürücülər mövcud problemin həlli üçün öz təkliflərini səsləndiriblər.

Sürücü Ziya Hüseynovun fikrincə, ərazidə sıxlıq yaradan ən böyük problem dayanacaqlardır: "Avtobus dayanacaqlarını daha uzaq məsafəyə daşımaqla buradakı sıxlığı aradan qaldırmaq mümkün ola bilər. Dövlət Yol Patrul Xidmətinin əməkdaşları ərazidə olarsa, günün pik vaxtlarında bu sıxlıq aradan qalxar".

20 Yanvar dairəsində tıxac
© Sputnik / Nigar Meherrem
"20 Yanvar" dairəsində tıxac

Digər sürücü İlqar Atayev də ərazidəki taksilərin sıxlıq yaratdığını düşünmür: "Əksinə, 1 manatlıq taksilər olmasa, Xırdalan və Sumqayıt istiqamətinə gedəcək sərnişinlər burada sıxlıq yaradar. Bu ərazidəki sıxlıq, əsasən, bəzi yolların dar olması ilə əlaqədardır. Müəyyən ərazilərdə yollar genişləndirilsə də, avtovağzalın yuxarı ərazisi dar olaraq saxlanılıb. Həmin yol "butulka"nı xatırladır. Sumqayıtdan Bakıya ikinci giriş olarsa, problem az da olsa, həllini tapar. Çünki nəqliyyatın hərəkəti üçün Binəqədi və Biləcərinin daxili yolları yararsızdır".

Sürücü Elvin Məmmədli isə, bu ərazinin, hələ sovet dövründə taksilərin dayanacaq məkanı olduğunu əsas gətirib: "20 Yanvar" dairəsi şimal girişindən gələn sərnişinlərin Bakıda düşdüyü ilk dayanacaqdır. Xırdalan və Sumqayıt istiqamətinə gedən sərnişinlər də bu dayanacaqdan yola düşürlər. Bu səbəbdən də "20 Yanvar" dairəsi taksi sürücüləri üçün əlverişli yerdir".

"Taksilərin yol qırağında dayanması yolverilməzdir. Lakin bu, o demək deyil ki, həmin avtomobil vasitələri bu ərazidən qovulmalıdır. Onları oradan qovsaq, yenə də fırlanıb həmin əraziyə qayıdacaqlar. Taksilər üçün müəyyən ərazi ayrılsa, problemi həll etmək mümkün olar. Köhnə avtovağzal adlanan ərazini taksi sürücüləri üçün dayanacaq yeri etsələr, daha məqsədəuyğun olar. Sərnişinlərin bu əraziyə axını üçün metronun çıxışını həmin istiqamətə yönləndirmək lazımdır" - Məmmədli bildirib.

Əməkdaşımız sürücülərin təkliflərini dinlədikdən sonra məsələyə aidiyyatı qurumların münasibətini öyrənib. Bakı Nəqliyyat Agentliyinin (BNA) mətbuat xidmətinin rəhbəri Mais Ağayev qeyd edib ki, BNA tərəfindən təkcə "20 Yanvar" metrostansiyası ərazisində deyil, o cümlədən şimal ərazisindən girişdə nəqliyyatın kompleks təşkili üçün bir sıra layihələr irəli sürülüb. Bu layihələrdə "20 Yanvar" dairəsindən Tbilisi prospekti istiqamətinədək nəqliyyat şəraitinin yaxşılaşdırılması nəzərdə tutulub.

BNA sözçüsü adıçəkilən dairəyə bağlı olan bir sıra ərazilərdə də nəqliyyatın normal axınını təmin etmək üçün tədbirlərin görüldüyünü bildirib: "Artıq 3-cü mikrorayon ərazisində də nəqliyyat şəraitinin yaxşılaşdırılması üçün görülən işlər yekunlaşmaq üzrədir. Son tamamlama işlərindən sonra 3-cü mikrorayon ərazisində işıqforlar da işə düşəcək. Bununla da həmin ərazidə gündəlik olaraq müşahidə edilən sıxlıq səngiyəcək. Bundan başqa, "20 Yanvar" dairəsinə bağlı olan 4-cü mikrorayon ərazisi və "Memar Əcəmi" metrostansiyası ətrafında da nəqliyyat şəraitinin yaxşılaşdırılması üçün tədbirləri görülür".

"Bakı Nəqliyyat Agentliyi tərəfindən "20 Yanvar" dairəsi ilə bağlı verilən təkliflərdən yalnız biri icra olunub. Bu da işıqforların quraşdırılması ilə bağlıdır. Lakin təkcə işıqforları quraşdırmaqla problemi həll etmək olmaz. Oradakı dayanacaq məntəqələrinin yeri dəyişdirilməlidir. Eyni zamanda, Mətbuat prospekti və Şərifzadə küçəsindən bu əraziyə daxil olan nəqliyyat vasitələrinin axınını kanallaşdırmaq üçün müəyyən adacıqlar təşkil olunmalıdır. Düşünürəm ki, müvafiq qurumlarla razılıq əldə edildikdən sonra bu layihənin də icrasına başlanılacaq" – deyə M.Ağayev əlavə edib.

Agentlik təmsilçisi onu da vurğulayıb ki, avvtobus dayanacaq məntəqələrinin yerinin dəyişdirilməsi də nəzərdə tutulub: "Lakin yalnız dayanacaqlar deyil, qeyri-qanuni taksi fəaliyyəti ilə məşğul olanlar, avtomobilini yolun kənarında saxlayanlar da hərəkətdə mane yaradırlar. Bu cür hallarla da mübarizə aparılacaq".

"Hazırda agentliyimiz tərəfindən yalnız xüsusi proqram təminatı olan planşetlər vasitəsi ilə dayanma və durma qaydalarını pozan sürücülərə qarşı inzibati tənbeh tədbirləri görülür. Yaxın vaxtlarda qanunvericiliyə dəyişiklik edilməlidir. Bu dəyişiklikdən sonra foto-video qeydinə imkan verəcək xüsusi avadanlıqlar vasitəsi ilə belə halları yaradan sürücülərə qarşı mübarizə aparılacaq. Düşünürəm ki, bununla da "20 Yanvar" metrostansiyası qarşısında qanunsuz parklanmanın qarşısı alınmış olacaq" – deyə mətbuat katibi əlavə edib.

Sözügedən ərazidə müşahidə olunan sıxlığa səbəb olan amillər haqqında Bakı Şəhər Baş Polis İdarəsi Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Vaqif Əsədovun da fikrini öyrəndk. O bildirib ki, günün pik vaxtlarında həmin ərazidə süni sıxlıq müşahidə edilir və bu sıxlıq dayanma-durma və parklama qaydasını pozan sürücülərin hesabına yaranır.

V.Əsədov onu da əlavə edib ki, eyni zamanda, qeyri-qanuni taksi fəaliyyəti ilə məşğul olan sürücülər və piyada qismində olan şəxslər də sıxlığın yaranmasına səbəb olurlar: "Problemin aradan qaldırılması üçün dayanma-durma və parklama düzgün yerinə yetirilməli, piyadalar onlar üçün ayrılmış ərazidən keçməlidirlər. İctimai nəqliyyatı idarə edən sürücülər isə onlar üçün ayrılan ərazidə dayanmalıdır".

"Təəssüflər olsun ki, hələ də həmin ərazidə çörək pulu qazanmaq adı ilə narahatlıq yaradanlar sürücülər var. Onların barəsində bu gün də müəyyən tədbirlər görülməkdədir" – deyə DYP rəsmisi vurğulayıb.

V.Əsədov sıxlığın aradan qaldırılması üçün DYP tərəfindən atılan addımlardan da söz açıb: "Süni sıxlıq və tıxacların baş verməməsi üçün ərazidə yol polisi əməkdaşları xidmət aparırlar. Bu halların qarşısının alınması, sürücülərin maarifləndirilməsi üçün tərəfimizdən müəyyən addımlar atılır. Bu gün Bakı Nəqliyyat Agentliyinin də həmin ərazidə xidmət göstərməsi müsbət haldır".

15250
Teqlər:
DYP, BNA, avtomobil, tıxac, "20 yanvar", "20 Yanvar" metrostansiyası, sürücü, taksi, Bakı
Əlaqədar
Bakıda intihar tıxacı: Şəhərin bir hissəsi kilidləndi
Bu avtomobil tıxacın qənimi olacaq
Əfsanəvi ideya reallığa çevrilir: Artıq kimsə tıxacda qalmayacaq
Paytaxtda böyük tıxac yaranıb - RƏSMİ
Bakı-Sumqayıt yolunda böyük tıxac yaşanır
Kəlbəcərə mənzərə, arxiv şəkli

Kəlbəcərdə hər il 50 mindən artıq insan müalicə alırdı - Xidmət rəisi

2
(Yenilənib 18:09 29.11.2020)
"Bu yataqların gündəlik debiti 3080 kubmetr təşkil edir. Burada ötən əsrin 80-ci illərində 800 min litr termal su bağlanırdı"

BAKI, 29 noyabr — Sputnik. Kəlbəcər təkcə filiz və ya qeyri-filiz yataqları ilə deyil, həm də termomineral suları ilə zəngindir. Sputnik Azərbaycan-ın məlumatına görə, bunu Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin rəisi Əli Əliyev deyib. Xəzər TV-nin "Birinci Studiya" verilişinin qonağı olan Ə.Əliyev deyib ki, Kəlbəcərdə "İstisu" və "Tutqun" termal-mineral iri su hövzələri mövcuddur. Onun sözlərinə görə, bu hövzələrin hər birində 4 yataq var: "Bu yataqların gündəlik debiti 3080 kubmetr təşkil edir. Burada ötən əsrin 80-ci illərində 800 min litr termal su bağlanırdı. Eyni zamanda "İstisu" kurort-sanatoriya kompleksi fəaliyyət göstərirdi".

O deyib ki, Kəlbəcərdə bir ildə 50 mindən artıq insan müalicə alıb, şəfa tapırdılar.

2
Teqlər:
müalicə, termal sular, İstisu, Qarabağ, Kəlbəcər
Yanğınsöndürənlər, arxiv şəkli

Zavodun tavanı ailələrin başına uçdu, maşınlar partladı - Xırdalanda qorxunc olay

13
Yaşayış sahələrinin vəziyyətinin qiymətləndirilməsindən sonra ailələrin burada yaşamağının təhlükəli olduğu məlum olub. Dövlət Komitəsi məcburi köçkünlərin kirayə mənzillərə yerləşdirilməsi ilə bağlı qərar qəbul edib

BAKI, 29 noyabr - Sputnik. Xırdalanda məcburi köçkünlərin müvəqqəti məskunlaşma yerində baş vermiş uçqunla bağlı məlumat yayılıb.

Qaçqınların və Məcburi Köçkünlərin İşləri üzrə Dövlət Komitəsi mətbuat xidmətindən verilən məlumata görə, noyabrın 28-də Abşeron rayonunu, Xırdalan şəhərində keçmiş Yüngül Konstruksiyalar Zavodunda uçqun baş verib.

Hadisə ilə bağlı məlumat daxil olduqdan dərhal sonra Qaçqınların və Məcburi Köçkünlərin İşləri üzrə Dövlət Komitəsinin aidiyyəti şöbəsinin və yerli sektorunun nümayəndələri orada olub, ailələrin vəziyyəti ilə tanış olublar.

Yanğın baş verən ünvanda yaşayan 9 məcburi köçkün ailəsi müvəqqəti məskunlaşıb. Hadisə nəticəsində ölən və xəsarət alan olmayıb.

İlkin ehtimala görə, hadisə yağış sularının təsiri nəticəsində meydana gəlib. Belə ki, keçmiş zavodun beton tavanı uçaraq Kəlbəcər rayonundan məcburi köçkün Verdiyev Seymur Dilqəm oğluna məxsus "Mitsubishi" və Laçın rayonundan məcburi köçkün Məmmədov Taleh Zahid oğluna məxsus "Volkswagen" markalı iki avtomobilin üzərinə dağılıb. Nəticədə avtomobillərdə yanğınla müşahidə olunan partlayış baş verib. Yanğın dərhal söndürülüb.

Yaşayış sahələrinin vəziyyətinin qiymətləndirilməsindən sonra ailələrin burada yaşamağının təhlükəli olduğu məlum olub. Dövlət Komitəsi məcburi köçkünlərin kirayə mənzillərə yerləşdirilməsi ilə bağlı qərar qəbul edib.

Hazırda FHN-in mütəxəssisləri tərəfindən hadisənin başvermə səbəbləri araşdırılır.

Araşdırmadan sonra yekun rəy veriləcək. Rəy əsasında müvafiq hüquqi addımlar atılacaq.

13
Teqlər:
yanğın, partlayış, avtomobil, məcburi köçkünlər, bina, zavod, Xırdalan