Təxtənəkəran-Miki yolunun vəziyyəti. 11 noyabr 2018-ci il

Bəxti qara gətirən yol yenidən dağılıb, kəndə ancaq böyük maşınlar gedə bilir

5677
(Yenilənib 19:55 12.11.2018)
"İkinci dəfə təmir ediləndə də təklif etdik, yenə bizi dinləmədilər"

Rahim Zakiroğlu, Sputnik Azərbaycan

BAKI, 12 noyabr — Sputnik. 2017-ci ilin dekabr ayında təmir olunaraq istifadəyə verilən Təxtənəkəran-Miki avtomobil yolunun bu ilin mart ayında asfalt qatının bəzi hissələrinin eroziyaya uğrayaraq dağılması haqqında xəbər vermişdik. Sakinlərin həmin şikayətindən sonra yol bu ilin yay aylarında yenidən təmir olundu. Lakin son günlər yağan leysan yağışları nəticəsində başıbəlalı Təxtənəkəran-Miki yolunda daha böyük problem yaranıb.

Sputnik Azərbaycan-ın bölgə müxbirinin verdiyi məlumata görə, son günlər Cənub bölgəsində yağan intensiv yağışlar nəticəsində Astara rayonunun dağ kəndlərində sürüşmə aktivliyi artıb. Nəticədə də Təxtənəkəran-Miki avtomobil yolunun 5-ci kilometrliyində asfalt qatı, təxminən, 18-20 metr uzunluqda aralanıb, çatlar yaranıb.

Miki sakini Firdovsi Nurəliyev bildirib ki, yolun dağılmış hissəsindən ancaq yolsuzluq avtomobilləri keçə bilir: "Haradasa 1 ildir ki, bu yol istifadəyə verilib. 10-15 gün olar, bu yolda çökmələr yaranıb. Bir neçə gün öncə Mikinin yuxarı başına gediş-gəliş kəsilmişdi. Camaat özü yola daş-torpaq tökərək, bir təhər özləri üçün keçməyə şərait yaradıb. İndi burdan ancaq altı hündür maşınlar keçə bilir”.

Təxtənəkəran-Miki yolunun vəziyyəti. 11 noyabr 2018-ci il
© Sputnik / Rahim Zakiroğlu
Təxtənəkəran-Miki yolunun vəziyyəti. 11 noyabr 2018-ci il

Kəndin digər sakini Meybulla Xalıqov isə deyib ki, yolda sürüşmənin baş verməsinin səbəblərindən biri də məhz həmin ərazidə dağdan axan qrunt sularıdır: "Buraların relyefinə bələd olduğumuz üçün bu yolda təmir-bərpa işləri aparılan vaxt yolda çalışanlara bildirdik ki, məhz bu hissəsə asfalt örtüyünün altına iri diametrli suötürücü borusu qoymaq və beton bərkitmə işləri görmək lazımdır. Dağdan axan qrunt suları asfalt örtüyünün altından keçərək, torpaq qatını yumasın, borunun içərisi ilə axıb aşağıda çaya tökülsün deyə. Onlar bizim təklifimizə heç əhəmiyyət də vermədilər”.

Təxtənəkəran-Miki yolunun vəziyyəti. 11 noyabr 2018-ci il
© Sputnik / Rahim Zakiroğlu
Təxtənəkəran-Miki yolunun vəziyyəti. 11 noyabr 2018-ci il

“Bu yay ikinci dəfə yol təmir ediləndə də təklif etdik, yenə də bizi dinləmədilər. Hazırda yol bərbad vəziyyətdədir, əksər minik avtomobilləri buradan keçə bilmir" – deyə kənd sakini əlavə edib.

Qeyd edək ki, torpaq sürüşməsi Təxtənəkəran-Miki yolunun təkcə 5-ci kilometrliyində deyil. Yol boyu bir neçə yerdə torpağın və qaya parçalarının sürüşərək yola töküldüyü də müşahidə edilir.

Təxtənəkəran-Miki yolunun vəziyyəti. 11 noyabr 2018-ci il
© Sputnik / Rahim Zakiroğlu
Təxtənəkəran-Miki yolunun vəziyyəti. 11 noyabr 2018-ci il

Kənd ağsaqqalı Şahmirzə Nəsirovun sözlərinə görə, problem barədə artıq kənd icra nümayəndəliyinə və bələdiyyəyə müraciət ediblər: "Biz onlara bildirdik ki, yolumuz kəsilmək üzrədir, vəziyyət pisləşir. Qarşıda hələ çox yağıntılı günlər olacaq. Belə davam edərsə, yol sürüşüb çaya gedəcək".

Əlavə edək ki, sürüşmə nəticəsində kənddə sitrus bağlarına da ziyan dəyib. Firdovsi Nurəliyevə məxsus, əraziyə yaxın bağda limon və naringi ağaclarının bir çoxu torpaq altında qalıb. Bəziləri ərazinin yaxınlığından keçən çaya tərəf sürüşüb.

Torpaq sürüşməsi ilə bağlı Astara Rayonu İcra Hakimiyyətinin Siyəkü kəndi İnzibati Ərazi İdarəetmə üzrə nümayəndəsi Xanəhməd Zahirovla əlaqə saxladıq. O bildirdi ki, Təxtənəkəran-Miki yolunda baş verən sürüşmə ilə bağlı artıq rayon rəsmiləri və yolun tikintisində iştirak edən podratçı təşkilat məlumatlandırılıb: "Hava şəraiti əl verərsə, yaxın günlərdə podratçı təşkilat sürüşən ərazidə təmir-bərpa işlərinə başlayacaq".

Təxtənəkəran-Miki yolunun vəziyyəti. 11 noyabr 2018-ci il
© Sputnik / Rahim Zakiroğlu
Təxtənəkəran-Miki yolunun vəziyyəti. 11 noyabr 2018-ci il

Məlumat üçün bildirək ki, 1100 nəfər əhalisi olan Miki kəndinin rayon mərkəzi ilə arasında 35 km məsafə var və bu yol rayon mərkəzinə aparan yeganə yoldur. Heç bir alternativi yoxdur. Hazırda isə bölgəyə leysan xarakterli yağış yağır. Ümid edək ki, bu yağışdan sonra kənd yolu, tamamilə dağılmayacaq.

5677
Teqlər:
sel, leysan yağışlar, Təxtənəkəran-Miki avtomobil yolu, bölgə, cənub
Əlaqədar
Sel turizm cənnətini cəhənnəmə çevirdi
Sel nəticəsində tarixi körpü uçdu, 8 nəfər öldü
Cənub bölgəsini sel aparır
Cənub bölgəsində fövqəladə vəziyyət yaranıb, sakinlər təxliyə olunur - FOTO/VİDEO
Sel Lənkəranı ağuşuna alıb, altı kənd su altında qalıb