Səkkiz ildir yatağa bağlanan usta: "Yaralar elə dərinləşmişdi ki, sümüklərim görünürdü"
(Yenilənib 17:56 11.11.2018)
"Hamıya yalvararaq dedim ki, "Mənə toxunmayın!"Rahim Zakiroğlu, Sptunik Azərbaycan
BAKI, 11 noyabr — Sputnik. 1981-ci ildə Lənkəran rayonunun Gəgiran kəndində doğulan Hikmət Məhərrəmov sonradan ailəsi ilə birlikdə yerdə Masallı şəhərinə köçüb. Sputnik Azərbaycan-ın bölgə müxbiri ilə söhbətdə H.Məhərrəmov hazırda da Masallı rayonunda qeydiyyatda olduğunu bildirib.
Dediyinə görə, o, əvvəllər tikintilərdə fəhlə, usta köməkçisi işləyib. Elə həmin tikintilərin birində də qəzaya uğrayaraq sağlamlığını itirib: "2010-cu ildə Masallı rayonu ərazisində fərdi evlərdən birində inşaat işləri görürdük, mən də nərdivana çıxmışdım. Qəfil huşumu itirib yerə yıxıldım. Özümə gələndə artıq yerdə olduğumu gördüm. Ayılan kimi ayağa qalxmaq istədim, ancaq gördüm ki, ayaqlarım işləmir. Ustam, ətrafda olan digər uşaqlar və qonşular köməyimə gəldilər. Ancaq hamıya yalvardım ki, mənə toxunmasınlar. Sanki mənə əyan oldu ki, belim qırılıb".
©
Sputnik / Rahim Murad
Hikmət Məhərrəmov
Ətrafdakılar təcili tibbi yardımın köməkliyi ilə onu Masallı Rayon Mərkəzi Xəstəxanasına çatdırıblar: "Xəstəxanada mənə dedilər ki, vəziyyətim çox ciddidir. Ondan sonra məni Bakıdakı "Semaşko" xəstəxanasına apardılar, orda mənə 4-cü və 5-ci fəqərənin sınığı diaqnozu qoyuldu. Elə o xəstəxanada belimdən əməliyyat olundum, bir aya yaxın orda qaldıqdan sonra evə gəldim. Həkimlər məni ayağa qaldıra bilmədilər".
Hikmət Məhərrəmov artıq səkkiz ildir ki, çarəsiz vəziyyətdə yatağa məhkum olub. Ailəsinin maddi vəziyyəti aşağı olduğundan müalicəsini davam etdirə bilmir: "2015-ci ildə televizorda Sumqayıtda yerləşən özəl bir xəstəxananın reklamını gördüm, dostlarım məni həvəsləndirib xəstəxanaya apardılar. Orada Angel adlı bir yunan həkim məni müayinə etdi. Dedi ki, 6 ay müddətində məni müalicə edib ayağa qaldıra bilər. Lakin bunun üçün 30 min manat lazımdır. Mənim də o qədər məbləği verməyə imkanım çatmadığı üçün qayıtdım evə".
Dediyinə görə, indiyədək ayaqlarında hissiyyat olsa da, getdikcə ayaqları, əsasən də sol ayağı yığılır: "Ayaqlarımda hissiyyat var. Məsələn, yatanda kimsə ayaqlarıma toxunarsa, dərhal yuxuda ayılıram. Soyuğu, istini də hiss edirəm. Bəzən elə olur ki, ayaqlarım üşüyür. Lakin indi ayaqlarım yığılır. Hətta sol ayağım elə yığılır ki, dabanım baldırıma dirənir. Ayaqlarımın tam yığılmaması üçün də yoldaşım ayaqlarımın üstünə taxta, onun da üstünə daşlar düzür".
"Yalnız döş qəfəsimdən yuxarı hissə işləyir, aşağı nahiyələr işləmir. Heç bir yerə gedə bilmirəm. Evdə kömək edirlər ki, əlil arabasına oturum. Tək olsam, onu da edə bilmərəm, aylarla yataqda qalaram. Paltarlarımı geyinməyə də mütləq kimsə kömək etməlidir" – deyir çarəsiz müsahibimiz.
O, xəstəliyi ilə yanaşı ailənin maddi ehtiyaclarını ödəyə bilmədiyinə görə də xəcalət çəkdiyini vurğulayır: "Bir övladım var, Bakıda texnikumların birində 2-ci kursda oxuyur. Vicdan əzabı çəkirəm ki, indiyə kimi bir ata, bir valideyn olaraq onun xərclərini tam qarşılaya bilmirəm. 128 manat 20 qəpik ünvanlı sosial yardım, 1-ci qrup əlilliyə görə isə 155 manat pensiya alıram. 283 manat 20 qəpiklə bir ay ərzində dolanmağa çalışırıq. Yoldaşım da mənim qulluğumu tutur deyə işləyə bilmir".
H.Məhərrəmov hazırda öz evində deyil, baldızının evində məskunlaşıb: "Masallıda çoxmənzilli binaların birində 1 otaqlı evim var. Lakin əlil üçün həmin mənzildə yaşamaq mümkün deyil. Araba ilə orda hərəkət etmək qəti-mümkündür. Orda qalsaq, gərək ancaq yataqda uzanam. Uzanmaqdan da bədənimdə yataq yaraları yaranır. Hətta bir ara yaralar elə dərinləşmişdi ki, sümüklərim görünürdü".
Ailə yanında xəcalət çəkən Hikmət Azərbaycanın bütün imkanlı şəxslərindən xahiş edir ki, ona müalicə olunması üçün köməklik göstərsinlər: "Çox xahiş edirəm, kömək edin, ayağa qalxım yenindən. İşləyim, ailəmə ruzi gətirə bilim. 8 ildir məhkum olduğum bu arabadan və yataqdan xilas olum".
Hikmət Məhərrəmova yardım etmək istəyənlər üçün onun şəxsi bank hesabını təqdim edirik:
Valyuta: AZN
Benefisiarın bankı: Kapital Bank ASC Masallı filialı
Filialın kodu: 200617
VÖEN: 9900003611
SWİFT kod: AIIBAZ2X
Müxbir hesab: AZ37NABZ01350100000000001944
Benefisiarın adı: Hikmət Məhərrəmov Məhərrəməli oğlu
Benefisiarın hesabı: AZ38AIIB41010019449991666161
Kömək etmək istəyən şəxslər, həmçinin (051) 644-15-60 nömrəsinə zəng edərək, birbaşa Hikmətin özü ilə əlaqə saxlaya bilərlər.
Teqlər:
Çağatay Ulusoyun "Netflix"dəki filmindən ilk treyler - VİDEO
(Yenilənib 23:01 02.03.2021)
Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.BAKI, 2 mart — Sputnik. Türkiyəli aktyor Çağatay Ulusoyun baş rolu oynadığı növbəti "Netflix" filmi "Kağıttan hayaller"in ilk treyleri yayımlanıb.
Sputnik Azərbaycan xəbər verir ki, 12 martda yayımlanacaq ekran işi 190-dan çox ölkədə, 204 milyondan çox istifadəçiyə göstəriləcək.
Filmdə kağız və karton toplayaraq yaşayan, səhhəti vaxt ötdükcə pisləşən Mehmet tərk edilən bir uşaq tapır. Onun həyatına girən Ali Mehmetə öz uşaqlığını xatırladır.
Ciddi məhdudiyyət: Bakıda "Formula-1"də azarkeşlər və yerli TV olmayacaq
(Yenilənib 22:58 02.03.2021)
Azərbaycan Qran-prisinin təşkilatçıları bu il paytaxtımızda "kral yarışları"nın necə keçiriləcəyindən danışıblar.BAKI, 2 mart — Sputnik, Teymur Tuşiyev. "Formula 1"in Azərbaycan Qran-prisinin reqlamentində bir sıra dəyişikliklər baş verib. Sputnik Azərbaycan xəbər verir ki, bu barədə Baku City Circuit (BCC) əməliyyat şirkətinin brifinqində məlumat verilib.
"Formula 1" Azərbaycan Qran-prisi bu ilin 4-6 iyun tarixlərində Bakı küçələrində təşkil olunacaq. Keçən il yarış koronavirus pandemiyası səbəbindən baş tutmamışdı. Epidemiya əleyhinə tədbirlərlə əlaqədar olaraq, yarışın Bakı mərhələsi tamaşaçısız keçiriləcək, buna görə stendlərin və əyləncə zonasının inşası nəzərdə tutulmur və konsertlər də təxirə salınır. Bundan başqa, həftəsonları mükafatlandırma mərasimləri sadələşdirilmiş formada, yarış iştirakçıları üçün mətbuat konfransları isə onlayn keçiriləcək.
Azərbaycan Qran-prisinin təşkilatçıları azarkeşlər olmasa da yarışın Bakıda keçirilməsinin vacibliyini vurğulayıblar.
"Bu qədər ciddi məhdudiyyətləri nəzərə alsaq, ortaya belə bir sual çıxa bilər: bu şəraitdə yarışı keçirməyin nə mənası var? Bildiyiniz kimi, "Formula 1" yarışları ölkənin turizm potensialını nümayiş etdirir, buna görə də onun keçirilməsi böyük əhəmiyyət daşıyır ", – deyə BCC-dən bildirilib.
Yeri gəlmişkən, BCC-nin Azərbaycan Qran-prisini keçirməkdən imtina etməməsinin daha bir səbəbi əks halda təşkilatçıların cərimə ödəməli olmasıdır. Cərimənin məbləği isə açıqlanmayıb.
Məhdudiyyətlər KİV nümayəndələrindən də yan keçməyib. Sosial məsafəyə riayət olunması qaydalarına görə, mətbuat mərkəzində jurnalistlər üçün yerlərin sayının 400-dən 150-yə endirilməsi nəzərdə tutulub. Həmin yerlər xarici və yerli jurnalistlər arasında bərabər şəkildə bölünəcək. Bununla belə, yerli telekanallar və radiolar Azərbaycan Qran-prisi üçün akkreditasiya əldə edə bilməyəcəklər.
Təşkilatçılar treklərin hazırlanması ilə bağlı əsas işlərin bu ilin may ayında yerinə yetiriləcəyi, bununla əlaqədar paytaxtın bəzi küçələrində nəqliyyatın hərəkətinin məhdudlaşdırılacağını də bildiriblər.
Eyni zamanda, qeyd ediblər ki, könüllülərdən müraciətlərin qəbulu artıq başa çatıb. Bu prosesə start veriləndən sonrakı 60 saat ərzində könüllülərdən təxminən yeddi min ərizə daxil olub. Marşallardan da ərizə qəbulu yekunlaşıb.
Qeyd edək ki, bu il marşalların sayı 150 nəfər artırılacaq.
Teqlər:
Doğulduğu yer - Azərbaycan? Qarabağ ermənisinin pasportu Ermənistanda qalmaqal yaradıb
(Yenilənib 00:01 03.03.2021)
"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam" - Arsen Karapetyan.
BAKI, 2 mart - Sputnik. Qarabağda doğulan Ermənistan vətəndaşlarının yeni pasportlarında doğum yeri hissəsinə “Azərbaycan” yazılmağa başlanılıb.
Sputnik Ermənistan xəbər verir ki, bu barədə Yerevan Ağsaqqallar Şurasının “Mənim addımım” fraksiyasından olan keçmiş üzvü, memar Arsen Karapetyan öz Facebook hesabında yazıb.
Karapetyan qeyd edib ki, dostu 80-ci illərin ortalarında Ağdərədə (Mardakertdə) anadan olub. Daha sonra isə Rusiyada yaşayıb və hazırda Ermənistan vətəndaşlığı almaq üçün müraciət edib. Onun pasportunda doğum yeri kimi isə Azərbaycan göstərilib.
"Azərbaycan SSR deyil, DQR deyil, sadəcə Azərbaycan. İndi dostum deyir ki, nəhayət xəyal etdiyim vətəndaşlıq aldım və məlum oldu ki, mən Azərbaycandanam. Nədir bu?", - deyə Karapetyan sosial şəbəkədə yazıb.
Məsələ ilə bağlı Ermənistan polisinin pasport və viza şöbəsinin rəis müavini Məryəm Gevorkyan açıqlama verib.
"Bu vətəndaş Sovet İttifaqı dövründə anadan olub, Azərbaycan SSR-də anadan olub. Ermənistan Respublikasının pasportu səyahət sənədidir, beynəlxalq standartlara uyğundur, ona görə keçmiş SSRİ ölkələri üçün kodlar yoxdur. Başqa sözlə, əgər bir insan keçmiş SSRİ-nin bir ölkəsində anadan olubsa, onun doğulduğu yer pasporta ölkənin indiki adı ilə qeyd olunur, yəni Gürcüstan SSRİ deyil, Gürcüstan", - deyə Məryəm Gevorkyan bildirib.
O əlavə edib ki, "bu, köhnə təcrübədir".
Qeyd edək ki, Arsen Karapetyan şərh bölümündə dostunun doğulduğu yerin "Azərbaycan SSR" kimi göstərildiyi Rusiya pasportunu da yerləşdirib.