Mehdiabad qəsəbəsi Garant şəhəriciyində güclü küləyin təsirindən binaların birinin dam örtüyü bütünlükdə qırılaraq, digər binaya çırpılıb

Hava pisləşən kimi problemlər başladı Pis vəziyyətə düşən isə yenə onlardır

2492
(Yenilənib 21:41 26.10.2018)
Sakinlər baş verənlərdə tikinti şirkətini ittiham edirlər. Onlar bildirirlər ki, evlərin tikintisinin keyfiyyətsiz olmasını kənardan baxan da müşahidə edə bilər

İradə Cəlil, Sputnik Azərbaycan

BAKI, 26 oktyabr — Sputnik. Dünən səhər saatlarında Mehdiabad qəsəbəsi "Garant" şəhəriciyində güclü küləyin təsirindən binaların birinin dam örtüyü bütünlükdə qırılaraq, digər binaya çırpılıb. Sakinlər Sputnik Azərbaycan-ın hadisə yerində olan əməkdaşına bildiriblər ki, hadisə bir anın içində baş verib.

"Səhər güclü külək var idi. Bəlkə elə buna görə də çox adam evdən çıxmamışdı. Birdən güclü səs eşitdik. Baxdıq ki, qarşı binanın damı qoparaq, digər binaya çırpılıb. Binanın dam örtüyü, eyvanları və mənzillərin pəncərələri sıradan çıxıb" – deyə sakinlər bildiriblər.

Qeyd edək ki, hadisə nəticəsində Məmmədov Mayis Əbdül oğluna məxsus 90GK839 dövlət nömrə nişanlı “Prado” markalı avtomobil də ciddi zədələnib. Belə ki, binanın damından qopan dəmir parça onun avtomobilinin üzərinə düşüb.

Sakinlər baş verənlərdə tikinti şirkətini ittiham edirlər. Onlar bildirirlər ki, evlərin tikintisinin keyfiyyətsiz olmasını kənardan baxan da müşahidə edə bilər.

Xatırladaq ki, bu şəhərcik qaçqınlar üçün nəzərdə tutulub.

Tikinti eksperti Elnur Fərzəliyev ötən gün Mehdiabad qəsəbəsində baş vermiş hadisəni təbi fəlakət deyil, tikinti işlərini aparan insanların yaratdığı süni fəlakət adlandırıb: "Bu binalar yeni tikilib. İstifadə olunan bütün materiallar yenidir. Adətən güclü külək iki halda dam örtüklərini uçura bilər. Əgər binanın dam örtüyü həddindən artıq köhnəlmiş və yararsızdırsa, dam örtüyü dağıla, uça bilər. İkinci halda isə bu, görülən işlərin keyfiyyətsiz olması ilə bağlı ola bilər. Qısacası: bərkidilmə işləri damın diametrinin ölcülərinə uyğun aparılmayıb. Dam örtükləri keyfiyyətsiz səviyyədə vurulub".

Ekspert qeyd edir ki, adətən belə hallar çoxmərtəbəli binalarda baş verir. Lakin şəhərcikdəki binalar çoxmərtəbəli deyil və kompakt şəkildə tikilib: "Bundan əlavə, binaların biri-birinə çox yaxın olması da gələcəkdə baş verə biləcək hansısa təbii fəlakətin vuracağı maddi zərərlərin çox olacağını göstərir. Bu halın yenidən təkrarlanmaması üçün kompleksdəki digər binaların da dam örtüklərinə yenidən baxış keçirilməsi vacibdir".

Məsələ ilə bağlı Qaçqın və Məcburi Köçkünlərin İşləri üzrə Dövlət Komitəsinin Mətbuat xidmətindən bildirildi ki, dünən əsən güclü külək Abşeron rayonunun Mehdiabad qəsəbəsində məcburi köçkünlərin yaşadığı "Qarant” şəhərciyindəki 7 mərtəbəli 4 binanın dam örtüyünü qopardıb. Binalardan birinin dam örtüyü tamamilə, digərlərininki isə qismən dağılıb.

Komitə sədrinin göstərişi ilə Tikinti-təmir və kommunal xidmətlər şöbəsinin, Mənzil İstismar Departamentinin, Tikilməkdə Olan Müəssisələr Müdiriyyətinin rəhbərləri və məsul əməkdaşları dərhal hadisə baş verən şəhərciyə gediblər.

Hadisə yerinə cəlb edilmiş təmir-tikinti briqadaları dam örtüklərinin qopmuş konstruksiyalarını şəhərciyin ərazisindən təmizlənməsi və binaların damındakı vəziyyətin araşdırılması ilə məşğuldur. Komitənin məsul əməkdaşları şəhərciyə və məcburi köçkünlərə dəymiş ziyanı müəyyənləşdirirlər.

Təbii fəlakətin fəsadlarının aradan qaldırılması, binaların dam örtüyünün bərpası işləri tam başa çatanadək Dövlət Komitəsinin nəzarətində saxlanılacaq.

2492
Teqlər:
Mehdiabad qəsəbəsi, külək, dam, Qaçqın və Məcburi Köçkünlərin İşləri üzrə Dövlət Komitəsi, qaçqın
Əlaqədar
Bu rayonda çoxmənzilli binalar tanınmaz hala salınıb
Azərbaycanda fırtına: aləm bir-birinə qarışdı
Cənub zonasında təbii fəlakət baş verib, nəticələr ürəkaçan deyil
Güclü külək Azərbaycanın bu bölgəsində fəsadlara yol açdı
Zaqatala mənzərə

Azərbaycanın bölgələrində günlük kirayə ev bazarı canlanıb

4
(Yenilənib 18:03 21.06.2021)
Bölgələrdə günlük kirayə ev bazarında canlanma müşahidə edilir. Hətta evlərin əksəriyyəti əvvəlcədən sifarişlə tutulub. Qiymətlərdə 4-5 dəfə artım var.

BAKI, 21 iyun – Sputnik. Ötən il yayda paytaxtdan bölgələrə getməklə bağlı məhdudiyyət olduğundan rayonlara üz tutanların sayı xeyli azalmışdı. Bu səbəbdən də günlük kirayə evlərin qiymətləri də xeyli enmişdi. Şəkidə də günlük evlərin kirayəsi 5 dəfəyədək ucuzlaşmışdı. Sputnik Azərbaycan-ın bölgə müxbiri şimal-qərb bölgəsindəki hazırkı vəziyyəti araşdırıb. Məlum olub ki, bu il yüksək tələbat səbəbindən qiymətlər yenə əvvəlki vəziyyətinə qayıdıb.

Rayon sakini Barat Məmmədova Sputnik Azərbaycan-a bildirib ki, artıq qonaqları qarşılamağa hazırdırlar: “Keçən il pandemiya ilə əlaqədar olaraq heç bir nəfər də gələn olmadı. 100 manat, 80 manatlıq evləri 30 manata, 20 manata da saldırdıq, amma gələn olmadı. İndi yenə 80 manata, 100 manata razılaşma yolu ilə verə bilərik”.

Rieltor İlqar Muradov bildirir ki, bu il günlük kirayə evlərə tələbat çoxdur. Qiymətlər də ərazidən asılı olaraq 80-150 manat arasında dəyişir:

“Ay yarımdır ki, mənə zənglər gəlir, evlər sifariş olunur. Şəhərin yuxarı hissəsində -  Xan Sarayı tərəfdə, “Marxal”, “Dodu məhəlləsi” tərəflərdə qiymətlər 100-150 manat civarındadır. Qiymətlər öz axarına düşüb. Aşağıda isti olduğu üçün 30 manat civarında fərq var”.

Zaqatalada da günlük kirayə evlərə tələbat artıb. Rieltor İlkin Mirzəyinin sözlərinə görə, turistlər ən çox dağətəyi və yaşıllıq ərazilərdəki evlərə üstünlük verirlər: “Əvvəllər şəhərdəki evlərə maraq var idisə, indi kənd evlərinə üstünlük verirlər. Həm şəhərə yaxın, həm də dağətəyi olduğu üçün Car kəndindəki evlərə turistlərin marağı daha çoxdur”.

Rieltor bildirib ki, ötən ilə nisbətən qiymətlərdə də xeyli fərq var.

“Keçən il turist az idi deyə 50 manatlıq evlər hətta 20 manata qədər düşmüşdü. Bu il yaxşıdır. Tələbat var, gələn-gedənlərimiz var. Qiymətlər hazırda 30 manatdan başlayır. Şəraitdən asılı olaraq da 40-50, hətta 100 manata kimi qiymətlər dəyişir”.

Ev sahibləri də turist axınını nəzərə alaraq qiymətləri artırıblar. Rayon sakini Hikmət Məmmədovun sözlərinə görə, qonaqla danışıqdan asılı olaraq endirim də edirlər.

“Ötən il evləri 20 manata da verirdik, ancaq qalan yox idi. Bu il adam sayına baxırıq. 50 manata veririk, 40 manata olur. Tək adam olsa, 30 manata da veririk. Bir də uzunmüddətli qalan olanda endirim edirik. Gələn də var".

Rieltorlar vurğulayıblar ki, bu il xarici ölkələrə getməkdə müəyyən məhdudiyyətlər olduğundan vətəndaşlar əsasən rayonlara üz tutacaqlar. Bu səbəbdən də gündəlik kirayə ev qiymətlərinin iyul-avqust aylarında daha da artacağı gözlənilir.

Eləcə də oxuyun:

4
Teqlər:
yay mövsümü, qiymətlər, Qax, Zaqatala, Şəki, bölgələr, kirayə mənzil, kirayə ev, kirayə
Mİngəçevirdə keçmiş turist bazasının ərazisi

Mingəçevir sakinləri təşvişdə: "İlanlar artıq ev heyvanına çevrilib" - FOTO

602
(Yenilənib 18:07 21.06.2021)
İlan zəhəri bəzi xəstəliklər üçün faydalı olsa da, ilan sancanın həyatda qalması üçün bəzən dəqiqələr belə çatmır. Mingəçevirdə Boz dağ adlanan ərazidə daha çox yayılan gürzənin zəhərindən istifadə mümkündür. Ancaq hələ ki, ondan qorunmaq lazım gəlir.

BAKI, 21 iyun — Sputnik. Mingəçevir şəhərində yerləşən keçmiş turist bazasında ilanlar sakinlər üçün qorxulu kabusa çevrilib.

Sputnik Azərbaycan xəbər verir ki, isti günlərdə ilanların sayı daha da artdığından onlar insanlara, ev quşlarına zərər yetirirlər. Turbazada Ağdam, Kəlbəcər, Laçın rayonundan olan sakinlər məskunlaşıblar.

© Sputnik / Rahim Mammadov
Mingəçevirdə keçmiş turist bazasında məskunlaşan sakinlər

Ağdam sakini olan Valeh Məcnunov Sputnik Azərbaycan-ın müxbiri ilə söhbətində ilanların soyuducudan, divara asılan xalçanın arxasından çıxdığını deyib: “Düzünü desəm, ilanlar, demək olar ki, biz sakinlərin ev heyvanına çevrilib. Həyətdə, evin içində rahat sürünürlər. Həyat yoldaşım bir neçə gün öncə soyuducunu açanda gürzə ayağının üstünə düşüb. Çox qorxmuşdu, böyük oğlum özünü çatdırıb tez məhv etmişdi. Kiçik oğlum Muradı isə həyətdə gəzən zaman ayağından sancıb. Tez xəstəxanaya çatdırdıq, şükür, ciddi problem yaranmadı. Azyaşlı uşaqlara görə qorxuruq, onları sancsa, ağır fəsadları ola bilər. Bu zəhərli canlılara bir əncam çəksələr, yaxşı olar”.

© Sputnik / Rahim Mammadov
Laçın sakini Gözəl Teymurova

İlanlarla bərabər, əqrəb və digər zəhərli həşəratlar da turbazada təhlükə saçır. İlanlar insanlarla yanaşı, toyuq-cücəyə də zərər yetirir. Laçın sakini Gözəl Teymurova Sputnik Azərbaycan-a bildirib: “Otuz ildir burada məskunlaşmışıq, elə ilanlar da bizimlə bərabərdir. İsti günlərdə daha da artırlar. Qızım toyuq hinində də görüb, hətta qoluna dolanıb ona zərər yetirməyə az qalmış özümü çatdırıb bellə başını əzmişəm. Çox qorxuludur buralar".

Gözəl xanım tezliklə yurduna dönəcəyi və doğma torpağına qovuşmaq sevinci ilə yanaşı, sürünənlərdən də canını qurtaracağı günü gözləyir: "Çox sağ olsun şanlı ordumuz, möhtərəm prezidentimiz, torpaqlarımızı işğaldan azad etdilər. Tezliklə öz kəndimizə qayıdacağım günü gözləyirəm”.

Turbazada yaşayanlar bildirirlər ki, əvvəlki illərdə ərazi dizinfeksiya ediləndə həşəratlar, ilanlar nisbətən azalmışdı. Bu il isə burada dərmanlama işləri aparılmayıb. Mingəçevir Dezinfeksiya İdarəsindən isə Sputnik Azərbaycan-a bildirilib ki, onlar təsərrüfat hesablı idarə olduqlarına görə dərmanlama işləri üçün müqavilə bağlanmalıdır.

Eləcə də oxuyun:

602