Mehman Həşimov

Xəzər sahilində yaşayan tənha Dərviş: "Bütün cinayətkarların ürəyində ədalət var"

11512
(Yenilənib 10:51 12.10.2018)
Mehman Həşimov: "Həyatda bütün insanlar tənhadır, ailəli olanlar belə..."

İradə Cəlil, Sputnik Azərbaycan

BAKI, 12 oktyabr — Sputnik. "Mən aciz bəndənəm, elə bir kəsəm, tək səndən istərəm hər nə istəsəm, Allahım, Allahım, sən ol pənahım mənim…"

İlk dəfə bu misraları dinləyəndə onun ifası cəlb etmişdi məni. Hiss olunurdu ki, yaşadıqlarını musiqi ilə insanlara çatdırır. Necə deyərlər, dərdini zümzümə edir.

Onu dəfələrlə dinlədikdən sonra qərara gəldim ki, yaxından tanıyım və oxucularımızla da tanış edim. Elə bu məqsədlə dostuna zəng etdim, danışdıq, razılaşdıq ki, Dübəndidə dəniz kənarında görüşək.

Mehman Həşimov
© Sputnik / Irade JELIL
Mehman Həşimov

Düşünürdüm ki, qayıqla dənizə dalarıq, ayağımız yerdən üzülər, suların qoynunda söhbətimiz daha maraqlı alınar. Ancaq vahiməli dalğalar bu arzumu "gözümdə qoydu". Dənizin kənarındakı bir yerə yan aldıq, mən sual verdim, o isə həm danışdı, həm ifa etdi, həm də oxudu. Bir sözlə, Dərvişlə həmdərd olduq…

Bəli, Sputnik Azərbaycan-ın budəfəki qəhrəmanı Dərvişdir. Əsl adı Mehman Həşimov olsa da, hamı onu "Dərviş" ləqəbi ilə çağırır. O, əslən qarabağlı, laçınlıdır. Uşaqlığı hazırda yaşadığı Pirallahı qəsəbəsində keçib. Elə orada, 168 saylı məktəbdə orta təhsil alıb. Məktəbi bitirəndən sonra Rusiyada yaşamaq marağı onu Azərbaycandan uzaqlaşdırıb. Üz tutub soyuq ölkəyə, qərib diyara…

"16 yaşım olanda getdim Azərbaycandan. O vaxtlar çox adam gedib-gəlirdi Rusiyaya. Rusların həyat tərzi nədənsə xoşuma gəlirdi. Həmin dövrlərdə qardaşım da Murmanskda yaşayırdı. İçimdəki Rusiya sevgisi ilə qardaşımın yanına getmişdim" – deyir Dərviş.

Söhbətimizin gedişində məlum oldu ki, min bir xəyallarla üz tutduğu Rusiya Dərvişi dəmir barmaqlıqlarla "mükafatlandırıb". İyirmi bir yaşı olanda barların birində mübahisə zamanı vurduğu şəxs öldüyü üçün həbs olunub. Özü isə bu davranışına "gənclik səhvi" kimi "don geyindirir".

Ömrünün 12 ilinə bədəl olan həmin cinayət onun bütün həyatını dəyişib: "2002-ci ildə azadlığa çıxdım, 2003-cü ildə Azərbaycana qayıtdım. Mən yenidən vətənə qayıdanda nəinki mən, burada həyat da, insanlar da, hətta insanların bir-birinə münasibəti də dəyişmişdi".

Mehman Həşimov
© Sputnik / Irade JELIL
Mehman Həşimov

Dərviş Azərbaycana qayıtdıqdan sonra da həyat üzünə gülmür. Onun yolu yenidən həbsxanadan düşür. Vəzifəli şəxsə qarşı cinayət törətdiyi üçün azadlıqdan məhrum edilir. On bir il həbs cəzası alan Dərviş 2014-cü ildə yenidən azadlığa çıxır: "İstəməzdim ki, səhvlərimi təkrar edim. Yaxşı bir həyat yaşamaq istərdim. Amma nədənsə alınmadı. Məni başa düşən və mənim başa düşdüyüm insanlarla qarşılamadım".

O, ömrünün 23 ilini həbsxana divarları arasında də keçirdiyi üçün nə sevgi yaşayıb, nə də ailə həyatı qurub: "Kişi üçün həyatda vacib olan geniş ev və sadiq həyat yoldaşıdır. Mənim nə geniş evim olub, nə sadiq həyat yoldaşım. Evlənmək olardı. Amma mənim ailəmə baxacaq imkanlarım yox idi. Ailə həyatı qurub sonra ayrılmaq istəmirdim. Buna görə də evlənmədim".

Evlənmədiyinə görə çox təəssüflənsə də, sabaha ümidlidir, həyatın hələ qarşıda olduğunu düşünür. Hesab edir ki, insan yaşından asılı olmayaraq, həyatda olduğu müddətdə sevə bilər: "Sevgi hər insana qarşı ola bilər. Sevgini qadına yönəltmək üçün isə kişinin o qadınla həm düşüncəsi, həm ürəyi, həm də cismi bir-birinə yaxın olmalıdır. Bu zaman sevgi yaranır. Əgər sevgidə bu üçündən biri yoxdursa, sevgi yoxdur. Mən heç vaxt sevməmişəm. Amma ola da bilər, niyə də olmasın. Bəlkə də mən sevgi ilə qəbirə gedəcəyəm. Mən də sevilmək, sevmək istəyirəm".

İnsanlardan həm xarici görkəmi, həm də düşüncələri ilə çox seçilən Dərvişin xoşbəxtlik anlayışı da fərqlidir: "Xoşbəxtlik insanın ancaq özündə olmalıdır. Ancaq tək xoşbəxt olmaq mümkün deyil. Tək 23 il məhbus olmaq olar, tək əzab-əziyyət çəkmək olar. Amma tək xoşbəxtlik olmur".

Onunçün tənhalıq məfhumu da başqadır: "Həyatda bütün insanlar tənhadır. Nəinki subaylar, hətta ailəli insanlar belə, tək-tənhadır. Sübut üçün deyim, ailə həyatı olsa belə, gecə yatanda hər kəs üzünü başqa səmtə çevirib yatır".

Qəribədir ki, başdan-ayağa qeyri-adiliklərlə dolu olan Dərviş 23 illik məhbəs həyatı yaşamasına, məhrumiyyətlərinə baxmayaraq, heyfslənmir. Onun indiyədək "kaş ki" dediyini eşidən, duyan olmayıb.

Həyat üzünü güldürməyən Dərviş bu gün mahircəsinə həyatın üzünə gülür. Maraqlısı odur ki, onun məharəti təkcə bundan ibarət deyil. O, həm də gitarada çox məharətlə ifa edir, özü şeir yazır, mahnı qoşur, həmçinin ürəyinə yatan mahnıları gözəl ifa edir. İfa etdikcə hiss edirsən ki, yana-yana oxuyur, bəlkə də oxuduqca dərdlərini yandırır…

Dediyinə görə, mahnıların çoxunu həbsxanada olanda yazıb: ""Həbsxana məktəbdir" ifadəsi ilə razılaşmıram. Kim bu sözü deyirsə, səhv edir. Orada qəm-qüssə, kədər var. Orada heç nə öyrənmirsən".

Dərviş bizimlə yaddaşında iz buraxmış bir həbsxana xatirəsini də bölüşdü: "Bir gün həbsxanada filmə baxırdıq. Filmdə cinayətkar polislər tərəfindən saxlanıldı. Həmin vaxt yanımdakı cinayətkarların bəzisi həyəcanla, sevinclə qışqırırdı ki, "tutdu, tutdu". Bir başqası da dedi ki, "nəyə qışqırırsan, o da cinayətkardır, siz də cinayətkarsınız". Biri qalxıb dedi ki, "bütün cinayətkarların ürəyində ədalət var və heç kim cinayətkar olmağı arzulamır. Mən bu insanlara cinayətkar deməzdim. Onlar da zərərçəkmişdir"".

Dərvişlə bir xeyli dərdləşdik, həm kədərləndik, həm də sevindiyimiz anlar oldu. Söhbətimiz bitəndən sonra isə o, bizi musiqiyə qonaq etdi…

11512
Teqlər:
gitara, dərviş, həbsxana, həyat, xoşbəxtlik, insan, Rusiya, Azərbaycan
Əlaqədar
Xalqın sənətkara pul, ev, maşın borcu yoxdur
Fəxri adı başına bəla olan sənətkar - Onun rəsmini “Dəmir ledi” də alıb
Dünya boyda sərvəti olan sənətkar
Goranboylu sənətkar qədimi peşəni yaşadır
Küçə "sənətkarları"nın əl işi vətəndaşın qəzaya düşməsinə səbəb oldu
Məmur tibbi əlçəklə, arxiv şəkli

Qaydalara əməl etməyən sahibkarlar sahibkarlıq subyektlərinin adları açıqlandı

2
Reyd keçirilən obyektlərdən 43-də Nazirlər Kabinetinin qərarı ilə təsdiq edilmiş metodiki göstərişlərin tələblərindən irəli gələn bir sıra qaydalara əməl olunmaması və kobud şəkildə pozulması faktları aşkarlanıb.

 

BAKI, 4 dekabr — Sputnik. Nazirlər Kabinetinin qərarı ilə təsdiq edilmiş koronavirusun (COVID-19) profilaktikasına dair metodiki göstərişlərin icrasına nəzarət məqsədilə Azərbaycan Respublikasının Qida Təhlükəsizliyi Agentliyi (AQTA) tərəfindən ictimai iaşə obyektlərində reydlər davam etdirilir. Agentlikdən aparılan reydlərlə bağlı Sputnik Azərbaycan-a verilən məlumata görə, Bakı, Sumqayıt şəhərləri, Abşeron rayonu, eləcə də koronavirus (COVID-19) yoluxmalarının artması müşahidə olunan şəhər və rayonlar (Gəncə, Şəmkir, Sabirabad, Ağstafa, Mingəçevir) üzrə 488 ictimai iaşə obyektində 901 monitorinq keçirilib. Sahibkarlıq subyektlərinə qida təhlükəsizliyi sahəsində qanunvericiliyin tələbləri izah edilib, icrası məcburi göstərişlər və maarifləndirici tövsiyələr verilib.

Reyd keçirilən obyektlərdən 43-də Nazirlər Kabinetinin qərarı ilə təsdiq edilmiş metodiki göstərişlərin tələblərindən irəli gələn bir sıra qaydalara əməl olunmaması və kobud şəkildə pozulması faktları aşkarlanıb. Aşkarlanmış faktlarla bağlı həmin müəssisələr barədə qanunvericiliyin tələbləri çərçivəsində inzibati tədbirlər görülüb. Sözügedən müəssisələr arasında daha çox uyğunsuzluqlar aşkar edilən ictimai iaşə obyektləri aşağıdakılardır.

Bakı şəhəri üzrə:

Bakı şəhəri, Nəsimi rayonu, Səməd Vurğun ev.68 ünvanında yerləşən, hüquqi şəxs "Kobra" kiçik müəssisəsinə məxsus yeməkxana, Həsən Əliyev ev 90D ünvanında yerləşən, fiziki şəxs Məmmədov Şəadət Arif oğluna məxsus obyekt, A. M. Şərifzadə ev 33 ünvanında yerləşən, fiziki şəxs Hüseynov Sənan Rasim oğluna məxsus "Kaktus" restoranı, Nizami Rayonu, Qara Qarayev pr. ev.69 ünvanında yerləşən, fiziki şəxs Heydərov Sahib Sabir oğluna məxsus "Ləzzət dönər" evi, Nəsimi rayonu, Alı Mustafayev 37B ünvanında yerləşən, fiziki şəxs İsmayılov Pənah Ələddin oğluna məxsus kafe, Nəsimi rayonu, Alı Mustafayev 3 mkr ev.10 K ünvanında yerləşən, fiziki şəxs Arzu Ekici Bayraməli qızına məxsus kafe, Binəqədi rayonu, Süleyman Sani Axundov ev.1 A ünvanında yerləşən, fiziki şəxs Nəbiyev Səfa Rəşadət oğluna məxsus "Cıdır Düzü" restoranı, Yasamal rayonu, Şərifzadə ev.2 M. ünvanında yerləşən, fiziki şəxs Bayramov Qalib Taryel oğluna məxsus "Quzu Təndir" restoranı, G.Mehmandarov küçəsində yerləşən, fiziki şəxs Həsənov Nail Telman oğluna məxsus kafe, Səbail rayonu, Yusif Məmmədəliyev ev.19 m.1 A ünvanında yerləşən, fiziki şəxs Muradov Kamran Namiq oğluna məxsus "Nutelland" kafesi, hüquqi şəxs "Nabikoğlu" Məhdud Məsuliyyətli Cəmiyyətinə məxsus "Chef Baku" kafesi, Yeni Günəşli qesəbəsində yerləşən, fiziki şəxs Rüstəmov Samin Ələddin oğluna məxsus kafe, Lökbatan qəs., keçid 1596 ünvanında yerləşən, fiziki şəxs Əliyev Elməddin Nazim oğluna məxsus "Lion Garden" kafesi, Həsən Əliyev, ev 115A ünvanında yerləşən, fiziki şəxs Hüseynov Elvin Fuqan oğluna məxsus kafe, Sulutəpə qəs., R. Allahverdiyev 11 ünvanında yerləşən, fiziki şəxs Xəlilov Bəhmən Məhəmməd oğluna məxsus kafe, H.Cavid pr. ev 8 ünvanında yerləşən, fiziki şəxs Mahmudov Alsavad Xalid oğluna məxsus "Şaurma №1" restoranı, Səbail rayonu, Neftçi Qurban Abbasov küç., ev.24a ünvanında yerləşən, fiziki şəxs Məhərrəmov Elgün Zakir oğluna məxsus kafe, Səbail rayonu, Neftçi Qurban Abbasov küç., ev.7 M. ünvanında yerləşən, fiziki şəxs Hüseynov Xəyyam Hüseyn oğluna məxsus yeməkxana, Biləcəri, R.İsmayılov 8 ünvanında yerləşən, fiziki şəxs Namazov Telman Fərəc oğluna məxsus "Rəmiş" kafesi;

Sumqayıt şəhəri, 3-cü mkr ünvanında yerləşən, fiziki şəxs Rəhimov Zaur Tofiq oğluna məxsus "Köz Dönər" kafesi, 9-cu mkr ünvanında yerləşən, fiziki şəxs Şamıyev Elvin Rəhim oğluna məxsus "Hicaz Dönər" kafesi, 13-cü mkr ünvanında yerləşən, fiziki şəxs Əliyev İlham İsmayıl oğluna məxsus "Tea" kafesi, Səməd Vurğun ev.25 ünvanında yerləşən, fiziki şəxs Zamanov Rasim Nadir oğluna məxsus "Rəvan" çay evi, 17-ci mkr ünvanında yerləşən, fiziki şəxs Ağayev Seymur Engels oğluna məxsus "Ordubad" kafesi, 3 mkr. Bakı küçəsində yerləşən, fiziki şəxs Cəfərov Nurəddin Allahverdi oğluna məxsus "Lider Dönər" kafesi, 34-cü məh. ünvanında yerləşən, fiziki şəxs Bayramov Müşviq Etibar oğluna məxsus "Dönər Kabab" kafesi, 3-cü mkr ünvanında yerləşən, fiziki şəxs Şıxvəliyev İlham Gülməmməd oğluna məxsus "Bahar" kafesi, 40-cı məh. ünvanında yerləşən, fiziki şəxs Allahverdiyev Bəhram Sədirxan oğluna məxsus "Nərgiz" kafesi, Bədəlbəyli küç., ev 22 ünvanında yerləşən, fiziki şəxs Hacıyev Həsən Qaimşad oğluna məxsus "Nübar" kafesi;

Abşeron rayonu, Xırdalan şəhərində yerləşən, fiziki şəxs Mirzəyev Elçin Yaşar oğluna məxsus "Qədim Bakı" kafesi, Xırdalan şəhərində yerləşən, fiziki şəxs Bağırov Həşim Məmməd oğluna məxsus kafe, Mehdiabad qəsəbəsində yerləşən, fiziki şəxs Əlizadə Şahin Qərib oğluna məxsus "Zirvə" kafesi, Xırdalan şəh., H.Əliyev prospektində yerləşən, fiziki şəxs Soltanov Ramin Rəfayət oğluna məxsus "Aziz Baba" dönər evi, Saray ŞTQ-də yerləşən, fiziki şəxs Səmədov Rasim Rafiq oğluna məxsus "Ziya" kafesi, Buzovna ştq ev.342 M. ünvanında yerləşən, fiziki şəxs Əskərov Azər Firudin oğluna məxsus "Sherlocks" kafesi;

Digər şəhər və rayonlar üzrə:

Ağstafa şəhəri, M.Ə.Rəsulzadə küçəsində yerləşən, fiziki şəxs Kosayev Qara Mirzə oğluna məxsus kafe;

Şəmkir, Dəllər qəsəbəsində yerləşən, fiziki şəxs Aslanov Rövşən Akif oğluna məxsus kafe; Gəncə şəhəri Ş.İ.Xətai 157 ünvanında yerləşən, fiziki şəxs Süleymanov Məmmədəli İslam oğluna məxsus kafe, Ş.İ.Xətai ev.0 M.0 ünvanında yerləşən, fiziki şəxs Tağızadə Heydər Fazil oğluna məxsus dönər evi, Təbriz küçəsi ev.315 ünvanında yerləşən, fiziki şəxs Qurbanov Kamran Sədrəddin oğluna məxsus yeməkxana;

Mingəçevir şəhərində yerləşən, fiziki şəxs Hacıyev Nurlan Arzuman oğluna məxsus obyekt, H.Hüseynov küç., ev.30 M. ünvanında yerləşən, fiziki şəxs Abbasov Rubail Yaşar oğluna məxsus restoran, Maqomayev 14 ünvanında yerləşən, fiziki şəxs Rövşən Bilalov Rasim oğluna məxsus kafe.

Qeyd edək ki, AQTA Bakıda, eləcə də regionlarda fəaliyyət göstərən ictimai iaşə obyektlərində yoxlama-nəzarət tədbirlərini davam etdirir və Nazirlər Kabinetinin qərarı ilə təsdiq edilmiş metodiki göstərişlərə əməl etməyən sahibkarlıq subyektləri barədə ən sərt tədbirlər görüləcək.

2
Teqlər:
Nəsimi rayonu, Bakı şəhəri, sahibkarlıq subyektləri
Bayılda sürüşmə zonası

Təbiətlə məmurlar sanki Bayıl sakinlərinin qəsdinə durublar - FOTOLAR

8
(Yenilənib 22:32 04.12.2020)
"Bizə bildirdilər ki, burada yaşamaq həyatımız üçün təhlükəlidir. Amma bizim buradan başqa yerdə evimiz yoxdur. Ona görə də məcburuq burada yaşayaq".

İradə Cəlilova, Sputnik Azərbaycan

BAKI, 4 dekabr — Sputnik. Bakının Bibiheybət qəsəbəsində yenidən torpaq uçqunu olub. Sputnik Azərbaycan bu barədə xəbər tutan kimi hadisə yerinə yollanıb. Bibiheybət məscidindən bir qədər aşağıda, yamacda baş verən torpaq uçqunu ərazidə olan evlərdə yaşayanlar üçün təhlükə yaradıb. Ərazidə yaşayan sakinlər Sputnik Azərbaycan-a bildiriblər ki, torpaq uçqunu gecə saatlarında baş verib. Bu səbəbdən də dövlət qurumları burada yaşayan insanlara evlərini tərk etməyi tövsiyyə edib.

  • Bayılda sürüşmə zonası
    © Sputnik / Irade JELIL
  • Bayılda sürüşmə zonası
    © Sputnik / Irade JELIL
  • Bayılda sürüşmə zonası
    © Sputnik / Irade JELIL
  • Bayılda sürüşmə zonası
    © Sputnik / Irade JELIL
  • Bayılda sürüşmə zonası
    © Sputnik / Irade JELIL
  • Bayılda sürüşmə zonası
    © Sputnik / Irade JELIL
1 / 6
© Sputnik / Irade JELIL
Bayılda sürüşmə zonası

Nazilə Məmmədova adlı sakin bildirib ki, bu ərazidə yerləşən evlərdə kirayə qalan sakinlər evlərdən köçüb: "Dövlət qurumlarının nümayəndələri gəlib əraziyə baxış keçirdilər. Bizə bildirdilər ki, burada yaşamaq həyatımız üçün təhlükəlidir. Amma bizim buradan başqa yerdə evimiz yoxdur. Ona görə də məcburuq burada yaşayaq" - deyə sakin bildirib.

Sakinlərlə söhbət əsnasında öyrəndik ki, ərazidəki evlərin heç birinin kupçası yoxdur. Odur ki, sakinlər əgər köçsələr, evlər sökülərsə onlara kompensasiya verilib-verilməyəcəyini bilmək istəyirlər: "Buradakı evlərin heç birinin sənədi yoxdur. Amma burada ev alsan, torpaq alsan bir kvadratmetri 2000 manatdır. Belə məlumatlar var ki, sökülərsə evlərə görə sakinlərə hər kvadrat metrə iki min manat ödəniləcək. Amma rəsmi qurumlar bizə bu barədə heç bir söz deməyiblər".

Sakinlər bildirir ki, yamacda yağıntılar çox olanda torpaq uçqunları baş verir. Amma onlar buna adətkərdə olublar: "Biz də istəyərik ki, bu təhlükəli yerdən köçək. Amma buna görə gərək bizə kompensasiya ödənilsin. Çünki, bizim başqa yerdə evimiz yoxdur. Nə də imkanımız yoxdur ki, köçüb başqa yerdə kirayə yaşayaq".

Sakinlər dövlət qurumlarının gələcəyi nəticəni gözlədiklərini söyləyiblər.

Məsələyə Səbail Rayon İcra Hakimiyyətindən münasibət bildirən olmadı. Ekologiya və Təbii Sərvətlər Nazirliyinə ünvanladığımız sorğunun da cavabını gözləyirik.

8
Teqlər:
Səbail rayon İcra Hakimiyyəti, Ekologiya və Təbii Sərvətlər Nazirliyi, Bayıl, sürüşmə, torpaq uçqunu