Alma bağı, arxiv şəkli

Tale bölgə əhalisinin üzünə gülüb: Hər kəs öz arzusunu reallaşdırmağa çalışır

12869
(Yenilənib 14:31 11.10.2018)
Qiymət aşağı, keyfiyyət isə yüksək - Gəl ay müştəri, almadan qalmadı

Leyla Abdullayeva —Sputnik Azərbaycan.

BAKI, 11 oktyabr — Sputnik. Ölkəmizdə 300-ə qədər alma növü yetişir. İlin bütün fəsillərində saxlanılması mümkün olan və bol vitaminlərlə zəngin bu meyvə, əsasən şimal zonasında (Quba və Xaçmaz) becərilir. Hətta Quba rayonu almanın vətəni sayılır.

Bu il Quba və Xaçmaz rayonlarında almanın məhsuldarlığı çox yüksək olub. Bağlarda artıq məhsul yığımına başlanıb. Sputnik Azərbaycan-ın bölgə müxbiri builki məhsuldarlıqla yerindəcə tanış olmaq üçün Xaçmaz rayonunun Arzu kəndində salınmış alma bağlarına yollanıb və məhsul yığan fermerlərlə həmsöhbət olub.

Qubada alma yığımı
© Sputnik / Leyla Abdullayeva
Qubada alma yığımı

İnsanın, sanki üzünə gülən qırmızıyanaq alma ağacları ilə dolu bağın sahibi Cəlil Allahyarovdan öyrəndik ki, son illər ərzində ən yüksək məhsuldarlıq bu il olub: "Belə yüksək məhsuldarlıq son illərdə olmamışdı. Bu il zəhmətimizin hədər getməməsi bizi çox sevindirdi".

Bağ sahibi bildirdi ki, bu il məhsulun bol olması ilə yanaşı, məhsulun keyfiyyəti də yüksəkdir, almalar çox sağlamdır: "Mənim bağımda bir neçə alma sortu yetişir. Bunların arasında bazara çıxartdığımız "Golden delişes", "Reneti", "Simerenko", "Qrani smit" və bir neçə müxtəlif sortlar var. Ən yaxşı qiymətə gedən isə "Qızıləhmədi" almasıdır. Çünki həmin almadan həm də dərman kimi istifadə olunur. "Qızıləhmədi" qan azlığının qarşısını alır".

Bağ sahibi məhsulun becərilməsi vaxtı bir sıra problemlərlə qarşılaşdıqlarını da vurğuladı: "Bu il çox əziyyət çəkdik, istər suvarmada, istərsə də dərmanlama işlərində. Amma şükürlər olsun ki, əziyyətimizin bəhrəsini gördük".

Fermerlərlə söhbətimiz əsnasında bağa alma üçün gələn alıcılarla da qarşılaşdıq. Məqam düşmüşkən, onların da builki məhsulla bağlı fikirlərini öyrəndik.

Alma ağacı
© Sputnik / Leyla Abdullayeva
Son illər ərzində ən yüksək məhsuldarlıq bu mövsüm olub

Alıcı Samir Babayev builki alma bazarında olan vəziyyət barədə danışdı: "Bu il məhsulun bolluğu, eyni zamanda, Rusiya Federasiyasında da analoji vəziyyətin olması qiymətin aşağı düşməsinə, alıcılıq qabiliyyətinin isə yüksəlməsinə səbəb olub. Keçən il sahibkardan almanın kilosunu 50-60 qəpiyə alıb, bazarda 1, 1.20 manata satmalı olurduq. İndi isə 40 qəpiyə alıb, 50-60 qəpiyə satırıq".

S.Babayev qeyd etdi ki, hazırkı vəziyyətdə məhsulu bazara çıxartmaq sahibkara sərf etmir: "Ona görə də aldığımız məhsulları xüsusi saxlanclara və rayonda fəaliyyət göstərən soyuducu anbarlara yerləşdiririk. Toplanan meyvənin müəyyən hissəsi satış üçün yerli və paytaxt bazarlarına, eləcə də respublikamızın digər bölgələrinə göndəririk".

"Bununla yanaşı, Quba alması daha çox qonşu Rusiya Federasiyasının müxtəlif şəhərlərindəki satış mərkəzlərinə də ixrac olunur. Bunun üçün alma iki ay saxlanılır, bu müddətdə çürüməzsə, Rusiya Federasiyasına ixrac edirik" – deyə o bildirdi.

Satışın səviyyəsini və bazar qiymətlərini öyrənmək üçün isə Şabran və Siyəzən rayonlarında yerləşən bazarlarda olduq. Oradakı alıcıların da fikirlərini öyrənməyə çalışdıq.

Bol olmaqla yanaşı, məhsulun keyfiyyəti də yüksəkdir
© Sputnik / Leyla Abdullayeva
Bol olmaqla yanaşı, məhsulun keyfiyyəti də yüksəkdir

Şabran rayon sakini Mehriban Səmədova almanın bu il ucuz olmasına görə çox sevindiyini bildirdi: "11 yaşlı xəstə övladıma həkimlər hər səhər 1 stəkan alma şirəsi içməyi məsləhət görüb. Ötən il alma baha olduğuna görə hər gün şirə çəkib verə bilmirdim. Bu da valideyn olaraq məni narahat edirdi. İndi isə hər gün övladıma alma şirəsi verə biləcəyəm. Buna görə də çox sevincliyəm".

Siyəzən rayon sakini Əkbər Süleymanov isə almanın ucuz olmasından istifadə edib, qışa meyvə tədarükü görəcəyini dedi.

Qeyd edək ki, böyük bağlarda alma yığımı oktyabr ayının sonlarınadək davam edəcək.

12869
Teqlər:
növ, alma, bağ, Quba, bölgə, məhsul, qiymət
Əlaqədar
Quba rayonunda "alma istirahəti"
Bir xurcun alma hesabına çıxan qəzet...
Min bir dərdin dərmanı: Bakıda arıçılıq məhsulları sərgisi keçirilir
Dövlət müdaxilə etdi, strateji məhsulun alış qiyməti qaldırıldı
Qonşumuzun milli valyutası çökür, bizim isə ərzaq məhsullarımız bahalaşıb
İmtahan, arxiv şəkli

Nazirlikdən imtahanlarla bağlı açıqlama

10
(Yenilənib 22:45 15.01.2021)
Nicat Məmmədlinin sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib.

BAKI, 15 yanvar — Sputnik. "Pandemiyadan sonra – ola bilər ki, yaz, yaxud da daha sonrakı semestrdə ənənəvi imtahan sessiyasına keçəcəyik". Sputnik Azərbaycan-ın məlumatına görə, bunu Təhsil Nazirliyinin Elm, ali və orta ixtisas təhsili şöbəsininn müdiri Nicat Məmmədli deyib. Onun sözlərinə görə, pandemiya şəraitində yazılı imtahanlar olsa da, imtahanlar əsasən şifahi formaya keçib. "İmtahanların təşkilində güzəştlərin olması ilə bağlı təkliflər edilir. Amma hazırkı pandemiya dövrü bizdən təhsilə daha məsuliyyətli yanaşmağı tələb edir".

Şöbə müdiri bildirib ki, ötən ilin dekabrında imtahan sessiyasının keçirilməsi haqqında əmr imzalanıb: "Sessiya imtahanları onlayn qaydada 4 həftə ərzində keçiriləcək. Əslində keçən ilin son semestrindən dərslər onlayn keçirilir. Bu, bütün təhsil sistemi üçün bir çağırışdır. Əsas vacib məsələ bir çox hallarda imtahanların formalarının keçirilməsi idi. Bundan əvvəl imtahanlar daha çox yazılı şəkildə keçirilirdi".

10
Bakıda avtomobil tıxacı, arxiv şəkli

Dünyada yollar, məsafələr qısaldılsa da, Azərbaycanda əksinədir

35
(Yenilənib 22:25 15.01.2021)
Hazırda orta hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib.

Nigar İsgəndərova, Sputnik Azərbaycan

BAKI, 15 yanvar — Sputnik. Bu gün dünyanın bir çox ölkələri məhz yolları, məsafələri qısaltmaq, xüsusən də işçi qrupun rahatlığı üçün müəyyən planlar üzərində çalışırlar. Lakin Azərbaycanda bu müddət azalmaq əvəzinə daha da artırılır. Pandemiyadan öncə getdiyimiz yarım saatlıq yol bu gün 2 saatlıq yola çevrilib. Ümumiyyətlə, pandemiyadan əvvəl də Azərbaycanda bənzər mənzərə müşahidə edilirdi. Bu isə xüsusən gündəlik olaraq işə gedən şəxslər üçün böyük problemə səbəb olur. Yəni, qısa məsafəni hər iki istiqamət üçün qət edən şəxs gününün 4-5, indiki halda isə hətta 6-7 saaatını da yolda keçirmiş olur. Bəs nə etməli?

Öncə dünya ölkələrinin təcrübəsinə nəzər yetirək. Bu gün əksər ölkələrdə artıq şəhərin mərkəzində avtobusların hərəkəti məhdudlaşdırılır. Belə ki, müəyyən məsafədən gələn şəxslər şəhərin mərkəzində avtomobilini park edərək mərkəzdən lazım olan ünvana ya velosiped, ya da ki, ictimai nəqliyyatdan istifadə etməklə çatmış olur. Belə olan halda həm əlavə yanacağa qənaət edilmiş olur, həm havanın çirklənməsinin qarşısı alınır, həm şəhər mrəkəzi sərnişin və piyadalar üçün daha uyğun bir vəziyyətə gəlir, həm də avtomobillərin olmaması səbəbi ilə əlaqədar olaraq tıxaclar yaranmır və beləcə məsafə daha da qısaldılmış olur. 

Sputnik Azərbaycan bu problemlərin həlli barədə nəqliyyat üzrə ekspert Hüseyn Abdullayevlə söhbətləşib. "Azərbaycanda avtobus marşrut xətlərinin planlaşdırılmasında böyük problemlər var. Ümumiyyətlə, heab edirəm ki, Bakının avtobus-marşrut şəbəkəsi yenidən müasir prinsiplərlə qurulmalıdır. Vaxt itkisinə səbəb olan nüanslar aradan qaldırılmalıdır. Avtobuların yollarda gecikməsinin qarşısını almaq üçün müəyyən addımlar atılmalı, ayrıca zolaqlar salınmalı, dəhlizlərdə avtobuslara üstünlük verilməlidir. Bir sözlə ümumilikdə nəqliyyat infrastrukturu ilə bağlı islahatlar aparılmalıdır" - ekspert deyib.

"Magistral avtobus xətlərinin də köməkçi avtobus xətləri olmalıdır. İyerarxiyalı sistemdə mütləqdir ki, bir nəqliyyatdan digər nəqliyyat xəttinə keçid mümkün qədər tez baş versin. Bunun üçün bu marşrutlar hamısı qısa intervalla işləməlidir. Bundan başqa, insanlar böyük məsafələr qət etməməli və hər mübadilə üçün əlavə gediş haqqı ödəməməlidirlər. Lakin qeyd edim ki, Azərbaycanda nəqliyyat sistemində bir pərakəndəlik var, avtobus, metro və dəmiryolu xətti ilə ayrılıqda müəyyən qurumlar məşğul olurlar. Əsas dəhlizlərdə isə avtobuslara üstünlük verilmir", - deyə eskpert bildirir.

Xarici təcrübədən danışdıqda isə, o qeyd edir ki, avtobus marşrutları, həm də digər nəqliyyat növəri arasında konkret iyerarxiya olmalıdır: "Yəni, müəyyənləşir ki, bu xətlərdən hansılar magistral, hansılar köməkçi nəqliyyat yollarıdır. Əsas magistral marşrut xətlərinə sərnişinlərin çıxışını təmin etməkdir", - deyə ekspert əlavə edib.

Millət vəkili Fazil Mustafa isə fərqli fikirdədir. Bu barədə Sputnik Azərbaycan-a danışan millət vəkili belə bir infrastrukturun qurulmasının mümkünsüzlüyündən bəhs edir: "Hazırda yollarda yaranan sıxlıq ilk növbədə metro ilə bağlıdır. Bu səbəbdən əksəriyyət minik avtomobilindən istifadə etmək məcburiyyətində qalır. Məktəblər açılmasa da, şəhərdə fəlakətli səviyyədə tıxaclar var. Pandemiya şəraitində yaranan vəziyyət təbiidir. Çünki avtobuslar da riskli olduğundna insanlar şəxsi avtomobillərə üstünlük verirlər. Bu səbəbdən hələlik çıxış yolu haqda danışmaqda çətinlik çəkirəm. Amma düşünürəm ki, tədricən metronun açılmasını görməliyik. Çünki nəqliyyatda hədsiz yüklənmə var".

Millət vəkili heab edir ki, şəhərin mərkəzinə çatmamış avtomobillərin park edilməsi təcrübəsini Azərbaycanda tətbiq etmək çətin olar: "Düşünürəm ki, bunun heç faydası da olmayacaq. Çünki bizdə normal elektrik qatarı yoxdur. Bu təcrübə yalnız düzgün infrastrukturun qurulduğu şəhərlər üçün keçərlidir. Bizdə isə düzgün infrastruktur qurulmayıb, şəhərsalmanın prinsipləri pozulub. Xaricdə belədir ki, məktəbəqədər yaşda olan uşaqlar üçün xüsusi avtobuslar var. Bizdə məktəbəqədərlər 25 faiz təşkil etsə də, heç bunu da təmin edə bilmirik".

Bir sözlə, hazırda gündəlik hesabla 6 saatı yola sərf etdiyimizi nəzərə alsaq, aylıq olaraq bu rəqəmin azı 120 saat olduğunu deyə bilərik. Bu isə o deməkdir ki, gündəlik olaraq ictimai nəqliyyatdan istifadə edən şəxslər təkcə son 5 ayda 600 saatını yola sərf edib. 

Qeyd edək ki, pandemiyadan öncə isə gündəlik olaraq işə gedib-gələn və bir qədər şəhərin mərkəzindən kənarda qalan şəxslər 4 saatını yola sərf edirlər. Yəni, aylıq olaraq bu 80 saat, illik olaraq isə 960 saatdır.

Hələlik isə ümid təkcə metronun açılmasına qalır...

35
Türkiyə Prezidenti Rəcəb Tayyib Ərdoğan koronavirusdan peyvənd vurdurur

Ərdoğan koronavirus peyvəndindən sonra: "Sapsağlamam"

0
(Yenilənib 00:05 16.01.2021)
Türkiyə Prezidentinə yanvarın 14-də Çinin "Sinovac" şirkətinin istehsalı olan "CoronaVac" vaksini vurulub.

BAKI, 16 yanvar — Sputnik. Bu ana qədər hər hansı bir yan təsiri olmayıb. Sputnik Azərbaycan "Hurriyet" nəşrinə istinadən xəbər verir ki, bunu Türkiyə Prezidenti Rəcəb Tayyib Ərdoğan jurnalistlərə açıqlamasında bildirib.

"Bu ana qədər hər hansı bir yan təsiri olmayıb. Sapsağlamam. 28 gün sonra ikinci iynəmizi vurduracağıq", - deyə Ərdoğan qeyd edib.

Qeyd edək ki, Türkiyə Prezidenti Rəcəb Tayyib Ərdoğan canlı yayımda koronavirusa qarşı peyvənd edilib.

Türkiyə Prezidentinə Çinin "Sinovac" şirkətinin istehsalı olan "CoronaVac" vaksini vurulub.

0