İnternet xətti

"Stressi satın alırıq" - Cəmiyyətdə yeni qalmaqal

8907
(Yenilənib 16:40 05.10.2018)
"Əgər pravayder 24 saat internet satırsa, deməli müştərinin 24 saat servis xidməti də göstərməlidir"

Təranə Xudabaxşiyeva, Sputnik Azərbaycan

BAKI, 5 oktyabr — Sputnik. Müasir insanları internetsiz təsəvvür etmək mümkün deyil. Xüsusilə bəzi peşə sahibləri var ki, onların işləri məhz internet üzərində qurulub.

Amma ölkəmizdə bir çox provayderlərin fəaliyyəti müştərilərini qane etmir. Belə ki, ödəniş bitəndən 1 neçə dəqiqə sonra interneti kəsərək müştəriyə güzəştə getməyən internet provayderlər, bunun müqabilində heç də lazımi xidmət göstərmir.

Belə bir şikayətlə Sputnik Azərbaycan-a müraciət edən vətəndaş Tural Məmmədovun sözlərinə görə, bir müddət öncəcəyədək abunəçisi olduğu provayderin xidmətindən və təqdim etdiyi internetin keyfiyyətindən narazı qalaraq başqa provayderə müraciət edib: "Qərara gəldim ki, "Ailə TV"-yə keçim və təxminən 2 həftə əvvəl keçdim. Lakin elə ilk gündən problemlər başladı, az qala, hər gün mənzilimizə verilən internet kəsildi, günlərlə internetsiz qaldıq".

Vətəndaşın sözlərinə görə, ən acınacaqlısı isə, problemlə əlaqədar provayderin 920 "qaynar xətt" xidmətinin fəaliyyəti ilə bağlıdır: "Mən iş adamıyam, xanımım da, həmçinin. Gün ərzində evdə olmuruq. Axşam 7-dən sonra evə gəlirik və bəlli olur ki, internet yoxdur. Zəng edirəm ki, 920-yə ki, belə bir problemlə üzləşmişik. Standart və ağılasığmaz cavab verirlər: "Bizim texniki heyətin iş vaxtı saat 18.00-da bitir, indi heç bir kömək edə bilmərik, yalnız gündüz vaxtlarında problemin həlli mümkündür". Nə qədər izah etsən də ki, axı, gündüz evdə adam olmur, üstəlik niyə sizin nöqsanınız üzündən bu gecə internetsiz qalmalıyıq, təəssüfdən başqa heç bir cavab almırsan".

"İnanın, əsəblərimiz tamam korlanıb, hər gün bu problem üzündən stress yaşayırıq. Sanki, öz pulumuzla stress satın alırıq. Yaxşı, dərdini kimə deyəsən? Ümumiyyətlə, özəl provayderlərə nəzarət edən, nöqsanları aradan qaldırmalarını tələb edən, vətəndaşın şikayətini deyə biləcəyi bir qurum varmı. Belə çıxır ki, yoxdur və yoxdursa, biabırçılıqdır" — deyə vətəndaş bildirib.

Sputnik Azərbaycan şikayətlə bağlı "Ailə TV"-nin marketinq və PR meneceri Sabir Məşədizadə ilə əlaqə saxlayıb. Onun da cavabından belə məlum olub ki, şirkət 24 saat texniki xidmət göstərmək iqtidarında deyil.

"Təəssüf ki, bu, mümkün deyil. Belə-bir təcrübə heç bir kabel televiziyası operatoru və eyni zamanda, telekommunikasiya sahəsində xidmət göstərən operatorda tətbiq olunmur. Əgər abunəçinin internetində qeyri-iş vaxtı problem yaranarsa, növbəti iş günü əməkdaşlarımız yaxınlaşıb köməklik göstərirlər. Biz, eyni zamanda, şənbə-bazar və bayram günləri də çalışırıq".

Azərbaycan İnternet Forumunun prezidenti Osman Gündüz saytımıza şərhində bildirib ki, provayderlərdə yaranan problem təkcə bununla bitmir: "Məsələn, müqavilə ilə müştəriyə 2 meqabayt internet xətti verilməlidirsə, bundan az meqabayt verilir. Çünki provayderlər özləri "Delta Telekom" və "Azərtelekom"dan internet alır və müştərilərinə paylayır".

"Həmçinin, müştəri çox olduğundan provayder mərkəzdən aldığı interneti pik saatlarda paylayanda müştərilərin internetindən istifadəsində problem yaranır. Çünki provayder əsas provayderdən lazım olan qədər internet almır, əlində olan interneti isə daha çox müştəriyə satır. Nəticədə də bəzən pik saatlarda müştərilərin internetində problem yaranır, hətta internet saatlarla kəsilir" — O.Gündüz vurğulayıb.

"O ki qaldı pravayderlərin 24 saat xidmət göstərməməsinə, bu, doğru hal deyil. Əgər pravayder 24 saat internet satırsa, deməli müştərinin 24 saat servis xidməti də göstərməlidir. Əks halda onların göstərdikləri xidmət deyil. Provayderlər xidmətə başlayarkən, bunları nəzərə almalıdır. Əks halda, onların xidmətləri yarımçıqdır" — deyə ekspert əlavə edib.

8907
Teqlər:
abunəçi, Sputnik Azərbaycan, Osman Gündüz, vətəndaş, provayder, mənzil, internet, keyfiyyət, xidmət
Əlaqədar
İnternet istifadəçiləri böyük təhlükədə: Artıq heç nə əvvəlki kimi olmayacaq
Vətəndaşlara xidmət göstərəcək internet portalının hazır olma müddəti bilindi
Müşfiq Ələsgərli: “İnternet mediasında ciddi problemlər mövcuddur”
İnternetdə tanış olmağın sirləri açıqlandı
Rusiyadan ABŞ-a internet tənqidi
KT, arxiv şəkli

"Tibbi ölçü cihazları dövlət yoxlamasından keçməlidir"

6
(Yenilənib 16:38 22.01.2021)
Məqsəd diaqnostikada istifadə olunan klinik-laborator, rentgen aparatları və s.  kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır.

BAKI, 22 yanvar — Sputnik. Mülkiyyət formasından asılı olmayaraq, səhiyyə sahəsində istifadə olunan tibbi ölçü cihazları istismara verilənədək və təmirdən sonra ilkin yoxlamadan, istismar prosesində isə dövrü yoxlamadan keçirilməlidir. Bunu Sputnik Azərbaycan-a Antiinhisar və İstehlak Bazarına Nəzarət Dövlət Xidmətinin sektor müdiri Elməddin Quliyev deyib.

Məqsəd göstərilən səhiyyə xidmətləri zamanı xəstəliklərin diaqnostikasında istifadə olunan klinik-laborator, rentgen aparatları və s. kimi diaqnostik tibbi cihazların qeyri-dəqiq ölçmələrinin vətəndaşların həyatı və sağlamlığına mənfi təsirinin qarşısını almaqdır. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti səhiyyə sahəsində xidmət göstərən subyektlərin nəzərinə çatdırır ki, "Ölçmələrin vəhdətinin təmin edilməsi haqqında" Azərbaycan Respublikası Qanununa əsasən, səhiyyə sahəsində yalnız üzərində yararlılığına dair yoxlama nişanı və ya yoxlama haqqında şəhadətnaməyə malik tibbi ölçü cihazlarından istifadəyə icazə verilir.

İnzibati Xətalar Məcəlləsinə əsasən, səhiyyə sahəsində ölçmələrin tipi təsdiq edilməmiş və ya yoxlamadan keçirilməmiş ölçmə vasitələrindən istifadəyə görə vəzifəli şəxslər üçün 1500 manatdan 2000 manatadək, hüquqi şəxslər üçün 3000 manatdan 4000 manatadək məbləğdə cərimə olunur. Mülkiyyət formasından asılı olmayaraq, səhiyyə sahəsində xidmət göstərən subyektlər tibbi ölçü cihazlarını ilkin yoxlamadan və ya dövrü yoxlamadan keçirmək üçün "Azərbaycan Metrologiya İnstitutu" publik hüquqi şəxsə və ya ölçmələrin vəhdətinin təmin edilməsi sahəsində akkreditasiya olunmuş digər qurumlara müraciət edə bilərlər.

İstehlakçılara tövsiyə olunur ki, səhiyyə xidmətlərindən istifadə edərkən ölçmələrin qeyri-dəqiq nəticələri ilə qarşılaşmamaq üçün tibbi ölçü cihazlarının yararlılığına dair təsdiqedici sənədi tələb etsinlər, yoxlamadan keçməmiş tibbi cihazlarla göstərilən xidmətləri almaqdan çəkinsinlər. Bu kimi hallarla qarşılaşdıqları təqdirdə istehlakçılara İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət etmələri tövsiyə olunur (tel: 498-15-01 və 498-15-04).

6
Qida festivalı, arxiv şəkli

Azərbaycanda qastronomiya turizmi çiçəklənəcək: Konsepsiyada nələr var?

4
(Yenilənib 16:37 22.01.2021)
Bir il davam etməsi nəzərdə tutulan layihənin yekununda "Milli dadlar" konsepsiyası ictimaiyyətə təqdim ediləcək.

BAKI, 22 yanvar — Sputnik. Dövlət Turizm Agentliyinin dəstəyi ilə Azərbaycan Turizm Bürosu tərəfindən ölkəmizdə qastronomiya turizminin inkişafı üçün "Milli dadlar" konsepsiyasının hazırlanması işinə start verilib. Sputnik Azərbaycan-a Agentlikdən verilən məlumata görə, layihənin əsas məqsədi qastronomiya turizminin inkişafına nail olmaq, tarixi milli mətbəx nümunələrinə, onların hazırlanma və təqdim edilmə ənənələrinə yenidən həyat verib, yerli və əcnəbi turistlərə çatdırılmasına dəstək verməkdir.

Azərbaycan Turizm Bürosu unudulmuş və ya unudulmaq təhlükəsi olan milli mətbəximizə məxsus nümunələrin vahid mənbədə toplanması işinə dəstək verilməsi üçün "millidadlar.az" onlayn portalını təqdim edir.

Azərbaycan Turizm Bürosu bu sahədə məlumatlı olan hər kəsi portalda qeyd edilən qısa suallara cavab verməklə ölkəmizin milli mətbəx nümunələrinin, qastronomiya ənənələrimizin qorunub saxlanılması və beynəlxalq tanıdılması işinə dəstək olmağa çağırır.

Bir il davam etməsi nəzərdə tutulan layihənin yekununda "Milli dadlar" konsepsiyası ictimaiyyətə təqdim ediləcək.

Layihə çərçivəsində ölkəmizin zəngin kulinariya potensialının dərin etnoqrafik köklərə malik olması nəzərə alınaraq Bakı-Abşeron, Quba-Qusar, Şəki-Zaqatala, Cənub regionu, Naxçıvan Muxtar Respublikası, Gəncə-Qazax, Qarabağ, Dağlıq Şirvan, Kəlbəcər-Laçın və Aran bölgələrindən olan milli mətbəxə məxsus müxtəlif nümunələr haqqında məlumatlar toplanılıb. Elmi materiallardan və birbaşa yerli əhalidən əldə olunan informasiyalar əsasında Azərbaycan üzrə 900 ədəd nümunə pasportun işlənib hazırlanması nəzərdə tutulur.

Nümunə pasportda qida və inqrediyentin tərkib hissələri və görünüşü kimi məlumatlarla yanaşı, onun mədəni, tarixi, müalicəvi əhəmiyyəti və turizm marketinqi istiqamətində uyğunluğunun qeyd edilməsi nəzərdə tutulub.

4
Müdafiə naziri general-polkovnik Zakir Həsənov və Böyük Britaniya və Şimali İrlandiya Birləşmiş Krallığının Azərbaycandakı fövqəladə və səlahiyyətli səfiri Ceyms Şarp arasında görüş

Azərbaycan Britaniya hərbi sahədə əməkdaşlıq edəcəklər?

0
(Yenilənib 16:41 22.01.2021)
Səfir Ceyms Şarp deyib ki, Azərbaycan-Böyük Britaniya əlaqələrinin, xüsusilə hərbi sahədə əməkdaşlığın inkişafı üçün səylərini bundan sonra da əsirgəməyəcək.

BAKI, 22 yanvar — Sputnik. Müdafiə naziri general-polkovnik Zakir Həsənov yanvarın 22-də Böyük Britaniya və Şimali İrlandiya Birləşmiş Krallığının Azərbaycandakı fövqəladə və səlahiyyətli səfiri Ceyms Şarp ilə görüşüb. Bu barədə Sputnik Azərbaycan-a Müdafiə Nazirliyindən məlumat verilib.

Müdafiə naziri azad edilmiş ərazilərdə ordumuz tərəfindən həyata keçirilən tədbirlər, həmçinin Azərbaycan Ordusunda aparılan islahatlar və digər məsələlər barədə səfirə məlumat verib.

Görüş zamanı iki ölkə arasında müdafiə sahəsində, o cümlədən hərbi-texniki sahədə əməkdaşlıq üçün böyük potensialın olduğu və bu imkanların genişləndirilməsinin vacibliyi vurğulanıb.

Tərəflər ölkələrimiz arasında hərbi təhsil sahəsində əldə olunan razılaşmaların həyata keçirilməsinin, hərbi ingilis dili kurslarında dinləyicilərin sayının artırılmasının zəruriliyini xüsusi qeyd edib.

Öz növbəsində diplomat Vətən müharibəsində qazanılan qələbə münasibətilə Azərbaycan xalqını təbrik edib.

Azərbaycan-Böyük Britaniya əlaqələrinin, xüsusilə hərbi sahədə əməkdaşlığın inkişafı üçün səylərini bundan sonra da əsirgəməyəcəyini qeyd edən C.Şarp ikitərəfli əməkdaşlıq çərçivəsində Böyük Britaniyanın azad edilmiş ərazilərin minalardan və partlamamış döyüş sursatlarından təmizlənməsi işlərində Azərbaycana köməklik göstərə biləcəyini bildirib.

Görüşdə regional və ikitərəfli əməkdaşlıq, həmçinin qarşılıqlı maraq doğuran bir sıra digər məsələlər müzakirə edilib.

0
Teqlər:
Böyük Britaniyanın Azərbaycandakı səfiri, Böyük Britaniya