Mingəçevir şəhəri

Azərbaycanın gözdən iraq düşmüş cənnəti - Burda həm dincəlmək olar, həm yaşamaq

1497
(Yenilənib 17:31 15.07.2018)
Burada xarici və yerli turistlər yay istirahətini ucuz, səmərəli və maraqlı keçirə bilərlər

İlham Mustafa, Sputnik Azərbaycan

BAKI, 15 iyul — Sputnik. Təbii gözəlliklərlə və fərqli iqlim tipləri ilə zəngin Azərbaycanda həm yay, həm qış turizmi üçün əlverişli şərait mövcuddur. Xarici və yerli turistlərin yay istirahətini səmərəli və maraqlı keçirə biləcəyi bölgələrimizdən biri də Mingəçevir şəhəridir.

Eyniadlı "dəniz"-in sahilində yerləşən ecazkar şəhər

Mingəçevir bir çox xüsusiyyətlərinə görə Azərbaycanın ən gözəl şəhərlərindən biri, bəlkə də birincisidir. Coğrafi cəhətdən, təxminən, ölkənin mərkəzində yerləşən Mingəçevir Kür çayının sağ və sol sahillərini əhatə edir. Azərbaycanın 4-cü böyük şəhəri olan Mingəçevir, ərazisinə görə "dəniz" adlandırılan Mingəçevir Su Anbarının sahilində yerləşir.

Mingəçevir şəhəri
© Sputnik / Ilham Mustafa
Mingəçevir dənizindən şəhərə görüntü

Ölkədə ən geniş küçələrə sahib olan Mingəçevir, eyni zamanda ən yaşıl şəhər statusunu da özündə saxlayır. 1984-cü ildə SSRİ-nin "ən təmiz və ən yaşıl şəhəri" adını alan sözügedən ərazi bu gün də öz yaşıllığı və ekoloji təmizliyini qoruyub saxlamaqdadır.

Mingəçevir şəhəri
© Sputnik / Ilham Mustafa
Şəhərdə 10-dan çox park salınıb

Şəhərdə 10-dan çox böyük park salınıb. Eyni zamanda şəhərin geniş küçələri boyunca parklardan heç də geri qalmayan yaşıllıqlar salınıb ki, istirahət və əyləncə üçün çox əlverişlidir. Mülayim iqlim şəraitinə aid ərazidə il ərzində günəşli günlərin sayı 240-250-yə çatır. Bu da ilin yarıdan çoxunu çimərlik istirahətinin kefini çıxarmağa şərait yaradır.

Yay istirahətinin gözəl məkanı  

Şəhəri ikiyə bölən Kür çayı və "dəniz" sahili burada yay turizmi üçün əlverişli imkanlar yaradır. Mingəçevir su anbarının sahilində yerləşən, ölkənin yeganə şirin sulu çimərliyi ilin yarıdan çoxunu istirahətə gələnlərin üzünə açıq olur. Çimərlikdə ödənişli yerlərlə yanaşı tam ödənişsiz çimərlik sahələri də mövcuddur. Bundan başqa Bozdağın yamacları arasında 70 kilometr məsafəyə uzanan şirin su hövzəsi şəfalı qumlu sahilləri ilə dincəlmək, balıq tutmaq istəyənlərin yolunu gözləyir.

Mingəçevir şəhəri
© Sputnik / Ilham Mustafa
Mingəçevir su anbarının sahilində çimərlik

Həm Kür çayında, həm Mingəçevir Su Anbarında ilin bütün fəsillərində balıq tutmaq üçün şərait mövcuddur. Mingəçevir su hövzəsindəki Şah mahi (şamayka), şırvıd (sudak), xəşəm, sazan kimi balıq növləri və Kür çayında olan xərçənglər özünəməxsus dadı ilə fərqlənir.

Mingəçevir şəhəri
© Sputnik / Ilham Mustafa
Sahildə balıq tutmağın qiyməti 5-30 manat aralığında dəyişir

Mingəçevirdə istənilən istiqamətlərdə balıq tutmaq üçün tilov və digər ləvazimatlar tapmaq mümkündür. Qiymətləri isə 5 manatdan başlayaraq 30 manat aralığında dəyişir. Dəniz qırağında açıq suda balıq tutmaq üçün müxtəlif tipli kiçik qayıqlar kirayələmək mümkündür. Qayıqların bir saatlıq kirayə qiyməti 20-50 manat arasında dəyişir.

Mingəçevir şəhəri
© Sputnik / Ilham Mustafa
Kür çayı gəzintisi

Bundan başqa, istənilən vaxt, şəhərin bütün istiqamətlərində yerləşən dəbdəbəli restoranlarda və balıqçı daxmasını andıran kiçik yeməkxanalarda hazır balıq da yemək mümkündür. Bişirilən balıqların dadında fərq olmasa da qiymət və komfort baxımından turistlər büdcələrinə uyğun istənilən yeri seçə bilərlər.

Mingəçevir ovçuluq üçün də əlverişlidir. Ətrafdakı dağlarda kəklik, turac, dovşan, su hövzəsində isə qaz, ördək, qaşqaldaq, sutoyuğu və sultan quşlarına rast gəlmək olur. Lakin ilin bəzi aylarında quş ovu qadağan olunub. Ov etmək istəyən turistlər əvvəlcədən xüsusi icazə almalı və uyğun zaman seçərək aidiyyatı üzrə müraciət etməlidirlər.

Ucuz şəhər

Mingəçevirdə istirahətə gələnlər üçün istənilən büdcəyə uyğun otel, hostel və gündəlik evlər tapmaq mümkündür. Şəhərdə bir neçə mehmanxana fəaliyyət göstərir ki, onlardan biri 5 ulduzlu, 2-si isə 4 ulduzlu mehmanxanalardır.

5 ulduzlu oteldə otaqların gündəlik qiymətləri 90-240 manat arasında, 4 ulduzlu otellərdə isə 70-150 manat aralığında dəyişir. Şəhərin baxımlı yerlərində o birilərdən heç də geri qalmayan, nisbətən kiçik otellər də var ki, onlarda da qiymət 40-100 manat fərqindədir.

Mingəçevir şəhəri
© Sputnik / Ilham Mustafa
Mingəçevirdə ən müxtəlif qiymətə otellər tapmaq mükündür

Bundan başqa, şəhərdə hostel və yataqxana tipli, həmçinin kirayəlik mənzillər də tapmaq mümkündür. Hostellərin qiyməti 10 manatdan, kirayə evlər isə şəraiti və ərazisindən asılı olaraq gündəlik 20-50 manat arasında dəyərləndirilir.

Mingəçevir Azərbaycanın iri sənaye şəhərlərindən hesab olunsa da, bir çox müəssisələrin tam gücü ilə işləmədiyinə görə ölkənin kasıb bölgələrindən hesab olunur. Bu səbəbdən də bir çox məhsulları burada digər bölgələrə nisbətən daha ucuz əldə etmək mümkündür.

Bəs Mingəçevirə necə getmək olar?

Mingəçevir Bakıdan 323 km məsafədə yerləşir. Bura istirahətə getmək üçün həm şəxsi avtomobildən, həm taksidən, həm də avtobusdan istifadə etmək mümkündür. Bakıdan Mingəçevirə, təxminən, 4,5 saat yol qət etmək lazımdır.

Mikroavtobuslar Bakıdan-Mingəçevirə hər gün Bakı Beynəlxalq Avtovağzalından səhər saat 7:00-dan axşam 18:00-dək yola düşür. Böyük avtobuslar isə 15:00-dan 18:00-dək bir saat fasilə ilə yola çıxır. Avtobusda bir yerin qiyməti 6 manat təşkil edir.

Mingəçevirə taksi ilə getmək istəyənlər paytaxtdan və əks istiqamətdə adambaşına 15 manat ödəməklə mənzil başına çata bilərlər.

Dəmir yol vağzalından hər gün Mingəçevir-Bakı-Mingəçevir marşrutu ilə müasir tipli sürət qatarı xidmət göstərir. Şəhərin dəmir yol stansiyası Bakı-Tbilisi magistral dəmir yolundan 18 km məsafədə yerləşir.

Beynəlxalq əhəmiyyətli ən yaxın hava limanı 80 km məsafədə — Gəncə şəhərində, respublika əhəmiyyətli hava limani isə 30 km məsafədə — Yevlax şəhərindədir.

1497
Teqlər:
Mingəçevir su anbarı, hotel, cənnət, yaşıllıq, Mingəçevir, turizm, Kür çayı, çimərlik
 “TOÇKA-U” raketinin buraxılışı, arxiv şəkli

Beynəlxalq təşkilatlar rayonlarımızın raket atəşinə tutulması barədə məlumatlandırılıb

1
Ermənistan ərazilərindən döyüş əməliyyatları zonasından aralıda yerləşən Qəbələ, Kürdəmir və Siyəzən rayonlarında yaşayan dinc əhalinin və mülki infrastrukturun raket zərbələrinə məruz qalması diqqətə çatdırılıb

BAKI, 22 oktyabr - Sputnik. Müdafiə Nazirliyinin Beynəlxalq Hərbi Əməkdaşlıq İdarəsinin rəisi general-mayor Hüseyn Mahmudov tərəfindən ölkəmizdə akkreditə olunmuş xarici hərbi attaşelər və beynəlxalq təşkilatların ölkəmizdəki nümayəndələri üçün bu gün növbəti brifinq verilib.
Sputnik Azərbaycan-a Müdafiə Nazirliyindən daxil olan məlumata görə, brifinqdə qonaqlara Ermənistan Respublikasının münaqişədə birbaşa iştirakı, Ermənistan ərazilərindən döyüş əməliyyatları zonasından aralıda yerləşən Qəbələ, Kürdəmir və Siyəzən rayonlarında yaşayan dinc əhalinin və mülki infrastrukturun raket zərbələrinə məruz qalması, eləcə də humanitar atəşkəs razılığına əməl etməyərək açıq şəkildə onu pozması haqqında ətraflı məlumat verilib.
Əlavə olaraq, işğaldan azad olunmuş Cəbrayıl, Füzuli və Zəngilan rayonlarının ərazilərində olan inzibati yaşayış mərkəzlərinin, tarixi-memarlıq və dini abidələrinin dağıdılması və talan edilməsi, eləcə də döyüş texnikasının tibbi təyinatlı texnika adı altında döyüşlərdə istifadə edilməsi barədə də məlumat diqqətə çatdırılıb.

1
Teqlər:
Azərbaycan Müdafiə Nazirliyi, Siyəzən, Kürdəmir, Qəbələ, raket zərbələri, erməni təxribatı, Ermənistan-Azərbaycan, Dağlıq Qarabağ münaqişəsi
Mövzu:
Azərbaycan və Ermənistan arasında müharibə
Əlaqədar
İsrail səfiri Gəncədə: “Qurbanların başına gələnləri dinləmək ürəyimi ağrıdır”
Qəbələnin atəşə tutulması nəticəsində bir nəfər xəsarət alıb
Prezidentin köməkçisi: "Qəbələyə raketlər Qafan və Cermuk bölgələrindən atılıb"
Hikmət Hacıyev Ermənistanın Qəbələ, Kürdəmir və Siyəzənə raket atəşi barədə
Ermənistan ərazisindən Siyəzən, Qəbələ və Kürdəmir raket atəşinə tutulub

Azərbaycanın İranla sərhədindəki Ağbənddə bayrağımız dalğalanır - VİDEO

49
(Yenilənib 19:30 22.10.2020)
Dövlətimizin başçısı Ağbənd zastavasında Azərbaycan bayrağının qaldırılmasının videosunu da paylaşıb.

BAKI, 22 oktyabr - Sputnik. Ağbənd qəsəbəsinin azad edilməsi ilə Azərbaycan və İran İslam Respublikası dövlət sərhədinin tam nəzarətə götürülməsi təmin olundu.

Sputnik Azərbaycan bildirir ki, bu barədə Azərbaycan Prezidenti İlham Əliyev Twitter hesabında məlumat verərək, bu münasibətlə Azərbaycan və İran xalqlarını təbrik edib.

Həmçinin dövlətimizin başçısı Ağbənd zastavasında Azərbaycan bayrağının qaldırılmasının videosunu da paylaşıb.

​Qeyd edək ki, bu gün müzəffər Azərbaycan Ordusu Füzuli rayonunun Mollavəli, Yuxarı Rəfədinli, Aşağı Rəfədinli, Cəbrayıl rayonunun Sirik, Şıxlar, Məstəlibəyli, Dərzili kəndlərini, Zəngilanın Kolluqışlaq, Malatkeşin, Kənd Zəngilan, Genlik, Vəliqulubəyli, Qaradərə, Çöpədərə, Tatar, Tiri, Əmirxanlı, Qarqulu, Bartaz, Dəlləkli kəndlərini və Ağbənd qəsəbəsini işğaldan azad edib.

49
Teqlər:
Prezident İlham Əliyev, Azərbaycan ordusu, erməni təxribatı, Ermənistan-Azərbaycan, Dağlıq Qarabağ münaqişəsi, bayraq, Ağbənd qəsəbəsi, sərhəd, İran, Azərbaycan
Mövzu:
Azərbaycan və Ermənistan arasında müharibə
Əlaqədar
Dövlət başçısı: "Azərbaycan və İran dövlət sərhədi tam nəzarətə götürüldü"
Füzuli, Cəbrayıl və Zəngilanın 20 kəndi və 1 qəsəbəsi azad edildi - İlham Əliyev
İlham Əliyev: "Sülhməramlılarla bağlı həlledici sözü biz deməliyik"
İlham Əliyev: "Ermənistanın bu hökuməti ilə sülhlə nizamlanma perspektivi çox uzaqdır"
İlham Əliyev: "Dağlıq Qarabağda heç bir referendum olmayacaq"
Milli Məclis

Milli Məclisin növbəti plenar iclasının vaxtı gündəliyi məlum olub

0
(Yenilənib 19:26 22.10.2020)
"Azərbaycan Respublikasının Xocavənd rayonunun Vəng kəndinin Çinarlı kəndi adlandırılması haqqında" qanun layihəsinə, "Hərbi vəzifə və hərbi xidmət haqqında" və digər qanunlarda dəyişikliklərə baxılacaq

Xalid Məmmədov, Sputnik Azərbaycan

BAKI, 22 oktyabr — Sputnik. Milli Məclisin növbəti plenar iclasının vaxtı məlum olub.

Sputnik Azərbaycan-ın məlumatına görə, parlamentin iclası 27 oktyabrda keçiriləcək. İclasın gündəliyinə 8 məsələ daxil edilib.

Bunlar aşağıdakılardır:

1. "Azərbaycan Respublikasının Xocavənd rayonunun Vəng kəndinin Çinarlı kəndi adlandırılması haqqında" Azərbaycan Respublikası qanununun layihəsi barədə.

2. "Hərbi vəzifə və hərbi xidmət haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi haqqında (üçüncü oxunuş).

3. "Təhsil haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi haqqında (ikinci oxunuş).

4. "Peşə təhsili haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi haqqında (ikinci oxunuş).

5. Azərbaycan Respublikasının Meşə Məcəlləsində, Azərbaycan Respublikasının Torpaq Məcəlləsində, Azərbaycan Respublikasının Mülki Məcəlləsində, "Torpaq islahatı haqqında", "Torpaq bazarı haqqında", "Bələdiyyə torpaqlarının idarə edilməsi haqqında", "Dövlət rüsumu haqqında", "Daşınmaz əmlakın dövlət reyestri haqqında" və "Torpaqların dövlət ehtiyacları üçün alınması haqqında" Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi haqqında (birinci oxunuş).

6. Azərbaycan Respublikasının Əmək Məcəlləsində və Azərbaycan Respublikasının Ailə Məcəlləsində dəyişiklik edilməsi haqqında Azərbaycan Respublikası qanununun layihəsi barədə (birinci oxunuş).

7. "Hərbi qulluqçuların statusu haqqında", "Əhalinin sağlamlığının qorunması haqqında", "Yol hərəkəti haqqında", "Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında", "Avtomobil yolları haqqında", "Özəl tibb fəaliyyəti haqqında", "Dövlət qulluğu haqqında", "Psixiatriya yardımı haqqında", "Onkoloji yardım haqqında" və "Tütün məmulatlarının istifadəsinin məhdudlaşdırılması haqqında" Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi haqqında (birinci oxunuş).

8. "Tibbi sığorta haqqında" Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi haqqında (birinci oxunuş).

0