Məktəb

Məktəb psixoloqları üçün təlim keçirilib

383
(Yenilənib 20:14 12.07.2018)
Təlimə regionlardan olan 20 məktəb psixoloqu və Uşaq birliyi rəhbərləri cəlb edilib

BAKI, 12 iyul — Sputnik. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi ilə "Hüquq Dünyası" Hüquqi Təbliğat İctimai Birliyi tərəfindən icra edilən "Məktəb psixoloqlarının bilik və bacarıqlarının artırılması və regionlarda uşaq hüquqlarının təbliği ilə bağlı tədbirlərin təşkili" layihəsi çərçivəsində İsmayıllı rayonunda 2 günlük təlim həyata keçirilib. Təlimə regionlardan olan 20 məktəb psixoloqu və Uşaq birliyi rəhbərləri cəlb edilib.

Təlimin ilk günü "Hüquq Dünyası" Hüquqi Təbliğat İB-nin baş katibi, layihə rəhbəri Zaur Quliyev açaraq həyata keçirilən layihə, donor təşkilat barədə iştirakçılara məlumat verərək bildirib ki, bugünkü təlimə regionlardan 20 məktəb psixoloqu və uşaq birliyi rəhbəri cəlb olunub. Təlim zamanı müasir praktik psixoloji xidmətin aktual məsələlərinə uyğun mövzular tədris ediləcəyi, müxtəlif qiymətləndirmə formaları üzərində praktiki iş aparacağı vurğulanıb.

İsmayıllı rayon İcra Hakimiyyətinin əməkdaşı Nəsimi Teymurov həyata keçirilən layihənin əhəmiyyətini qeyd edərək, region psixoloqlarınin bilik və bacarıqlarının artırılması baxımından faydalı olacağını qeyd edib.

Təlimçi-ekspert, psixologiya üzrə fəlsəfə doktoru Elmira Mirzəyeva təhsildə psixoloji xidmətin məqsədi, vəzifələri və xüsusiyyətləri, sağlamlıq imkanları məhdud uşaqlarla, təhsildə uşaqlarla psixoloji işin təşkili, məktəb psixoloqunun fəaliyyətinin əsas elementləri, psixoloji qiymətləndirmə və konsultasiya mövzularına dair təqdimatlar edib. Təlimçi tərəfindən müxtəlif problemli situasiyalar üzrə praktiki diaqnostika, konsultasiyalar aparilmiş və müzakirələr, qrup işləri, təqdimatlar, rol oyunları kimi təlim üsulları həyata keçirilib.

Təlimçi-ekspertin dəstəyi ilə təlimdə iştirak etmiş hər bir psixoloq fəaliyyət göstərdiyi məktəbdə və reabilitasiya mərkəzində riskli davranışlara və zərərli vərdişlərə meylli uşaqlara təlim zamanı əldə etdiyi biliklərlə sosial-psixoloji xidmətin göstərilməsi və uşaqlar arasında psixodiaqnostika və psixokonsultasiya işini aparmaqla, gördüyü işlər barədə qisa hesabat hazırlayıb təşkilatçılara göndərilməsinin əhəmiyyəti qeyd olunub. Bunun layihənin davamlılığı üçün əsas amillərdən biri olacaq.

İştirakçılar layihə çərçivəsində təşkil olunan qeyri-formal təlim kursunun ümumtəhsil məktəblərində və reabilitasiya mərkəzlərində çalışan region psixoloqlarının bilik və bacarıqlarının artırılmasında böyük bir təcrübə olduğunu qeyd edib, layihəyə verdiyi dəstəyə görə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına, layihənin uğurlu icrasına görə "Hüquq Dünyası" Hüquqi Təbliğat İctimai Birliyi öz dərin təşəkkürünü bildirilmiş və məktəb psixoloqları və uşaq birliyi rəhbərləri üçün belə praktiki təlimlərin davamlı olaraq təşkil edilməsinin zəruriliyini qeyd ediblər.

Təlim kursunun sonunda iştirakçılara Sertifikatlar təqdim olunub.

383
Teqlər:
təlim, psixoloq, məktəb, Qeyri-Hökumət Təşkilatları
Gəncədə vəziyyət

Vətən müharibəsində dünyasını dəyişmiş mülki şəxslərə şəhid statusu verildi

3
(Yenilənib 12:19 05.12.2020)
Ümumilikdə, 206 nəfərdən 196 nəfərinə Prezidentin təqaüdü, 151 nəfərinə müavinət, 40 nəfərinə pensiya təyin edilib.

BAKI, 5 dekabr — Sputnik. Vətən Müharibəsi zamanı erməni terroru nəticəsində həlak olan 94 mülki şəxsə şəhid statusu verilib. Bu barədə Sputnik Azərbaycan-a Əmək və Əhalinin Sosial Müdafiəsi Nazirliyindən məlumat verilib.

Bildirilib ki, nazirliyin tabeliyindəki Dövlət Sosial Müdafiə Fondu tərəfindən onların ailə üzvlərinin şəhid ailə üzvləri üçün nəzərdə tutulan hüquqları təmin olunub.

Belə ki, erməni terroru nəticəsində şəhid olan mülki şəxslərin ailələrinin 206 üzvünə müvafiq sosial təminat növləri üzrə aylıq ödənişlər təyin olunub. Onların böyük əksəriyyətinə hüquqlarına uyğun olaraq həm Prezidentin təqaüdü, həm də pensiya (və ya müavinət) təyinatı aparılıb. Ümumilikdə, 206 nəfərdən 196 nəfərinə Prezidentin təqaüdü, 151 nəfərinə müavinət, 40 nəfərinə pensiya təyin edilib.

Qeyd edək ki, sentyabrın 27-də saat 06 radələrində Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Nəticədə cəbhə bölgəsində genişmiqyaslı hərbi əməliyyatlar başlayıb, kəndlərin intensiv atəşə tutulması nəticəsində mülki şəxslər həlak olublar. Mülki infrastruktur obyektlərinə ciddi ziyan dəyib. Azərbaycan Ordusunun ön xətt bölmələri düşmənin bu təxribatının qarşısını almaq və qoşunların qarşıdurma xəttinə yaxın zonalarda yaşayan mülki əhalinin təhlükəsizliyini təmin etmək məqsədilə cavab tədbirləri görüb.

2020-ci il noyabrın 10-da Azərbaycan, Rusiya və Ermənistan liderlərinin Qarabağ üzrə üçtərəfli bəyanatı imzalanıb. Bəyanata əsasən, Dağlıq Qarabağ münaqişə zonasında 2020-ci il noyabrın 10-u saat 00:00-dan etibarən bütün hərbi əməliyyatların dayandırılması və tam atəşkəs barədə bəyanat veriblər.
Bəyanata görə, Ağdam rayonu 2020-ci il noyabrın 20-də, noyabrın 25-də (ilkin olaraq noyabrın 15-i nəzərdə tutulurdu) isə Kəlbəcər rayonu Azərbaycana qaytarılıb. Dekabrın 1-də Laçın rayonu Azərbaycana qaytarılıb. Bununla yanaşı, təmas xətti və Laçın dəhlizi boyunca Rusiya Federasiyasının sülhməramlı kontingenti yerləşdirilir. Paralel olaraq Ermənistan silahlı qüvvələri işğal olunmuş ərazilərdən çıxarılır.
Tərəflərin razılığına əsasən, yaxın üç ildə Laçın dəhlizi üzrə Xankəndi ilə Ermənistanın əlaqəsini təmin edəcək yeni hərəkət marşrutunun tikintisinin planı müəyyən olunacaq. Daxili məcburi köçkünlər və qaçqınlar BMT-nin Qaçqınların işləri üzrə Ali Komissarının nəzarəti altında Dağlıq Qarabağın və ətraf rayonların ərazisinə qayıdacaqlar. İqtisadi və nəqliyyat əlaqələrinin bərpa olunacağı gözlənilir. Ermənistan Respublikası vətəndaşların, nəqliyyat vasitələrinin və yüklərin hər iki tərəfə maneəsiz hərəkətinin təşkil olunması məqsədi ilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat əlaqəsini təmin edəcək.

3
Teqlər:
ƏƏSMN, status, şəhid, həlak olan, mülki əhali, müharibə, Azərbaycan, Qarabağ
Təqvim, arxiv şəkli

Gələn ilin bayram günləri müəyyənləşdi: Beş gün Novruzu qeyd edəcəyik

13
2021-ci il martın 20, 21, 22, 23, 24-ü Novruz bayramı, mayın 13, 14-ü Ramazan bayramı, iyulun 20, 21-i Qurban bayramı günləri müəyyən edilib

BAKI, 5 dekabr - Sputnik. Gələn ilin bayram günləri müəyyənləşib. 

Sputnik Azərbaycan bildirir ki, Nazirlər Kabinetinin 2021-ci il üçün Novruz, Ramazan və Qurban bayramları günlərinin müəyyən edilməsi haqqında” qərarına əsasən, 2021-ci il martın 20, 21, 22, 23, 24-ü Novruz bayramı, mayın 13, 14-ü Ramazan bayramı, iyulun 20, 21-i Qurban bayramı günləri müəyyən edilib.

Qərara əsasən, yuxarıda nəzərdə tutulan günlər iş günü hesab edilmir.

13
Teqlər:
Nazirlər Kabineti, Ramazan bayramı, Qurban bayramı, Novruz bayramı, gələn il, bayram günləri