Daşgil vulkanı

Əcnəbilər Azərbaycandakı möcüzəsiz möcüzəyə toxunmaq üçün sıraya durublar - VİDEO

20264
(Yenilənib 16:45 12.07.2018)
Vulkana yaz-qış demədən, daha çox əcnəbilər gəlir, yuyunur, bəzən də palçıqdan yığıb aparırlar

İradə Cəlil, Sputnik Azərbaycan

BAKI, 12 iyul — Sputnik. Daşgil vulkanı Bakıdan 80 kilometr uzaqlıqda, Ələt qəsəbəsinin yaxınlığında yerləşir. Dövlət Neft Şirkətinin balansındakı ərazidə yerləşdiyinə görə Bakı və Abşeron Palçıq Vulkanları Qrupuna daxil edilməyib.

Sputnik Azərbaycan-ın reportaj hazırlayan əməkdaşı xəbər verir ki, ərazidə çox sayda palçıq vulkanları fəaliyyətdədir. Onlar arası-sıra qaynayır, kənara palçıq atır.

Daşgil vulkanı
© Sputnik / Irade JELIL
Daşgil vulkanı

Deyilənə görə, Daşgil vulkanının palçığı müalicəvi xüsusiyyətə malikdir. Məhz buna görə də insanlar oraya şəfa tapmaq ümidi ilə üz tuturlar. Biz də qərara gəldik ki, sözügedən məkana yollanaq və Daşgilin "sehrini" öz gözümüzlə görək.

Bakıdan vulkan yerləşən əraziyə müxtəlif yollarla getmək mümkündür. Qobustan ərazisindən vulkana gedən yol kələ-kötür və təhlükəlidir. Ən rahatı Ələt qəsəbəsindən keçən yoldur. Burada da qarşında iki yol açılır. Biri dağı aşaraq keçə biləcəyin, digəri isə, dağın altı ilə keçən yoldur. Nə qədər qəribə olsa da, vulkana gələnlərin əksəriyyəti rahat yolu qoyub, dağ yolu ilə keçməyə üstünlük verirlər.

Yol kənarında dayanmış taksi sürücüləri yol soruşanlara əsla yardımçı olmaq istəmirlər. Əksinə, "bu avtomobillə keçə bilməzsən", "yol bərbaddır, avtomobil sıradan çıxar" — deyərək Daşgilə getmək istəyənləri qorxutmağa çalışırlar. Və ya bələdçilik etmək üçün 10 manat istəyirlər.

Ən yaxşısı isə avtomobildə naviqasiya proqramını işə salmaq və Daşgil qəsəbəsini seçərək getməkdir. Bu zaman yol səni, istər-istəməz, aparıb vulkan ərazisinə çıxaracaq. Bununla yanaşı, yolda vulkanın olduğunu bildirən işarələr də quraşdırılıb.

Ərazidə taksi fəaliyyəti ilə məşğul olan İskəndər Əliyev bizə vulkanın "sirrindən" danışdı: "Burada metan qazı yerdən palçığı vurub üzə çıxarır. Və qaz asanlıqla alovlanır. Deyilənə görə, buradan çıxan palçıq bir çox xəstəliklər — dəri-zöhrəvi, o cümlədən revmatizm xəstəliyi üçün faydalıdır".

Onu da bildirdi ki, vulkana yaz-qış demədən, daha çox əcnəbilər gəlir, yuyunur, bəzən də palçıqdan yığıb aparırlar: "Ərazidə böyük ağızlı bir vulkan var və turistlər ona girərək çimməyə çalışırlar. Vulkanın kənarlarının dərinliyi 1.20 metrdir. Ancaq ayağını qoyduqca adamı daha da dərinliyə çəkir. Yəni tək halda vulkana girməyə cəhd etmək belə, olmaz. Əks halda, orada batıb qalarsan".

Əraziyə gəlməsinə baxmayaraq, vulkan barədə xəbərsiz olanlar da az deyil. Həmsöhbət olduğumuz Fazil Zeynalov da elələrindəndir. O, Daşgil vulkanına qonaqlarını gətirdiyini bildirdi: "Düzü, mən birinci dəfədir ki, bu vulkan haqqında eşidirdim. Qonaqlarım Filippindəndir. Onlar bu vulkan haqqında geniş məlumatlı idilər. Dedilər ki, palçığı faydalıdır. Onların sayəsində mən də gəlib görmüş oldum".

Daşgil vulkanı
© Sputnik / Irade JELIL
Daşgil vulkanı

25 ildən artıqdır ABŞ-ın Nyu-York şəhərində yaşayan Alla xanım isə, qeyd etdi ki, əvvəllər Azərbaycanda yaşayıb, vulkanlar haqqında da məlumatlıdır: "Mən Bakıda doğulmuşam, Tibb İnstitutunu bitirmişəm. Sonra Nyu-Yorka köçdüm. 25 ildən sonra Azərbaycana gəlmək məni çox sevindirir. Azərbaycan çox dəyişib. Vulkan haqqında əvvəl də eşitmişdim. Amma ilk dəfədir ki, görürəm".

Daşgil vulkanı Sputnik Azərbaycanın obyektivində
© Sputnik / Kamilla Əliyeva / Taleh Mahmudov

Ərazidə taksi fəaliyyəti ilə məşğul olan sürücülərdən öyrəndik ki, bura qış aylarında gəlmək çox təhlükəlidir. Yay aylarında isə, ya səhər tezdən, ya da axşamüstü gəlmək lazımdır. Çünki günortalar günəşin istisi əraziyə daha çox düşür. Və ərazidə günəşdən qorunmaq üçün yer olmadığına görə tez bir az zamanda günvurma baş verə bilər. 

Qeyd edək ki, turizm şirkətləri vulkanlara səyahətləri adambaşına 50-85, şəxsi avtomobil sürücüləri isə 50 manata həyata keçirir. Ən yaxşısı yaxınlıqdakı taksi xidmətindən istifadə etməkdir. Ələt qəsəbəsindən taksi sürücüləri bir nəfəri, vulkan sayından asılı olaraq 10-20 manata aparırlar.

20264
Teqlər:
Daşgil vulkanı, palçıq, müalicə, günəş, taksi, Bakı, sürücü, avtomobil
Əlaqədar
Bakıda "yatmış əjdaha" hər an oyana bilər: Sakinlərin həyatı təhlükə altındadır
Yer üzünü daha bir vulkan təhlükəsi alıb
Bu vulkanın nə zaman sakitləşəcəyi məlum deyil
Vulkan püskürməsi kəndləri məhv etdi, insanları diri-diri yandırdı
Vulkanın dəhşət saçan görüntüləri yayıldı - VİDEO
Həyətə çıxdı və... vulkanla qarşılaşdı - VİDEO
Vulkan püskürdü və onlarla ev yox oldu
Təcili yardım avtomobili

Oğuzun 60-dən çox sakini zəhərləndi - kimsə səbəbini bilmir

365
(Yenilənib 17:43 23.07.2021)
Oğuzda baş verən hadisənin səbəbləri, həmçinin qida zəhərlənməsi olub-olmaması ilə bağlı AQTA mütəxəssisləri tərəfindən araşdırmalara başlanılıb.

BAKI, 23 iyul — Sputnik. Oğuzda 50-dən çox şəxs zəhərlənib, sakinlər mədə-bağırsaq pozulması, qusma ilə bağlı Oğuz Rayon Mərkəzi Xəstəxanasına yerləşdiriliblər. Sputnik Azərbaycan-ın xəbərinə görə, zəhərlənən şəxslərə ilkin tibbi yardım göstərilib.

Azərbaycan Respublikasının Qida Təhlükəsizliyi Agentliyindən isə Sputnik Azərbaycan-a bildirilib ki, məsələ ilə bağlı araşdırma aparılır: "Oğuzda baş verən hadisənin səbəbləri, həmçinin qida zəhərlənməsi olub-olmaması ilə bağlı AQTA mütəxəssisləri tərəfindən araşdırmalara başlanılıb. Araşdırmaların nəticələri ilə bağlı ictimaiyyətə ətraflı məlumat veriləcək".

Yaranmış vəziyyətlə bağlı Oğuz Rayon Mərkəzi Xəstəxanasının şöbə müdiri Zümrüd Zəkəryəyeva Sputnik Azərbaycan-a bildirib ki, son 3 gün ərzində Oğuz Rayon Mərkəzi Xəstəxanasına 60-dan çox müraciət daxil olub. Onların da əksəriyyəti yeniyetmələrdir: 

"Bu 60 nəfərdən artıq müraciət edənlərə 1-15 yaş arası uşaqlar və böyüklər də daxildir. Şikayətlər qusma, ishal, ürəkbulanma, mədə-bağırsaq ağrıları və halsızlıqdır. Bəzilərində temperatur müşahidə edilir, bəzilərində yox".

Zümrüd Zəkəryəyevanın sözlərinə görə, xəstələrə simptomatik yardımlar edilib. Amma xəstəliyin səbəbini tampaq mümkün olmayıb. Kütləvi zəhərlənmə ehtimalı isə yoxdur. Çünki, müraciətlər eyni vaxtda yox, 3 gün ərzində edilib. Həm də xəstəxənaya gələnlər bir-birini tanımır və heç bir məclisdə birlikdə olmayıblar.

"Zəhərlənmənin hansı səbəbdən baş veridiyini xəstələrin özləri də bilmir. Qəflətən baş verir. Adətən gecə saatlarında bizə müraciətlər olur. Səbəbini aydınlaşdıra bilmirik. Bu səbəbdən də aidiyyəti orqanlara müraciət etmişik. Onlar iş aparırlar", - Zəkəryəyeva deyib.

Analizlər əsasında araşdırma aparan Oğuz MRX rayon Gigiyena və Epidemiologiya Mərkəzinə müraciət edib. Mərkəzin həkim-epidemioloqu Xuraman Abbasova da araşdırmaların davam etdiyini deyib: 

"Rayon Mərkəzi Xəstəxanasının müraciətinə əsasən xəstəxanada olduq, araşdırma apardıq. Tezliklə bu xəstəliyin hansı səbəbdən yaranmasını araşdırıb lazımi məlumatı verəcəyik".

Xəstəxanada müalicə alan yeniyetmə Cəmilə Rüstəmzadə də halının qəfildən pisləşdiyini deyib.

"Axşamdan halım pisləşdi. Ürəkbulanma, ishal və qusma oldu. Axşamdan təcili şöbəyə gəldik. Sistem filan vurdular. Vəziyyətimin niyə elə olduğunu demədilər. İndi bir az yaxşıyam, amma bir cavab verən yoxdur. Heç özüm də bilmədim nədən oldu".

Rayon sakini Səbirə Ağasıyeva da övladının sözügedən əlamətlərlə xəstəxanada müalicə aldığını və bu vəziyyətə hansı səbəbdən düşdüyünü bilmədiyini deyib.

"Oğlumun dünən halı pisləşdi, pis oldu. Halsızlıq, baş ağrısı, ürəkbulanma əmələ gəldi. Xəstəxənaya gətirdim, əllərindən gələni elədilər. Şükr Allaha, indi yaxşıdır", - o, əlavə edib. 

Eləcə də oxuyun:

365
Azərbaycan nümayəndə heyəti Tokioda Olimpiya kəndində

Olimpiadanın açılışında Azərbaycandan neçə idmançı iştirak edir?

25
(Yenilənib 15:21 23.07.2021)
Azərbaycan Milli Olimpiya Komitəsinin rəhbərliyi Tokiodakı Olimpiya kəndində ölkəmizi təmsil edən idmançıların yaşayış şəraiti ilə tanış olub və onlara məsləhətlərini veriblər.

BAKI, 23 iyul — Sputnik. Tokio Olimpiya Oyunlarının açılış mərasimində Azərbaycanın otuza qədər idmançısı iştirak edəcək. Sputnik Azərbaycan Milli Olimpiya Komitəsinin saytına istinadən xəbər verir ki, bu sözləri qurumun vitse-prezidenti Çingiz Hüseynzadə idmançılarla görüşü zamanı deyib.

Milli Olimpiya Komitəsinin vitse-prezidenti Çingiz Hüseynzadə və baş katibin müavini Azər Əliyev Tokioda Olimpiya kəndinə səfər ediblər. Azərbaycan nümayəndə heyətinin rəhbərliyi ilə görüşən Çingiz Hüseynzadə və Azər Əliyev yerli şərait, idmançıların hazırlığı ilə tanış olublar.

© Photo : National Olympic Committee of Azerbaijan
Azərbaycan nümayəndə heyəti Tokioda Olimpiya kəndində

"Çətindir, bir az ağır olacaq. Amma sizdən böyük nəticələr gözləyirik. İnanıram ki, yaxşı olacaq. Sizə uğurlar arzulayıram. Hamınızdan yaxşı nəticələr gözləyirik", - deyə Hüseynzadə bildirib.

"Bizim idmançılar da paraddan keçəcəklər. Onların hamısı indi burada yoxdur. Əsas idmançılarımız - güləşçilər, karateçilər, gimnastlar hələ Tokioya gəlməyib. Onların çıxışları olimpiadanın son günlərində olacaq. Bu gün açılışa buradakı idmançılarımız çıxacaq. Biz sabah yarışı olan idmançıları da mərasimə aparmayacağıq. 20-30 nəfərlik nümayəndə heyətimiz açılışda iştirak edəcək", - deyə Hüseynzadə bildirib.

© Photo : National Olympic Committee of Azerbaijan
Azərbaycan nümayəndə heyəti Tokioda Olimpiya kəndində

Azərbaycan Tokio-2020-də

Tokio Yay Olimpiadasında ölkəmizi 44 idmançı təmsil edəcək. Onlar 40 lisenziya qazanaraq 14 idman növündə - cüdo, güləş, bədii gimnastika, idman gimnastikası, karate, boks, taekvondo, yüngül atletika, güllə atıcılığı, qılıncoynatma, veloidman, badminton, üzgüçülük və triatlonda - çıxış edəcəklər.

Azərbaycan üçün bu, 2004-cü ildə Afinada keçirilən Olimpiya Oyunlarından bəri ən az sayda Olimpiya lisenziyasıdır, o vaxt idmançılarımız 38 lisenziya qazanmışdılar.

2008-ci ildə Pekində azərbaycanlı idmançılar 44, 2012-ci ildə Londonda 53, 2016-cı ildə Rio-de Janeyroda 56 lisenziya qazanıblar. 1996-cı ildən bəri olimpiadalarda idmançılarımız 43 medal qazanıblar ki, bunun da 7-si qızıl, 11-i gümüş, 25-i isə bürüncdür.

Həmçinin oxuyun:

25
Здание Министерства иностранных дел Азербайджанской Республики в Баку

XİN Azərbaycan Ordusunun hərbi qulluqçusunun öldürülməsi barədə

0
(Yenilənib 18:34 23.07.2021)
Ermənistan tərəfinin son zamanlar davamlı təxribatlara əl atması, Azərbaycan mövqelərini atəşə tutaraq, bölgədəki vəziyyəti gərginləşdirmək cəhdləri qəbuledilməzdir və vəziyyətin bu şəkildə inkişafının bütün məsuliyyəti Ermənistanın üzərinə düşür.

BAKI, 23 iyul - Sputnik.Azərbaycan Respublikası Xarici İşlər Nazirliyinin Mətbuat xidməti idarəsi Ermənistan silahlı qüvvələrinin Ermənistan-Azərbaycan dövlət sərhədinin Kəlbəcər rayonu sahəsindəki mövqelərini atəşə tutması barədə məlumat yayıb. 

Məlumatda deyilir: 

"Azərbaycan Respublikası Müdafiə Nazirliyinin məlumatına əsasən, bu ilin 23 iyul tarixində Ermənistan silahlı qüvvələri Azərbaycan Ordusunun Ermənistan-Azərbaycan dövlət sərhədinin Kəlbəcər rayonu sahəsindəki mövqelərini atəşə tutub. Qarşı tərəfdən açılan snayper atəşi nəticəsində bir hərbi qulluqçumuz şəhid olub.

Ermənistan tərəfinin son zamanlar davamlı təxribatlara əl atması, Azərbaycan mövqelərini atəşə tutaraq, bölgədəki vəziyyəti gərginləşdirmək cəhdləri qəbuledilməzdir və vəziyyətin bu şəkildə inkişafının bütün məsuliyyəti Ermənistanın üzərinə düşür.

Azərbaycan, beynəlxalq sərhədləri çərçivəsində ərazi bütövlüyünü müdafiə etmək, habelə bölgədə sülh və təhlükəsizliyi təmin etmək üçün bütün lazımi addımları atmaq hüququnu özündə saxlayır".

Atəşkəsin növbəti dəfə pozulması

Qeyd edək ki, iyulun 23-ü saat 16:00 radələrində Ermənistan silahlı qüvvələrinin bölmələri Basarkeçər rayonu ərazisindəki mövqelərindən Azərbaycan Ordusunun Ermənistan-Azərbaycan dövlət sərhədinin Kəlbəcər rayonu sahəsindəki mövqelərini atəşə tutub.

Qarşı tərəfdən açılan snayper atəşi nəticəsində hərbi qulluqçumuz gizir Yaqublu Fərman Telman oğlu şəhid olub.

Müdafiə Nazirliyinin bildirdiyinə görə, hazırda qeyd olunan istiqamətdə yerləşən Azərbaycan Ordusunun bölmələri tərəfindən cavab tədbirləri həyata keçirilir.

"Ermənistan tərəfi bu kimi təxribat yolu ilə qəsdən iki ölkənin dövlət sərhədində vəziyyəti gərginləşdirmək məqsədi güdür. Baş vermiş təxribata görə bütün məsuliyyət tam şəkildə Ermənistanın üzərinə düşür", - MN bildirib.

Həmçinin oxuyun: 

* Düşmən Kəlbəcəri atəşə tutdu, Azərbaycan Ordusunun hərbçisi şəhid oldu

* Ermənistan Naxçıvandakı mövqelərimizi atəşə tutub, hərbçimiz yaralanıb - MN

* Kəlbəcər Ermənistan ərazisindən atəşə tutulub, cavab atəşi ilə susdurulub

* Ağdamdakı bölmələrimiz atəşə tutulub, Azərbaycan Ordusunun hərbi qulluqçusu yaralanıb

* Ermənistan Tovuz və Kəlbəcərdəki mövqelərimizi atəşə tutub

0