Sədərək ticarət mərkəzi

Elektrik böhranı qiymət artımına da səbəb oldu

516
(Yenilənib 22:40 03.07.2018)
Fürsətçil tacirlər qiymətləri "şişirdib"

BAKI, 3 iyul — Sputnik. Xəbər verdiyimiz kimi, dünən gecə ölkə ərazisində elektrik enerjisinin ilə bağlı ciddi böhran yaşanıb. Elektrik enerjisinin kəsilməsi özü ilə bərabər bir çox sahələrdə də problemlər yaradıb. Paytaxtın, demək olar ki, əksər hissəsində hazırda elektriklə yanaşı su da yoxdur.

Qəribəsi odur ki, ölkədə yaşanan elektrik böhranı qiymət artımına da təsir edib. Artım daha çox "Sədərək" Ticarət Mərkəzində müşahidə olunur. Bu barədə Sputnik Azərbaycan-a "Sədərək"də fəaliyyət göstərən bir neçə mağaza əməkdaşı məlumat veriblər.

Onlar bildiriblər ki, Sədərək bazarında hazırda işıqlar yanmır: "Səhərdən bazara gəlmişik, ancaq işləyə bilmirik. İşıq yoxdur, mağazalar qaranlıqdır, həm də çox istidir deyə, oturub işləyə bilmirik". 

Həmçinin qeyd ediblər ki, bazardakı kafe və yeməkxanalar işığın olmamasından istifadə edib qiymətləri qaldırıblar: "Bu gün çox az sayda kafe və yeməkxana işləyir. İşləyənlər də fürsətdən istifadə edib qiymətləri ikiqat "şişirdiblər". Hər gün bir manata aldığımız çayı bu gün iki manata almağa məcbur olduq".

Mağaza əməkdaşları onu da vurğulayıblar ki, bazarda məişət avadanlıqlarının satışında da qiymət artımı müşahidə olunur. Ancaq bu artım bir neçə gündür ölkə ərazisində hökm sürtən anomal istilərlə əlaqədardır.

"Havalar normadan artıq isti keçdiyinə görə kondisionerlərin, sərinkeşlərin qiyməti son bir neçə gündə artıb. Məsələn, bir həftə əvvəl 1020 manata təklif olunan kondisioner hazırda 1100 manata satılır. Sərinkeşlərin qiymətində isə keyfiyyətinə və firmasına görə 2-20 manat arası artım var. Bu artım son günlərdə məişət texnikasına tələbatın artması ilə bağlıdır" – deyə qeyd ediblər.

Onu da öyrəndik ki, bazarda bu gün alış-veriş edənlərin sayı qiymətlərlə tərs mütənasibdir. Belə ki, bazara mal almağa gələnlərin sayında əvvəlki günlərlə müqayisədə azalma hiss olunur. 

Qeyd edək ki, bu gecə Mingəçevir şəhərində fəaliyyət göstərən ölkənin ən böyük elektrik stansiyası olan Azərbaycan İES 6-cı enerji blokunda baş vermiş partlayış və yanğın nəticəsində respublikanın əksər hissəsi qaranlığa qərq olub. Aparılan təcili və təxirəsalınmaz işlər nəticəsində bir neçə saat içərisində ölkə ərazisinin 80%-ində elektrik enerjisinin verilməsi bərpa olunub.

Hazırda isə elektrik enerjisinin kəsilməsi ilə bağlı digər sahələrdə yaranmış fəsadların aradan qaldırılması istiqamətində işlər görülür. Artıq bir çox sahələrdə həyat normal məcrasına dönüb.

516

Dövlət komitəsi "Uşaqlar üçün kitab" olayına reaksiya verdi - RƏSMİ

1
Ailə, Qadın və Uşaq Problemləri üzrə Dövlət Komitəsi: “Uşaqlar üçün nəzərdə tutulan "kitab" ekspert rəyi olmadan çap edilib”.

BAKI, 12 avqust - Sputnik. Ailə, Qadın və Uşaq Problemləri üzrə Dövlət Komitəsi bu gün KİV-də və sosial şəbəkələrdə uşaq ədəbiyyatının spesifik xüsusiyyətlərinə və ona olan tələblərə uyğun gəlməyən, lakin uşaq auditoriyası üçün nəzərdə tutulduğu qeyd edilən “Qaz ilə göyərçinin əhvalatı” adlı kitabla bağlı məlumat yayıb.

Dövlət Komitəsindən verilən məlumatda bildirilir ki, Azərbaycan Yazıçılar Birliyinin üzvü olduğu iddia edilən şairə Aygün Bal müəllifi olduğu kitabında uşaqların yaş xüsusiyyətlərini, həmçinin seçdiyi mövzunun didaktik və tərbiyəvi əhəmiyyətini nəzərə almayıb: 

"Şübhəsiz ki, bədii ədəbiyyatın tərkib hissəsi olan uşaq ədəbiyyatı birbaşa təlim-tərbiyə və yeni nəslin ədəbi zövqünün formalaşması vasitələrindən biridir. Məhz bu səbəbdən hər bir ədəbi nümunə gələcəyimiz olan övladlarımızın formalaşması işinə öz müsbət təsirini göstərməklə yanaşı, həm də uşaq psixologiyasına və marağına müvafiq məzmunda və üslubda yazılmalıdır. Adıçəkilən çap məhsulunda istifadə olunan ifadələrin azyaşlı uşaqlara göstərə biləcəyi mənfi təsirləri nəzərə alaraq vəsaitin istifadəsinin Azərbaycan Respublikasının qanunvericiliyinin tələblərinə uyğun gəlmədiyini qeyd etmək lazımdır.

Belə ki, ailə institutunu nüfuzdan salan informasiyalar uşaqlar arasında dövriyyəsi qadağan olunan informasiyalar sırasına aid edilib. "Uşaqların zərərli informasiyadan qorunması haqqında" Azərbaycan Respublikası Qanununun 4-cü maddəsinə əsasən həmin informasiya məhsullarının uşaqlar arasında yayılması qadağandır. Həmçinin, bu qanunun tələblərinə zidd olaraq sözügedən "kitab" ekspert rəyi olmadan çap edilib.

Məlumat üçün bildiririk ki, İnzibati Xətalar Məcəlləsinin 388-2.0.2-ci maddəsinə əsasən informasiya məhsulunun “Uşaqların zərərli informasiyadan qorunması haqqında” Azərbaycan Respublikasının Qanununda nəzərdə tutulmuş qaydada yaşa görə təsnifatlaşdırılmasını təmin etmədən, o cümlədən həmin Qanunla müəyyən edilmiş hallar istisna olmaqla informasiya məhsulunu müvafiq yaş kateqoriyasına uyğun işarələmədən ölkə ərazisində yayılmasına görə inzibati məsuliyyət nəzərdə tutulub.

Nazirlər Kabinetinin 29 iyul 2020-ci il tarixli 267 nömrəli Qərarı ilə təsdiq edilmiş “İnformasiya məhsulunun yaş kateqoriyalarına aid edilməsi Qaydaları”na əsasən informasiya məhsullarının ekspert rəyi olmadan yayılması inzibati məsuliyyətə səbəb olur.

Ailə, Qadın və Uşaq Problemləri üzrə Dövlət Komitəsi olaraq uşaqların istifadəsi üçün bu kimi informasiya məhsullarının yayılmasını məqsədəuyğun olmadığını vurğulamaqla yanaşı, bu barədə məlumatların yayılmasına görə qanunvericilikdə nəzərdə tutulmuş qaydada müvafiq tədbirlərin görüləcəyini diqqətə çatdırırıq".

1
Mehdiabad qəsəbəsində antisanitariya

Bakıda bələdiyyənin əməkdaşı cərimə edildi

8
(Yenilənib 23:33 11.08.2020)
Mehdiabad Bələdiyyəsinin əməkdaşı Z.Yarışov və Bakı şəhər sakini K.Əhmədov barəsində protokollar tərtib edilib. Z.Yarışov 3.000, K.Əhmədov isə 600 manat məbləğində cərimələniblər.

BAKI, 11 avqust — Sputnik. Daxili İşlər Nazirliyinin Baş İctimai Təhlükəsizlik İdarəsi Ekologiya və Təbii Sərvətlər Nazirliyinin müvafiq qurumları ilə birgə sanitariya-gigiyena qaydalarının pozulması hallarının qarşısının alınması məqsədilə reydlər keçiriblər.

Sputnik Azərbaycan Daxili İşlər Nazirliyinin məlumatına istinadla xəbər verir ki, avqustun 6-da keçirilən reydlər zamanı Abşeron rayonunun Mehdiabad qəsəbəsində yerləşən "Şok Market"in yaxınlığında və Binəqədi rayonu Binəqədi gölü ərazisində məişət tullantılarının qalaqlanması və yandırılması faktları aşkar edilib.

İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsinin tələblərini pozduqlarına görə Mehdiabad Bələdiyyəsinin əməkdaşı, qəsəbə sakini Z.Yarışov və Bakı şəhər sakini K.Əhmədov barəsində protokollar tərtib edilib. Z.Yarışov 3.000, K.Əhmədov isə 600 manat məbləğində cərimələniblər.

Bu istiqamətdə tədbirlər davam etdirilir.

8