Tovuz rayonu Ağdam kəndinin sakinləri

Azərbaycanda iki kənd bir-biri ilə müharibə vəziyyətinə gəlib

3920
(Yenilənib 10:04 01.05.2018)
Sakinlər rəsmiləri günahlandırır, rəsmilərsə sakinlərin yalan danışdıqlarını iddia edirlər

İlham Mustafa, Sputnik Azərbaycan

BAKI, 1 may — Sputnik. Azərbaycanda müstəqillik qazandıqdan sonra aparılan ən uğurlu islahatlardan biri də torpaqların pulsuz olaraq kəndlilərə paylanması oldu. Sürətlə aparılan bu islahatın uğurları göz qabağında olsa da, səlahiyyətli şəxslərin səhlənkarlığı, məsuliyyətsizliyi səbəbindən vətəndaşların bəzi çətinliklərə rast gəldiklərinin şahidi oluruq.

Tovuz rayonu Ağdam kəndinin sakinləri də bu cür problemlə üzləşdiklərini iddia edirlər. Kənd sakinlərinin Sputnik Azərbaycan-ın bölgə müxbirinə bildirdiyinə görə, 1990-cı ildə inzibati ərazi islahatları aparılarkən keçmiş Ağamalıoğlu sovxozu bölünərək Ağdam və Vahidli inzibati ərazi vahidliyinə ayrılıb. Bundan 9 il sonra isə hər iki kənddə torpaq islahatlarının həyata keçirilməsi ilə Ağdam sakinlərinin problemləri başlayıb.

Tovuz rayonunun Ağdam kəndi
© Sputnik / Ilham Mustafa
Tovuz rayonunun Ağdam kəndi

Sakinlərin iddiasına görə, artıq 20 ilə yaxındır ki, onlar öz torpaqlarını əkib-becərə bilmirlər. İnzibati ərazi islahatı zamanı kənd torpaqlarının qonşu kəndə verilməsi, yerli qurumların isə onların problemlərini həll etmək istəməməsi Ermənistanla təmas xəttində yerləşən Ağdamı qonşu kəndlə də müharibə vəziyyətinə gətirib.

Kənd sakini Pərgar Həsənov üzləşdikləri problemlə bağlı bunları deyib: "Kəndlər 1990-cı ildə bölünüb və hər birinə ayrı xəritələr işlənilsə də, islahat yalnız Ağdam kəndinin ərazisində aparılıb. Buna görə 61% təsərrüfat sahibinin imzası ilə bir çox qurumlara məktub ünvanladıq. Dəfələrlə nümayəndələr gəldi və paylanan torpaqların bir hissəsində səngərlər qazıldığını, təmas xəttinə çox yaxın olduğunu gördükdən sonra, sərhəd bölgəsi olduğu əsas gətirilərək islahatlar dayandırıldı və nəticələr ləğv edildi".

Azərbaycan SSR Ali Sovetinin 29 avqust 1990-cı il tarixli qərarı
© Sputnik / Ilham Mustafa
Azərbaycan SSR Ali Sovetinin 29 avqust 1990-cı il tarixli qərarı

Digər kənd sakini Nəsimi Bağırbəyli isə islahatların rəsmi qaydada dayandırılmasına rəğmən, mərkəzi bazada əks olunmadığını deyib: "Torpaq islahatı yerli aqrar islahat komissiyasının qərarı ilə dayandırılsa da, belə görünür ki, bunu yuxarı təşkilatlardan gizlədiblər. Necə ola bilər ki, islahatın dayandırıldığı, əhalinin 61%-inin torpaq aktlarını təhvil verdiyi halda, sosial yardım üçün müraciət edənlərin məlumatlarını mərkəzi bazaya vuranda adlarına pay torpağı çıxır və imtina gəlir ki, "siz pay torpağını gizlətmisiniz". Eyni zamanda, yuxarı təşkilatlara məktub yazanda cavab gəlir ki, bizdə islahatın dayandırılması barədə heç bir məlumat yoxdur".

Kəndin yaşlı sakinlərindən olan İsa Əliyev isə deyir ki, bu problem qonşu kəndləri üz-üzə qoyub: "Xəritədə aydın görünür ki, Axınca çayının sağ sahili Vahidli, sol sahili isə Ağdam kəndinin ərazisi kimi göstərilib. Milli Məclisin qərarı, prezidentin təsdiqi var bu haqda. Yerli təşkilatlar isə məsələni həll eləməməklə iki kəndi üz-üzə qoyub, qardaş qırğınına səbəb olmaq istəyirlər".

Kənd sakini Qasım Hacıyev hər iki kəndin rəhbərliyi və sakinlərinin iştirakı ilə razılaşma aktı imzalandığını, lakin Vahidli camaatının bu razılaşmaya əməl etməməsindən şikayətlənib: "Yerlərimizin ətrafına hərlənə bilmirik. Vahidli camaatı yığılaraq davaya gəlir, polis orqanlarına məlumat verirlər. Onlarsa gəlib müvəqqəti sakitləşdirməklə məşğul olurlar. "Bu məsələ aydınlaşdırılana kimi heç bir tərəf əkib-becərməsin" deyirlər. Məsələ ilə heç bir rəsmi qurum maraqlanmaq istəmir. Nəticədə, Ağdam camaatının torpağa bu qədər ehtiyacı olduğu halda, 10 hektarlarla ərazi əkilməmiş qalır. Torpaq olmadığından qonşu rayonlarda fəhləlik edirik".

Vahidli sovetliyinin inzibati xəritəsindən çıxarış
© Sputnik / Ilham Mustafa
Vahidli sovetliyinin inzibati xəritəsindən çıxarış

Sakin Şıxəli Süleymanov isə müharibə nəticəsində kənd qəbiristanlığının, əkinə yararlı torpaqlarının bir hissəsinin neytral ərazilərdə qaldığını, digər əkinə yararlı ərazilərdənsə kimlərinsə məsuliyyətsizliyi ucbatından istifadə edə bilmədiklərindən gileylənib: "İcra hakimiyyəti rəhbərliyinin qəbuluna gedirik, deyirlər ki, "filan təşkilata məlumat vermişik, düzələcək". İdarə ilə əlaqə saxlayırıq, "bizə heç bir göstəriş verilməyib" deyirlər. Yenidən gedirik, bu dəfə başqa təşkilata tapşırıldığı bildirilir. Oradan da maraqlananda məlum olur ki, əslində, heç bir tapşırıq verilməyib. Nəticədə 20 ildir ki, torpaqsızıq".

Daşınmaz Əmlakın Dövlət Reyestri Xidmətinin 8 fevral 2018-ci il tarixli məktubu
© Sputnik / Ilham Mustafa
Daşınmaz Əmlakın Dövlət Reyestri Xidmətinin 8 fevral 2018-ci il tarixli məktubu

Məsələ ilə bağlı Sputnik Azərbaycan-a açıqlama verən Tovuz Rayon İcra Hakimiyyəti başçısının müavini Niftalı Qasımov sakinlərin iddiasının doğru olmadığını, islahat dayandırılsa da, nəticələrinin ləğvi barədə söhbət getmədiyini bildirib: "Torpaq islahatı keçmiş Ağamalıoğlu sovxozunun torpaqlarında aparıldığından hər iki kəndin arasında bərabər qaydada bölünüb. Sonradan islahatdan narazı qalan bir qisim kənd sakini torpaq aktlarını təhvil versə də, pay torpaqları daha yaxşı ərazilərə düşən təsərrüfat sahibləri sənədləri özlərində saxladılar".

"Mərkəzi bazada adlarına torpaq payı çıxması isə, ondan irəli gəlir ki, torpaq aktları çap olunduğuna görə, sənədlər mərkəzi bazaya işlənib. İslahatın dayandırılması isə doğrudur, lakin nəticələrinin ləğv olunması haqda söhbət getmir. Müharibədən sonra islahat aktlarına əsasən, hər kəsin torpaq payı ölçülüb veriləcək", — icra başçısının müavini əlavə edib.

Rayon rəsmisi problemdən müvəqqəti çıxış yolunu da göstərib: "Torpaq aktlarının olmasına baxmayaraq, heç bir sakinin adına faktiki torpaq yoxdur. Camaat müvəqqəti olaraq torpaqları öz aralarında razılaşaraq bölüb, istifadə etsin".

3920
Teqlər:
torpaq islahatı, özəlləşdirilmə, Vahidli kəndi, Ağamalıoğlu sovxozu, Ağdam kəndi, müstəqillik, Sputnik Azərbaycan, kənd, təmas xətti, Tovuz, rayon, Azərbaycan, cəbhə
Əlaqədar
Azərbaycanda qədim kəndin sakinləri kütləvi köç edəcək - AYDA
Kəndlilər xəzinə tapdı, amma xərcləyə bilməyəcəklər
Qubada faciə: Kəndirlə kanala düşən iki nəfəri su apardı
Balaca kəndin böyük problemi: Bir dayanacaq qədər yaxın olan həll yolu
Təhlükə ilə üz-üzə, lakin nikbin: Cəbhəyanı kəndimizin bir günü

"Lotu Quli"nin məzarı üstündə atışma olub, 1 nəfər ölüb

5
Silahlı insident nəticəsində bir azərbaycanlı başından güllələnib. O, aldığı güllə yarasından hadisə yerində ölüb.

BAKI, 19 yanvar - Sputnik. İstanbulun Esenyurt rayonunda "Lotu Quli" ləqəbli kriminal avtoritet Nadir Səlifovun məzarı üstündə silahlı insident olub.

APA-nın verdiyi xəbərə görə, silahlı insident nəticəsində bir azərbaycanlı başından güllələnib. Güllələnən şəxsin Əli Həşimov olduğu bildirilir. O, aldığı güllə yarasından hadisə yerində ölüb.

Onu vuran digər azərbaycanlı Kənan adlı şəxs isə xəstəxanaya çatdırılıb.

Məlumata görə, hadisə borc üstündə baş verib.

Hadisədə şübhəli bilinən 3 nəfər saxlanılıb.

5
 Передача денег из рук в руки, фото из архива

Hökumətdən 190 manatlıq birdəfəlik ödəmə ilə bağlı açıqlama

4
(Yenilənib 18:40 19.01.2021)
Ötən il dekabrın 30-da ƏƏSMN tərəfindən ölkədə karantin rejiminin sərtləşdirilməsi ilə bağlı işsiz və karantin rejimində gəlirini itirən qeyri-formal işləyən aztəminatlılara cari ilin yaşayış minimumu həcmində birdəfəlik ödəmə vəsaitlərinin köçürülməsi başa çatdırılıb

BAKI, 19 yanvar - Sputnik. Nazirlər Kabineti işsiz və xüsusi karantin rejimində gəlirini itirən qeyri-formal işləyən şəxslərə birdəfəlik ödəmə (190 manat) vəsaitlərinin yanvar ayı üçün verilib-verilməyəcəyi ilə bağlı məsələyə aydınlıq gətirib.

Hökumətdən “Report”a bildirilib ki, 2020-ci il 14 dekabr saat 00:00-dan 2021-ci il 18 yanvar saat 00:00-dək bütün ölkə üzrə sərtləşdirilmiş xüsusi karantin rejimi tətbiq edilmışdi.

“Bu müddət bir ayı əhatə edib. Bununla əlaqədar olaraq da ötən il dekabrın 30-da Əmək və Əhalinin Sosial Müdafiəsi Nazirliyi tərəfindən ölkəmizdə xüsusi karantin rejiminin sərtləşdirilməsi ilə əlaqədar işsiz və xüsusi karantin rejimində gəlirini itirən qeyri-formal işləyən aztəminatlılara cari ilin yaşayış minimumu həcmində birdəfəlik ödəmə (190 manat) vəsaitlərinin köçürülməsi başa çatdırılıb”, - Nazirlər Kabinetdən vurğulanıb.

4