Rəşad Əhmədov

Kiçik yaşlarından pul yığır, misilsiz sərvəti var, amma milyonçu olmaq istəmir

931
(Yenilənib 10:16 09.04.2018)
"Məndə elə pullar var ki, qazanc məqsədilə kolleksiya yığanları çox maraqlandırır"

İlham Mustafa, Sputnik Azərbaycan

BAKI, 9 aprel — Sputnik. O, pul toplamağa hələ 5-ci sinifdə oxuyanda başlayıb, yaşıdları əlinə düşənin "başına tez daş salsalar" da, ona verilən pulu xərcləməyib, kənarda saxlayıb. Yaşadığı rayonun sərhəddə yerləşməsi isə, hələ kiçik yaşlarından onun xarici ölkə valyutalarını əldə etmək həvəsini daha da artırıb. Bu gün 36 yaşı olmasına baxmayaraq, o, hələ də hobbisini davam etdirir.

Söhbət Qazax şəhər sakini Rəşad Əhmədovdan gedir. Müxtəlif dövlətlərin pul vahidlərini toplayan Rəşad bu işi hobbi olaraq həyata keçirir. Hazırda onun kolleksiyasında 40-dək ölkənin 1000-dən çox metal, 400-dən artıq kağız pulu yer alır.

Hobbisi barədə Sputnik Azərbaycan-ın bölgə müxbirinə danışan kolleksiyaçı bir vaxtlar idmançı olaraq, hazırda isə məşqçi kimi getdiyi xarici ölkələrin yeni və qədim pul vahidlərini əldə etməyə çalışdığını deyir. Eyni zamanda dostlarının da ona çox kömək etdiyini bildirir.

"Uşaq vaxtı bu iş maraqlı gəldiyi üçün başladım, sonradan daha da həvəsim artdı. Xaricdə yaşayan qohumlar, dostlar da çox kömək edirlər. Hər hansı ölkəyə səfər edən dostlar həmin ölkələrin hazırda işlənən, yaxud qədimdə işlənmiş pul vahidlərini tapıb göndərirlər, beləliklə yavaş-yavaş kolleksiya da artır" — müsahibimiz danışır.

R.Əhmədov kolleksiyasındakı qəpikləri yığmaq üçün istifadə etdiyi albomları da ona Rusiyada yaşayan dostlarının alıb göndərdiyini deyir. Rəşadın kolleksiyasında, əsasən 18-ci əsrdən bəri buraxılan qəpiklər, həmçinin kolleksiyaçılarda rast gəlinən yubiley pulları, gümüş, mis və bürünc sikkələr yer alır.

Kolleksiyasında yer alan, çox az sayda çap edilmiş, bir çox amerikalıların evlərində suvenir kimi saxladığı 2 dollarlıq əsginas da maraq oyadır. Ölkəmizdə əlamətdar günlər, yubiley əsginasları və sikkələrinin olmaması haqqında danışan kolleksiyaçı Azərbaycanda da belə pulların buraxılmasını arzuladığını bildirir.

Kolleksiyaçı bəzən bir neçə qəpik əldə etmək üçün 100 manatdan çox pul xərclədiyini də deyir. Buna baxmayaraq, dəfələrlə istəyən olsa da, hələ heç bir eksponatını satmadığını bildirir.

"Məndə elə pullar var ki, qazanc məqsədilə kolleksiya yığanları çox maraqlandırır. Tez-tez zəng vururlar, tək-tək, yaxud hamısını satmağım üçün pul təklif edirlər, ancaq satmıram. Bunların hər biri mənim xatirəmdir", — deyir Rəşad Əhmədov.

931
Teqlər:
sikkə, Rəşad Əhmədov, əsginas, Qazax şəhəri, hobbi, qəpik, ölkə, pul, Rusiya
Əlaqədar
Musiqiçi qeyri-adi hərəkəti ilə tamaşaçıları heyrətləndirməyi bacardı
Azərbaycandakı qeyri-adi məkanda möcüzələr yaşanır
Şimal-qərb bölgəsində qeyri-adi hadisə: camaat gözlərinə inanmayıb - VİDEO
Bakıda qeyri-adi həyat tərzi keçirən 112 ailə: divarlarda ağac bitir, mətbəxdə çimirlər...