Tərtər şəhərində şəhid Nicat İsgəndərovun barelyefinin açılışı

Aprel şəhidinin xatirəsi əbədiləşdirildi FOTO

84
(Yenilənib 18:26 02.04.2018)
Tərtərdə aprel şəhidi Nicat İsgəndərovun adına küçə verildi

Musa Muradlı, Sputnik Azərbaycan

BAKI, 2 aprel — Sputnik. Aprel şəhidlərinin xatirəsini əbədiləşdirmək istiqamətində daha bir addım atılıb. Sputnik Azərbaycan-ın bölgə müxbiri xəbər verir ki, Tərtər şəhərindəki küçələrdən birinə şəhid Nicat İsgəndərovun adı verilib. Küçənin girişində şəhidin barelyefinin açılışı olub.

Tədbirdə şəhidin valideynləri, döyüş yoldaşları, Tərtər rayon İcra Hakimiyyətinin əməkdaşları, idarə, müəsisə, təşkilat rəhbərləri, rayon ictimaiyyətinin fəalları, QHT və KİV nümayəndələri iştirak edib.

Şəhidin atası Bəhruz İsgəndərovun çıxışı
© Sputnik / Musa Muradlı
Şəhidin atası Bəhruz İsgəndərovun çıxışı

Tədbirdə əvvəlcə söz şəhidin atası Bəhruz İsgəndərova verilib. Bəhruz İsgəndərov dövlətin diqqət və qayğısından razı olduğunu bildirib, tədbirdə iştirakına görə Tərtər Rayon İcra Hakimiyyətinin başçısı Müstəqim Məmmədova, ictimaiyyət nümayəndələrinə minnətdarlığını ifadə edib.

Tərtər məscidinin axundu Sadiq Cəfərov şəhidlərin adına salınan küçələr, yolların xalq arasında müqəddəs and yeri ola biləcəyini deyib.

Şəhidin döyüş yoldaşı Nemət Haqverdiyev aprelin 1-dən 2-nə keçən gecə erməni təxribat qruplarının hücumunu qətiyyətlə dəf etdiklərini, Nicat İsgəndərovun qəhramancasına şəhid olduğunu qeyd edib.

Daha sonra birinci Qarabağ müharibəsi vaxtı fəaliyyət göstərmiş Tərtər Batalyonunun komandiri olmuş Pənah Məmmədov, Nizami Məmmədov və başqaları çıxış edərək erməniləri dinc yolla torpaqlarımızdan çəkilməyə, əks təqdirdə Azərbaycan ordusunun tədbirləri sayəsində ərazilərimizi boşaltmalı olacaqlarını bildirdilər.

Tərtər Rayon İcra Hakimiyyətinin başçısı Müstəqim Məmmədov şəhid atası Bəhruz İsgəndərova, şəhid anası Maya İsgəndərovaya qəhrəman oğul böyütdüklərinə görə minnətdarlığını bildirib: "Aprelin 2-nə qədər Nicat İsgəndərov tək sizin oğlunuz idisə, həmin gündən sonra o, bütün Azərbaycan xalqının oğlu oldu".

 Tərtər şəhərində şəhid Nicat İsgəndərovun adına küçə
© Sputnik / Musa Muradlı
Tərtər şəhərində şəhid Nicat İsgəndərovun adına küçə

Barelyefin açılışından sonra tədbir Nicat İsgəndərovun xatirəsinə həsr olunmuş filmə baxışla davam etdirilib. Filmdə şəhidin həyat yolundan danışılıb, döyüşqabağı yaxınlarına göndərdiyi səsli telefon danışıqları səsləndirilib.

Şəhidin atası Bəhruz İsgəndərov və anası Maya İsgəndərova, döyüş yoldaşları Rafiq Tarıverdiyev, Röyal Qəhrəmanov, Mübariz Məmmədov Nicat İsgəndərovla bağlı keçirdikləri hissləri, xatirələrini danışıblar. Nicatın anası Maya İsgəndərova həmin müdhiş aprel günündə sarsıntı keçirənlərdən birinin də şəhidin nişanlısı Sevinc olduğunu söyləyib. Nicat İsgəndərov aprel döyüşləri ərəfəsində məzuniyyətə çıxmağı və toy hazırlıqlarına başlamaq barədə düşünürmüş.

Qeyd edək ki, Nicat Kazımov 1989-cu ildə anadan olub. 2006-cı ildə Tərtər rayon 1 saylı orta məktəbi bitirib. Hərbi xidmətdən sonra təhsilini gizirlər məktəbində davam etdirərək kəşfiyyatçı peşəsinə yiyələnib. Ölümündən sonra “İgidliyə görə” medalı ilə təltif olunub.

84
Teqlər:
Aprel şəhidimiz, barelyef, xatirə, küçə
Xırdalanda uşaqlar, arxiv şəkli

Uşaq ikili standartın çərçivəsində: internetdə bir fikir var, valideyndə başqası

7
(Yenilənib 22:30 23.11.2020)
Noyabrın 20-si Ümumdünya Uşaqlar Günüdür. BMT Baş Assambleyasının 1954-cu ildə qəbul etdiyi №836 saylı qətnaməsində bütün dövlətlərə uşaqların şərəfinə bu bayramın keçirilməsi tövsiyə olunub. Bu məqalə gec dərc olunsa da, həmin günə həsr olunub.

Post-sovet məkanında adətən iyunun 1-ni Uşaq Hüquqlarının Müdafiəsi Günü kimi qeyd etmək qəbul olunub. Dünyanın bir çox ölkəsində uşaq hüquqları, onların problemləri ilə bağlı bir çox normativ aktlar və mütərəqqi qanunlar mövcuddur. Bununla belə, uşaq problemi hələ də aktuallığını saxlamaqdadır.

Çində uşaq oğurluğu problemi olduqca aktualdır

Uşaq gününü qəbul etmək nəyə lazım idi? Müasir dünya olduqca çətin problemləri ortaya qoyur. Hər gün texnoloji yenilik gündəmə gəlməsi yeni problemləri yaradır. Hər yeni mərhələdə yeni çətinliyi dəf etmək, bu işlərin uşaqlara təsirini aradan qaldırmaq lazım gəlir. Dünya üzrə ümumi qanunvericilik olmadığına görə, bəzən hər ölkə üzrə anlaşılmaz problemləri müşahidə edirik.

Məsələn, dünyanın ən qüdrətli ölkələrindən biri olan Çində uşaq oğurluğu problemi olduqca aktualdır. 1970-2015-ci illərdə ölkədə mövcud olan bir uşaq siyasəti böyük cinayətkar qrupların yaranmasına şərait yaradıb. Uşağı olmayan ailələr oğurluq yolla qaçırılmış uşaqları almaqla arzularına çatarmışlar. Əsil valideynlərin isə bəxtinə illərlə itirilmiş övladı axtarmaq qalırmış. Hətta bu gün də Çində minlərlə uşağın oğurlanması, kənara satılması, uşaq əməyinin istismarı, uşaqların cinsi istismarına rast gəlinir. Uşaqlara şikəst edib dilənçiliyə məcbur edən xüsusi qruplar da var. Maraqlı hallara da rast gəlinir.

İki yaşında itmiş Mao İn yalnız 30 il sonra öz valideynlərinə qovuşa bilib. 1988-ci ildə onu oğurlayıb başqa bir ailəyə satıblar. Uşağın anası Li Szinçji və atası Mao Szinçji övladlarını tapmaq üçün minlərlə elan yerləşdirib, çox miqdarda vəsait xərcləyiblər. Ana hətta öz işini tərk edərək həyatını oğlunun axtarışına sərf edib. İllərlə televiziya ekranından danışan Li heç vaxt ümidini itirmədiyini deyib. 2007-ci ildə övladlarını itirmiş valideynlərin qrupuna da qoşulan Mao və Li 2020-ci ildə övladlarına qoşula biliblər. Başqa regionda tapılan 34 yaşlı Qu Ninin DNT analizi verdikdən sonra hər şey aşkarlanıb.

Bu uşaqların nə təhsili var, nə də gələcəyi

Əslində belə hallar elə də tez-tez baş vermir, itirilmiş övladı tapmaq hər valideynə qismət olmur. Uşaq əməyinin istismarı, uşaqların təhsildən kənarda qalması, kasıblıq ucbatından uşaqların sağlamlığı itirməsi hallarına daha çox rast gəlinir. Afrikanın elə ölkələri var, orada elə uşaq özünü tanıyandan zibildə eşələnməklə məşğuldur. Yəni uşaq elə zibillikdə doğulur, böyüdükdən sonra orada pula satıla biləcək materialları toplayıb təhvil verir, min cür xəstəlik taparaq tez də həyatdan gedir. Bu uşaqların nə təhsili var, nə də gələcəyi.

Ekstremal halları kənara qoysaq, elə adi günümüzdə də xeyli çətinlik var. Ötən əsrin 70-ci illərində orta məktəbin 1-ci sinfinə gedən uşağın 7 yaşı olmalı idi. 6 yaşında uşağı götürməzdilər. Hazırda yaş həddi 6-ya endirilib, hətta ilin sonunda 6 yaşı tamam olanlar artıq sentyabrda məktəbə gedə bilərlər. 5 yaşlı uşaq artıq tədris prosesinə qoşulmalıdır. Özü də bu müddətdən öncə bu günün uşaqları həm bağça sistemindən keçir, həm də məktəbəqədər hazırlıq prosesindən.

Valideynin uşağına təsir etmək imkanı gün gündən azalır

Bu günün uşağı faktiki uşaqlığını keçirə bilmir. Elə doğulduğu gündən ətrafında onlarla texniki vasitə ilə üzləşir. 100-lərlə kanalı və internetə çıxışı olan televizor, müxtəlif növ planşet, smartfon, oyun qurğuları uşaq həyatının ayrılmaz hissəsinə çevrilir. Uşaq dəhşət dərəcədə yüklənir. Özünə qapanan, autizm xəstəliyinə düçar olan uşaqlarla yanaşı xeyli sayda hiperaktiv uşaqlar da peyda olub. Kimi telefonu əlinə alıb özünə qapanır, kimi də mənasız videoya baxıb ev-eşiyi dağıdır.

Valideynin uşağına təsir etmək imkanı gün gündən azalır. Uşağı daha çox internet resursları tərbiyə edir. Başqa insanların, digər millətlərin davranış modelləri valideynin dediyindən daha çox əhəmiyyət kəsb etməyə başlayır. İnformasiya kanalları çoxalıb deyə nəyinsə qarşısını da almaq olmur. Valideynin texniki bacarığı da bəzən uşağın bildiyindən zəif olur. Zet nəslinin nümayəndələri anında istənilən qurğudan baş çıxarır, özlərinə maraqla olan məlumatı hər yerdən tapa bilirlər.

Azərbaycanda nəsillər arasında sözün əsl mənasında bir ciddi anlaşılmazlıq var. Milli-mental dəyərlər aşılanır, bəzən bu yöndə olan fikirlər uşaqda gülüş doğurur. Muğamat dinləmək əvəzinə uşaq məşhur bloqçunun videosunu izləməyə, dolma-plov yerinə isə hamburger yeməyə üstünlük verir.

Bir-birini anlamamağın səbəblərindən biri də patriarxal cəmiyyətə məxsus ata kultunun olmasındən, uşağa bir şəxsiyyət kimi yanaşmamaqdan irəli gəlir. Uşaqla danışmaq, onun problemlərini anlamaq əvəzinə elə “mən dedim, deməli belə olacaq” fikrinə üstünlük verilir. Zaman isə dəyişib, bu günün valideyni çox zaman uşağı üçün layiqli nümunə ola bilmir, bir şeyi deyir, amma əksinə hərəkət edir. Telefonla oynamağı qadağan edir, amma səbəbini demir. Özü qazlı rəngli içkiyə üstünlük verir, amma övladına deyir, olmaz. Uşaq daim ailədaxili ikili standartların çərçivəsində yaşamalı olur. İnternetdə bir fikir var, valideynin beynində başqası.

Valideyn də uşaq üçün ən əhəmiyyətli nümunədir

Valideyn-uşaq münasibətlərini dünyanın bir çox ölkəsində ciddi araşdırırlar. Tez-tez hər hansı bir tədqiqatın nəticəsi də açıqlanır. Yüzlərlə kitab, təlimat yaradılıb. Nəyisə bilmirsənsə, uşaq psixoloqundan tutmuş ən müxtəlif növ mütəxəssisə müraciət edə bilərsən. Ölkə var, uşağa fastvud yeməyi qətiyyətlə qadağan edilib. Hər dərsdə onun ziyanından danışırlar. Baxırsan, belə qida satılan şəbəkəyə turistdən başqa heç kim getmir. Valideyn də uşaq üçün ən əhəmiyyətli nümunədir.

Bir ölkə, toplum olaraq yeni dönəmdə “uşaqlara münasibətdə necə davranmalıyıq” sualına cavab axtarmalıyıq. Uşaq valideyndən çox zəmanəsinə bənzəyir deyə, valideyn zamanın nəbzini tutmağı bacarmalı, uşağa irəlidə gedən bir flaqman kimi yol göstərməlidir.

7
Teqlər:
uşaqlar
Dilarə Kazımova, arxiv şəkli

"Avroviziya" mahnı müsabiqəsinin iştirakçısından "Azərbaycanım" - VİDEO

11
Bir neçə həftə öncə ermənilərin şikayəti nəticəsində "Youtube" kanalı bağlanan ifaçı buna məhəl qoymayaraq sosial mediada yeni işini paylaşıb.

BAKI, 23 noyabr — Sputnik. Müğənni Dilarə Kazımova vətənimizin qələbə qazanması münasibətilə yeni mahnısı "Azərbaycanım"ı təqdim edib.

Sputnik Azərbaycan xəbər verir ki, bir neçə həftə öncə ermənilərin şikayəti nəticəsində "Youtube" kanalı bağlanan ifaçı buna məhəl qoymayaraq yeni işini özünün "Instagram" səhifəsində paylaşıb.

Посмотреть эту публикацию в Instagram

Публикация от D I L A R A (@dilarakazimova)

Musiqisi Faiq Sücəddinov, sözləri Baba Vəziroğluya aid olan iş barədə Dilarə fikirlərini belə ifadə edib: "İnformasiya cəbhəsində vuruşanda eyni zamanda mahnı ilə dəstək olmaq istəyirdim. Öz töhfəmi musiqi ilə, səsimlə vermək niyyətində idim. Faiq Sücəddinov zəng etdi ki, sənin səsinə uyğun mahnı var. Mən çox bəyəndim. Bu mahnının sözləri çox gözəldir, inam və ümid verəndir. İşğaldan azad olunmuş torpaqlara həyatın, baharın gəlməsini tərənnüm edir. Stimul verir. Həmin torpaqların əvvəlki halından daha gözəl olacağından bəhs edir".

D.Kazımova mahnı üçün kamera qarşısına da keçib. O, Gülnarə Xəlilovanın "Xalçaların dili" kolleksiyasından libas geyinib.

Qeyd edək ki, mahnının aranjmanı Camal Qurbanov, miks və soundu isə Samir Əsədova məxsusdur.

11
Teqlər:
müsabiqə, Dilarə Kazımova, qələbə, mahnı
Mövzu:
Azərbaycan və Ermənistan arasında müharibə