Yeni yaşayış binası

Mənzil almaq istəyənlər iyun ayınadək ehtiyatlı olsunlar, pulları "bata" bilər

3236
(Yenilənib 13:41 27.03.2018)
Hüquqşünas: "Əgər mənzil almaq fikriniz varsa, çalışın, iyundan sonra həyata keçirin"

İradə Cəlil, Sputnik Azərbaycan

BAKI, 22 mart — Sputnik. "Şəhərsalma və çoxmərtəbəli binaların tikintisi, söküntüsü, kompensasiyaların verilməsi barədə müraciətlərdə 28,8 faiz artım olub". Sputnik Azərbaycan xəbər verir ki, bu sözləri ötən ay AZƏRTAC-a müsahibəsində Prezident Administrasiyasının Sənədlərlə və vətəndaşların müraciətləri ilə iş şöbəsinin müdiri Süleyman İsmayılov deyib.

O, qeyd edib ki, ötən il Prezident Administrasiyasına il ərzində daxil olan müraciətlərdə, əsasən, yaşayış binalarının tikintisində norma və qaydalara riayət edilməməsi, təhlükəsizlik qaydalarına əməl olunmaması, tikintilərin plansız aparılması, bəzən kompensasiyaların miqdarının sakinlərlə razılaşdırılmadan tikinti işlərinə başlanılması, yeni yaşayış binalarının dövlət komissiyası tərəfindən qəbul edilməməsi, bu səbəbdən mənzillərin özəlləşdirilməsində və qazla təminatında çətinliklər yaranması məsələlərinə toxunulur.

Müraciətlərdə ən çox "Evrostroy-SS", "FVS İnşaat", "Murad M.S.", "İdeal-İ İnşaat", "Hermes-S", "Brend Palace", "Meqa City Holdinq", "Abşeron LTD 2013", "İnam-İnşaat-555", "Xudafərin", "Əzizbəy-KM", "Baku Pearl Residence", "Caspian Park", "Fuad LTD", "İron İnşaat", "Mahal", "Elite City", "Avro Qrand", "İnşaat Konstruksiyaları", "Birlik-İnşaat", "Hasil", "AENT-E", "MVV Verus Praedium", "Yüksəliş C", "Rifah-Plaza" MMC-lər və "Kristal Abşeron", "İlin Dörd Fəsli", "Badu-Kubə", "Yeni Yasamal", "Şərur", "Dağlar", "İnteks", "Çənlibel", "Ayla", "Mars", "Fateh-N" MTK tikinti şirkətlərinin fəaliyyətindən şikayət edilir.

Vətəndaşları maraqlandıran digər bir problem isə tikinti şirkətlərinin iflasa uğrama ehtimalıdır. Maraqlıdır, etibar edərək mənzil aldığımız tikinti şirkəti iflasa uğrayarsa, vətəndaşa dəymiş zərəri kim ödəyəcək? Sputnik Azərbaycan bu suala bir neçə ekspertdən cavab almağa çalışıb.

Məsələyə münasibət bildirən tikinti sahəsi üzrə ekspert Elnur Fərzəliyev əvvəlcə bu problemin beynəlxalq təcrübədə necə həll olunduğuna aydınlıq gətirib. Bildirib ki, inkişaf etmiş əksər ölkələrdə bina inşa edən tikinti şirkətlərinə dövlətin münasibəti tam fərqlidir. Onun sözlərinə görə, bina inşa edən şirkət tikintiyə başlamazdan əvvəl binaya cəkiləcək bütün maliyyə xərclərinin smetasını tutaraq aydiyyatı qurumlara təqdim edir.

"Bina tikintisinə cəkiləcək xərclər əvvəlcədən şirkətin şəxsi bank hesabında olmalı, yaxud banklar tərəfindən həmin şirkətə kredit ayrılmalıdır. Şirkətin həm maliyyə büdcəsi, həm texniki iş təcrübəsi yoxlanıldıqdan sonra tikintiyə başlamağa icazə verilir. Bu, strateji sahə olduğundan daim dövlət qurumları tərəfindən nəzarətdə saxlanılır. Bizdəki kimi tikintiyə camaatın pulu ilə başlayıb, sonradan iflasa uğramaq variantı olmur", — ekspert əlavə edib.

Fərzəliyev, həmçinin qeyd edib ki, tikinti şirkətlərinin iflasa uğradığı halda vətəndaşa zərərin dəyməməsi üçün vətəndaşların evləri öncədən qiymətləndirilməli və sığorta edilməlidir: "Belə olan təqdirdə, şirkət iflasa uğradığı zaman dəyən zərəri sığorta şirkətləri ödəməlidir".

"Lakin bir çox binalar var ki, uzun illərdir inşası tamamlanmayıb, yarımçıq vəziyyətdə qalıb. Zərərçəkmiş vətəndaşlarsa bu hallarda hara müraciət edəcəklərini, kimdən kömək diləyəcəklərini bilmirlər. İflasa uğramış şirkətlərin yarımçıq qalmış işlərini isə təsadüfi hallarda başqa şirkətlər tamamlayaraq təhvil verir", — ekspert deyib.

E.Fərzəliyevin qənaətincə, gələcəkdə vətəndaşların bu cür hallarla üzləşməməsi üçün bu sahədəki dünya praktikasından faydalanmaq, onu ölkəmizdə də tətbiq etmək lazımdır: "Ən vacib olaraq müqavilə ilə olan alqı-satqılar notarial qaydada aparılmalı, vətəndaşın mənzil üçün ödədiyi pulu notarius təsdiq etməli, hər bir mənzil sığortalanmalı və hər bir mənzil üçün ünvan verilməlidir".

Əmlak eksperti Ramil Osmanlı da bu problemlə bağlı fikirlərini bildirib. Onun sözlərinə görə, tikinti şirkətləri iki formada — Mənzil Tikinti Kooperativi (MTK) və Məhdud Məsuliyyətli Cəmiyyət (MMC) kimi fəaliyyət göstərir. Belə problem yarananda MMC kimi fəaliyyət göstərən tikinti şirkətləri heç bir məsuliyyət daşımır.

R.Osmanlı bildirib ki, MMC müflis olarsa, müflis olduqdan sonrakı addımlar MMC-nin rəhbəri və binada mənzil alan sakinlərlə məhkəmə qaydasında həll oluna bilər: "Məsələdə dələduzluq, cinayət faktı aşkar edilməyibsə, bütün mübahisələr mülki qaydadırsa, istehlakçılara dəymiş zərər şəxsin digər əmlaklarına yönləndirilə bilər".

Ekspert əlavə edib ki, əgər müflis olmuş tikinti şirkəti MTK-dırsa, burada müflis olma hər bir payçının payına düşür: "Çünki MTK-larda hər kəs eyni hüquqa malikdir. Yəni baş verən prosesdə hər bir payçı iştirak edir".

R.Osmanlı MTK-ların müflis olması ilə bağlı qanunvericilikdə heç bir maddəyə rast gəlmədiyini vurğulayıb: "MTK müflis olarsa, payçılara kompensasiya ödənilməlidirmi? Kim ödəməlidir? Bunun hər hansı hüquqi qaydası varmı? Bu, bir qədər qəliz məsələdir. Çünki MTK-nı təsis edənlərlə digər payçıların hüququ eynidir. Bütün qərarlar, işlər MTK üzvlərinə hesabat xarakterində çatdırılır".

"MTK-nın müflis olması vəziyyəti qəlizləşdirir. Ola bilər ki, bu, təsisçilərin məsuliyyətsizliyi üzündən olsun. Bu zaman payçılar təsisçilərə qarşı hər hansı bir iddia qaldırırsa, bunu faktlarla sübut etməlidir. Sübut etməlidir ki, onlar bu prosesdə iştirak etməyib, kənarda qalıb və təsisçilər onların payını mənimsəyib", — deyə müsahibimiz vurğulayıb.

Ekspert deyib ki, son illərdə 10-a yaxın MTK rəhbəri bu şəkildə həbs edilib: "Amma həbs də çıxış yolu deyil. Çünki onlar dələduzluğa görə, 10-15 il həbs edilir və istehlakçıya, payçıya dəyən zərər ödənilmir. Bina da yarımçıq qalır".

Osmanov yeni binalarda mənzillərin satışı ilə bağlı ölkə başçısının sərəncam imzaladığını da xatırladıb: "MTK təsisçiləri yeni tikintiyə başlayarkən reyestr aparılmalıdır. Satış zamanı vəsait tam ödənilməməlidir. Vəsaitin ödənilməsi ilə bağlı konkret müddəalar mövcuddur. Tikinti başlayandan, bina tam təhvil verilənə qədər binanın pulu faizlərə bölünərək ödənilməlidir".

Həmsöhbətimiz qeyd edib ki, bundan başqa, Daşınmaz Əmlakın Dövlət Reyestri Xidməti tərəfindən ilkin qeydiyyat həyata keçirilir: "Vətəndaş və şirkət arasında bütün müqavilələr notarial qaydada həyata keçiriləcək. Və bunun reyestri Daşınmaz Əmlakın Dövlət Reyestri Xidməti tərəfindən qeydə alınacaq. Düzdür, bu məsəldən az şirkətlər xəbərdardır. Yəqin ki, yaxın zamanlarda bununla bağlı inzibati nəzarət gücləndiriləcək. Qanun pozuntusu aşkar edilən MTK-lara qarşı müəyyən sanksiyalar həyata keçiriləcək. Məncə, bu ilin ortalarına qədər bu rəsmiləşdiriləcək və nizama salınacaq".

Ekspert hesab edir ki, bu günə qədər olan problemlər isə, cinayət tərkibi olmadığı halda məhkəmələrdə mülki qaydada həll olunmalıdır: "Bura dəymiş zərərin ödənilməsi və ya vətəndaşa dəymiş zərərin müqabilindən mənzillərin verilməsi və s. daxildir. Yox, əgər cinayət tərkibi yaradan hal varsa, məsələ başqa istiqamət alır və dəymiş zərərin ödənilməsi ikincisi plana keçir".

Məsələyə münasibət bildirən hüquqşünas Asif Abdullayev isə qeyd edib ki, bu günə qədər qüvvədə olan qanunvericiliyə görə, tikinti şirkətinin müflisləşdiyi, qoyub qaçdığı, aldatdığı halda vətəndaş heç nədən sığortalanmır: "Yəni qoyduğu vəsaitin batma ehtimalı böyükdür. Əgər tikinti şirkətinin rəhbəri vətəndaşların pulunu mənimsəyərək qaçıbsa, bu iş cinayət tərkibi daşıyır və o şəxs ən yaxşı halda həbs edilə bilər".

"Təcrübə göstərir ki, belə şəxslər həbs olunsalar belə, pulu qaytarmırlar. Əgər tikinti şirkətinin rəhbəri aldatmayıbsa, həqiqətən müflis olubsa, vətəndaş mülki qaydada məhkəməyə müraciət edərək pulunu tələb edə bilər. Məhkəmə də pulun qaytarılması üçün qərar verə bilər. Amma bunun icrası çətindir. Əgər şəxsin pulu, əmlakı yoxdursa, heç bir imkanı yoxdursa, pulun qaytarılması real deyil".

"Mən demirəm ki, aldanan vətəndaş başına gələnlə razılaşmalıdır. Xeyr. Bu vətəndaşlar öz haqqını tələb etməlidir. Amma mən məsələnin real tərəfini deyirəm", — deyən A.Abdullayev vurğulayıb ki, vətəndaş mənzil alarkən tikinti şirkətinin reputasiyasına fikir verməlidir.

Hüquqşünasın sözlərinə görə, cari il iyun 1-dən etibarən Mülki Məcəllədə dəyişiklik qüvvəyə minəcək və bu dəyişikliyə əsasən, vətəndaşın mülkiyyət hüququ əvvəlcədən qeydiyyata alınacaq: "Artıq yeni tikilidən ev aldığınız zaman onun dəyəri bina istifadəyə verilənə qədər mərhələli şəkildə ödəniləcək. Bu da vətəndaşların hüquqlarının qorunmasına hesablanıb".

Ekspert onu da qeyd edib ki, yeni qaydaya əsasən, binanın tikildiyi ərazidə də vətəndaşın torpaq payı olacaq: "Buna görə də, əgər mənzil almaq fikriniz varsa, çalışın, iyundan sonra həyata keçirin".

3236
Teqlər:
Elnur Fərzəliyev, MMC, Asif Abdullayev, hüquqşünas, iflas, Sputnik Azərbaycan, müflis, MTK, Ramil Osmanlı, tikinti, vətəndaş, bina, əmlak, mənzil, pul, ekspert, qanun, şirkət, ev
Əlaqədar
Prezidentdən vətəndaşlara güzəştli mənzillə bağlı vacib fərman
Yeni binalarda mənzil alanlar üçün müjdə
İkinci binadakı mənzillərin açarları sahiblərinə təqdim edildi
Proses başladı: Bir mənzili 3-4 nəfərə satan şirkət rəhbəri tutuldu
Artıq bir mənzilin bir neçə sahibi olmayacaq
Təqaüdçü qadın, arxiv şəkli

Pensiyaçıların həsrətlə gözlədiyi xəbər gəldi - artımların vaxt veriləcəyi açıqlandı

31
(Yenilənib 13:57 20.01.2021)
Pensiyaların 2021-ci ilin 1 yanvar tarixinə olan məbləği həmin göstəriciyə uyğun şəkildə və cari ilin əvvəlindən indeksləşdirilərək artırılacaq.

Zülfiyyə Quluyeva, Sputnik Azərbaycan

BAKI, 20 yanvar — Sputnik. Bu ildən əmək pensiyalarının orta məbləği 338 manat, yaşa görə pensiyaların məbləği isə 370 manat olacaq. 2021-ci ilin yanvar ayı üzrə pensiyalar ödənilsə də, pensiyalara artım hesablanmayıb. Sputnik Azərbaycan pensiyaların artımının nə vaxtdan ödəniləcəyini araşdırıb.

Əmək və Əhalinin Sosial Müdafiəsi Nazirliyindən Sputnik Azərbaycan-a bildirilib ki, Dövlət Statistika Komitəsindən orta aylıq nominal əmək haqqına dair məlumatlar nazirliyə göndərildikdən və Prezidentin müvafiq sərəncamından sonra pensiyalar yanvar ayının artımı daxil olmaqla ödəniləcək. Nazirlik bu məsələdə icraedici funksiya daşıyır.

Dövlət Statistika Komitəsindən Sputnik Azərbaycan-ın sorğusuna verilən cavabda isə bildirilir ki, 2020-ci il üzrə istehlak qiymətləri indeksinə dair məlumatlar Əmək və Əhalinin Sosial Müdafiəsi Nazirliyinə artıq göndərilib:

"Orta aylıq nominal əmək haqqına dair məlumatlar isə Dövlət Statistika Komitəsinin Statistik işlər proqramına uyğun olaraq cari ilin fevral ayının ilk ongünlüyündə təqdim ediləcək".

Qeyd edək ki, "Əmək pensiyaları haqqında" Qanunda əmək pensiyalarının ildə bir dəfə ölkə üzrə orta aylıq nominal əməkhaqqının illik artım tempinə uyğun olaraq indeksləşdirilməsi nəzərdə tutulur. Cari il üçün pensiyaların indeksləşdirilərək artırılması da Dövlət Statistika Komitəsindən Əmək və Əhalinin Sosial Müdafiəsi Nazirliyinə təqdim olunacaq rəsmi məlumatda 2020-ci il üzrə ölkəmizdə orta aylıq nominal əməkhaqqının artım tempi göstəricisi əsasında həyata keçiriləcək. Pensiyaların 2021-ci ilin 1 yanvar tarixinə olan məbləği həmin göstəriciyə uyğun şəkildə və cari ilin əvvəlindən indeksləşdirilərək artırılacaq.

31
Məktəblərin birində, arxiv şəkli

Bu şagirdlərin summativ qiymətləndirilməsi aparılmayacaq

22
(Yenilənib 12:52 20.01.2021)
II-XI sinif şagirdlərinin qiymətləndirilməsi fənni tədris edən müəllim tərəfindən distant formada aparılır.

BAKI, 20 yanvar — Sputnik. Birinci sinif şagirdlərinin summativ qiymətləndirilməsi aparılmayacaq.

Sputnik Azərbaycan-ın məlumatına görə bu, Təhsil Nazirliyinin "Xüsusi karantin rejimi dövründə ümumi təhsil müəssisələrində təhsilalanların attestasiyasının (məktəbdaxili qiymətləndirmənin) aparılmasının müvəqqəti qaydaları"nda bildirilib.

II-XI sinif şagirdlərinin qiymətləndirilməsi fənni tədris edən müəllim tərəfindən distant formada aparılır. Qiymətləndirmə 100 ballıq şkala ilə ölçülür.

22
Teqlər:
Azərbaycan Təhsil Nazirliyi, Təhsil Nazirliyi
Qubada 20 yanvar faciəsinin 31-cü il dönümü ilə əlaqədar şəhidlərin məzarları ziyarət olunub

Qubada qar yağır, sakinlər isə şəhidlər xiyabanına axışır

0
(Yenilənib 14:34 20.01.2021)
Rayon ictimaiyyəti 20 Yanvar faciəsinin 31-ci ildönümü ilə əlaqədar həm 20 Yanvar şəhidlərinin, həm Birinci Qarabağ müharibəsi şəhidlərinin, həm də Vətən Müharibəsi şəhidlərinin məzarlarını ziyarət ediblər.

 

Leyla Abdullayeva, Sputnik Azərbaycan

BAKI, 20 yanvar — Sputnik. Bu gün bütün bölgələrdə olduğu kimi Qubada da şəhidlər böyük ehtiramla yad edilib. Güclü qar yağmasına baxmayaraq, şəhidlər xiyabanına böyük insan axını olub.

Ziyarət edənlər arasında Quba Rayon İcra Hakimiyyətinin başçısı Ziyəddin Əliyev, rayon rəsmiləri də iştirak edib. Rayon ictimaiyyəti 20 Yanvar faciəsinin 31-ci ildönümü ilə əlaqədar həm 20 Yanvar şəhidlərinin, həm Birinci Qarabağ müharibəsi şəhidlərinin, həm də Vətən Müharibəsi şəhidlərinin məzarlarını ziyarət ediblər.

  • Qubada 20 yanvar faciəsinin 31-cü il dönümü ilə əlaqədar şəhidlərin məzarları ziyarət olunub
    © Sputnik / Leyla Abdullayeva
  • Qubada 20 yanvar faciəsinin 31-cü il dönümü ilə əlaqədar şəhidlərin məzarları ziyarət olunub
    © Sputnik / Leyla Abdullayeva
  • Qubada 20 yanvar faciəsinin 31-cü il dönümü ilə əlaqədar şəhidlərin məzarları ziyarət olunub
    © Sputnik / Leyla Abdullayeva
1 / 3
© Sputnik / Leyla Abdullayeva
Qubada 20 yanvar faciəsinin 31-cü il dönümü ilə əlaqədar şəhidlərin məzarları ziyarət olunub

Onu da qeyd edək ki, şəhidləri yad etmək üçün Qubanın kəndlərindən də vətəndaşlar Şəhidlər xiyabanına üz tutublar.

0